Sinasabi ng ilan na ang mundong ito ay higit pa sa isang simpleng pagkakataon.

Na ang pag-iral ng bawat mga bagay ay disenyong ihinugis ng isang dakilang kamay. Na ang mundo'y isang obra maestra na walang kapantay.

Tinatawag ng mga mortal ang manlilikha bilang si Bathala.

Si Bathala ang pinagmulan ng lahat. Binigyang buhay niya ang mga alikabok na bumubuo sa kalawakan, ang mga burol na lumalampas sa paningin, ang mga luntiang halaman, makukulay na paruparo, at pati na ang mga mababangis na hayop.

At ang pinakapaborito Niya sa lahat ng Kanyang mga nilikha, ang kawangis Niyang mga tao.

At mula sa mga tao ay nilikha Niya ang Hiwaga.

Mula sa tao isinilang ang Hiwaga. Sa kailaliman ng kanilang isip, sa bawat hinahon at pagsiklab ng kanilang damdamin, ay namumukadkad ang isang natatanging hiraya—na siyang dahilan ng pagkalikha ng lahat.

Mula sa pag-asa ng mga tao ay isinilang ang mga diwata. Taglay ang liwanag na katulad ng araw, kagaya ng mga bulaklak na sumisibol, yumayabong na tulad ng mga halaman. Ang kanilang pag-iral ay tanda ng pag-asa sa gitna ng kadiliman.

Mula naman sa kanilang mga luha, lumitaw ang mga sirena. Ang unang buntot ng mga ito ay hinabi mula sa pilikmatang napigtas sa hinagpis, at ang kanilang mga awitin ay likha ng pagtangis. Ang kanilang natatanging kagandahan ay lulan ng kapighatian, tanda na sa gitna ng pagluluksa ay may nabubuo pa ring mahiwaga.

Mula naman sa kanilang matatayog na pangarap ay tumindig ang mga higante. Na kagaya ng mataas na hangarin ng tao ay kayang abutin ang mga ulap. Sila'y nananahan sa mga panaginip at nahihimlay sa mga pangarap na hindi natutupad.

Ang kanilang katandaan ay naging binhi ng mga tikbalang, may biyayang tulin na kasingbilis ng pagtakbo ng oras at taglay ang karunungang angkin ng pinakamatandang tao. Hawak nila ang panahon, inilalahad ang mga bagong kwento ng mundo.

At sa takot naman ng mga tao ay isinilang ang mga nilalang ng dilim. Ang mga tiyanak at mga busaw, ang mga naunang hukluban at mambabarang. Niyayapos ang mga ito ng gabi at inuuyayi ng mga bangungot. Nanginginaan sa mga galit, nag-aapoy at nasusunog. Taglay ang katangiang tumupok at sumira ng kahit ano. Ang pumatay—ang kumitil ng buhay.

Mula sa mga tao ay nilikha ni Bathala ang bawat nilalang ng Hiwaga. Sa kailaliman ng kanilang mga isip, sa bawat hinahon at pagsiklab ng kanilang mga damdamin. Sa kanilang kaluluwa nananahan ang lihim ng paglikha.

Umiiral ang mga nilalang na ito upang salaminin ang kahiwagaan ng mga tao.

Oo, mahiwaga ang mga tao.

Sila ang tunay na hiwaga.

***