#100words

Subsob ang ulo ni Anthony sa lukot na papel habang inaalala sa isip niya ang nakita niya kanina nang mapadaan siya sa eskwelahan. Gamit ang pudpod na lapis na napulot niya, maingat niyang iginuhit sa papel ang mga letra na ayon sa guro ay katumbas ng pangalan niya.

"Anthony," nakangiting usal niya nang sa wakas ay maisulat niya ang kanyang pangalan. Ang sabi ni Mg Boy, ang amo nila sa dyank shap, walang lugar sa mundo ang tulad niyang walang alam.

Ngunit, alam na niya ngayong isulat ang kanyang pangalan. Sapat na ba iyon upang 'di na siya tawaging mangmang?