Kuch rishte toot toh jaate hai par khatam kabhi nhi hote. Balki unke jeene ki adaa badal jati hai. Dost badle, dosti badli, dosti karne ka tarika bhi badla. Sab badla, kyuki waqt badla. Aur waqt badla, isliye hum badle. Sirf ghadi ki suiyaan nhi badli, sirf calendar ke panne nhi palte balki bahut kuch badal gaya tha. Inki jagah le li technology ne. Kise pata tha ki ek time ke change hone se technology itni change ho jayegi. Aur is technology ke aane se sirf in cheezon ka asteetatva hi nhi badla balki isne pyaar aur dosti ke maayne bhi badal diye.
Do zindagiyaan badli is waqt ke badalne se. Sameer Naina dono ek dusre se durr the, sirf sheharo ki duri hi nhi thi balki ab toh dil ki bhi duri aane lagi thi inke beech. Par phir aayi ek dor jisne inke tootte hue rishte ko ek baar phir se tham liya, jisne inhe phir se ek duje ke sang bandh diya chahe woh dosti ka rishta se hi kyu na ho.
Friends toh yeh school mein hi ban gaye the, ab baari thi inke Virtual Friends banne ki. 90s mein pyaar karne walo ne kahan socha tha ki pyaar aise bhi ho sakta hai. And Thanks to Mark Zuckerbeg who discovered Facebook. Jo inhe durr hote hue bhi ek baar phir ek dusre ke kareeb le aaya.

Naina's VO
Han yeh sach hai ki jaise jaise daur badal rha tha hum sab badal rhe the, hum sabki life change ho rhi thi, humari lifestyle change ho rhi thi. Tabhi toh Landline ki jagah ab Smartphone ne le li thi, Library ki jagah Google ne, Whatsapp ke aane se Postcard ko ab koi puchta tak nhi tha, Radio ke gaano ki jagah ab humari Playlist ke gaane bajne lage the, TV ko replace kar diya ab Downloaded videos aur series ne, apni Feelings ko dikhane ke liye ab Emojis ka sahara liya jata tha, Photo ki jagah Selfie ne le li, aur inhe sundar dikhane ke liye ab Makeup se zyada Filters use hone lage. Raat raat bhar humari ungliyaan chalne lagi koi silayi bunayi mein nhi balki chatting mein. Hindi English ki jagah ab Hinglish ne li. OMG, LOL, WTF, FYI, TTYL, XOXO yeh sab words ab humari dictionary mein add ho gaye the. Kitna kuch badal diya tha is ek technology ne. Un dino se hum in dinon tak aa pahunche the. Lekin humara kya, humare pyaar ka kya. Woh toh ab bhi un dinon wala hi tha. Koshish kar rha tha in dinon jaisa banne ki par phir bhi rahega toh un dinon jaisa sachha, masoom aur nirdosh hi.
Aur humare pyaar ko un dinon se in dinon tak transfer karne ka credit jata hai mujhe. Jisne shuruat ki thi Sameer ko online stalk karne ki, use phir se apna dost banane ki aur apna dil ek baar phir se tudwane ki.
Jab se maine Sameer ko apni gaali mein do pal le liye dekha tha uske baad se hi mujhe sukoon nhi mila tha. Bhul toh main use kabhi payi hi nhi thi par us din ke baad se mere andar ek toofan mach gaya tha aur us bemausam toofan ko shaant karne ke liye aaya tha Dosti ka mausam jiske liye maine sahara liya tha Facebook ka.  Aajkal ke baccho ki toh paide hote hi ID ban jati hai, par humari gaadi thodi late start hui thi, par khushkismati se ho hi gayi thi.
Jee haan mujh jaisi ladki jise actually mein ek Social Awkward Person ka title milna chahiye, woh Social media par aayi, usne ek ladke ko roz follow kiya aur itna stalk kiya jitna CBI walo ne kisi mujrim ko nhi kiya hoga. Mujhe toh pata hi nhi chala ki kab Sameer ki photo ko School Magazine mein dekhne ki bajaye main use uske Facebook ke posts mein dhundne lagi. Mujhe pata hi nhi chala ki mere din ki shuruat aur meri raat ka anth uske naam aur uski tasveer se hone laga.
Aisa karte karte maine 3 saal guzaar diya the. Mujhe toh kahin baar shak hota hai ki agar yeh Facebook na hoti toh kaise main itna waqt uske bina kaat paati. Par phir achanak kuch toh hua jisne meri is masoom se love story ko ek Virtual love story bana diya.

In Naina's House
Bela- Naina kya beta jab dekho tu is phone mein hi ghusi rehti hai. Pehle teri kitaabein aur ab yeh naye zamane ki bala.
Dikha zara main bhi toh dekhu kya dekh rhi hai.

Naina- Nhi..ku..kuch..kuch bhi toh nhi hai Mummy.

Bela- Accha thik hai yeh sab chod aur so ja ab.

Naina(to herself)- Haash bach gayi aaj nhi toh Mummy aaj Sameer ki photo dekh hi leti.
Par kab tak main bas use aise hi dekhti rahugi. Kya Gannu ji kaisi kahani hai humari. Na usse kuch kehne ki himmat hai aur na usse chupane ki. Mann toh karta hai use Friend Request bhej hi du. Par kya sochega woh mere baare mein; sochega toh tab agar main use yaad bhi hoyungi. 5 saal ho gaye ab toh School chode hue bhi. Ab kahan yaad hoyugi main use. Kya karu?

Her Heart says- Bhej de Naina, yeh use decide karne de ki tu use yaad hai bhi ya nhi. Aur waise bhi Geeta mein likha hai Karam karo phal ki chinta mat karo. Aur jab pyaar kiya toh darna kya.

Her Mind says- Par kya usne pyaar kiya hoga tujhse. Nahi, toh phir tujhe darna chahiye. Aur kaise tu ek ladke ko request bhej sakti hai aur woh bhi yeh jante hue ki teri friend list mein ek bhi ladka nhi add hai. Kya sochega woh, kya sochega tera parivaar, kya sochega yeh samaaj.
Tu aisa nahi kar sakti.

Her Heart says- Bhej de, kuch mat soch. Ek friend request bhejne se tera character nhi decide ho jayega. Is dil par bharosa rakh aur bhej de.

Her Mind says- Nahi bhejni use koi request. Nahi matlab nahi.

Her Heart says- Han

Her Mind says- Nahi

Her Heart says- Han

Naina- Bas karo.

Bela- Kya hua naina tu chillayi kyu.

Naina- Woh Mummy cockroach tha. Sab thik hai aap so jao.

Naina(to herself)- Gannu Ji help karo na meri. Bhej hi deti hu uske baad jo hoga dekha jayega.

Friend Request Sent.

Otherside in Sameer's Hostel
Sameer(to himself)- Ab is waqt kiski notification aa gayi. Yeh toh friend request hai kisi ki. Dekhta hu.

Naina Aggarwal, Naina ne mujhe Friend Request bheji hai. Sach mein yeh toh Naina hi hai. Finaly jo kaam main nhi kar paya aaj tak woh isne kar diya. Roz iski profile check karta hoon. Roz dekhta hoon apni Naina ko. Par kabhi himmat hi nhi hui use Request bhejne ki.
Par kya mujhe yeh accept karni chahiye, main toh nafrat karta tha na isse. Main sach mein nafrat karta tha Naina se? Nahi nafrat toh nhi, bas naraaz tha. Tha nhi abhi bhi hoon.
Par kuch bhi ho jaye yeh accept toh main karuga hi. Abhi karu ya subah karu. Subah hi karta hoon kahin woh kuch galat na soche mere baare mein.

Tabhi woh apna wallet nikalta hai aur usme Naina ki photo hoti hai jo usne Facebook se hi li hoti hai.
And he kissed it and slept.

In Night at 02:00am
Sameer(to himself)- Kar hi leta hoon. Aisa toh main so hi nhi payuga. Aur woh konsa abhi jaag hi rhi hogi.

Friend Request Accepted

Naina(to herself)- Main sapna toh nhi dekh rhi. Usne meri Request Accept kar li. Thank You Gannu ji.

Aaj Main Upar Aasman niche
Aaj Main Aage Jamana hai pichhe
Aaj Main Upar Aasman niche
Aaj Main aage Jamana hai pichhe
Tell me O khuda abb main kya karu
Chalu sidhee kee Ulatee chalu

Naina's VO
Pyaar mein Pagal hona kise kehte hai yeh mujhe us din pata chala tha. Tabhi toh ek friend request bhejne ke liye mere dil aur dimaag ne world war jo start kar diya tha, karta bhi kyu na aakhir mere pehle pyaar ki pehle ladke ko pehli friend request jo thi. Woh request bhejne ke liye tab maine kya kya nhi socha tha Geeta ke shlok, parivaar, samaaj, character. Lekin yeh mujhe hi pata hai ki tab mera dil kitna zor se dhadak rha tha shayd utna hi jitna apna pyaar ka izhaar karte waqt dhadakta hai. Par mujhe khushi hai ki aakhirkar is jung mein jeet dil ki hi hui, jeet pyaar ki hui thi. Aur us jeet ka phal bhi toh mujhe itni jaldi mil gaya tha. Aur woh phal itna meetha laga tab mujhe ki main kya btayu. Tabhi toh raat ke 2 baje main baawro ki tarah gaana gane lagi thi. Par baat thi bhi mere liye bahut special. Us din ke baad se toh mera har post jaise uske liye hi hota tha. Par tab mujhe kahan pata tha ki yeh Facebook friendship ki khushi bas kuch dino ke liye hi thi mere liye.

After Few Days
Sameer(to himself)- Yeh kya Naina ne aaj ek post daala hai. Like karu kya, haan toh usme kya hai. Waise bhi isme konsa woh hai yeh toh uske ghar aaye hue Ganpati ji ki photo hai. Kar deta hoon. Mera pehla like kisi ladki ke post par.

Sameer's VO
Humari kahani in dinon tak toh aa hi gayi thi par yeh un dinon ko bhi chod nahi payi thi. Tabhi toh hum dono ek virtual friendship ke liye aise darr rhe the jaise shaadi ke liye koi proposal bhejna ho. Pyaar mein log kya kya nhi kar jate aur apne use first time ko hamesha yaadon mein taaza rakhte hai. Chahe woh first bike ride ho, first movie date ho ya phir first hug. Aur main..main yeh yaad rakhuga ki maine pehli baar ek ladki ke post par like kiya. Wahh yeh tha mera Pehla Pyaar.
Aur woh like Naina ke liye sirf first like hi nhi tha balki last bhi tha kyuki uske baad himmat hi nhi hui uske kisi post ko like karne ki. Shayad apni naraazgi jaahir kar rha tha uske post pae Like na karke. Par like nhi kiya toh kya hua uske har photo ko ghanto tak niharta toh rehta tha. Aakhir yeh bhi toh mera pyaar hi tha. Par bhala ho us Facebook ka jisne mujhe meri Naina ki ek photo toh dilwa di. Warna School mein toh aisa mauka hi nhi mila kabhi. Chahe kitni bhi naraazgi ho, gussa ho ya nafrat ho uski photo humesha mere kareeb rehti thi. Aisa lagta tha jaise har kadam par woh hi mere saath ho.
Lekin humari yeh dosti ko bhi lagta hai humari hi nazar lag gyi. Kyuki yahan hum ek dusre ke dost toh the, par isse zyada kuch nhi tha. No likes, No comments, No Messages, No birthday wishes. Bas ek dusre ki posts ko dekhte rehna.

After few Days
Naina(to herself)- Kitni posts paata hai yeh Sameer. Par kuch bhi kaho har photo mein ekdum hero lagta hai.
Ek minute yeh iske hath mein ring. Yeh toh Ring Finger hai. Matlab he is engaged. Par aisa kaise ho sakta hai. Kya pata kisi ne use propose kiya ho aur...

Yeh sochke hi Naina ki aankhein bhar aati hai.

Naina(to herself)- Kahin main phir se uski life mein interfere toh nhi kar rhi.
Mujhe use request bhejni hi nhi chahiye thi. Galti kar di maine. Sunaina ne school mein shi hi kaha tha ki main Sameer ki life mein teesra insaan hi hoon jo uske aur kisi aur ke beech aa rhi hoon.
Aur waise bhi woh ab bahut badal chuka hai, ab main uske jaisi nhi rhi. Woh life mein bahut aage badh chuka hai, uske shauk badal gaye hai, dost badal gaye, shehar bhi badal gaya hai. Ab mujhe usse dur hi rehna chahiye.
M

ujhe use unfriend hi kar dena chahiye.

Unfriend

Sameer's VO
Yeh thi naye zamane ki dosti aur naye zamane ka breakup. Us din mujhe bahut gussa aaya tha kyuki mujhe laga pehle woh khud friend request bhejti hai aur phir baad mein khud hi unfriend kar deti hai. Par tab mujhe kahan pata tha ki Naina ab tak us Sunaina ki baaton mein uljhi hui hai. Woh Sunaina jo ab humari life mein exist hi nhi karti. Aur uske na hote hue bhi usne ek baar phir se meri Naina ko mujhse durr kar diya. Manta hoon ki is dosti ke tootne mein itna dukh nhi hua tha kyuki yahan humne aisa koi khaas lamha jeeya hi nhi tha, koi pyaar ka ehasas hua hi nhi tha. Par phir bhi tha toh yeh yeh modern zamane ka breakup hi. Hum dono ki umar toh badh rhi thi, dheere dheere mature bhi ho rhe the par humara dil toh ab bhi bachha hi tha. Tabhi toh apne Pyaar ke liye humne in cheezon ka sahara liya tha. Itne saalon baad humare Pyaar ki seedhi mein dosti ka pehla kadam uthaya bhi toh is Virtual Word se, toh seedhi ka girna toh tay hi tha. Shayad un dino ke pyaar mein in dino ki technology kahin fit nhi baith payi. Aur na chahte hue bhi Naina ka dil ek baar phir se toot gaya tha. Par yahan galti uski hi thi kyuki agar usne mujhe ache se stalk kiya hota toh use pata hota ki uski tarah meri friend list mein bhi woh hi pehli ladki thi jo meri friend thi. Par jo bhi ho yeh bhi humara pyaar hi tha jo hume aisi harkatein karne ko majboor kar rha rha.

Dosti ka mausam toh le aaye the yeh dono par shayad bhool gaye the ki yeh mausam hai jisme kabhi dhoop toh kabhi chaav hai. Zaroori nahi mohabbat mein roz baatein ho, khamoshi se uske posts aur messages ka intezaar karna bhi toh Ishq hi hai. Naye zamane ka Purana Ishq!

।तेरे लिए।