#100words

"'Yong chicken sandwich?" tanong ni Mama.

"Nasa lunch bag na po," sagot ko.

" 'Yong pancit palabok?"

"Nasa picnic bag po," ako ulit.

"Eh yung-"

Hinakawan ko si Mama, aligaga pa rin siya gaya tuwing nagde-date sila ni Papa.

"Ayos na lahat, Ma. Baba na po kayo. Kanina pa naghihintay si Papa."

Ngumiti lang siya bago bumaba ng kotse. Tahimik naming nilakad ang mahabang daan patungo kay Papa. Binitbit ko lahat nang inihanda ni Mama sa araw na 'yon.

Ilang sandali pa, "Happy anniversary, mahal" sabi ni Mama habang hinahaplos ang marmol kung saan nakaukit ang pangalan ni Papa.