ငါငိုနေတာတွေ့ရင် မနှစ်သိမ့်ပါနဲ့
စုတ်ပြတ်သပ်အောင်ပြိုလဲနေလည်း ကမ်းလင့်မယ့် မင်းရဲ့
လက်ကိုပြန်ရုတ်ခဲ့လိုက်ပါ

ငါက ဒီလိုလူ
အရမ်းမွန်းကြပ်လာတဲ့အခါ လွှတ်ချပြီး
တစ်နေရာရာက ငြိမ်သက်မှုမရှိတဲ့အခါ မတုံ့မဆိုင်း
ချန်ထားပစ်ခဲ့နိုင်တဲ့ ကြောင်တစ်ကောင်လို
ငါက ငါသာရာချောင်ကိုရှာပြီး ဝင်ခွေမှာ
​ငါ့အမွှေးတွေကို သပ်ပေးချင်တဲ့
လက်ဖဝါးတိုင်းကို မာန်ဖီလွှတ်ဦးမှာ
ငါက ငါ့အတွက်ပဲ ကြည့်မယ်လူ
ဘယ်လိုအဓိပ္ပါယ်ရှိတဲ့ ဆက်ဆံရေးတစ်ခုကိုမှ မတည်ဆောက်ပဲ
ဘယ်တစ်ဦးတစ်ယောက်အတွက်မှ
စေတနာ မေတ္တာတွေရှိမနေဘဲ
ငါ့အတွက်ကောင်းမယ်ဆို
အကုန်လုံးကိုနင်းခြေပစ်နိုင်တဲ့လူ

ငါ့လိုလူကိုရှောင်ပါ
ငါ့လိုလူကို မလွမ်းပြနဲ့
ငါ့အတွက်သတိရခြင်းဆိုတာ အလိမ်အညာတွေမလို့
ငါက ငါတစ်ယောက်တည်းနဲ့လုံလောက်တဲ့သူ
ငါ့ရဲ့ လျစ်လျူရှုခြင်းတွေကို အပြစ်တင်ဖို့
မင်းရဲ့ ဂရုစိုက်ခြင်းကရှိခဲ့ရမှာမလို့
မင်းလည်းငါ့ကို လျစ်လျူရှုပါ
တစ်ကြိမ်တစ်ခါမှ ငါ့ကိုငဲ့ကြည့်ပေးဖို့
တောင်းဆိုခဲ့ဖူး တာမှမဟုတ်တာ
​မင်းရဲ့ မျှော်လင့်ချက်တွေကို မင်းကိုယ်တိုင် ရိုက်ချိုးလိုက်တဲ့အခါ မင်းလည်းပဲ ပျော်ရမှာ.. ။