Chapter Two

Pagpipilian

Sumama ako kay Glenda sa club. Five hundred lang ang bigayan pero malaking bagay na iyon para sa aming dalawa ni Shawy.

Mabuti na lang rin at maagang umuwi si Nanay Esme kaya nakaalis ako dahil kung hindi siya umuwi ay baka hindi ako natuloy dahil walang magbabantay kay Shawy.

"Basta kapag may umalis na customer, puntahan mo kaagad ang lamesa at linisin mo para makapasok 'yung mga naghihintay sa labas. Kaya mo ba 'yon?"

Ngumiti ako at agad tumango kay Bella, isa sa mga waitress na mas matagal nang nagta-trabaho sa club.

Marami kaming bagong empleyado ngayong gabi para lang sa anibersaryo ng lugar pero kapag nagustuhan ko ay baka pilitin ko si Glenda na ipasok na ako. Wala rin naman akong pinagkakaabalahan sa bahay bukod sa bantayan si Shawy kaya okay na ring may trabaho kahit hindi malaki ang kita basta lang mapunan ko ang tiyan ng kapatid ko.

"Oo naman po! Iyon lang ba? Pwede rin akong kumuha ng order. Isusulat lang naman 'di ba tapos ipapasa sa bar?"

Tumango siya pero umiling pagkatapos.

"Saka na. Sa ngayon 'yan lang ang trabaho mo. Kapag nagkulang sa tao ay sasabihan kita."

Lumawak ang ngiti ko at nginitian siya ng mas matamis.

"Thank you po."

"Oh sige na. Trabaho na."

Agad akong tumalima. Kung tutuusin ay napakadali lang naman ng gagawin. Sanay naman akong maglinis kaya hindi ako nahirapan. Tingin ko nga ay kaya ko itong gawin araw-araw.

Ilang oras ang lumipas ay napuno na ang club. Halos hindi na ako makahinga sa dami ng tao. Kahit na hindi ako uminom ng alak ay para akong nahilo sa dami nila. Mas umingay na rin at kalaunan ay mas naging pakawala na lalo ang mga babae.

Napailing ako ng makita si Glenda sa kabilang dulo habang ka-table ng limang matatandang lalaki. Hindi naman lingid sa kaalaman ng lahat na isa siyang dakilang pokpok pero hindi ko pa rin lubos maintindihan kung paano at bakit niya 'yon ginagawa.

Sa tingin ko ay hindi naman talaga iyon ang gusto niyang gawin sa buhay o kahit nang sinong babaeng tanging katawan ang ginagawang puhunan. Sa tingin ko ay wala lang silang ibang pagpipilian kundi ang ibenta ang sariling laman o mamatay sa gutom.

Gaya ko, kahit na ilang beses na akong nagnakaw ay hindi naman talaga iyon ang gusto kong gawin sa buhay. Kahit na marami akong nagawang masama ay may dahilan naman ako. Sa tingin ko ay nagiging masama lang kaming mahihirap dahil gusto lang naming mabuhay. Kumakapit kami sa patalim at kahit na mali ay iyon pa rin ang gagawin namin dahil wala naman kaming ibang mas maganda o mabuting pagpipilian.

Mamamatay sa hirap o sa gutom. Iyon lang sa dalawa.

Inalis ko ang tingin nang halikan siya ng isang matanda. Hindi ko talaga masikmura. Bata pa ako pero hindi naman malaki ang agwat ng edad namin. Halos kasabayan ko lang rin siyang lumaki pero dahil nga maraming pangangailangan sa buhay ay mas maagang namulat sa realidad.

Ako rin naman ay gano'n pero kahit minsan ay hindi sumagi sa utak ko ang ibenta ang sarili. Oo nga't alam kong mabilisang pera iyon pero hindi ko talaga kaya. Naiisip ko pa lang na halikan ang isang taong hindi ko gusto ay parang umiikot na ang sikmura ko. Siguro nga ay talagang palakasan na lang ng sikmura.

Nagpatuloy ako sa pagtatrabaho habang pinagmamasdan ang mga gaya ni Glenda sa paligid.

Nang matapos siya sa unang mga customer ay ilang oras siyang nawala. Sa kanyang pagbalik ay muli na siyang naki-table sa iba.

"Saan ka galing?" tanong ko nang sundan siya sa banyo pagkatapos kong linisin ang huling lamesa.

Nagulat siya ng makita ako, tila nakalimutang naroon nga pala ako. Napapailing siyang ngumisi at pagkatapos ay naghugas ng kamay.

"Ano pa ba sa tingin mo, Ray? Syempre nagpatira para sa pera may iba pa ba?!" Natatawa niya pang sabi na parang isang malaking biro na lang iyon.

Marahas akong napalunok at nilapitan siya. Pinanuod ko siyang ayusin ang kanyang sarili. Sinuklay niya ang nagulong buhok at nagpabango.

"Hindi nga?" hindi pa rin makapaniwala kong tanong kahit na alam kong nagsasabi siya ng totoo.

"Ano bang akala mo umalis ako at nagdasal kasama nang mga 'yon?" muli siyang humalakhak. "Hay naku Ray, marami ka pang matututunan kapag nagtagal ka rito."

Naghugas na lang rin ako ng kamay habang nakatitig sa kanya mula sa salamin.

"Sabi mo isang gabing raket lang 'to. Baka hindi na maulit."

"Gusto mo bang maulit?"

Nangunot ang noo ko at mas napatitig sa kanya.

"Kung gusto mo ay galingan mo ngayong gabi. Kapag napansin ka ni Chekwa na masipag baka gawin kang regular! Hayaan mo, kung hindi naman at gusto mong bumalik ay babalitaan kita kapag kailangan ng tao rito. Teka, kumusta? Hindi ka ba nahihirapang maglinis ng mga lamesa at sumunod sa mga utos nila?"

"Hindi naman. Sanay naman ako sa ganito. Medyo nakakapagod pero okay lang. Ikaw ba? Hindi ba mahirap ang trabaho mo?"

Tumagal ang titig niya sa akin. Oo nga't simula ng mapunta siya sa ganito ay puro murahang bati na lang ang nangyari sa pagitan namin pero bago 'yon ay totoo namang naging kaibigan ko siya. Halos sabay nga kaming niregla at nagnakaw ng napkin sa tindahan noon ni Mang Joel eh.

"Kumpara sa ginagawa mo, mas ayos sa akin ang ganito. Mas malaki ang kita sa ilang bukaka lang. Hindi ko na kailangang magpagod ng walong oras at magbuhat ng mabibigat para lang kumita ng kakarampot. Napagdaanan ko na 'yan at hindi na ako babalik. Okay na sa akin ang ganito."

"'Yan na ba talaga ang gusto mo? Paano kung mabuntis ka o di kaya naman ay mahawaan ng sakit?"

"Alaga ni Chekwa ang lahat ng babae rito. Tsaka maingat naman ako. Kung mabuntis eh 'di tang ina, blessing!" pagbibiro niyang alam kong may laman.

Pinilit ko na lang na tumawa kahit na gusto kong malungkot sa sitwasyon naming dalawa.

Isinilid niya ang lahat ng gamit pabalik sa kanyang purse at pagkatapos ay tinapik ang balikat ko.

"Kung gusto mo ng full time rito, kakausapin ko si Chekwa. Sino-sino pa ba ang magtutulungan kundi tayo, 'di ba?"

Ngumiti ako at tumango. Nilagpasan na niya ako pero bago pa tuluyang lumabas sa pintuan ay pinabaunan pa ako ng salita.

"Basta sagot mo 'yung bilog bukas. Samahan mo na rin ng pulutan para bongga na!"

Natatawa na lang akong umiling. Sa pagkawala niya't muling pagtahimik ng banyo ay natulala na lang ako sa aking repleksiyon.

Se estado ng buhay ko, hindi malabong isang araw ay gawin ko rin ang mga ginagawa ni Glenda. Kahit na ayaw kong mangyari iyon sa akin ay hindi ako pwedeng magsalita ng tapos. Marami pang pwedeng mangyari at kung ano ang kahihinatnan ko ay bahala na.

Hindi maipinta ang tuwa sa puso ko nang tanggapin ang unang perang nakuha ko sa normal at malinis na paraan. Binigyan pa ako ng extrang dalawang daan ng manager dahil nag overtime ako at tumulong pa sa pagsasara ng club.

Bago umuwi ay dumaan ako sa Jollibee para bilhan ng pagkain si Shawy. Ito na yata ang pinaka-masarap na pagkaing matitikman niya sa buong taon!

Imbes na bumili ng para sa sarili ay dumiretso naman ako sa palengke para mamili ng ilang kilong bigas at manok upang may makain naman ang mga matatandang kasama ko.

Pagdating ko sa bahay ay tulog pa silang lahat. Dahil masaya ako ay hindi ko ramdam ang pagod. Ipinagluto ko na lang sila para paggising ay mayroon silang kakainin.

Gusto ko ring sabihin sa kanila ang ginawa ko pero hindi ko inasahang hihiritan nila ako ng tig-isang daan pang meryenda raw at pamasahe papuntang trabaho. Kahit na alam kong walkaton lang naman sila sa mga raket nila ay binigyan ko pa rin para matapos na ang usapan.

"Mabuti naman pala at may napala ka diyan sa pakikipag-kaibigan mo kay Glenda," si Tatay Tino. "Aba't hindi masama ang magtrabaho sa club. Kung gusto mong magtrabaho ay papayag na ako."

"Tino, tigilan mo nga muna 'yan. Sino ang magbabantay kay Shawy kapag nagtrabaho na si Ray, ha? Buti sana kung napipirmi 'yang bayag mo dito para bantayan ang anak mo."

"Nay, isang beses lang naman 'yon," putol ko dahil tiyak na magbubulyawan na naman sila sa harap ni Shawy. "Wala pa akong permanenteng trabaho."

"Pero kung meron nga ay patusin mo na. Ako nang bahala kay Shawarma. Malaki naman na 'to at hindi na pasaway, 'di ba Shawy?"

Tumango lang ang pobre kong kapatid. Mabuti na lang at enjoy na enjoy ito sa hawak na burger at fries. Bahagya kong ginulo ang kanyang buhok.

"Ah basta, Elorae! Hindi ko gustong tumulad ka sa babaeng 'yon. Alam ko ang trabaho no'n at huwag mong gagawin 'yon, naintindihan mo ba?"

"Opo, Nay. Hanggang waitress lang naman po ang gagawin ko."

"Mabuti at nagkakaintindihan tayong dalawa."

Nagpatuloy kami sa pagkain at nagpatuloy rin ang kaliwa't-kanang batuhan nila ng diskusyon. Buong araw akong nakatulog pagkatapos. Nagising lang ako nang gabi na at katukin ako ni Glenda habang hawak ang mga gin bilog sa magkabilang kamay.

"Ano tara?" nakangisi niyang bungad habang pupungas-pungas ako at hindi pa maidilat ng maayos ang mga mata.

Kahit hindi ko siya pinaunlakan ay walang sabi siyang pumasok sa loob ng bahay at dumiretso na sa kusina para timplahin ang hawak na alak. Naiiling na lang ako habang sinisindihan niya iyon.

"Shawy, bili ka ngang yelo dali." pinanlakihan ko siya ng mga mata pero wala nang nagawa dahil agad nang nakuha ng kapatid ko ang pera niya.

Umupo ako sa lamesa at hinintay siyang matapos.

"Oh, ako na ang nang libre ha? Nakakahiya naman kasi sa 'yo napagod ka buong araw. Hindi bale, sa susunod ikaw na talaga ang manlilibre."

"Wala naman akong pang-libre sa 'yo, 'no. Wala akong permanenteng trabaho."

Lumawak ang ngisi niya. Tinapos niya ang ginagawa pagkatapos ay agad na sinalinan ang mga baso namin. Tamad ko iyong kinuha ngunit bago pa tuluyang tunggain ay natigil na ako sa mga sunod niyang sinabi.

"Paano kung sabihin kong mayroon ka nang permanenteng trabaho?" nangunot kaagad ang noo ko at naibaba pabalik ang baso sa lamesa.

Lumawak ang ngisi niya at agad na tinungga ang laman ng kanyang baso bago nagpatuloy.

"Nag-resign kanina lang 'yung isang waitress at ikaw ang bukambibig ng mga tao do'n kaya sinabi ni Chekwa na kontakin ka para offeran ng full time na trabaho! Ano, gusto mo ba o gusto mo?!" pagpapatuloy niyang nagpalaglag na sa panga ko.

~~~~~~~~~~~~

This story is already completed. You can now read the full version on www.patreon.com/cengcrdva or VIP group as this will not be updated here anymore to avoid wattpad from DELETING it.
Just message me for full VIP details.
Thank you!
🍀