PILOT EPISODE

FADE IN

EXT. MANSION DE BAROSA. UMAGA.

Makikita ang isang manor na magiting na nakatindig mula pa noong labingwalong siglo, panahon ng mga Espanyol. Bakas ang katandaan ng lumang mansyon ngunit hindi pa rin kumukupas ang kapangyarihan na taglay ng mga nag mamay-ari nito, ang mga Barosa.

Sa entrada, sopistikadang nakatayo ang isang Donya, ang asawa ng kasalukuyang Primero Propietor na nangangahulugang "The Chief Owner" ng buong Hacienda Barosa, na walang iba kundi si Donya Alizandra Bettina Lisano-Barosa. Suot ang kanyang shades, pati na rin ang floppy hat na bagay sa kanyang pixie haircut, nagpapaypay siya dahil kakagaling lang niya sa pangangabayo bilang bahagi ng kanyang daily routine sa malawak na bakuran ng kanilang manor.

Nasa mid-50's na si Donya Bettina ngunit hindi pa rin natitinag ang mataas niyang kilay at prestihiyosang kagandahan na pinamana pa ng mga Mestizong Intsik nilang ninuno, ang mga Lisano.

Pinagmamasdan ni Donya Bettina mula sa entrada ang kanyang mga tauhan, inaayos at pinapaganda ng mga ito ang mga halaman, may nagwawalis, at naglilinis ng kanilang malaking fountain na may estatwa ng anghel sa gitna.

Maya-maya ay lumapit ang katulong na si Janine habang dala-dala ang isang baso ng orange juice.

JANINE

Senyora Bettina, heto na po 'yung inutos niyong orange juice.

(sabay abot ng baso gamit ang dalawang kamay at sinabayan ng bahagyang pagyuko bilang paggalang)

DONYA BETTINA

(Kinuha ang baso mula kay Janine)

Sige, Janine, bumalik ka na sa kusina.

(Nang umalis si Janine ay humigop siya sa baso.)

Habang pinagmamasdan ni Donya Bettina kung ano ang ginagawa ng kanyang mga tauhan ay hindi niya maiwasang magmuni-muni. Iniisip niya ang bawat misteryo ng mundo at kung saan ba nagsimula ang lahat.

Biglang sumingit si Marilyn, ang ambisyosang Vice-Mayordoma ng mansion, ngiting ngiti ito at halatang sipsip,tsismosa at plastic.

MARILYN

Donya Bettina, okay na po 'yung mga bagahe niyo, ready na pong ilagay sa kotse.

(Tagaktak ang pawis dahil binuhat niya ang anim na maleta galing second floor)

DONYA BETTINA

(Tinanggal ang shades at humarap kay Marilyn, medyo inis dahil sinira ang pag-emote niya)

Mabuti naman kung ganon, paki-sabi kay Dario ay maghanda na siya dahil aalis na ako ngayon na.

MARILYN

Ngayon na po?

DONYA BETTINA

Kung mamaya pa ay baka mauna ka na sa hukay.

(poker faced at flat toned niyang pagkakasabi)

MARILYN

Senyora naman! Sabi ko nga ngayon na!

(Nataranta bigla, pero dahil likas na tsismosa ay may itatanong pa siya ulit)

Pero senyora, hindi niyo man lang po ba sasabihan si Don Rico na aalis na kayo?

Sa pagkakataong ito ay tila nawalan na ng pasensya si Donya Bettina, ngunit nanatali lang siyang poised at kalmado at dahil ayaw naman niyang aksahin ang kanyang enerhiya sa aliping ito. Nang maramdaman ni Marilyn ang titig sa kanya ni Donya Bettina ay kaagad siyang natauhan.

MARILYN

(Nauutal)

Hehehe, sabi ko nga po tatawagin ko na si Dario.

(Kaagad na umalis)

Bahagyang kumirot ang puso ni Donya Bettina, hindi dahil sa tinatarayan niya ang atribidang si Marilyn, dahil kundi sa pagbanggit nito sa kanyang mi amor o mahal na asawang si Don Rico Andreigo Barosa, sa pagkakaalam niya'y sa ganitong oras ay palaging umiikot at bumibisita si Andy (na kanyang tawag sa mahal na asawa) sa mga plantasyon, pabrika, barangay sa loob ng Hacienda. Hindi nito alam ang kanyang pinaplanong pag-alis papuntang ibang bansa.

INT. MANSION DE BAROSA. SA LOOB NG GREAT HALL. UMAGA.

Pumasok sa loob ng mansyon si Donya Bettina at pumunta sa Great Hall, kung saan nakasabit ang malalaking painting ng bawat henerasyon ng pamilya Barosa. Pinagmasdan niya ang larawan ng kanilang pamilya.

DONYA BETTINA

(Voice Over)

Patawad, mahal ko.

Kaagad na nagbalik sa sarili si Donya Bettina at naglakad ng taas noo palabas sa kabila ng mga madidilim na lihim ng kahapon at ang kasalukuyang laban niya sa kanyang buhay.

EXT. HACIENDA BAROSA. BUKID SA SILANGANG-KANLURAN. UMAGA.

Isang ordinaryong araw lamang para sa mga tiga Barangay Maharlika, hindi pa sumisikat ang araw nang magtrabaho na kaagad ang mga magsasaka na sinimulan nila nang kumakanta, maririnig sa background ang kanta na May Ibong Kakanta-Kanta na sinasabayan ng pag-awit ng mga alipin na tila isang musical ang kanilang buhay.

Malilipat ang view sa isang maliit na dampa, bubukas ang pinto ng kubo at bubungad ang isang babae, si Carmela Garcia, may mahaba at maalun-alon itong buhok, ang kulay ng balat ay naging kayumanggi dahil sa pagbibilad sa araw, pero minsang tinawag na pinakamagandang mutya ng kanilang barangay. Noong araw ay maagang nabuntis si Carmela at nagkaroon ng anak na dalaga na ngayon.

CARMELA

(Pagkababa sa dampa ay sumigaw)

Sabing! Bangon na at magtatrabaho pa tayo sa bukid!

Mula sa loob ng dampa ay sumungaw sa bintana ang kanyang disi-otsong anak na babae na si Sabriela Garcia, na binansagang Sabing. Pupungas-pungas pa ito ngunit kahit gulu-gulo ang buhok na mala 'I woke up like this' ang peg ay maganda pa rin ito, na minana niya sa kanyang ina at dahil doon ay madalas silang mapagkamalang magkapatid.

SABRIELA

(Kinu-kusot kusot ang mata)

Nay naman, ang aga-aga pa oh.

CARMELA

(Isinuot ang sombrero at inayos ang bayong na dadalhin)

Naku, kapag mas maagang gumising mas maagang makukuha ang biyaya.

SABRIELA

(Lumabas na ng kubo)

Palagi niyo 'yang linya, nay.

(At parang may magic na maayos kaagad ang itsura niya. Pak ganda.)

CARMELA

(Busy busyhan si mother)

At isa pa dadaan si Don Rico sa plantasyon at baka makitang tatamad tamad tayo.

SABRIELA

(Nagtataka habang nag-uunat ng braso)

Huh? Ano namang pake sa'tin ni Don Rico eh hindi hamak na mga alipin lang tayo rito.

CARMELA

Basta, halika na!

(nairita medyo sa kakulitan ni Sabing)

Sumakay sila sa kalabaw at nagtungo sa plantasyon. Katulad ng inaasahan ay marami na ang mga tao sa bukid na nagsisimulang kumayod. Lalakas ulit ang background music at tila mag-aalal musical na naman ang mga magsasaka sa pagkanta nila ng May Ibong Kakanta-kanta ng Mabuhay singers.

May ibong kakanta-kanta sa sanga ng punong mangga

Ang awit kay tamis-tamis, ang tunog kay saya-saya

Sa himig na kabit-kabit ang diwa ay mahalaga

Ang buhay mo raw giginhawa rin kung masipag ka.

Pagkatapos ng lyrics ay instrumental na lang ang maririnig. Kada makakasalubong nila ang ibang magsasaka ay babatiin sila nito ng 'Magandang umaga!' dahil siyempre silang mag-ina ang pinakamaganda rito kaya pak na pak sila sa bukiran.

Maya-maya'y sasalubungin sila ni Johona Buhay, ang kababata ni Sabriela, tagaktak na ang pawis pero nangingibabaw pa rin ang black beauty nito.

JOHANA

Uy, Sabing! Aling Carmela!

(Sabay-sabay silang naglakad)

CARMELA

Buti pa 'tong si Johana, napakasipag gumising ng maaga!

(parinig niya kay Sabing)

SABRIELA

K.

JOHANA

Wow, pasosyal?

(nag-apir sila ni Sabriela)

Maya-maya'y makakasalubong nila si Zacharias Cuenca o Zachary, isa pa nilang kababata, may karga-karga itong isang sako. Maliit lang si Zachary pero makisig at kasing boses ni Ogie Alcasid, pasimpleng nililigawan si Sabriela.

ZACHARY

(Hingal na hingal)

Hi Nanay Carmela. Hi Sabriela my loves.

CARMELA

(Pumanewang at nagtaas ng kilay)

Anong Nanay Carmela? At anong Sabriela my loves?

ZACHARY

(Hindi pinahalatang nabibigatan sa dala niya)

Kung hindi niyo ho mamasamain eh gusto ko ho sanang ligawan ang anak niyo.

CARMELA

Tigilan mo ko Zacharias baka gusto mong makatikim ka sa'kin nito.

(Ipinakita ang kamao)

ZACHARY

Ito namang si Aling Carmela hindi mabiro.

(aambaan siya ni Carmela at nagtatakbong umalis)

Naiwang nagtatawanan ang tatlong kababaihan at nagsimulang magtrabaho sa bukid. Nang sumapit ang alas otso ay luminya ang mga trabahador dahil sa ganitong oras palagi nilang inaasahan na dadaan si Don Rico, ang kanilang mahal na Primo Propietor at pinaka-amo.

Tumitingkayad pa si Carmela upang silipin kung nandyan na si Don Rico ngunit umugong ang bulungan nang hindi pa ito dumadating. Naka-ugalian kasi nito na palaging dumaan sa kanilang barangay na walang palya upang kamustahin sila .

Ngunit hindi ngayong araw.

Babalik na sila sa kanilang mga gawain nang narinig nila ang isang tunog ng malakas na sirena.

At ang humahangos na isang magsasaka na umibis mula sa kabayong sinakyan.

MANG ANDOY

Mga ka-barangay!

(sigaw nito paulit-ulit)

Nasaan si Ka-Elpidio?!

(Tawag naman niya ngayon sa kapitan nila)

Nakuha niya ang kuryosidad ng mga trabahador, maging ang mag-ina at muling huminto ang lahat.
Sumulpot mula sa kung saan ang kanilang kapitan o pinuno na si Elpidio Balares, nakasalamin ito at halos mapanot na.

KA-ELPIDIO

Oh, Andres? Anong problema?

MANG ANDOY

Masamang balita!

(sinadyang binitin ang sasabihin para pa-suspense)

Patay na raw si Don Rico! Patay na si Don Rico!

Sabay-sabay na nagulat ang mga tiga Barangay Maharlika, lalung lalo na si Carmela. Nagimbal hindi lang ang Barangay Maharlika kundi ang buong Hacienda Barosa sa balita na natanggap nila ngayong umaga.

Patay na si Don Rico Andreigo Barosa, ang kanilang Primero Propietor.

Mabilis ding kumalat ang tsismis ang di umano'y biglaan at walang paalam na pag-alis ng asawa nito na si Donya Alizandra Bettina.

At ang naging tanong kaagad ng taumbayan, sino na ang magiging bagong Primero Propietor? Sino na ang magiging tagapagmana ng Hacienda Barosa?

FADE OUT