11:51 pm

Biglang dumilat ang mga mata ni Maria na nanlalabo pa. Sobrang bigat naman ng paghinga niya at nananakit rin ang buong katawan nito dahil sa mga natamong sugat at bali sa iilang parte ng katawan.

Kahit nanlalabo ang paningin at hindi nakakagalaw ay napuna niyang nasa loob siya ng silid sa isang ospital; malinis, hindi maalikabok, at hindi mabaho. Malayong-malayo sa napasukan niyang ospital sa kaniyang panaginip o bangungot.

Bangungot...

Bumilis sa pagtibok ang puso ni Maria nang maalala nito ang nangyari kanina sa kaniyang panaginip. Parang totoong-totoo ito dahil sa ramdam na ramdam niya ang sakit sa ginagawa ni Cassey at halos ikinamatay niya ang ginawa nito kung hindi lang siya nagising.

Isa pa'y lubos din siyang nag-aalala rin siya para sa kaniyang mga kaibigan. Hindi niya alam kung buhay pa ba ito o nasa maayos na kalagayan dahil sa nangyaring aksidente. Lubos siyang nakokonsensya dahil sa kasalanan niya ang lahat. At sisisihin niya talaga ang sarili hanggang kamatayan kung may mangyayaring masama sa kanila.

Natatakot siya sa maaaring resulta ng kapahamakang isidulot niya.

Biglang lumangitngit ang pintuan na nagpatigil kay Maria. Napatingin siya sa gawi nito at nakita niya ang kakapasok na lalakeng doktor. Gusto niyang lingunin ito pero may makapal na bagay na nakabalot sa kaniyang leeg na pumipigil sa kaniya.

Gustong magsalita ni Maria at itatanong sana kung nasaan ang ina niya at kung kumusta ang mga kaibigan nito. Pero hindi niya magawa dahil sa nananakit ang leeg niya kahit bumulong lang.

Napansin niya namang may hinugot ang doktor mula sa bulsa nito. Do'n lamang niya nalaman kung ano ito nang itinaas ito ng doktor at itinutok sa may ilaw. Ito ay isang seringgilya na puno ng malinaw na likido.

Lumapit ito sa kaniya saka itinurok ito sa kulay kahel na bilog sa may hose ng kaniyang IV fluid. Batid ni Maria na ito ay gamot na tutulong sa kaniya para mapabilis ang paggaling, ngunit hindi pala.

Ilang saglit pa ay umepekto na ang itinurok ng doktor. Bigla na lang na nahilo si Maria at ang kadiliman ay sumakop sa kaniyang paningin. Bago pa man ito nawalan ng malay ay narinig pa niya ang ibinulong ng doktor.

"Mag-ingat ka, Maria." Sabi nito na kaboses ni Cassey.