#لا_ياصديقي

#المحطة_الخامسة

#بقلمي_سارة_المجيد

مساءكم عسسسل يالعمر كلوو

🌹🌱🌹🌱🌹🌱🌹🌱🌹🌱🌹

غرور ..اوووووف اوووووف ياكلبي

علاء ..وبهل اثناء رجع انسد التلفون .. وايضا انشغل .. كلت هاي اختها غير واهس ليل ونهار تحجي بلتلفون من خررب حظي خليها لاختج شوية تحجي ..

المهم كعدت الصبح وك العادة .. تعرفون شغلي .. بس كالي خالد علاء تعال .. روح جيبها .. اني طيران ع سيارة ورحت .. اجتي .. فتحت باب الصدر وركبت يمي .. هاي شنو مو من عوايدها 😨..

غرور ...بعد اركب يمك هنا قبل لا نوصل ارجع ليورة شتكول 😉 .. وغمزت ..

علاء ..اني كتلها على راحتج وين ما تحبين تركبين .. هيه ركبت وكالت علاوي شغلي اغنية شي ..

شغلت الها اغنية هيه حسيتها طارت بغير عالم وتدحج علي .. كلت معقولة .. معقولة تحبني ..

اشافت بيه لخاطر تحبني .. وهيه تغني ويا الاغنية وتدحج وتأشر عليه .. واني فاتح حلكي ما احس واذا هورن قوي باذني ..

واذا اني صافن بلترفك لايت .. وره مسافة وكفت نزلت ورجعت صعدت ليورة ..مشيت وصلتها .. بس صرت اكعد ع نار بين ما تطلع .. طلعت وهم ركبت ليوره .

وره مسافة كعدت يمي ..وهم شغلت غير اغنية وحركاتها كلها توحي ان هيه تحبني .. الله ..

اخيرا انسان حبني على وضعي .. اخيرا .. شفت يا شاهين .. شفت .. شفت ان اني هم اكدر احب واكدر الكه الي يحبني ... معبالك بس انت تنحب شايف نفسك عليه مدري ع ايش 😏





و وصلتها و رجعت للبيت .. وهم انتظرت ال 11 وبلشت ادك .. وطلعت روحي يله حصلتها .. وجاوبت بضحكة تخبل .. ورجعت اول ما حجت بدت تعيدلي الاغاني .. واني فاتح حلكي واضحك ..

غرور ..علاء .. اني وضعية التلفون بدت تضوجني يوميا اخوية كابس عليه يريد يحجي ويا صاحبتو واختي كل النهار ويا حبيبها .. اريد اطلع وياك واحجيلك ..

علاء ..اني من كالت هيج .. عيوني وكفت .. كلت بيني وبين نفسي  الله موعد ..الله صدك لك صدك تحبني هاي ..

الله يا ربي شكد حلووو شعور الحب من تحس انسان يحبك .. كتلها ماشي .. بس خلي اخذ اجازة من الشغل واجيج بعدني ما مكمل كلامي بس كالت اوك اوك يله باي باي وسدتو ..

سديت التلفون وذبيت السماعة وشمرت نفسي ع الجرباية ورحت لغير عالم حتى حلمت بيها بذاك اليوم 😍

في مكان اخر ..

شاهين ..رجعت من الدوام سبحت وبدلت كلت اروح للمحل جان عدنه محل كوزمتك اخوية الاصغر من ستار كاعد بي طبيت اخذت عطر الي لان عطوري خلصن كتلو عبدالرحمن اذا اجه ابن عمنه طارق انطي فلوس من الدخل لان راد مني وماجنت شايل بجيبي خطية انطي من المحل واني عود اسدهن بعدين

عبدالرحمن ..ماشي خيي صاار

شاهين ..عفيه خيي ..وبهل لحظة داطلع جان اتصير سما بوجهي ..جمدت بمكاني لايالله شجابها هاي ..جانت وياها امها ووحدة ماعرفها مراة كبيرة ...

سما ..من عافني شاهين انجبرت اخذ ابن خالتي حتى لا اعنس واضيع المشيتين ..اضطريت اقبل بابن خالتي ..

ومن كملت الكعدة واتفقوا اخذتني امي وخالتي حتى نشتري الذهب وباقي النيشان من ملابس ومكياج وعطور ..

اني اخذتهم ع محل بيت شاهين لان ادري هوه من ينزل من دوامو دائما يروح للمحل ردت اشوفو لاخر مرة 😔

واحلا صدفه جانت اول ماطبيت صار بوجهي يممممه حسيت گلبي يريد يطلع من صدري ويحضنو ..
شكد مافرحت ردت اشبكو واشمو كدام امي وخالتي بس كوه لزمت نفسي ..

امي كلتلو ها يمه شاهين شلونك امك شلونها

شاهين ..احم هلا خالة الحمدلله ربي يسلمج اتفضلو المحل محلكم ..انداريت ع اخوي كتلو عبد دير بالك ع الجماعة ..

طبوا النسوان و وراهم سما
ردت اطلع جان تلزم ايدي وهمست بأذني كالت بداعتي ابقه خلي املي عيني منك اعتبر هذا طلبي الاخير الك

شاهين ..خررب حظي غير بلوة هسه تفضحنه هاي ..وخرت ايدي من ايدها وخزرتهأ بعيني ماكدرت ابقه ردت اروح لبيت عمي ابراهيم مشتاق للحبيبة ...

شفت عيونها غوركن خليت وطلعت ..رحت لبيت عمي ابراهيم دكيت الباب طلعت عمة زهور رحبت بيه وطبيت شفت جديتي سلمت عليها وبست راسها وكعدت

جدة ..ها يبن جاسم شلونهم اهلك

شاهين ..بخير جدة الحمدلله خو انتي ذبيتي اقامة هنا بعد ماتجين يمنه

جدة ..اي كافي كضيت عمري يمكم بعد وفاة جدك الله يرحمو هسه خليني اعيش باقي عمري يم ابني ابراهيم خلي اشبع منو

شاهين ..اتربعت بصفها وبست ايدها كتلها الله ينطيج الصحة والعافية جدة ويطول بعمرج ...

هنا اجت غزلاتي تتمايل بمشيتها يممه فديت هل طول عيوني وكفن عليها وجان ما حس اله جدتي تكفخني ع راسي

جدة ..شاهينووو نزل عينك يول لا افكسهن الك

شاهين ..اااااخ جدة شبيج نزلتي مي العمى بعيني هسه شسويت اني 😣

شهلاء ..هههههه هلو شاهين شلونك

شاهين ..عدلت كعدتي كتلها هلا شهولة الحمدلله انتي شلونج😍

شهلاء ..تمام بخير

جدة ..ول شاهين هذا صاحبك علاء شو مالو ذچر وينو جان كل وكت يجي يشوفنه شمحتاجين مامحتاجين هسه اختفه بعد

شاهين ..ذكرتني جديتي بصاحبي اوووف علاء كسرتلي گلبي شكد بذات راح ذيج الروحة وبعد ولا سئل .كتلها والله يا جدة علاء للاسف زعلان مني ..بسبب شقه اتشاقينه ويا اني واخوتي

جدة ..اه انزول علي ليش يزعل منك انتوا رابين سوا

شهلاء ..اي صحيح شاهين صارلو هواي علاء مديجي قبل جان كل وكت يمر علينه من انت بالدوام فجأة اختفه

شاهين ..اي مثل مكلت صارت شغلة بينه شو ماتحمل الشقه وزعل وعافني ..

شكد دزيت علي جماعة يحجون ويا ..وحتى اني رحت لحد عندو ردتو يرجع مارجع وظل مصر ع زعلو شسويلو بعد ...

جدة ..ميخالف واني امك مصيرو يردلك اني اعرفو لعلاء مايكدر يستغنه عنك ..انتوا اثنينكم اتربيتوا سوا وكبرتوا سوا يعني انت بمقام اخو الكبير اكيد ماينسه افضالك علي

شاهين ..الله كريم جدة انتظر شسوي ..
دحجت ع شهولتي غمزتلها يعني روحي للمطبخ اريد احجي وياج ..

جدة ..ها شاهينوو شبيها عيونك طب بيها تراب اشو دترمش ولك

شاهين ..من خرررب حظي متكوليلي ياجدة شلون تشوفين ..احم كتلها يله جدة اني رايح

شهلاء ..خربت ضحك ع شاهين كل مايجي جديتي تقصفو 😂
احسن يستاهل 🙄

شاهين ..خلصت اجازتي والتحقت لبغداد ردت اروح لمنطقة العلاوي حتى اشتري جهاز بلي استيشن نتونس بي بالدوام ويه ربعي ...هناك المحلات مال هيج شغلات 
طبكت سيارتي جانت عندي سوبر 90 بعدها بلجيس

المهم .. نزلت افتر اريد اشتري  بلي استيشن ...واني خال ايدي بجيوبي خايف ع الفلوس  تنباك لان هوايه اتذكر الجهاز الواحد جان سعرة ب500 الف دينار ...

كولوا اشتريت واحد وسيديات ورجعت
ادور السيارة .. واذا السيارة ماكو 😂
لا يلكعبة .. وبذيج الفترة اذا تتذكرون جان اكو بوك سيارات
اروح وارجع افحص السيارات وحده وحده ماكو سيارتي 😂

والله 4 مرات الزمو للشارع روحة رجعة ماكو اتخبلت سيارتي اختفت ...

وجان اكطع الامل واطلع ع شارع العام اريد اخذ تكسي

وجان ويا ما اطلع ع شارع مادري شلون انادريت واذا سيارتي طابكة بمكانها 😂
اثاريني من فرحتي بالبلي انثولت وماكمت اشوف 😂
والله نزلت من التكسي ورجعت شغلت سيارتي ورجعت للوحدة مالتي ...

في مكان اخر

علاء ..بلشت احلم شلون راح يكون موعدي الاول .. واهم شي شاهين ما يدري وما موجود ويخرب عليه الموعد خلصت منو ومن دكاتو بيه ..

يالله شراح البس شيصبرني لما نطلع .. رجعت صفنت .. كلت زين شوكت .. شو ما كالت شوكت نطلع ..

اووووف يحظي اسئلها كول احجي شبيك ضام راسك ..من اصخام الصخمك دومك مطفي يله اشوف شلون اسئلها ..

نمت وكعدت رحت لشغلي .. بس اني احس نفسي انسان جديد .. واضحك واشتغل واغني .. صاحني خالد ..

خالد ...ها علاء شو اليوم مطرب وتغني .. شصاير وياك 🤔 ..

علاء ..اني تخربط وضعي اخاف منو .. كتلو لا ماكو شي بس كعدت اليوم نشيط ..

خالد ..هااا نشيط .. اي بلكت تبقى نشيط .. واليوم بلليل اريد ادزك ..

علاء ..اني كيفت من كالي هشكل .. كلت يالله حتى اشوف حبيبتي .. صفنت على روحي ..

شنو حبيبتي معقولة حبيتها اني .. اااااخ .. قلبي عصرني .. تصير بمعدتي مغصة من احد يجيب طاريها ..

معقولة هذا الحب  اوووويلي غرور خردلتني .. اجه الموعد ركبت وطلعت اصارع الريح حتى اوصل .وصلت وركبت بلصدر ك العادة .. تنورة قصيرة ..

من صعدت بلسيارة صعدت .. يبوووو انهجموا اهلك علاء .. هاي رجلين لو سيراميك .. هيه انتبهت ضحكت نزلت التنورة ..

غرور .. ههههههه عينك .. علاء صاير وكيح ..

علاء ...اني خجلت ودنكت راسي ...

غرور ههههههه امشي امشي اووف منك ..

علاء .. مشيت وسئلتها .. كتلها تردين نطلع شو لا كتيلي وين و شوكت ..

غرور ..اي .. دحج باجر اكيد خالد ما يدز عليه .. باجر نفس الوقت تجيني هنا .. وتاخذني ونروح لمكان وحدنه ما اريد احد يشوفنه .. ماشي ..

علاء ..اني گلبي فرفح .. كلت اي اوك الي تشوفي ... وصلتها يم خالد بلمكتب واني واكف بره گلبي ياكلني شديسوون جوه ..

اريد اسوي شي يطلعهم .. نزلت على المعمل جوه وجان اتحارش بواحد من الحراس مال المعمل .. و اسوي ويا عركة وصياح ..

شكوللكم .. موتني ضرب .. واني اكول ميخالف تصير هوسه ويطلع من المكتب ويعوفها .. اتحمل لخاطرها ..

طلع خالد ع صياح بس بلبنطرون

خالد ..شكو هاي شنو هل هوسة ..

علاء ..واجه والحراس الباقين خلصوني من ايد هذا الوحش .. اخذني خالد للمكتب طبيت .. لكيتها تعدل بملابسها .. اني دنكت .. وطبيت غسلت وجهي .. وكعدت بصفحة ..

خالد ..شبيك علاء شنو الصار ليش هذا ضربك

علاء ..هذا كل ما انزل يظل يحشش عليه .. ابو رعشة وابو رجفة .. اني هذا مرض الله .. خومو بيدي .. ودنكت ..

خالد ..ميخالف لا تدير بال .. واني اشك حلكو الك ..

علاء ..بگلبي كلت وينك يا اخو دربي وينك ابو سرحان .. جنه نلقب شاهين ابو سرحان بشبابو لان هاي كنية الذيب ..

هوه جان قلبو ميت مثل الذيب .. و ما يعوف حقو ولا حقنه لو يعرف الموت وراها .. كلت وينك وتجي تشوف حالي .. مشمور بزاوية المكتب  كاعد مقرفص رجلية و وجهي ملخ من الكتل .. اااااخ شكد مشتاقلك ياخيي احس نار بداخلي دتنهش بيه ع فراكك 😭😭

لو تسمع بالي جرالي جان حركت المعمل بلي بي من ورايه .. هسه عرفت قيمتك يا اخويه .. 😔😔

((وبدت معالم الندم تضهر ع علاء بعد ما خذل صاحبو ورفيق دربو ..هسه من وكع ياله عرف قدرو بس منعرف راح يسامحو شاهين لو يطردو ))

علاء ..صاح بيه خالد شبيك ما تجاوب .. صحيت على نفسي .. كتلو العفو استادي ما انتبهت ..

خالد ..البنية كاعد تحجي وياك .. كالتلك سلامتك

علاء .. الله يسلمج .. كمت اشيل بروحي كوه احس جسمي مفصخ تفصيخ من الضرب الاكلتو من هل متوحش البره ...

خالد ..اوكف وين ابقه اكعد ارتاح ..

علاء .. لا اخليكم براحتكم اروح اكعد بلسيارة

خالد. ..يله انت خربت الكعده بعد .. اخذها وصلها ..

علاء ... اني طلعت واضحك بگلبي لان خربت الكعدة مالتهم ..لان من اشوفها تدخل يمو الف شيطان يركبني اريد اطب احرك المكتب ع راس خالد بس شسوي مابيدي حيلة غير الي سويتو والحمدلله جابت نتيجة وخربت الكعدة عليهم ...

طلعت وراية هيه ركبت .. وهم بعد مسافة كعدت يمي

غرور .. يا لئيم سويت هاي الهوسة حتى تطلعني .. شنو علاوي تغارين يا حلوووة ..

علاء .. حجت هل حجاية تتموع كدامي وتضحك .. اني دنكت وسكتت .. هيه خربت انوب ضحك ..

غرور ..واضح جوابك واضح هههههه ...

علاء ..دحجت عليها اتنهدت ومشيت و وصلتها لمكان بيتهم ..

غرور ..باجر لا تنسى موعدنه ماشي يا اموره انتي .. فدوة للعيون المزروكه ..حجيت هيج واضحك ههههه ..

علاء ..ماشي تمام ..رجعت للبيت شافتني اختي .. كالت يبووووو علاء شصاير بيك .. كتلها هيج كلشي كلشي بس شوية مشكلة واحد تعده عليه بلشغل ..

اختي ..اووووف منك .. هسه لو شاهين يدري مو جان فزعلك واخذ حقك .. ظل انت معند وراسك يابس ظل ..

علاء ..كلامها صحيح والله فلا جنت اخاف من احد من جان شاهين بظهري جنت احس عندي سند بس وين بعد كلو بسبب كبريائي خسرتو لصديق عمري ...

كتلها بطلي حجي و وخري من يمي ما اريد لا مساعدتج ولا مساعدت هذا شاهين .. المتكبر .. شايف نفسو جبير ع الكل .. محد بعينو .. وخري .. طبيت للحمام .. و دحجت بالمراية على وجهي شصاير بي ..

كلت بگلبي صح كلامج يا اختي بس هذا الحال شسوي .. سبحت وطلعت .. ومددت بغرفتي ضلوعي وجسمي كلو يوجعني .. وكعدت افكر بموعدنه مال باجر وشنو راح البس و شنو اكول وهيه شنو الي تريد تكولو ..

وكعدت ارتب بلملابس العندي .. صارت ساعة 11 .. وبلشت ادك ادك ادك ادك .. كووووله مشغول وعبرت ساعة 1 .. كلت ما بيها امل احجي وياها اليوم .. يله مو مشكلة باجر اشوفها .. ونمت وكعدت الصبح نشيييط .. وركض للشغل ..

وكملت شغلي وبسرعة .. جنت خايف لا يدز عليها .. وينلاص كلشي .. والله وانتظرت يقرب الوقت ..

طبيت على خالد كتلو استادي .. اليوم ..اترخص منك اريد اطلع من وكت من الشغل ..

خالد ..ها خير وين ..

علاء ..اليوم يردون يجونه خطار .. وامي كالت تعال من وكت حتى تستقبلهم ..

خالد ..اهاا .. ماشي روح ..

علاء ...شكرا ... وطلعت
ركض جنت طاير من الفرحة راح اقابل حبيبتي اووويلي غرور بهذلتي حالي شسويتي بيه صرت مسودن من وراج ...

طلعت اركض اريد الكف السيارة .. ركبت ودوووس .. مشيت واني افكر شنو اسوي شنو اخذ .. شنو احجي .. تذكرت شاهين شيسوي من يطلع ..

كلت اطبق مثلو .. شو ولا وحده تطلع ويا وترجع ضايجة .. مادري ساحر ما اعرف شيسوي وياهن .. يرجعن انوب متخبلات علي .. ف وصلت بلمكان نفسو ..

شو ماكو هيه .. انتظرت شوية .. على امل ان تجي .. ماكو .. بديت اكطع الامل .. واكول بيني وبين نفسي .. يمكن دتلعب بمشاعري .. على شنو تحبني .. شعندي اني ينحب حتى تحبني ..

واني مدنك .. وافكر ما احس واذا باب السيارة انفتح .. دحجت واذا ....

#وللحكاية_بقية ...

وبدت غرور تلف حبالها حول عنق علاء حتى يكون الها ستارة لكل الاعيبها الدنيئة بعدين انشوف علاء شلون راح يوكع بشباكها الخبيثة وشنو الدمار الي راح يلاقي بسببها ...كل هل احداث المشوقة راح انشوفها بالبارتات الجاية ...

يتبع ...

#سارة_المجيد🎀