Girlfriendsssss

Jay-Jay's POV

"WALANG TATAKAS!" malakas na sigaw ko na halos ikapaos ko na.

Mga hayop 'tong mga kumag na 'to.

"Lahat tayo maglilinis!" dagdag ko pa bago sila makalapit sa pinto.

"Ang liit ng room na 'to, 'tsaka muka pa namang malinis," sabi ni Calix habang pasulyap-sulyap sa cellphone. "Hinihintay na ko ni Mica."

Dinuro ko siya ng walis tambo. "Ihahambalos ko sa 'yo 'to! Mamaya ka na lumandi!"

Maglilinis na lang ng room tinatakasan pa. Akala mo naman ikamamatay nila. Kamot ulong lumayo sa pinto si Calix.

Pinandilatan ko ng mga mata ang iba para lumayo rin sa pinto. Kumuha ng basahan ang iba at ang iba naman nakiwalis-walis. Si David naman kinuha ang pang-mop at timba bago lumabas.

Bantay sarado ko sila. Nakapamaywang pa ko na parang mayordoma sa isang malaking mansyon. At syempre dahil nakabantay ako dapat walang makakaligtas.

"Hoy Ci-N! Saan ka pupunta?" tawag ko sa batang kumag.

Pasimple pa siyang gumagapang palabas ng pinto. Akala yata niya dahil maliit siya hindi ko siya makikita. Agad siyang tumayo st pinagpag ang damit.

"Susundan ko si David," inosenteng sagot niya.

"Kaya na ni David 'yon. Dito ka, magpunas ka ng bintana," utos ko sabay turo kina Kit at Mayo na nagpupunas ng bintana.

"Susundan ko si David," pag-uulit niya.

"Wag na nga!"

"Susundan ko si David."

"Bakit ba?"

"Susundan ko si David."

Tinignan ko siya ng masama. "Gusto mo masaktan?"

Umiling siya. "Susundan ko si Dabid."

Recorded ba sinasabi nito?

"Lintik! Puntahan mo na nga! Para kang sirang plaka!" inis na sabi ni Felix at inambaan pa siya ng bato ng basahan.

Parang nanalo sa lotto ang batang kumag. Mabilis siyang tumakbo palabas. Agad ko namang hinarap si Felix at tinignan ng masama.

"Bakit mo pinaalis?"

"Hindi ka ba naririndi? Paulit-ulit," inis na sagot niya sa 'kin.

"Nagagalit ka sa 'kin?" galit din na tanong ko sa kaniya. Pinanlalakihan ko pa siya ng mata.

Agad siyang umiling at nakatawang bumalik sa ginagawa.

Ayos din mambwisit 'to!

"Walang tatakas ah? Maglinis kayo diyan," sabi ko habang tinuturo sina Josh na nakalapit na naman sa pinto.

"Ang lupet mo sa 'min," komento ni Drew.

'Yong utang mo malupet.

"May sinasabi?"

Agad siyang umiling at kuwaring nagtanggal ng agiw. Niligin ko ang paningin at napansin ko na parang kulang sila. Alam kong lumabas sina David at Ci-N. Hindi ko na rin binilang ang Hari nila, dahil tanggal na talaga siya sa bilangin.

Wag na siya babalik.

Tapos na ang brriiitttday niya at lahat-lahat tapos hindi pa rin nagbabalik ang hudas. Do'n na lang siyang hinayupak siya. Bagsakan sana siya ng London Bridge kapag nag-falling down.

Pasalamat siya inaalala ko ang tama ng baril sa likod niya kaya mabait-bait pa ko. Kundi, nako! Pasasabugin ko mga eroplano galing United Kingdom, masiguro ko lang na hindi na siya babalik dito.

Binalikan ko ang ginagawa kong pagbibilang. Meron talagang nawawala sa kanila.

Napatingin ako sa pinto ng mapansin ko ang pagdating ni Ci-N na ginagawang kabayo ang pang-mop at si David na mamasa-masa ang buhok at damit.

Naligo?

"Tapos na ba kayo magwalis? Ito na pang-mop," sabi ni David at binaba ang timba na may tubig at kaunting sabon.

"HAAAAYYAAAAA!" sigaw ni Ci-N habang kuwaring hinahampas ang pang-mop na para talagang kabayo.

"Sige! Pag-yan nasira. Muka mo gagamitin namin pang-mop!" inis na sabi ko sa batang kumag bago harapin si David. "Kumusta ang tubig? Refreshing bang ipaligo?"

Dinig ko ang mahinang pagtawa ng ibang Ulupong. Pilit niyang pinakalma ang sarili bago sandaling tignan si Ci-N at harapin ulit ako.

"Kailangan ko pa bang ikwento ang ginawa niya?" inis na tanong niya.

Natawa na lang ako ng malakas. Malamang na napagtripan na naman siya ng Batang Kumag.

"Wag na. Kawawa ka naman," komento ko bago lapitan si Ci.

Pilit kong inagaw sa kaniya ang pang-mop. "Akin na 'yan!"

Ayaw pa sana niyang ibigay kundi ko lang siya inambaan ng batok. Nakanguso naman siyang inabot sa 'kin ang kabayo—este pang-mop.

"Pwede na ba umuwi?" tanong niya.

Umiling ako. "Hindi pa kaya tayo tapos."

"Bakit si Eren? Nakita ko siyang umalis na."

Napahinto ako. Kaya pala parang may kulang sa kanila.

Sinasabi ko na tinakasan ako!

Muntik ko ng mabalibag ang pang-mop kundi ko lang naisip na wala pa kong ipapalit. Bukod do'n, wala kaming gagamitin ngayon. Wala akong planong ipalit ang pagmumuka ko sa pang-mop.

"Ay hindi pa pala siya umaalis. 'Yan pabalik na si Eren," sabi ni Ci habang nakaturo sa tumatakbong Eren.

Handa na sana akong murahin at buweltahan siya pero naagaw ang atensyon ko ng grupo ng mga babaeng tumatakbo kasunod niya. Halata ang galit sa mga muka nila.

Mukang may gulo.

"Itago niyo ko," sabi ni Eren habang taranta sa pagtatago.

Papasok sana siya sa room pero nagbago ang isip niya tapos babalik na naman sana pero papasok na naman sa pinto ng room hanggang sa maisipan niyang magtago sa likod ko.

"Umalis ka dyan! Baka madamay ako," pagtataboy ko sa kaniya pero huli na dahil huminto sa harap namin ang mga babaeng mukang malaki ang galit sa kaniya.

"Hoy ikaw!" sigaw ng isa sa 'kin.

"Hoy ako!" gulat na sagot ko.

"Ikaw ba bagong girlfriend niyang hayop na 'yan?!"

Mabilis akong umiling. "H-Hindi 'no."

Napansin ko ang paglabas ng ibang Ulupong at ang pagsilip ng iba sa pinto at bintana.

"Anong nangyayari?" tanong ni Yuri na may hawak pang walis tambo.

"Sopiea. Anong ginagawa mo rito?" tanong ni Drew sa isang babae malapit sa kaniya.

"Hoy Darlyn!" tawag naman ni Rory sa isang babae pero inirapan lang siya nito.

"Elyanna Shielo? Bakit andito ka? Hindi ka naman dito nag-aaral," tanong naman ni Kit sa isang babae pero sa halip sumagot nagsimula na siyang umiyak.

"Bakit andito 'tong mga 'to? Pati kapatid ni Hyacinth andito," tanong ni Felix kay Eren na nasa likod ko pa rin. "Pati si Princess Jane, taga kabilang school pa 'yan."

"Si Michaila ba 'yon?" tanong ni Mayo kay Kit.

Gulong-gulo na ko sa nangyayari. Karamihan sa mga babaeng 'to kakilala rin nga mga Ulupong na 'to pero bakit si Eren ang pinupuntirya nila?

Parang may hinala na ko.

Pilit kong hinatak si Eren paalis sa likod ko. "Harapin mo sila," utos ko at parang tuko na kumapit sa braso ko ang walanghiya.

"Ayoko . . . Papatayin ako ng mga 'yan," pakiusap niya sa 'kin habang maluha-luha.

"Babe . . ." sabi ng isang babae habang umiiyak. "Bakit mo ko niloko?"

Tumigil kami pareho ni Eren at dahan-dahang hinarap ang mga babaeng masama ang tingin sa kaniya.

"H-Hi Babe," sabi ni Eren habang nagpipilit ng ngiti.

"Totoo nga!" sigaw ng isang babae at sunod-sunod na nag-iyakan ang iba pa.

Napangiwi ako sa mga reaksyon nila. Anong meron sa salitang Babe? Endearment lang naman 'yon.

"T-Teka lang, Irish Divine," awat ni Eren sa babaeng sumigaw ng 'totoo nga'. "Magpapaliwanag ako—."

"Walang hiya ka! Hindi ako si Irish Divine!" sagot naman niya at ngumawa ng mas malakas.

"Ay ano . . . Clarisse pala," pagtatama ni Eren.

"Ako si Clarisse!" sigaw ng isang babae mula sa likod.

Napakamot sa batok si Eren at halatang iniisip pa rin ang pangalan ng kaharap.

Wow. Gaano ba sila kadami at hindi na niya maalala mga pangalan nila?

"Diana Kristine," sabi ulit niya sa kaharap.

Halatang napipikon na ang babaeng kanina niya pa hinuhulaan ang pangalan.

"Ako 'yon! Ano ka ba?!" galit na sabi ng isang babae habang nagpapapadyak.

"Walang hiya ka talaga!" sigaw ng kaharap ni Eren. "Sa dami naming babae mo, hindi mo na maalala mga pangalan namin! JHULIA ANG PANGALAN KO!" galit na dagdag niya bago hampasin ng bag si Eren.

Ayown! Tama ang hinala ko.

Mabilis na umawat sila Denzel at Rory sa babae habang nakapagitna sa kanila.

"Oy! Oy! Teka lang!"

"Relax! Aayusin na 'to."

"Eren! Bakit mo ko niloko?" hagulgol niya bago tumigil sa paghampas.

Napaupo na siya sa sahig habang mas nilalakasan pa ang pag-iyak. At parang ayaw magpatalo ng iba dahil mas nilakasan pa nila ang pag-iyak nila. Daig pa nila mga crying lady sa burol.

"Jay-Jay . . ." bulong sa 'kin ni Ci-N. "Patay na ba si Eren? Bakit nila iniiyakan?"

"Hindi pa naman, pero malapit na. Unahin muna ang iyakan," bulong ko rin sa kaniya at tumango-tango naman siya.

"Sabi mo Eren, ako lang ang mahal mo," sabi ng isa at napaluhod na.

"Reyna, wag ka umiyak," sabi ng kasama niyang babaeng galit na galit ang tingin kay Eren. "Hindi worth it iyakan ang mga gagong kagaya niyan."

"Walanghiya ka Eren. Todo tanggi ka pa na hindi mo ka-text 'yong Angel. Totoo naman pala," panunumbat no'ng isang babae.

"Ako 'yong Angel!" sabi nang isang babae habang nakaturo ang daliri sa sarili. "Ikaw ang itinatanggi niya. Habol daw ng habol 'yong Kate Kristine Joy sa kaniya."

"Ang kapal mo!" sigaw na naman nang isang babae sabay bato ng mamahaling cellphone niya. "Siguro girlfriend mo rin 'yong Jackie Versoza."

"Eh sino si Jean Jaya at Sophia San Diego sa cellphone mo?" tanong nang isang babae sa sulok.

Napakarami!

Pare-pareho kaming nakatingin kay Eren. Pare-parehong hindi makapaniwala na napakarami niyang babae. At pare-pareho rin namin siyang gustong kutusan.

"Kaya pala sabi ni Nezairah at Cyril mag-ingat ako sayo!"

"Nilalandi mo nga talaga ang pinsan kong si Vanessa."

"Siguro totoo na kinuha mo talaga number ni Rain Jane."

"Sino 'yong Shekina na kausap mo? Babae mo rin?"

"Kaya pala parang galit sa 'kin sila Rosilyn at Mikay. Kasi sila rin nilalandi mo na."

"May nalalaman ka pang may stalker kang Maribel Rael at Bea. 'Yon pala pinopormahan mo rin."

"Binalak mo pa talagang ligawan sila Sandy, Gisela at Shaira. Lagot ka sa mga Kuya namin."

Ang tindi!

"Ang dami! Baka nahiya ka pa, gusto mo dagdagan?" sarcastic na tanong ni Felix halatang naiirita sa kaniya.

Sino ba naman kasing matutuwa na parang laruan na kinolekta niya ang mga babae? Dismayado kaming lahat sa kaniya.

Alam ko naman na babaero siya pero hindi ko expect na ganito katindi. Pinag-sabay-sabay niya ang mga babae. At halos hindi na nga niya matandaan ang mga pangalan.

"Pare, babaero ako dati pero hindi ganyan," sabi ni Calix at napailing pa.

"Para kang nangolekta ng damit," sabi ni Blaster.

Napanguso naman si Eren sa 'min. "Anong magagawa ko? Mapag-mahal ako eh."

Ay wow.

"Ang dami mo naman magmahal," inis na sagot ko.

Lumapit siya sa 'kin at humawak na naman sa braso ko. Bubuka pa lang sana ang bibig niya para magsalita pero sumigaw na ang isa sa mga babae niya habang nakaturo sa 'min.

"Sabi ko na! Ikaw ang bagong girlfriend niya!" hinarap niya ang mga kasama. "Siya ang pinalit sa 'ting lahat!"

Galit na galit silang nakatingin sa 'kin. Bigla na lang silang sumugod sa 'min. Agad na humarang sina Yuri at David para tulungan ako pero inabot pa rin ako ng ibang babae.

Si Eren naman nasa likod ko pa rin at ginawa akong panangga. Ang ibang Ulupong naman inawat ang ibang babae. Kagaya ni Drew na nakayakap sa bewang ng isang babae mula sa likod at si Blaster naman niyayakap talaga ang mga babae.

"Walanghiya ka! Ang landi-landi mo!" sabi ng isang babae habang pilit akong inaabot.

Salamat kay Yuri na nakaharang sa kaniya hindi niya ko magawang abutin ng tuluyan, pero nagawa pa rin nila kong kalmutin kanina.

Ang hapdi ng balat ko.

Dahil hindi makalapit sa 'kin ang ibang babae, ibinunton nila ang galit sa mga nakiki-awat. Lalong nakagulo at malakas na reklamo ng mga Ulupong ang nangingibabaw. Pero ang iba nauwi sa pagsasabunutan na malamang ko ay nagka-initan na dahil sa mga rebelasyong nalaman.

Huli ko na napansin na may mga ibang istudyante palang nanonood.

"Jay-Jay!" dinig kong boses ni Ci-N. "Tulong mo ko!"

"Ci-N!" sigaw ko at pilit siyang hinanap. "Saan ka?"

"Dito—aray!" sigaw niya.

Nakita ko siyang nakaupo sa sahig at sinasabunutan ng isang babae.

"David! Si Ci-N!" sigaw ko sa kaniya sabay turo.

Halatang hindi makaalis si David dahil sa babaeng hampas ng hampas sa kaniya. Hindi ako alam kung paano pupuntahan si Ci-N. Kapag sumuong ako sa gitna para na rin akong sumuong sa lawa ng buwaya.

Patay ako nito.

Tinignan ko si Eren na nasa likod ko. Siya lang ang ginhawa sa 'ming lahat. Samantalang siya 'tong dahilan ng kaguluhan na 'to.

"Tulungan mo si Ci-N!" Sigaw ko sa kaniya.

Todo iling siya sa 'kin. "Mamamatay ako."

"Ako ang papatay sa 'yo kung hindi mo siya tutulungan!" galit na sigaw ni Yuri.

Medyo nagulat ako sa reaksyon niya pero may punto naman siya. At kung hindi siya ang gagawa baka ako ang tumapos sa buhay niya.

"Iiihhh..." reklamo ni Eren.

Mabilis ko siyang sinampal. Hindi 'yon gano'n kalakas pero sapat para gisingin ang kahibangan niya.

"Tang'na ka! Pupuntahan mo o pupuntahan mo?" May pagbabanta ang boses ko.

Kahit naiiyak na. Napilitan siyang sumuong sa gitna ng mga nag-aaway. Yumuko at prinotektahan niya ang ulo gamit ang dalawang kamay. Pero hindi pa rin siya nakaligtas sa mga nananakit.

Kalmot, sabunot, sampal at sipa ang natanggap niya bago makalapit kay Ci-N. At nang makita siya ni Ci, agad siyang kumapit kay Eren para makaalis sa kinatatayuan.

Sa sobrang focus ko sa kanila, hindi ko namalayan na may babae na pa lang nakalusot palapit sa 'kin. Bigla na lang niyang hinatak ang buhok ko.

"A-Araaaay!" sigaw ko habang pilit tinatanggal ang kamay niya.

"JAY!" sigaw ni Yuri.

"Anong meron sa 'yo?! Bakit ikaw ang pinili niya at hindi ako?!" sigaw ng babae habang nakasabunot pa rin sa 'kin.

"Hindi niya ko pinili! Walang kami! Kaklase ko lang 'yang tukmol na 'yan!" pilit kong paliwanag sa kaniya.

"Sinungaling!" sigaw niya at akmang sasampalin ako.

Parang may sariling isip ang kamay kong sinalag ang kamay niya at hinawi. Dinig ko ang pag-aray niya at dahil din do'n lumawag ang pagkakahawak niya sa buhok ko. Kinuha ko ang pagkakataon para tanggalin ang isang kamay niya at lumayo sa kaniya.

Sa sobrang bilis ng pangyayari huli na rin niya napansin na nakalayo na ko sa kaniya.

Yes! Ninja moves.

"Ikaw! Hindi pa ko tapos sa 'yo!" galit na sabi niya at akmang lalapit na naman.

Sa sobrang taranta ko at takot na rin na makalapit siya, kusang tumaas ang kamao ko para sapakin siya.

Ay mali!

Bagsak siya sa sahig. Dumudugo ang nguso at ang ilong.

"Bakit mo sinapak?!" galit na tanong ni Eren.

Dali-dali siyang tumakbo at nilapitan ang babae. Naramdaman ko naman ang pagkapit ni Ci-N sa braso ko. Sandali ko pa siya nilingon, ang mga gasgas niya sa muka at magulong buhok ang una kong nakita.

"Apple pie! Sinapak niya ko!" sumbong no'ng babae kay Eren at nagsimulang umiyak. "Ang sakit-sakit!"

"Apple pie. Wag na umiyak. Baka lalong lumala," sabi ni Eren at pilit naghanap ng ipupunas sa muka ng babae niya.

Apple pie na nga.

Huli ko na napansin na tumigil ang lahat sa pag-aaway-away. Halos lahat sila pinapanood si Eren na asikasuhin si Apple pie. Kita ko ang inggit at selos sa mga mata ng ibang babae.

Ang tindi nga naman ng impact ng Ulupong na 'to sa kanila. Niloko na sila at lahat-lahat may tama pa rin sa kaniya.

"Kasalanan niya!" sigaw ng isang babae habang nakaturo sa 'kin.

"Eh ano ngayon?!" sagot ko naman. "Gusto mo din masapak?!" alok ko habang iniaamba ang kamao ko.

Agad naman siyang tumahimik at lumayo. Maging ibang babae ay lumayo rin sa 'kin.

"Section E?" tanong ng kung sino.

Pare-pareho kaming napatingin do'n na si Sir Alvin pala. Hindi ko maiwasan na hindi mag-aalala at kabahan. Kung nasa dating room pa kami hindi ako mag-aalala. Kaso ibang room na 'to, ibang building at may batas na sinusunod dito.

Malalim ang buntong hininga niya bago harapin ang isang istudyante sa tabi niya. "Get their names," sabi niya bago kami ulit tignan na puno ng dismaya. "Clean this mess. I'll wait in the Guidance office."

Halos sabay-sabay kaming nagulat at hindi matanggap ang sinabi niya. Gano'n kabilis kaming ipapa-guidance? Samantalang ang dami naming naka-away sa dati naming room hindi naman kami pinapatawag ng gano'n.

"Sir! Teka lang!" tawag ko at tinangka siyang habulin pero isang braso ang humawak sa 'kin para pigilan ako.

"Tumigil ka Jay," sabi ni David at binitiwan ako. "Kami na lang ang haharap kay Sir."

Naglakad na siya kasunod ni Sir at gano'n din ang ginawa ni Yuri, Felix at Calix.

Bakit pakiramdam ko iba ang pupuntahan ni Calix?

"Anak nang . . ." inis na sabi ko. "Hindi pa tayo nagtatagal mukang mapapaalis na tayo rito sa room na 'to."

Kaniya-kaniya ng apila ang mga Ulupong. Gusto kong magmura, mga isang dosena. Lintik naman kasi! Nananahimik kami rito, bakit naman kasi ngayon pa nila naisipan na pumunta rito?

Tinignan ko ng masama si Eren na kasalukuyang inaasikaso ang Apple Pie niya. Ang sarap nilang hambalusin ng pang-mop sa mismong pagmumuka nila. Gawin ko kayang basahan ang muka nila?

"Apple pie, ang sama niya makatingin," sumbong naman no'ng babae ng makita niya kong masamang nakatingin sa kanila.

Hinarap naman ako ni Eren. "Ano ba Jay? Nabitin ka pa ba sa pananapak mo?" inis na sabi niya.

Agad ko siya inambaan ng suntok. Kundi lang ako pinigilan ni Ci-N aabutin talaga siya sa 'kin.

"Wag . . . kawawa naman siya," bulong ni Ci.

Kumusta naman kaya kaming nadamay?.

"Ikaw may kasalanan nito!" inis na sabi ko sabay turo sa mismong muka ni Eren. "Dapat kasi doon mo sa labas hinarap ang mga babae mo!"

"Jay-Jay naman! Natakot ako eh! Ang dami nila!" maiyak-iyak na sagot niya.

Nang-gigigil ako sa muka niya. Handa naman sana akong tulungan siya kayalang ang putrages, mapapaalis kami dito dahil sa kabalbalan niya.

"Paalisin mo na 'tong mga babae mo! Sa halip na matapos na kami sa paglilinis, nadagdagan pa," inis na sabi ni Edrix at hinagilap ang basahan sa sahig.

Ang iba agad na hinanap ang mga hawak nila kanina. 'Yong mga babae naman ay nagsi-tabi sa sulok.

"Dapat ikaw maglinis dito! Oh kaya 'yang mga babae mo!" galit na sabi ni Mayo kay Eren sabay bato ng basahan sa paanan ng mg babae.

Agad na nag-atrasan ang mga babae dahil na rin sa takot. Ang iba sa kanila malapit na maiyak.

"Hala! 'Yong kabayo—ay pang-mop pala," dinig kong sabi ni Ci kaya nilingon ko siya.

Hawak niya ang pang-mop na hati na ngayon sa dalawa. Nasabunutan ko na lang ang sarili ko dahil sa inis. Magpapalit pa kami ng gamit ngayon.

Nginang 'yan!

"Alam mo, hindi ako ko-komento tungkol sa mga kalokohan mo," mahinahon pero seryosong sabi ni Josh kay Eren. "Pero ngayon, tangina ka."

Medyo kinilabutan ako sa pagmumura niya. Hindi naman kasi palasalita 'yan. Kaya malamang na inis na talaga siya kay Eren kaya ganiyan.

"Tingin ko mas mabuti kung pauwiin mo na 'tong mga girlfriendsssss mo," mahinahong sabi ni Kit. "Oh kaya naman sila na maglinis dito. Tutal malakas ang loob nila manira at manakit."

Tinignan ni Eren ang mga babae niya. Yung iba sa kanila nagawa pang magpaawa pero ang iba nanatiling matapang.

"Maglinis kayo dito!" May pagbabantang utos niya sa kanila.

"Bakit kami susunod—?"

"Maghiwalay na tayo!" putol niya sa reklamo ng babae niya. "Lahat kayo! Mag-break na tayo!"

Kita ko ang gulat at lungkot sa mga mata nila. Sila pa talaga ang nalungkot sa pakikipaghiwalay ng Ulupong na 'to? Dapat nga sila ang makipaghiwalay dahil sila ang niloko.

Iba rin!

"Hindi pwede! Sabi mo mahal mo ko!" sigaw ng isa habang umiiyak. "Ako dapat ang piliin mo!"

"Eren! Patatawarin kita! Basta iwan mo na sila!" sabi naman ng isa.

"Ako ang nauna sa kanilang lahat. Kaya dapat ako ang piliin mo!" singit naman ng isa habang nakaturo sa sarili.

Literal kaming nakatanga at nakanganga sa kanila. Mangha sa kamandag nitong tukmol na 'to. Sa kabila ng panloloko niya hinahabol pa rin siya ng mga babae niya.

Hindi ko kinaya.

"Pre, talo kagwapuhan mo," komento ni Denzel kay Blaster kasunod ng pagtawa.

Siniko naman siya ni Edrix para patahimikin. Nagsisimula na namang mag-iyakan ang mga babae ni Eren. Nagsisimula na ring sumakit ang ulo ko sa kanila.

"Utang na loob, paalisin mo nalang sila," sabi ko pero hindi niya ko pinansin.

"Maglinis kayo rito at mamaya tayo mag-usap!" inis na sabi niya sa kanila bago tulungan si Apple Pie na tumayo.

"Eren . . ." Sunod-sunod na tawag nila na para bang nagtatawag ng milagro sa santo.

Iba talaga! Gwapo eh!

Mabilis silang tinalikuran ni Eren kasama si Apple Pie na nagawa pang umirap sa 'kin. Susunod pa sana ang mga babae niya kundi lang humarang sina Rory at Drew sa dadaanan nila.

"Oy! Oy! Maglinis kayo! Ang galing niyong manggulo tapos tatakasan niyo!" inis na sabi ni Drew.

Pilit nilang pinapasok sa room ang mga babae ni Eren. Inabutan naman nila ng basahan at walis ang iba. Nakasunod lang ako ng tingin sa kanilang lahat.

Hindi maganda ang kutob ko sa pagpapatawag ni Sir Alvin sa guidance. Baka mamaya, paalisin na kaagad kami rito. O kaya naman suspindihin kami. Gusto ko talagang sumunod para malaman ang pag-uusapan nila.

Hinarap ko si Ci-N na kasalukuyang pinagdidikit ang nabaling hawakan ng pang-mop.

"Ci-N, susundan ko sila Yuri sa guidance. Ikaw muna bahala dito," sabi ko at agad na naglakad.

"Sige. Pasalubong na lang. Bagong mop," bilin pa niya bago ako makalayo.

Pasalubong?

Pababa na ko ng hagdan ng matanaw ko si David at Yuri na paakyat naman. Kahit nagtataka kung bakit ang bilis nilang makabalik, agad ko silang sinalubong para makibalita.

"Anong nangyari?" tanong ko sa kanila.

"Ayos na. Kapatid mo na ang nakipag-usap sa guidance counselor at kay Sir Alvin," sagot ni David.

Si Aries?

Ngumiti naman sa 'kin si Yuri na para bang kinukumpirma ang sinabi ni Dabid. Napakurap-kurap ako.

Weh? Hindi nga?

"S-Seryoso?"

Sabay pa silang tumango bilang sagot. Hindi ko alam kung paanong usap ang ginawa nila pero malaki ang pasasalamat ko sa pag-resolba ng problema.

Kakaiba rin bumawi si Aries.