O nimfë përrallore, vashëz imcake bukurane e regjur, pse s'më flet?

Çeli buzët e tua si petalet e ndonjë trëndafili vjeshtarak lagur nga vesa mëngjesore e më gëzo me dy a tri fjalë të tuat. Ah, ç'ëndërr e realizuar të shikoj teksa lëvizin ethshëm ato buzë!

Lere zërin tënd si cicërima e ndonë bilbili pranveror të ngrohë çdo qelizë në trupin tim e të jetoj larg acarit. Ato fjalë a shigjeta të tuat, të dalin nga thellësia jote do më mbushin çdo boshllëk në shpirt!

Leri prekjet më të nxehta se dielli veror mbi lëkurën time, të digjem njëherë e mirë në flakët e përjetshme. Le të bëhem shkrumb e hi, le të përcëllohem!

O çupëz e ngjyer në aromë dashurie, ëngjëll shkëputur nga qielli kaltërosh, ky shpirt i imi etur për dashuri të kërkon parreshtur ty, kërkon çupëlinën e vet.

O zanë! Zanë e bukur shkëputur nga përrallat e moçme, fali pakëz magji këtij njeriu të mjerë, jepi pakëz jetë,pluhur të mbinatyrshëm që të buzëqeshë!

O simbol force, fortese e gurtë prej mishi e kockash! Sa plumba e topa ke duruar! Sa herë ke menduar se je rrënuar, por jo. Përsëri qëndron kryelartë mbi çdo stuhi e dhimbje.

O shtojzovalle legjendash! Je aq e rrallë sa nëpër mitet e vjetra, thuajse e pavërtetë. Ja ke dalë që të tjerët të fillojnë të dyshojnë ekzistencën tënde.

O driti qiriri! Je shpresë e rreze drite për çdo shpirt të zaptuara nga errësira.

O qenie humane e pakrahasueshme. Sa dashuri fal, sa njerëz do, sa sende a dukuri.

O krijesë përrallash! Më duaj dhe mua.

Lerma dhe mua shpirtin të më shkrihet ndë të ëmblat fllade të dashurisë që shpirti jot kundërrmon. Lerma dhe mua shpirtin të më ndihet i dashuruar.

Nuk doja të të dashuroja, por nuk të zgjodha unë, të zgjodhi kjo zemër e imja lozonjare që pa më pyetur vendosi.

Unë i mjeri! Si ta ble dashurinë e një shpirti kristal të pastër, të një zemre borë dhjetori të bardhë?

Kam pasuri, kam mall e çdo gjë. Mund të kem ç'të dua e kë të dua ndër duar, por vetëm ty jo moj dritëz hëne! 

Ty jo e ty të dua!

I përulet kjo e imja zemrës asaj tëndes, i përgjërohet ta dashurojë, po a mund të kërkohet dashuria?

Dashuria nuk kërkohet, dashuria ndihet e jetohet.

Dashuria dashurohet!