Nang muli siyang magising ay mabuti-buti na ang pakiramdam niya. Tapos nang operahan si Georgina at kasalukuyang nasa ICU para mamonitor ang kalagayan nito.

Si Chantal ang kumontak sa mga Valdez para ipaalam ang nangyari kay Georgina. Agad namang dumating ang mga magulang at kapatid nito. Sa kuwarto niya nagpunta ang mag-anak pagkatapos nilang silipin si Georgina sa ICU para humingi ng paliwanag sa nangyari.

Nagulat ang mga Valdez na magkasama sina Lee at Georgina sa insidenteng kinasangkutan ng dalaga. Lalo na nang malaman ng mga ito na sinalo ni Georgina ang bala na dapat ay para sa kanya.

"S-Si James Sanders kamo ang may pakana nito?" hindi makapaniwalang tanong ng Daddy ni Georgina.

"I'm afraid so," sagot ni Lee.

"Let me get this straight, Zervos. Ano'ng relasyon mayroon kayo ng kapatid ko to warrant such action from James?" usisa ni Gael.

He's an inch taller than Gael but the man is intimidating with his bulk at five eleven and an unflinching stare. Ang namayapang kapatid nitong si Gabriel ay anghel kung ikukumpara dito. Bago naging magaling na negosyante si Gael Valdez ay matunog ang pangalan nito sa underground fighting arena. There are rumors that he used to run with one of the notorious gangs of Metro Manila.

Ano ang isasagot niya? Hindi niya pwedeng sabihin ang totoong namagitan sa kanila ni Georgina. Pupulbusin siya ni Gael, injured or not. He could probable hold out on his own against Gael. Pero wala pa siya sa kondisyon para i-test ang teoryang 'yon. At medyo tinatablan siya ng takot sa kapatid ni Georgina.

"Ah..."

"Georgina's been in love with him since college. James abducted Lee para mapilitan si Georgina na ibenta sa kanya ang property niyang nakaharang sa development ng project niya," si Chantal.

"W-What?" si Gael.

"Chantal," saway niya sa babae. Pero tiningnan lang siya nito ng masama.

"Why? Kung hindi dahil sa obsession sa 'yo ni Georgina, hindi tayo magkakagulo. Siya lang naman talaga ang puno't dulo ng gulong 'to."

"Mag-iingat ka sa pananalita mo, Miss Sanders. Hindi mo kilala ang kapatid ko para pagsalitaan mo nang ganyan," matalim ang matang pagtatanggol ni Gael sa kapatid.

Chantal scoffed. "Hah! I guess wala talaga kayong alam, ano? Georgina seduced my fiance two years ago kaya hindi natuloy ang kasal namin. Ang mali ko lang, hindi ko pinakinggan ang paliwanag ni Lee. Masyado akong nabulag sa selos at galit. Hindi pa siya nakuntento, sinundan na naman niya ngayon si Lee dito sa Boracay kung kailan we're working on fixing things between us."

Damn it! Naunahan siya ni James sa pagsasabi kay Chantal. Frustrated na naihilamos niya ang magkabilang palad sa mukha.

"Chantal, stop," hindi nakatiis na saway niya sa dalaga. Hindi maganda ang dating sa kanya ng mga pinagsasabi ni Chantal tungkol kay Georgina.

Disbelief registered on Chantal's face. "I'm just telling them the truth!"

"Maldita ang kapatid ko pero hindi siya gagawa ng ganoong bagay," tanggi ni Gael.

"Oh, God!" Bumuway ang pagkakatayo ng Mommy ni Georgina.

Mabuti na lang at mabilis na nadaluhan ng asawa nito ang namumutlang ginang. "Lucia!"

"Mom! Okay lang kayo?" tarantang inalalayan din ni Gael ang ina sa kabila.

Pero imbes na magpaakay ay tinabig ni Lucia ang braso ng anak para harapin si Lee.

"M-Malapit sa bahay mo ang aksidenteng kinasangkutan ni Gabriel," sabi nito, nanginginig ang mga labi. "Coincidence lang ba o si Georgina ang pupuntahan sana ni Gabriel nang gabing 'yon?"

Walang nakaimik sa kanila sa tanong ng ginang. Tama si Mrs. Valdez but he didn't have the heart to confirm it. Ilang segundo pa ang lumipas at napatango na lang ang Mommy ni Georgina. Tiningala nito ang katabing asawa.

"Take me to our daughter, Fernan."

Tahimik na umalis ang mag-asawa pero nagpaiwan si Gael. Hinintay nitong makalabas ang mga magulang bago siya tinapunan ng galit na tingin. Nangnangangalit ang bagang ng binata, parang mananagpang.

"Siguro naman patas na kayo ng kapatid ko. Ginulo niya ang buhay mo noon, sinagip ka naman niya ngayon. As soon as she's stable, ililipat namin siya sa Maynila. Hindi ito pakiusap kundi warning sa inyong dalawa ni Miss Sanders. Leave my sister alone. As far as I'm concerned, bayad na ang kapatid ko sa atraso niya sa inyo." Iyon lang at tinalikuran na sila ni Gael.

"Finally, hindi na tayo guguluhin ni Georgina."

Bumangon ang iritasyon sa dibdib niya para kay Chantal. "Ano sa tingin mo ang ginawa mo?"

"Hindi ka ba natutuwang wala nang sagabal sa atin?"

"Hindi ako sinundan ni Georgina. She got here first."

Gumuhit ang galit sa mga mata ng dalaga. "Ipinagtatanggol mo na siya ngayon?"

"Stop with your nonsense."

"Then stop acting as if you're in love with her! You're hurting me!"

Wala siyang naisagot kay Chantal.

#

Dalawang buwan na ang nakakalipas simula nang mabaril siya sa Boracay. Nakabalik na siya ng Maynila at ngayon ay kasama niya ang kapatid at mga magulang sa sala ng bahay nila. Sinusubukan niyang umapela na alisin na ang mga bodyguards na nakabantay sa kanya. Naaasiwa kasi siya. Tinalo pa niya ang preso sa trato sa kanya ng pamilya.

Hindi siya makaalis ng bahay na walang bantay. Wala siyang cellphone, bawal din ang internet. Kinumpiska ng Kuya Gael niya ang laptop niya, pinutol din ang linya ng telepono sa kuwarto. Pakiramdam ni Georgina ay bumalik siya sa teenage days niya.

Naiintindihan din naman niya ang kapatid kung bakit nito ginagawa 'yon. Hindi rin niya masisisi ang pamilya kung bakit gusto nilang putulin niya ang ano mang ugnayan niya kay Lee. And speaking of Lee, kamusta na kaya siya? Walang balitang nakakarating sa kanya tungkol sa binata.

"Gulo lang ang hatid ng lalaking 'yon sa buhay mo, anak. Isa pa, maganda ka. Maghanap ka na lang ng iba, 'yong single," sabi ng Mommy niya.

"Mom, ilang beses ko bang dapat ulit-ulitin na wala ho akong balak na kontakin siya. Kaya no need na pabantayan n'yo pa ako."

Laking pasalamat niya at wala siyang narinig na panunumbat mula sa pamilya kahit nalaman na nila ang totoong kuwento. Hindi siya sinisi ng mga ito sa pagkawala ng kapatid niya, kabaliktaran sa iniisip niya dati. Ngayon, gusto niyang bumawi sa pamilya.

"Mas mabuti na 'yong nakakasiguro. Isa pa, hindi pa nahuhuli si James. Baka mamaya balikan ka niya. Kaya dapat lang na may bantay ka sa lahat ng oras," dugtong ng Daddy niya.

Napabuntung-hininga na lang si Georgina. Wala siyang kakampi. Tuloy ay lalo niyang nami-missed si Gabriel. Tumayo na lang siya at humakbang palabas ng sala.

"Saan ka pupunta?" tanong ng Kuya Gael niya.

"Sa garden!"

May duyan siyang ipinalagay sa garden, nakatali sa pagitan ng dalawang puno ng palma. Katabi ng isang palma ang malaking puno ng mangga na nagbibigay ng lilim. Tuwing hapon ay doon siya tumatambay para magbasa o kaya ay matulog.

Nag-aagaw na ang antok niya nang makarinig si Georgina ng pagsutsot. Noong una ay binalewala niya sa pag-aakalang namali lang siya ng dinig. Pero nang muli niyang marinig ay naalarma siya. Na-eengkanto na ba siya?

Nanlalalaki ang mga matang napatingin siya sa paligid, sapo ang dibdib na nag-uumpisa nang mag-riot sa pagkabog. Wala namang tao dahil sa pagkakaalam niya ay wala ang may-ari ng bahay sa tabi nila. At isang beses sa isang linggo kung dumating ang tagalinis. Muli niyang narinig ang pagsutsot kaya tuluyan siyang napatayo, ready nang tumakbo.

"Georgina!" pabulong na tawag ng kung sino sa kanya.

Pagtingala niya ay nakita niya ang ulo ni Lee na nakalitaw sa kabila ng mataas na pader. Hindi niya napigilan ang pag-awang ng bibig at lumapit sa kinaroroonan nito.

"Ano'ng ginagawa mo d'yan? Paano ka nakapasok sa bahay nina Mrs. Tan?" hindi makapaniwalang tanong niya.

"Kakilala ko sila. Pero hindi na importante 'yon. Kailangan kitang makausap. Hindi ako makalapit sa 'yo, tinalo mo pa ang presidente sa higpit ng mga bantay mo," nakasimangot na reklamo nito.

Pinigilan niya ang sariling matuwa sa kaalamang nagtangka pala si Lee na makalapit sa kanya. Pero ganoon pa man ay ni-remind niya sa sarili na 'wag magpadala.

"Ahm...bakit?"

Saglit na natameme si Lee. Umilap ang mga mata nito at nagtanggal muna ng bara sa lalamunan bago sumagot. "Hindi pa kita napapasalamatan."

"You're welcome," aniya saka nginitian ang binata. "Pasok na 'ko."

"Wait!"

Marahas siyang napalingon dito. "Wag kang maingay!" saway ni Georgina.

"'Wag ka munang umalis."

"Ano pa ba ang sasabihin mo?"

"Ah..." kagat-labing natigil si Lee sa sasabihin.

Georgina rolled her eyes. Nauubos na ang pasensya niya. "Ano ba, bilis na kasi! 'Pag nahuli ako ni Kuya na nakikipag-usap sa 'yo baka tuluyan na niya akong ikulong sa kuwarto!"

"You're an adult! Hindi nila pwedeng gawin 'yon!"

"Nagawa na nila," paalala niya. "Isa pa, ayoko nang bigyan ng sakit ng ulo ang pamilya ko. Kaya umalis ka na, puwede?"

"Ganoon na lang ba 'yon, Georgina?"

Kunot-noong napatingin siya kay Lee. "Marunong ka nang magdrama ngayon? Tigilan mo nga ako, hindi bagay sa 'yo. Sige na."

She turned on her heels to go back inside the house.

"Alright, alright! Makinig ka," sumusukong pahabol ni Lee.

Pinagbigyan niya ang binata, hindi niya itinuloy ang pag-alis pero hindi rin siya lumingon.

"Pinagbawalan na ako ng kapatid mo na lumapit sa 'yo." Bumaba ang timbre ng boses nito, "But what can I do? I missed you."

Ang puso niyang traidor, tumambling hanggang lalamunan niya. She hold up her hand, palm facing him.

"Really, Leandro. Hindi mo na kailangang gawin 'to. Inuulit ko, okay na tayo. Kailangan ko nang pumasok sa loob."

"Hindi mo man lang ba ako na-missed?"

Natigil siya sa paghakbang palayo. Pigil ang emosyong nilingon niya ang binata. "Tinatanong mo 'yan dahil?

"Damn it! I don't know, okay?" he paused, clearing his throat. "Siguro I just wanted to see for myself how you're doing. Lalo na't hindi ko alam ang lagay mo mula nang ilipat ka nila ng ospital. Wala akong mapagtanungan dahil naka-block lahat ng impormasyon tungkol sa 'yo."

"O—kaayyy..." sakay niya.

"At galit na galit sa akin ang Kuya mo."

Georgina laughed nervously. "Ano naman ngayon? It doesn't matter if my family doesn't like you. Given na 'yon dahil sa kabaliwan ko sa 'yo, hindi ko maayos ang buhay ko. Bawal ang makipag-usap o makipagkita sa 'yo. Kaya tumigil ka na, okay?"

"Hey—"

"Mam Georgina?"

Pinandilatan niya si Lee at sinenyasang umalis na. Bago pa makalapit ang katulong ay sinalubong na ito ni Georgina.

"Ano 'yon, Mae?" tanong niya sa katulong sabay pasimpleng harang ng katawan para hindi nito makita si Lee. Hindi niya alam kung nagtago nga ba ang binata o pinairal ang katigasan ng ulo.

"Pumasok na raw ho kayo sabi ni Sir Gael, nagluto siya ng meryenda."

"Sige, susunod na ako. May naiwan lang ako sa duyan," aniya.

Nang mawala sa paningin ni Georgina ang katulong ay nilingon niya ang kinaroroonan ni Lee. Padabog na binalikan niya ito at muling tiningala.

"Ang tigas talaga ng ulo mo!" may diin ang pagkakasabi niya palibhasa kontrolado ang boses.

"Ayoko," pagmamatigas ni Lee.

"Tatawagin ko ang mga bodyguards ko."

"Tawagin mo. I'm itching for an exercise anyway."

Biglang lumitaw ang katawan ni Lee sa pader at sumampa ito doon. In seconds, he jumped down the wall as if the drop was one foot tall. Pagbagsak ng binata ay gumulong ito sa damuhan. Sa pagkabigla ay hindi nakakilos si Georgina. Basta na lang siyang nakanganga habang ini-execute ni Lee ang talon-pader-gulong moves nito.

"W-Why did you do that? Bumalik ka doon, bilis!" tarantang itinulak niya si Lee sa direksyong pinanggalingan nito. Lagot ito sa kuya niya! Wala pa man ay pinangangatugan na siya ng tuhod sa mga posibilidad.

"I'm afraid I can't do that. Unless I grow a pair of wings to fly up that wall," sabi ni Lee na parang balewala lang dito ang sitwasyon.

"Bakit ka kasi tumalon?!" kulang na lang ay mapapadyak siya.

"Hindi ka kasi nakikinig. A desperate situation calls for desperate measure, jumping down that wall is the most attractive option for me to get to you."

"I really don't get it why you're doing this!" aniya.

"That's why we have to talk," pilit ni Lee.

"Ano pa nga ba ang magagawa ko eh, nandito ka na? Magtago ka muna, titingnan ko kung paano kita maipupuslit sa kuwarto ko!" paasik na bilin niya sa binata.

Kumislap ang kapilyuhan sa mga mata ni Lee. Aakalain mong parang naglalaro lang sila ng tago-taguan eh. "Your room? Nice, I like that."

Parang nakakalokong itinulak pa siya nito pasulong. Tinapunan lang niya ito ng masamang tingin. Imbes na patulan siya ay kusang nagtago ang binata sa likod ng makakapal na halaman doon sa garden.

Kakaba-kabang pumasok siya sa loob ng bahay. Walang tao sa sala nila hanggang sa hagdan paakyat. Sumilip siya sa dining room at nakahinga nang maluwag ng makita ang pamilya doon. Sigurading abala din ang mga katulong sa kusina ngayon.

Binalikan niya si Lee. Walang salitang hinablot niya ang kamay nito at mabilis na kinaladkad papasok sa bahay.

"Bilisan mo! Nasa dining room sila," sabi niya kay Lee. Halos kumawala na sa dibdib niya ang puso sa sobrang kaba. Ewan ba niya kung bakit niya ginagawa 'to, siguro nga naapektuhan ng mga gamot ang utak niya.

"Yes, boss."

Nilingon niya ito nang makapasok sila sa loob. "Yes boss ka d'yan."