صباح الخير حبايب ❤ 
(18)
#حكمـة_ذئب

#بقلم_شمس_السعدي

الجو حار وجانت رضاء گاعدة على المكينة شوية تهفي بمهفة الخوص الي تصنعهن عمتها حمدية من الخوص
وتزينها رضاء بيدها بقماش حولها حتى ماتتلف وخاصة مهفتها جانت مشتغلتها بعناية ومزينتها بدانتيل ابيض
لان العراقيات وخاصة مابعد الحصار التجأن للصناعة اليدوية كالفخار والحصير والخياطة ووالليف وايضا صناعة المهفات والحصير من الخوص ..
-اول خطوة جانن يجمعن السعف وبعدها يتم فرزه واختياره حسب المنتج الي يردون صناعته فليس كل سعفة تستخدم لصناعة المهفة ..
فقط سعفة "القلبة" تكون "للمهفة" اما السعف الباقي فيستخدم لـ "البل" (هو نوع من الحصير يفرش على الأرض) اوالطبك الذي يوضع عليه الخبز (نوع من الصواني).
فلكل سعفة شروطها ومميزاتها لصناعة المهفة او الحصيرة او الطبك اي لكل واحدة منهم سعف مختلف
وهالشي ميعرفة الا المتمرس بهذي الشغلة مثل حمدية جانت تتعاون مع نساء المنطقة وتاخذ منهم سعف القلبة حتى تصنع بي المهفات ورضاء تزينهم بالقماش او الدانتيل وتبيعهم كان اقبال كبير عليهم لسبب انقطاع الكهرباء بصورة مستمرة والجو الحار ..

بينما رضاء جانت تخيط والجو حار ومستخدمة المكينة برجلها رغم تتعب حتى تكمل الخياط العندها ..
اجاها حكمت وسألها بصورة مفاجئة :
- يمة اني منو ابوي ؟؟
تلعثمت كلماتها وماتگدر تجاوب او ترد ..
بعد وهلة من التفكير والخوف والذكريات الي رجعتلها
سألته : منو الي گالك ؟
رد : يعني صدگ الي سمعته ابوي مهدي مو ابوي ورزاق وبشار ومحمد مو اخوتي ..
زين اني منو ابوي وليش جذبتوا علية ..

نزلت دموعي سحبت الكرسي وگعدت بالگاع اشرتلة بخنگة يگعد يمي ..
جان لابس الدشداشة البيضه ولاف عليها الشماغ الاحمر من يومه يحب يقلد جده بكلشي ..
اعاين على طولة ماجن عمرة 12 سنة احسة رجال وهيبة گبالي ..
ماقبل يگعد .. رد عليه :
سولفيلي الصدگ يمة ريحيني جنت ماصدگ بأي واحد الا بيج تالي اسمع من الناس وانتي طلعتي تجذبين عليه ..
ماضجتي عليه من اشكيلج جفا ابوي وياي ..
لو كره اخواني الي ..
جنت دوم احس بذنب واستغفر من اسألج وتگليلي يمة ابوك مايصير تحجي هيج لو اخوانك اتحملهم ولاتضحك العالم عليك ..
حتى رزاق من تهمني وضربني وشگ راسي تذكرت حجاياتج من تگليلي يمة صير لين وياهم يحبوك ..
تعبت واني ادور محبة ابوي واخواني تالي طلع كل هذا جذب ..
نزلت دموعة وصار وجهة احمر.  خفت عليه لايصير بي شي ..
گمت ردت احضنه گام بسرعه عاين عليه بنظرة لو ميتة ولاشايفتها مااتحمل وعافني وطلع ..
ماخلاني احجيلة وافهمة .. طلعت وراه مالحگت عليه طلع وسد باب الحوش وراه ..

دخلت صارت بتول گبالي جانت تضحك عرفت هي الي گايلتلة اتقربت منها :
شستفاديتي هسا .. صدگيني ماراح ترتاحين لان راح تزيدين الحقد بيدج .. يمكن انتي سوتيلي خدمة لمن حجيتيلة . جنت شايلة هم هاليوم ..
صح ماسمعني وضاج بس يرتاح يسمعني وراح يصدگني لان هذا تربات ايدي واعرفة .
طلعت عمتي على صوتنا :
خير ياساتر
اتنهدت : بتول گالت الحكمت انت مو ابن مهدي
شهگت عمتي وجان بيدها جفجير :
رگعتها بي ذيج طفرت
عزا العزاج ولج من سود الله وجهج شعدكم وي هالمگرود شو ماگابليه مگابل وشانين عليه الحرب ماتگلولي شني انتي ..

صاحت بتول : يووووه اول وتالي يعرف قابل يبقى العمر كلة مسمى اخو اولادي
ردت عمتي : وج ترحيلة فدوة شفايتلج لو صدگ اخو اولادج على الاقل يجيبلهم السمعة الطيبة لان الناس تحبه ولايبوگ ولايمد ايده ..

صاحت بتول : اولادي مو حرامية هو شوه سمعته هسا يطلع هو اليبوگ وتاهم ابني ..
دخلت عمتي لميعة وشايلة صدام على جتفها صار عمرة خمس سنوات والا تشيله على جتفها تگعده ..
ووياه سداد جانن يم وداد ..
هالفترة كلما تطلع تاخذ سداد وياها ..

اول مادخلت نزلت الولد من جتفها وانطت عباتها السداد ..
شكو صوتجن طالع وجانت بالگوة تجر النفس من التعب گعدت بالگاع ومددت رجليها .
صاحت سداد جيبيلي ماي من الحِب هم خليتن بي ثلج لو لا ؟

صاحت بيها عمتي : لمي جنتج يلميعة تراها طشرت بيتنا الله اليعلم شراح يصير لو درة ابوي ..
عاينت على بتول : شسويتي ؟

هزت بتول ايدها ودخلت ..
ردت عمتي : گالت الحكمت ابوك موش مهدي ولاذولة اخوتك والولد طلع ومانعرف وين راح ..

جابت سداد الطاسة الفافون بيها الماي .. اخذتها عمتي لميعه منها شربت شوية وحجت :
والله عبالي شو شني واذا گالتلة هو اول وتالي يدري
مادامة طفل مايفتهم ينسى ويتعود احسن مما يكبر
وكملت تشرب ماي ..

صفنت عليها شني من بشر ذني.. عبالهن حكمت طفل مثل جهالهن ..
هزيت ايدي ومشيت .. بقيت الوب بالطارمة واسمع عماتي يتكاونن بيناتهن ..
وين اروح والمن اسأل ..
اندگت الباب ركضت فتحتها صار گبالي كرار وحيدر هستوهم سامعين بحكمت واجو ..
ركضت لجوة لبست حجابي واجيت لگيت عمتي مدخلتهم ..
هلا عمة هلا بيكم نور البيت .. هيج لاتجون لاتسألون العطلة راح تگضي وانتو ماكو ..

بقوا يتعذرون الها . واني عيني ع الباب ..
سألني كرار : شلون صار حكمت وصدگ رزاق طاگة
حيدر رد : شلون يطگة هيج لو رايح بيها..
جانت عمتي لميعة گاعدة وتعاين بطرف عينها
ردت عليهم : هو اخوان بينهم وجهال مايفتهمون ذاك داس بگلبه وهذا مااتحمل..

ضحكت . جهال شني واخوان شني ؟ مو هسا تگولين همة موش اخوان وخلهم يعرفون الحقيقه شو تغير حجيج ..
التفتت الكرار وحيدر : حكمت ماغلط بحقة ذاك باگ الوارد وتهم حكمت ولين حكمت دافع عن نفسة ضربة بالوزن زين ماراح بيها ابني وابن اخوكم ..

ضحكت عمتي لميعة وطلعت بتول :
شو صار ابن اخوكم مو قبل شوية تحاسبيني جيف گلتله الحقيقه ..
گامت عمتي لميعة بالگوة كل يوم يزيد وزنها عن اليوم القبلة :
ولجن هاي تريد واحد يأدبها طالع السانها العايبة وصايرة تتحجى ..
اجت صوبي گاموا كرار وحيدر صارو گدامي ..
حجة كرار : عمة مو هيج رضوة مو طفلة وتطگوها
ردت عمتي لميعة : انت خطار مالك شغل .

ضحك : هم صدگ وتلوميني عمة لين مانجي ونسأل
صاحت عمتي حمدية : وانت شلك بلسانها الباذر البيت بيت جدك والكم حصة بي غصب عن اليرضى والمايرضى ..

ضحكت عمتي لميعة : لاعيني البيت بيت رجلي واولادي نسيتي محمد وهادي ماتوا قبل ابوهم يعني مايورثون هيج سامعه ..

هزت ايدها عمتي حمدية : البيت بيت ابوي بعد عمر طويل وهااا لاتصدگين ابوي يظلم واحد يعني لاتتأملين وتحلمين ..
حكمت وكرار وحيدر الهم مثل ماالابنج ..
اشرتلنا نگوم للديوانية..
فرشتلهم يرتاحون لين مايجي جدي ونتغذا ..
كرار رد : ام حكمت شني حكمت عرف ؟
هزيت راسي اي سودة عليه وطلع من غير مايسمع مني مااعرف وينة وبالي يمة الله يجازي الجان السبب
گام بسرعه من مكانه لبس حذائه رايح للدورة يم جدي خاف واشوفه..
رديت عليه : اي ينطيك العافية خوية

راحوا هو وحيدر واني رحت للمطبخ شفت عمتي تطبخ من جديد ..
- شتسوين عمة اساعدج .. اني مسوية تبسي وتمن راح اطبخ وياهن تشريب دجاج علمود الولد وانتي اگعدي سوي زلاطة بس لاتخلين بيها خيار عن الزفرة واثرمي وياها بصل وكرفس تطلع طيبة ..
ضحكت : عمة شني السالفه مااعرف وتعلميني
ضحكت : لا مو هيج بس كرار هيج يحبها وحيدر مايحب وياها خيار لان دجاج وخيار يطلع الزفرة ..

ابتسمت : عمة انتي شنو ؟
عكفت حواجبها : شبيه ولج
- انتي امنا. تعرفين شنحب وشنكره .. امهاتنا لو موجودات ماسون ويانا مثلج ..
شبابج وعمرج فنتيه علينا .
اتنهدت: الله مارزقني بجهال بس عوضني بيكم ..
خاصة انتي وحكمة احسكم ناگعين بگلبي ..
خاف يگضي الوكت واوگع يرضوة مااريد واحد يلمني غيرج ..
نزلت دموعي مااتحملت حضنتها وبجيت طلعت خوفي على حكمت وقهري وي حجيها الزرف گلبي ..
انفتحت الباب وسمعت صوت جدي : ياالله

ركضت صار گبالي اشرلي مااحجي .. ووياه حكمت والولد .. جانوا حيدر وكرار يسولفون ياه وهو يبتسم بس عيونة حزينات ..

الي ضوجني ماخلة عينة بعيني .. ركضت الجدي اخذت شماغة والعگال ونزعتة الجواريب ..
راح يتوضا رحت علگتهن بالغرفة واجيت لگيتهم رايحين بالديوانية لان بيها مبردة الهول بس مروحة وحار ..

اشرتلي عمتي نحضر الغدا وصاحت سدن بتول وينجن يالمسعدات يلة تعالن .
مالحگت اسأل جدي ..
فرشنا السفرة بالديوانية اجو عمي صالح ومهدي اليوم من وكت جاي هو ورزاق وبشار هم جان بالگاع وياهم

گعدنا ناكل بس الكل ساكتة بتول وعمتي لميعة حسن بغلطهن وخنسن .. وجدي مايگدر يحجي يم حكمت
سأله مهدي : شلونك بوية حكمت هم تحس بوجع
حسيته اختنگ رد :
زين الحمد لله .. وسكت

جان كل مرة يگله زين بوية هسا مالفظها
طول مااحنة گاعدين هو يعاين المهدي وولده . وشلون يفلس اللحم ويقسمة الهم ..

كملنا غدا صاح جدي : يلة بوية الجاي وينة ..
سويت الجاي والبنات ينگلن الماعين ..
دخل جدي للمطبخ جنت واگفه يم الطباخ وبتول تفرغ بالماعين شافته انصدمت .
خزرها : تلمين غراضج وترحين لهلج مااريد اشوفج بالبيت بعد ..
صفنت بوجهة وگالت : جدي بس…
قاطعها : حجاية مااسمع حكمت ماگالي منو الگاله بس اعرف هاي سوالفج محد يطشر بيتي غيرج ..

شمرت الماعين من ايدها : اني اصلا مااريد ابقى على اساس شلون بيت .. اجة مهدي سأل :
شكو شصاير ؟
ردت عليه : حقك شتدري بالبيت مرتك تنهان وتنطرد وانت ملتهي مدري وين ..
صاح بيها : بيمن ملتهي ولج غير بعيشتج انتي وجهالج
دفعته وراحت للغرفة سأل مرة ثانية :
شكو
اتنهد جدي : حكمت عرف انت مو شي ابو ..
دار وجهة وراح مالحگت اسأله على حكمت شگاله عني
مهدي حسيتة ضاج وراح للغرفة تعارك وي بتول واصواتهم طلعت وعيرتة بحكمت :
لازم عاجبك الوضع وفرحان لان تربي نغل!!
حسيت هالكلمة جن زرفت گلبي مااتحملت بقيت اغسل بالماعين وابجي لين فار الجاي وطاح على الجولة
طفتة عمتي وگالت اني اصب كملي شغلج وانتي سداد همي ايدج وخليها وي اختج مو طايح الشغل عليها وانتن مرتاحات ..

كملت شغلي ورحت للغرفة جانت طافية الكهرباء وحارة  گلت خلي اكمل الدشداشة البيدي اخليلها دگم اخيطهن بيدي
وهم الهي روحي وماافكر مااگدر اخلي عيني بعينة
شلون راح اگدر افهمة شلون راح اخليه يسامحني
انفتحت البردة دخل حكمت ..

احس جسمي عرگ وقطرات الماي تنزل على جيني من ورى الدسداشة .. اني جنت بالگاع گاعدة اريد
عاين عليه دنگت سويت روحي الظم بالخيط ..
گعد يمي واخذ المهفة ويهفيلي .. شاف وجهي عرگان
بقيت ساكتة مااتحملت وهو مستمر يعاين عليه ويهفي مااتحملت بجيت ورفعت راسي :
كافي يمة تعذبني ..
مسح دموعي وتمدد على رجلي :
يمكن ضجت منج الصبح سامحيني خاف ضوجتج هم اعذريني جدي يگول دوم ولاتقل لهما اف ..
واني طلعت ماردت اغلط بحقج .. وهيج جنت اخاف من ربي اذا عاتبت ابوي .. سكت وبعدها گال من جنت عبالي هو ابوي ..
يمة اعذريني اخذ ايدي باسها دنگت على راسه بسته
اعذرني اني يبعد امك : ماجنت اريد اضم عليك بس الوكت اغبر دوهني ..
- سولفلي جدي كلشي وعرفت ليش سجلتوني بأسم ابوي مهدي حتى مايصيحولي ابن العايبة مثل ماجنت اسمعها من اهلي ..
ابد ماعرفت ليش هيج يگلولج لمن حجالي جدي ..
شلون تحملتي يمة شلون تسكتيلهم ..
- يمة اكو الله اليحاسب . الصار غصب عني والله صح تمرمرت وتعذبت بس انت جنت ثمرت تعبي وعذابي
اني ماجاي اشوف ابني عمرة 12 سنة جاي اشوف رجال گبالي ..

اتنهد : لو كبرت اعوضج يمة ومااخلي واحد يأذيج اخذج واخذ جدي وعمتي ونروح بيت وحدنا ..

مسحت دموعي :لايمة هذا بيت جدك وبيتك .. جدك لو طلع منا يموت مايتحمل دير بالك تگله وتوجع گلبه

- لاتخافين يمة بعد مالي شغل بأحد ..
صح جدي ماسولفلي كلشي وگالي لمن تكبر تفهم كلشي بس اني فاهم يمة. وماانسى السوه ابد الا ادرس وانجح واصير طبيب ومااخلي واحد يحجي عنج ..

يمة فدوة الحلگك اخذتة الحضني وابوس بي ..
احس هم وانزاح عن گلبي ماتوقعت راح يسامحني بس اعرف گلبه طيب وجدي يمكن فهمه وعرف يقنعه
حتى بتول ماضجت منها لان حجت بسوايتها خلتني اقوى وزاحت عني سالفه جانت شاغلتني دوم ..

للعصر راد يطلعون كرار وحيدر جدي ماخلاهم گالهم باتوا هنا ..
بتول واولادها اخذهم مهدي الاهلها عمتي لميعة لان جدي طرد بتول حبست روحها بالغرفة وسداد جانت تاخذلها شتريد ماعدا الحمام تطلع وترجع بسرعه ..

لليل سهرنا كلنا بالديوانية على فلم وحيدر وكرار اشترولنا حلويات وببسيات .. وعمتي مسوية حلاوة شعرية ..
جدي جان فرحان بلمتنا رغم ناقصة وهواي غابوا عنها احسة يعاين ويتحسر على ذيج الايام حتى قبل لا يتزوج مهدي صح جانت عمتي لميعة ماتسكت بس مو مثل هسا ..
جنا كلنا صغار ونلعب بساحة الحوش الي جمعت احلامنا وذكرياتنا جان جدي يطلع التلفزيون بالليل بالساحة وبجهة الحايط مخلين الكرويتة الخشب القديمة يگعد عليها ويتكى على المنادر ..
وعمامي ونسوانهم وابوي وامي وعمتي گاعدين يمة على الحصيرة يشربون الجاي رغم الجو حار بس ابد مايستغنون عن الجاي المهيل. 
لو احنة شلون جنا نلعب وگلب على گلب لاعرفنا حقد ولاتفرقة الا لمن كبرنا ..
جانت عائلة الحجي خضير من اجمل العوائل بذاك الزمن ..
طشـرنـه الوكـت مو جنه ملمومـين..
ياهـو اللي حسدنـه وصابنـه بعينـه..
مااذيـنـه احـد لا حسدنـه الـنـاس..
راضيـن بوضعـنه برغــــم مابـيـنـه..
حـلـم صـار الـملاكـه وشوفه الاحـباب.
يـادنــيـه عـلـيـج الله دلــميـنـــــــــه.

اتنهدت واني ارجع للواقع ماصفت عدنا بس الذكريات
فرشت للولد وحكمت اصر ينام يمهم حسيتة تونس بجيتهم ..
رحت اجيب مخاديد لگيته يسألهم عن حسن يشبه من وشلون شكلة ..
اتأذيت حيل .. احس بوجع گلبه الكاتمة ومايگدر يگوله خاف يأذيني ..

شگد جان يحاول يتقرب المهدي ويحسسه انه هو هم ابنه مثل رزاق وبشار محمد ماجان يهتم بي مهدي هواي ..
بس هسا گمت اشوف حكمت شلون مبتعد وحتى ماسمعت كلمة بوية منه…
اذا يسلم عليه يگله شلونك وگواك الله دون مايگول بوية ..
جنت متوقعة مهدي يفهمة انه راح يبقى ابوه حتى لو ماجان ابوه الحقيقي ويواسيه بجم كلمة بس الي شفته جن مهدي هم ارتاح وانزاح الحمل منه ..

جدي جان يعاني من الگاع وهاي راح ندخل بالاثنين وتسعين وبدأت الاوضاع تسوء ناس قلة تشتري بسبب الوضع والحصار
جدي يسولف يگول النسوان بالعلوات تروح تلم الباقي من الطماطة والخضروات وتاخذهن ما تشتري
جا بمرور السنين شراح يصير بهاي الناس وشتاكل ..

بدأت الدوامات وحكمت فرحات لان راح للمتوسطة حس بروحة كبر اول يوم بدل وأتأنق وطلع كرار جان مواعدة بجنطة مال ولد كبار لان يستحي يشيل جنطتة القديمة ..
كرار جان زين وخاصة من تخرج وتوضف صح شغلة ببغداد بس كلما يجي يحير شيجيب النا من الاورزدي
هذا سوق جبير ببغداد مثل المولات الي منتشرة هسا بس بي شغلات رخيصة وحلوة من يسولف نتحسر اني وعمتي .. كم مرة يجيبلنا صابون مناك ريحته تعط وتخبل گمنا نوصيه كلما يجي ..
وعمتي گامت تخليه يتسوگلها وتبيع على نسوان المنطقة بنفس السعر تگول يكسرن الخاطر وهم اكسب ثواب ..

بيوم اندگت الباب جانت عمتي بالحمام وعمتي لميعة ماهي بس اني وسداد ..
فتحنا الباب نسوان ثلاثة گالن نريد نشتري غراض. .
دخلتهن للديوانية گلتلهن هسا تطلع عمتي وتجيجن

رحت گلت العمتي گالت جايه بس ابدل طلعت وجان شعرها بملل ولافة الخاولي عليه ..
سلمت واشرتلنا روحن جيبن الكراتين ..
جبناهن وگعدن يگلبن وعينهن على عمتي اخذن كم شغلة وگامن ..

بعد يومين رجعن بس هالمرة اجن يخطبن عمتي ..
گاللها سمعنا انتي ارملة واخوي اسير وعمرة جبير وبنية البيت ماترضى بي ومن شفناج انعجبنا بيج
وخطية ماصارله كم شهر من رجع بس نريد نفرحة ونفرح بي ..

عمتي مااهتمت السالفه الاجن عليها وضلت تسألهن على اخوهن شوكت اجة ووين جان وبعد اكو وياه وشسمة وهن يعرف واحد اسمة فارس ..
سودنتهن وعمتي لميعة جنها فرحت واخذت عنوانهن
وماگالتلهن رجلها اسير ..

من وعت عمتي وگلتلها عمة ترى النسوان جايات يخطبنج الاخوهن هي تسودنت .. وانتن شمالجن ماگلتلها متزوجة ..
عمتي لميعة گامت تقرأ براسها : وافقي ومنو يگول عايش صارلة عشر سنوات ويصير تتطلگين منه غيابي وتتزوجين لو تردين يضيع شبابج على حلم ما يتحقق
تعاركت عمتي وياها
وگالتلها معليج انتي ماگاعدة ببيتج وتردين تخلصين مني .. رجعي خبر للنسوان خليهن يشوفن غيري ..
بس عمتي لميعة ردت خبر موافقين وقارية براس عمي حتى يخلي جدي يوافق وتجي المشية
رغم دورة سنة عمي هادي لسا ماطالعه جانت

اندگت الباب العصرية واجن النسوان نفسهن بس هالمرة جايبات النيشان اول مادخلن هلهلن ..
سكتتهن عمتي گالتلهن احنة حزانة وبعدين لويش تهلهلن شكو ..
استغربن !! مو ام مهدي خابرتنا وگالت العروس موافقة جيبوا النيشان وحددوا المشية..

بساعتها عمتي فقدت واذا تعصبت ماتشوف احد گدامها
اول مرة طردت النسوان وگالتلهن اني متزوجة ورجلي اسير ..
ودور ركضت ورى عمتي لميعة وذيج بالگوة تركض من سمنها وعضتها بزندها ..
- وج مو گلتلج سدي السالفه بكيفج تعرسيني روحي شوفي رجل البنتج مو الي ..

ضاجت سداد ودخلت لجوة رغم جنا كلنا نضحك على موقف عماتي من وحدة تركض ورى الثانية ..
اجة جدي وسولفتلة عمتي تسودن وعمي صالح گالها غصب عنج توافقين شتنتظرين بعد الاسرى كلها رجعت بعد ماكو لاتحلمين وتبقين منتظرة ترى تخلصين عمرج كله وحيدة .

اختنگت بعبرتها وگامت .. رحت وراها جانت تبجي وتدعي الله يرجعة وترتاح .. بعدين سألتني :
صدگ كلها رجعت جا فارس وين .. لو ميت جان حسني گلبي بس ادريه عايش وراح يرجع ..

مااعرف شلون اواسيها لو اخفف عنها مااگدر اگلها انتظري وخاف صدگ ميت ولااگدر اگلها تزوجي وادريها ماتتحمل تصير مرة الغيرة ..
اني الوحيدة الي جنت احس بونها وبجيها عليه بليل دوم جانت تحلم بي هي نايمة وتسولف وياه حتى تتغزل بي بس لليوم ماگلتلها ..
لان اعرفها تكبت بگلبها طول النهار وتطلعهن بليل بأحلامها ..

استمرت الاشهر ومهدي رجع بتول بعد مااعتذرت الجدي والي بس هالمرة والغريبة مارجعها هو ولاجابها بسرعة بقت اشهر يله مطرشة العمتي تكون واسطة بينها وبين مهدي ..
الظاهر زعلهم مايخصنا بيناتهم .. المهم رجعت وجانت هادية مو مثل قبل ..
مهدي طول الفترة الغايبة بيها بتول ماجان يبات بالبيت كلنا جنا نتصور يبات يمها ببيت اهلها ..
بس بعدين عرفت من عاتبت عمتي وتگلها كم شهر ما يمر علينا ولايشوف ولده وينطيهم مصرف ..
لو حلالة حظن رضوة وابنها ..

استغربت جنت طالعة من المطبخ واسمعها هن بالهول گاعدات يم الصوبة رديتها : لاتخافين ماجان اصلا يبات لابالبيت ولايمي وهيج اريح ..
صفنت جا وين يبات ... قاطعتها عمتي معليج بيها هو لو بالشغل لو هنا يعني وين يبات ..

دورة سنة عمي قربت وملتهين نسوي خفيفي وعمتي تدگ التمن علمود الحلاوة ..
گاعدين نحضر وملتهين اندگت الباب راحت سداد تفتح دخلت مرة ووياها بنية صح هي شابة بس مو ذاك الجمال ..
وجانت لاطخة وجهها مكياج وگذلتها صفرة طالعه من العباية ..
سألتها عمتي واحنة كلنا صافنين عليهن :
هلا حبيبة تفضلي محتاجة شي ؟
گعدن بالهول واحنة بعدنا عينا عليهن منتظرين نعرف شيردن .. عمتي كل ظنها جايات يشترن لو عندهن خياط ..
بس المرة صدمتنا من گالت .. هذا بيت مهدي مووو
طفرت بتول . وانتي منين تعرفين مهدي وشرايدة منه
حجت البنية الوياها .. اني مرتة وارتسمت الضحكة على وجهها .. بينما هناك وجوه ارتسمت عليها البؤس والصدمة وخيبة الامل !!
#بقلمي_الكاتبة_شمس
يتبع .…