احم ادري المفروض انزل بارتات هواي وكذا
بس الله يسلمكم ايدي متعوره وماكدر اكتب هواي
بس شوي حضغط على روحي واكتبلكم هل البارت..

المهم شلونكم ياگماعة انشالله بخير..
انه بخير اذا انتو بخير...
اليوم حبيت احجيلكم موقف صار وياي ....
بمحافضة كربلاء... من رحت زيارة ...
انه من جنت اصغيرة اروح للأمام اشوف الناس تبجي ودموعهم مثل الشلال ...
بيني وبين نفسي زين انه ليش مابجي مثلهم...
كبرت وفهمت الي يجي للأمام معناته مهموم..مكسور...
عنده الم محد حيفهمه غير الوسيط الي بينه وبين رب العالمين...
فا مرة جنت حييل تعبانه ومخنوكه بوقتها ماما كالت امشو نروح للأمام نزور وهم نفتر شوي انه جان مالي خلك حتى امشي ...
ظلو يتوسلون بيت خالو بيه ورحت وياهم بس ماشارك بشي وياهم ملتزمة الصمت...
واريد ارجع للبيت بسرعه ....
كلساع يوكفون بمكان وانه روحي طافرة اريدهم يفكون ويمشون ماكو المكان يوكفون بي ساعة...جان بابا واخوي وبيت خالي ويانا..اجى بابا يمي كلي شبيج
كتله مبيه شي
كال لا اكو شي
كتله بابا يمتى يخلصون اريد ارجع للبيت نعسانه وتعبانه..
كلي بس لامريضه كتله لالا مو مريضه بس اريد ارتاح شوي
كلي هسه من ترحين للأمام ترتاحين انه شوي عبس وجهي لان اريد ارجع خلص تعبت وبوكتها كلياتي وكلساع اشرب مي ... المهم ظلينا نمشي اختي الجبيرة كاضة ايدي علمود لا اتيه..
وصلنا للأمام بعد تفتيش ونودي التلفونات للأمانات...دخلنا بس شنو ازدحام موت...
امي ماقبلت ادخل كالت ماكدر ادخلج بهيج ازدحام اتيهين مني ...ابوج ميقبل كتلها هوا شنو انه صغيرة ياندخل سوا يانتطلع سوا وصدك طلعنا برا كعدنا بالصحن مال الامام الحسين(ع)...
كمت صليت الزيارة للأمام وقرأت الزيارة وكعدت وانتضرهم يخلصون علمود نروح للأمام العباس(ع)
تصدكون بس كعدت بجيت كأنو احد كلي ابجي ابجي ظليت اباوع للقبه مال الامام وازيد بجي وادعي
احسه علم بحالي شنو.. مو احس وانما اكيد...
عيوني انفخو وصارو حمررر بس محد انتبهلي لان كاعدين يصلون ...
جانت مره اربعينيه كاعدة يمي كاعده تقرأ قرأن التفلتي باوعت بوجهي انه استغربت ليش تباوع بوجهي ...
كتلها خاله رايدة شي محتاجة شي..
كلتلي مدام وصلتي للأمام وبجيتي بصحنه الشريف كل همج راح وانطتني سبحه لونه ازرق شون لون البحر ...
كالت هاي مزوره من الكعبه اخذيها ضميها عندج وكلما يضيق الحال بيج سبحي بيها وانشالله زال همج...
تصدكون رجعت للبيت لاتعبانه لانعسانه الخمول الي بجسمي راح والسبحه كل ما يضيق الحال اسبح بيها ..
وهيه لحد هسه موجودة عندي..
اكو اشياء انكون ماراغبين انروحلها او نكون بحالة خمول ...
بس من راح اتروحله ويزول الهم الي بيك صدكوني راح تتمناه تروحله كل يوم....
مثل هسه انه اتمنى اروح للأمام بس بهاي الاوضاع منكدر ...
القصد ..
جانت الاوضاوع زينه والحمدالله ماكو شي بس قليل انروح للأماكن المقدسة...
وهسه نتمنى يوم واحد بس انروحله....
في اشياء من تتقربلها راح يروح كل الضيق وتفرج همومك...
اتمنى لو اذهب الى حرمك الشريف لأستلقاء على ارضك...💭👑🖤

كونو انتم كونو بخير...
بحفظ الرحماان..♥️👑