"HOY 'te! Ano tulaley ka na naman diyan." Biglang sabi ng katabi ko at sinundot pa ang tagiliran ko, buti na lang ay wala akong kiliti ro'n.

"Ano ba 'yan, April. Shh ka lang diyan at nakikinig ako kay Sir." Kunwaring sabi ko at tumingin sa harapan.

"Utot mo blue, nakikinig titig na titig ka nga kay Sir diyan. Kung 'di ko lang alam na crush mo si Aaron baka isipin 'kong may gusto ka kay Sir Geronimo." Bulong pa nito sa 'kin.

"Gaga ka! 'Wag ka nga," sambit ko na lang at pinilit ang sarili 'kong makinig kay Sir pero hindi talaga mawala sa isip ko ang huling chat sa 'kin ni Aaron kagabi. Gusto niya raw kasi na sabay kaming mag-lunch para raw magkumustahan.

"Shh, 'wag kayong maingay, marinig kayo ni Sir." Saway naman ni Erika na nasa harapan namin ngayon.

Hindi na naman kami umimik ni April. Tumingin kami sa harapan at nakinig na kay Sir.

"May thirty minutes pa si Sir, ang aga talaga niya lagi magpalabas," sambit ni Garien na inaayos na ang bag.

"Hindi pa kayo nasanay, lagi namang ganyan si Sir." Natatawang sabi ni Hannah.

"Okay na 'yon, may klase pa tayo ng alas-dos e. Tapos twelve-thirty na. 'Pag late tayo pinalabas, tayo rin kawawa," sabat naman ni Vance.

"Tama rin naman. Tara kain na tayo?" Yaya ni Jelina at nagsimula ng maglakad.

Sakto namang nag-vibrate ang phone ko, kaya tinignan ko ito.

Aaron Davis:

Nasa labas ako ng classroom niyo. :)

"Shit!" Napamura naman ako nang mabasa ko ang chat niya.

"Friend, ayos ka lang?" Biglang pagtatanong ni Joana na nasa tabi ko, tumigil din ang mga kaibigan ko para tignan ako.

"Anong nangyari? Bakit ka namumula?" Inosente namang tanong ni Dianhel.

"A-Ah, hindi ako makakasabay ng lunch."

"Bakit?" Nakataas ang kilay ni Jael habang nagtatanong.

"Niyaya kasi ako ni Aaron, sabay raw kaming mag-lunch. Tapos nandiyan na siya sa labas." Paliwanag ko at rinig ko naman ang impit na tili ng iba 'kong kaibigan.

"Nasa labas? Tara, tara labas na tayo." Excited namang sabi ni Hannah at lumabas na nga kami.

Pagkalabas namin ay nakita ko si Aaron sa tapat ng pintuan, nasa may railings siya nakaharap sa pinto. Ngumiti ito nang magtama ang mga mata namin.

"Guwapo," rinig 'kong bulong ni Erika.

"Sana all," sambit naman ni Jelina at Vance.

"Hi?" Bati ni Aaron nang makalapit kami sa kanya.

"Hello. Sorry, naghintay ka ba ng matagal?"

"Ay 'te! Ang pabebe ng boses mo," ani Jael na malapit sa 'kin.

"Ayos lang, hindi naman ako matagal naghintay. Hello, Jael." Pagbati rin nito kay Jael. Siyempre magkakilala sila.

"Aaron, hello. Kumusta?" Tanong ni Jael.

"'Tsaka na kayo magkumustahan. Sabay ka na lang sa 'min mag-lunch Aaron." Yaya ni Gen. Halata sa mukha ni Aaron ang pag-aalinlangan pero tumango rin 'to.

Sabay-sabay na nga kaming naglakad palabas ng University at nag-uusap lang ang mga kaibigan ko. Ako naman ay tahimik lang at katabi si Aaron na tahimik din.

"So? Pakilala mo naman kami Wayde." Nakangiting sabi ni JL nang makaupo na kami sa table namin. Naka-order na kami at sabay-sabay ng umupo.

"A-ah sige," sambit ko. "Aaron, mga kaibigan ko. Vance, JL, Jelina, April, Hannah, Dian, Iyah, Garien, Nika, Erika, Joana, Gen at siyempre si Jael. Guys, si Aaron, schoolmate namin ni Jael no'ng highschool." Pagpapakilala ko sa kanilang lahat.

May nagkamayan, may tango lang at ngiti ang ibinigay kay Aaron. Pagkatapos magpakilala ay may sari-sariling mundo na ang mga kaibigan ko.

"Kumusta ka na, Aaron?" Rinig 'kong pagtatanong ni Jael. Kaya napatingin ako sa gawi nila.

"Ayos lang. Ikaw ba? Nakikita 'kong naglalaro ka sa court ng volleyball pero hindi kita malapitan kasi minsan busy e," sagot ni Aaron na nasa tabi ko ngayon. Pinagtabi kasi kami ng mga kaibigan ko at siyempre dahil crush ko nga um-oo agad ako.

"E? Dapat lumapit ka. E 'di sana alam namin ni Wayde na rito ka nag-aaral. Ang akala namin do'n ka lang sa University malapit sa 'tin e." Tumatawang sabi ni Jael at may paghampas pa sa balikat, katabi kasi ni Aaron si Jael sa kaliwa niya at ako naman sa kanan.

Naningkit naman ako sa nakita ko at umiwas ako ng tingin. Close sila 'te. E 'di sila na. Naiinis na bulong ng utak ko. Nakita ko namang tinignan ako ni Jelina na nasa harap ko kaya yumuko na lang ako sa mesa.

"Wayde, ik—" Naputol ang sasabihin ni Aaron nang biglang dumating ang pagkain namin.

Nagsimula naman akong kumain at hindi na lang sila pinansin. Nag-uusap sila, minsan sinasali ako at sumasagot naman ako.

Natapos kaming kumain ng hindi man lang nakapag-usap ni Aaron. Sumabay na rin siya sa 'min pabalik sa University.

"Nagdo-dorm ka ba Wayde?" Tanong ni Aaron habang pabalik kami sa University. Magkatabi kami ngayon at nauuna na yung mga kaibigan ko maglakad.

"Hindi, dagdag gastos lang kasi."

"Sabagay."

"Ikaw ba?"

"Oo, bale condo ‘yon. Kinuhanan kasi ako ng parents ko e,” sagot nito.

“Oh? May kasama ka? Hindi ka na lang nag-bedspace, mas makakamura ka kapag gano’n.”

“Sinabi ko rin ‘yon sa kanila kaso baka raw kasi hindi safe e,” paliwanag niya at may punto naman siya roon kaya tumango na lang ako. "Uuwi ako mamaya sa Caloocan, sabay ka na sa akin?" Napahinto naman ako sa tanong niya at huminto rin siya. Tinignan niya ako ng nakangiti.

"Kasabay ko si Jael e."

"E 'di sabay rin natin. Hindi kasi tayo nakapag-usap kanina."  Tumango-tango naman ako at ngumiti. Tama siya hindi kami nakapag-usap at mamaya na ang tamang oras para makapag-usap kaming dalawa.

"Sige." Nakangiti 'kong sabi at ngumiti rin siya.

Nagpatuloy naman kami sa paglakad at nagulat ako ng bigla niya akong akbayan. Pagtingin ko sa kanya ay nakangiti lang siya sa 'kin at halos lumabas naman ang puso ko ng dahil sa sobrang lakas ng pagtibok.

Namumula yata ako. Sabi ko sa sarili ko dahil ramdam ko ang pag-init ng mukha ko dahil sa pagkaakbay niya.

"Anong oras labas niyo?" Pagtatanong niya habang naka-akbay pa rin sa 'kin.

"Five PM, pero baka mag-extend 'yon. May bago kasi plate na gagawin at baka ipatapos 'yon sa 'min ngayon."

"Mga four-thirty labas namin, hintayin na lang kita sa tapat ng classroom niyo?"

"Hindi na, sa may kubo na lang?" Sagot ko. Baka kasi mainip siya sa harap ng classroom at wala pa namang upuan. Mas mabuti ng nasa kubo, may upuan, mahangin at baka may mga kakilala pa siyang puwede niyang makausap.

"Are you sure?" Tanong niya pa at tumango-tango na lang ako bilang sagot.

"So, see you mamaya?" Sabi ni Aaron nang nasa tapat na kami ng classroom, tinanggal niya na rin ang kamay na naka-akbay sa 'kin

"See you," sambit ko ng nakangiti.

Pagpasok ko sa classroom ay puro asar ng mga kaibigan ko ang sumalubong sa akin.

"Naks naman, laki ng ngiti ah." Asar ni Vance habang paupo sa upuan niya.

"AAHH pa nga e.Sana all." Tumatawang sabi ni April.

"AAHH? Pinagsasabi mo babae?" Tanong naman ni Erika.

"AAHH, akbay-akbay while walking," sagot ni April at inakbayan pa si Erika na tumatawa na rin.

"Ang rami mong alam, Pril," sambit naman ni Jelina at umupo na sa tabi ni Vance.

"Ako pa ba, Joy? Ako pa ba?" Mayabang na sabi nito at umupo na rin sa upuan niya.

"Mga baliw kayo 'no?" Sabi ko na lang ng nakangiti at umupo na sa tabi ni Joana. Sa rami naming magkakaibigan, apat na row ang sakop namin at kami nila Joana ang nasa dulo.

Nang makaupo ay nagkanya-kanya na naman kaming usap. Wala pa rin naman ang prof kaya nag-iingay na muna ang mga kaklase ko.

"Hoy 'te, sabay raw si Aaron sa 'tin mamaya. Ayos lang?" Pagtatanong ko kay Barni na nasa tabi ko.

"Landi 'te, kakikita niyo pa lang tapos may pasabay-sabay na," biro nito habang nakataray ang mukha.

"Pake 'te? Ano sabay ka sa 'min?"

"Oo naman, baka rape-in mo si Aaron, kawawa naman."

"Ew ka 'te. If I know 'pag kasama mo si Eubert ganyan gagawin mo. Tulad mo pa ako sa'yo." Tinaasan ko naman siya ng kilay.

"Oo nga, Barni. Laki ng pagnanasa mo ro'n e." Singit ni April at humagalpak ng tawa. Nasa harap kasi namin ito at humarap lang sa 'min.

"Tama ka riyan, 'te." Pagsang-ayon ko at tumawa na rin si Hannah at Iyah na katabi ni April.

"Nandiyan na si Ma'am. Mamaya na 'yang usapan niyo." Saway naman ni Erika na nasa harapan nila April kaya tumahimik na rin kami.

"Ipasa niyo na yung plate number five. Isa-isa ang lapit para mag-attendance rito. Parabola gagawin niyo ngayon," sambit ni Ma'am paglapag niya ng mga gamit niya sa harap.

Kanya-kanya namang reklamo ang mga kaklase ko dahil 'di pa raw sila tapos sa plate number five. Ang iba naman ay lumapit na kay Ma'am para mag-attendance at ipasa ang plate na natapos.

"Ma'am, puwede bang ihabol yung plate mamaya?" Tanong ng isa 'kong kaklase.

"Late na 'yan," sagot ni Ma'am.

"Sige, Ma'am. Ayos lang."

"Ano 'te? Tara na kay Ma'am," biglang sabi ni Joana sa 'kin.

"Mamaya na 'te. Ang rami pang tao sa harap oh. Makakapag-attendance naman tayo niyan," sambit ko at nilabas na ang gagamitin ko.

"BUTI pinauwi na lang ni Ma'am yung plate. Medyo mahirap kasi, sa bahay ko na lang tatapusin," sabi ni Hannah habang naglalakad na kami palabas ng classroom.

"Tatapusin mo ba talaga Hannah? Baka mamaya ay 'pag malapit na pasahan, saka ka kikilos." Sermon ni Erika kay Hannah.

"Tatapusin ko 'yon. Tiwala lang," sambit nito at kumapit sa braso ni Erika.

"Uuwi na ba kayo?" Pagtatanong ni Gen.

"Oo, uuwi na kami," sagot ni Vance.

"Sasabay sa 'min si Aaron, nasa kubo siya ngayon," sagot ko naman.

"Sige, una na kami ah. Baka ma-traffic pa kami e. Ingat kayo." Paalam ni Gen at umalis na nga sila kasama ang iba. Ang natira na lang ay kami ni Barni, Joana at Nica dahil nagdo-dorm lang naman sila rito.

"Sasama ba kayo sa may kubo mga 'te?" Pagtataning ni Barni sa dalawa.

"Ako, hindi na," sagot ni Nica.

"Sasabay na ako kay Nica, gagawin ko pa kasi plate," sabi naman ni Joana at nagpaalam na rin.

Kami na lang dalawa ni Barni ang natira at naglalakad papunta sa kubo kung nasaan si Aaron. Tinext ko na rin kasi ito sinabi niya kung saan siya banda.

"Bakit pala sasabay si Aaron?" Tanong ni Barni.

"Ewan ko rin, nagdo-dorm 'yon tapos uuwi raw siya ngayon kaya sasabay siya." Kibit-balikat kong sagot.

"Bisexual ba 'yon?"

"Hindi ko alam e." Nakanguso 'kong sagot.

"E? May naaamoy ako ro'n e."

"Ano naman?"

"Feeling ko may gusto 'yon sa'yo." Natigil naman ako sa paglalakad sa sinabi niya at tumigil din ito.

"Baliw ka ba. Baka may girlfriend nga 'yon. Alam mo naman, guwapo, mabait at matalino pa. Imposibleng wala 'di ba?"

"Hay nako 'te. Tignan mo ha. Sumama sa 'tin sa pagkain kanina, tapos ngayon sasabay uuwi, inantay pa tayo. May gusto talaga 'yon sa 'yo." Paliwanag naman niya at naglakad na kami ulit.

"Imposible 'yan," sambit ko na lang at tumingin na sa kubo na medyo nasa kalayuan

Habang papalapit kami ay nakita naman naming may kausap si Aaron, mga kaibigan niya yata dahil nagtatawanan pa sila. May katabi si Aaron na babae at nakasandal pa sa balikat niya. Nahinto ako saglit dahil do'n pero tumuloy na rin sa paglalakad.

Palapit nang palapit ay naririnig namin ang tawanan at pinag-uusapan nila.

"Bakit kasi hindi mo ligawan 'yang si Ella, Aaron. Mabait naman, tapos may gusto pa sa 'yo. Pag niligawan mo 'yan, sasagutin ka agad niyan. Pustahan pa tayo." Malokong sabi nang isang lalaki na nasa harap lang ni Aaron.

"Baliw ka, Ryan. Baka maniwala 'tong si Aaron, mailang sa 'kin, hahahaha." Tumatawang sabi naman ng babae na nasa tabi ni Aaron.

"Totoo naman, Ella. Huwag ka na magkaila." At tinukso na nga nila si Aaron at yung Ella.

May dumaang sakit sa dibdib ko pero hindi ko na lang 'yon pinansin at naglakad na para tawagin si Aaron. Hindi ko pa naman natatawag ay tinawag na ito ni Barni.

"Aaron," tawag ni Barni.

Sabay-sabay namang tumingin sa 'min ang mga nasa loob ng kubo.

"Oy Jael, nandito na kayo. Uwian niyo na?" Pagtatanong ni Aaron ng nakangiti at tumayo na para lumapit sa amin.

"Oo, tara na ba?" Yaya ni Barni. Silang dalawa lang ang nag-uusap at ako ay nakatayo lang sa tabi ni Barni at nakatingin lang kay Aaron.

"Sige. Nga pala, mga kaibigan ko pala," sabi ni Aaron nang makalapit sa 'min at tinignan ang mga kaibigan niya. "Si Ella, Ryan, Mark, Jen at PJ." Turo niya sa mga kaibigan niya. "Mga P're sila Wayde at Jael, schoolmate ko no'ng highschool."

Nagtanguan lang naman kami ng mga kaibigan niya at nagpaalam na rin na mauuna na kaming umuwi kasi mukhang wala pa silang balak umuwi.

"Aaron, chat kita later ah," sabi pa ni Ella at nag-asaran na naman sila ulit.

"Sure," sambit naman ni Aaron at nagpaalam na sa mga kaibigan.

Nauna na naman akong maglakad at narinig 'kong hinabol ako ni Barni.

"Ay 'te. Naunahan ka na yata," sabi niya at kumapit pa sa braso ko.

Umiling-iling naman ako dahil sa sinabi niya. Paano mauunahan? E wala naman akong ginagawa.

"Baliw, naunahan ka riyan," sabi ko na lang at tuloy-tuloy na kami sa paglakad.

"Ha, ha, ang bilis niyo namang maglakad." Hinihingal na sabi ni Aaron at nasa tabi ko na.

"Mabagal ka lang talaga." Tumingin ako sa kanya at ngumiti, mabilis ko rin namang iniwas dahil nakatingin din ito sa 'kin.

"Kumusta klase?" Tanong nito nang maayos na ang lagay niya at hindi na hinihingal.

"Ayos naman. Hindi pinasa plate, pinauwi na lang sa 'min," sabi ko.

"Buti naman. Anong oras uwi niyo bukas?"

"Alas-dose, bakit?" Sagot ko. Dalawa lang kaming nag-uusap ni Aaron dahil si Barni ay busy sa kanyang cellphone at naka-earphone pa, baka nakikinig na naman ng mga makalumang kanta.

"Labas tayo?"

Gulat naman akong napatingin sa kanya at nakangiti naman itong nakatingin sa dinaraanan namin.

Muntik naman akong matumba nang may naapakan akong bato at buti na lang nahawakan agad ako ni Aaron saka inalalayan.

"Ayos ka lang?" Tanong niya at tumango naman ako.

"Wayde, ayos ka lang?" Tanong din ni Barni na nasa tabi ko na, tumingin naman ako sa kanya at tumango na rin. Lumapit naman ito at tinapat ang labi sa tainga ko. "Hay nako, 'wag ka kasi masiyadong tumingin kay Aaron, nadidisgrasiya ka tuloy." Bulong nito. Pinalo ko naman siya pero nakaiwas agad.

"Bakit? Ano yung binulong sa'yo?" Biglang nagtanong si Aaron na nasa tabi ko at nakahawak pa rin sa bewang ko. Napatingin naman ako sa kamay niya na hindi niya pa rin tinatanggal.

"E, wala. Hayaan mo na lang," sambit ko at lalayo na sana ako sa kanya pero hindi mas hinigpitan niya ang hawak sa bewang ko. "E, 'wag mo na akong hawakan?" May pag-aalinlangan 'kong sabi.

"Ayos lang. Hawakan na kita, baka may magyari ulit sa'yo e." At ang kamay niya sa bewang ko ay pinadausdos niya paitaas para maakbayan ako.

Nahihiya man ay hinayaan ko na lang. Ramdam na ramdam ko ang paglakas ng tibok ng puso ko, sabayan pa ng pag-iinit ng pisngi ko na alam 'kong namumula na.

"So, labas tayo bukas?"

"E, i-ikaw bahala. Anong oras ba uwi mo bukas?"

"Wala akong pasok. Sunduin na lang kita." Masaya nitong sabi.

"Nakakahiya naman sa'yo. Wala ka pa lang pasok. Magpahinga ka na lang."

"Ayos lang, Wayde. Payag ka na ha?" At pinisil niya pa ang balikat ko kaya napatingin ako ro'n saglit at tumingin sa kanya.

"Sige, ikaw bahala."

"It's a date, then." Napatingin naman ako sa kanya na may pagkabigla sa mukha, tinignan niya ako pero ngumiti lang ito at tumingin na ulit sa dinaraanan namin

It's a date, then.

Paulit-ulit na bulong ng isipan ko hanggang sa makauwi ako. Nakapag-ayos na ako't lahat-lahat at nagpapahinga na pero 'yon pa rin ang nasa isip ko. Naputol na lang ang iniisip ko nang may nag-text sa 'kin.

From: Aaron <3

See you tomorrow, Wayde! <3

Tinabunan ko naman ang aking mukha ng unan at doon tumili para hindi marinig ng magulang ko na nasa labas lang.