مساء الحب والسعادة حبايب 💕
///// البارت السـابـع /////
#بقلم_الكاتبة_شمس
( شمس السعـدي )

********* #ترانـيــم ***********

اﻣﺸﻲ ﻭﻻ ﺗﻠﺘﻔﺖ !!
وإن كان ﺍﻟﻄﺮﻳﻖ ﻣﻈﻠﻢ ﻭﺿﻴﻖ ﻭﻏﺮﻳﺐ ﻭﻣﺠﻬﻮﻝ ..
فالحـياة ﻣﻐﺎﻣﺮﺓ ﻳﺠﺐ ﺍﻥ ﺗﻐﺎﻣﺮ ﻭﺍﻻ ﺍﻧﺖ ﻻ ﺗﻌﻴﺶ ..
ﻧﺤﻦ ﻧﺨﺴﺮ ﺍﻟﻜﺜﻴﺮ ﻣﻦ ﺍﻳﺎﻣﻨﺎ ﻭﻧﺎﺳﻨﺎ ﻻﻧﻨﺎ ﺩﺍﺋﻤﺎ ﻧﺨﺎﻑ
ﺍﻟﺨﻮﻑ ﻳﻔﺴﺪ ﻛﻞ ﺷﻲﺀ ..
ﺗﻌﻠﻤﺖ ﻣﻦ ﺍﻟﺤﻴﺎﺓ ﺍﻥ ﺍﺳﻠﻢ ﻛﻞ ﺷﻲﺀ للرب ﻭﺍﻣﻀﻲ
ﻓﺎﺫﺍ ﺍﻟﺘﻔﺖ ﻳﻌﻨﻲ ﺍﻧﻲ ﺍﺷﻜﻚُ ﺑﻘﺪﺭﺗﻪ !!
ﻛﻞ ﻣﺎﺣﺪﺙ ﻫﻮ ﺧﻴﺮﺍ .. ﻭﻛﻞ ﻣﻦ ﺑﻌﺪ ﺧﻴﺮﺍ
ﺑﺎﻻﺧﺮ ﺳﻴﺒﻘﻴﻚ ﺍﻟرب ﻓﻲ ﺍﻟﻤﻜﺎﻥ ﺍﻟﻤﻨﺎﺳﺐ ﻭﻣﻊ ﺍﻟﻨﺎﺱ ﺍﻟﻤﻨﺎﺳﺒﺔ ﻟﻚ ..
ﻓﺎﺫﺍ ﻛﻨﺖ ﻣﻦ ﺍﺻﺤﺎﺏ ﺍﻟﻨﻮﺍﻳﺎ ﺍﻟﻄﻴﺒﺔ ﻻﺗﺨﺎﻑ ﺍﺑﺪﺍ....!!

مشيت من غير مالتفت .. مو اهون من تركي المدينتي وتهجيري منها .
مكتوب لي اعيش عمري كلو مهجرة ومالي سند ..
لازم اعتمد على نفسي ..
واوقف على رجلي ..

كان اخو ايمان يدحق فينا بالمراية .. انا غشعتو مرة لما عامر رجع من المستشفى ..

احمد .. باعن خوية .. اني حاولت الگيلجن مكان قريب ع الولاية .. بس المدارس والحسينيات كلها مزدحمة ..
راح اخليجن وي عائلة بيها مرة جبيرة ورجال جبير بالعمر وماعدهم احد ..
انهزموا ومايعرفون شي عن ولدهم ..
ترانيم .. مو مشكله خلينا بأي مكان ..
لينا .. اختي وين رايحين .  واخي عزيز يعرف ..
ترانيم .. ماكو احد بيهم يعرف ولا راح يعرفوا ..
لينا .. وليش هربانين هم يحبونا وانا تعودت عليهم
ترانيم .. لينااااا هذا الي لازم يصير . مانبقى عمرنا كلو عندهم ..
لينااا .. لكن ..
ترانيم .. اقطعي الكلام مو وقتو . 
كان اخو ايمان يدحق فينا…

طلع الصبح ولينا نايمة على كتفي ..
احمد .. وصلنا ..
صحيت لينا .. قومي حبيبتي وصلنا.  
قامت وماتكلمت شي معاي .
نزلنا ..
كان المكان يشبه البيت لمن صغير ..
اتقرب هو ودق الباب ..
وقال .. ابو رماح .. ابو رماح ..

طلع رجال كبير بالعمر ..
احمد .. جبتلك امانة يمك من الموصل هم .. ماعدهن احد واهلهن اخذوهم داعش ..
ابو رماح .. كلنا امانة الله ابني .. ادخلن بويه ادخلن
لينا كانت ماسكة بيه رغم هي ماتتكلم معي وزعلانة ..

دخلنا كانت مرأة كبيرة نايمة .
اغشعتنا قعدت ..

تذكرت الشغل ..
طلعت اتكلم معاه .. لقيتو راح !!

ابو رماح .. ها بنتي نسيتي شي ..
ترانيم .. لا عمو !!
رجعت للبيت سلمت على ام رماح ..
ام رماح .. اشنو قصتكم ..
ترانيم .. قصتنا طويله .. لكن مالها معنى بعد ضياعنا وفراقنا عن اهلنا ..

نزلت دموعها وقالت .. احنة هيكي ضيعنا ولدنا وابو رماح نسى الموبايل بالبيت وطلعنا خايفين على ارواحنا
وماتذكرناه الى لما مشت الشاحنه بينا للجنوب ..

لينا .. واولادكم وين ؟؟
ابو رماح كان يخلي ماي بالقوري ع النار ويقول. 
انا عندي بنت وولد متزوجين لكن بيوتهم بعيدة عنا ..
ماقدرنا نحصلهم .. ولما الناس كلها فزعت وهربت هربنا معاهم ..
انا وخالتكم ام رماح كبار مو حمل بهذلة وعذاب ..

ترانيم .. واحنة لزمونا لما كنا نهرب للاقليم .. واخذوا ابي واخي ويمي واخذونا سبايا وباعونا لولا معجزة ساعدتنا بالهرب ..

ام رماح .. الله يحبكم .. لو تسمعي اشنو يسون ببناتنا . خايفه على بنتي وبناتها وبنات ابني . 
خايفه عليهم لاياخذوهم ويبيعهم او يغتصبوهم .. ولو هم صغار اكيد مايلمسوهم ..

ابو رماح .. هذول ماعندهم رحمة ولايعرفوا صغار وكبار كفرة مو اسلام ..
سيدنا علي ( كرم الله وجهه ) كان ذاكر قبل 14 قرن انه في زمنٍ مـا راح يظهر اصحاب الرايات السود ..
والي شعورهم كـ شعر النساء ..
وهاذ تحقق كلامو ..
الله كلشي ذكر من خلال رسلو وخلفاؤ .
لكن البشر مايتعظ ولايخاف .. عاميتو الدنيا ..
ترانيم .. انتو مسلمين ؟؟
ام رماح .. اي بنيتي احنة سنة .. واكيد انتن مسيحيات مبين من وجهجن ..
ترانيم .. اي مسيحيات . منو علي اتشوقت اسمع عنو ..
ابو رماح .. انا سني .. لكن دايما اقرأ كتب عنو .. هو خليفة من الخلفاء الراشدين .
لكن هو امام الشيعة ..
انا مااقدر اتكلم عنو بقدهم . هم يتكلموا عنو بعشق وحب كان صديق الي بالجيش ايام الشباب ..
شيعي .. اخلاقو لامثيل لها ..
وانسان متدين ويخاف ربو ..
ولما اقلوا انت شلون هيكي .
يقول هذه اخلاق نبينا وامامنا علي ( عليه السلام )
وكان دايما يقصلي عنو ويتكلم عن نهجو ..
جذبني اقرأ كتابو اسمو نهج البلاغة ..
عجبتني شخصيتو وحكمتو بالدنيا ..
ترانيم .. وانا عجبني اقرأ عنو ..

ام رماح .. يكفي ياابو رماح .  البنات تعبانات واكيد جوعانات .  خلينا نجهز الريوق وبعدها كملوا كلام ..

كملنا ريوق ..
كانت لينا زعلانة حتى مااكلت ..
المكان الي جالسين فيه .. عبارة عن غرفتين وحدة صغيرة ووحدة كبيرة ..

ام رماح .. اخذو غراضكم واقعدوا بالغرفه الصغيرة وانا وابو رماح راح نبقى هوني ..
ترانيم .. اعتذر لانا قلقنا راحتكم ..
ام رماح .. لاتقولي هالكلام بنتي .. احنة نفس المصير واهل .. انتو بناتي من اليوم لحتى تلقوا اهلكم او نرجع المدينتنا ..

حسيت براحة لما اغشعتهم ناس طيبين ..
وكأنو الرب يجعل بطريقنا الطيبين حتى يحمينا ..

دخلت .. لينا نامت ..
لينا حبيبتي انتي قاعدة .
-انا نعسانة اختي اريد انام ..
-براحتك حبيبتي لكن من تقعدي خلينا نحكي ..
ماردت علية . تذكرت الموبايل طلعتو وغلقتو مااريد احد يعرف مكانا ..
---------------------------------
سراب… .
گعدت من النوم الساعة تسعه على صوت امي وهي تصيح ..
-يلة ماتگعدن صار الظهر ..
باوعت المكان لينا وترانيم فارغ ..
معقولة نزلوا من وكت اليوم ..
بلة رنوم عادي تگعد .. بس لينا شلون گعدت من الصبح وهي سرور بالگوة يگعدن الصبح .
صحيت سرور .. سرور خانم يله اگعدي .. حتى لينا وترانيم گعدوا وانتي بعدج ..
سرور… امممممم عوفيني ..
سراب .. ولج راح تبدي الدوامات شلون بيج هم تبقين هيج ..

تركتها ونزلت ..
صباح الخير ..
-صباح النور .. وينج لسا هاي .. سوي ريوگ الاخوج خلي يتريگ حتى ياخذ علاجة ..
-وجدتي تريگت ..
-اي جا تبقى لسا ..

رحت صبحت على جدتي وبست راسها ..
طلعت وسألت ..
جا البنات وين ..

-اني وهي تلگط التمن ..
يابنات ..
-لينا وترانيم ؟؟
-غير نايمات محد گعدت لسا ..
-ماموجودات بالغرفة !!
-خاف بغرفه عزيز اخذن بيها مقاوله ..

تركت كلشي وصعدت اشوفهن ..
فتحت الباب الغرفه فارغة ..
دخلت الغرفه علي وعامر .. بس علي نايم والغرفة مسويها مهرجان ..
ياربي وين راحن ذني ..
طلعت ايمان من غرفتها ..
-ماشفتي البنات ؟؟
-يابنات ؟؟
-لينا وترانيم ؟؟
-لا وين اشوفهن غير نايمات يمج ..
-ماهنة ..
-ماشفتي بغرفه عزيز .. لان ست ترانيم ماتفارگها ..
-شفتها ماهي .. خليتها تحجي ونزلت .
رمضت للحديقه اباوع ماكو ..
دورت البيت كله ماكو ..
ملكية .. شكو شبيج تتراكضين منا ومنا ؟
سراب .. جدة لينا وترانيم ماهنة بالبيت ..
ملكية .. يا قحطان ابني .. وين راحن البنات .. هنة مايندلن اي مكان بعد وين يرحن ..

عامر .. ها سراب شبيهن ..
رحت يمة… البنات ماهنة بالبيت كله ..

امي .. ماگالن وين يرحن معقولة عرفن شي عن اهلهن
سراب .. صدگ تحجين يمة .. منين يجيبن اخبارهم ماعندهن تواصل بس وي عزيز . وحتى جناسي ماعندهن
ملكية .. مو اخوج جابلها موبايل خابريها وشوفيها وين
سراب .. مااعرفه بس عزيز يعرفه واصلا لان هي يمي ما فكرت اخذة منها . 
ملكية .. عزا العزاج على هاي السالفه شلون ماتاخذين رقمها .. ذني امانه بله اذا سمع عزيز شيگول ..

عامر .. اوگفوا اني راح اخابر عزيز واشوفه ..
ايمان .. والله مكبريها قابل هنة صغار .. اكيد ماعجبتهن الگعدة هنا ومشن . مخنوگات بالحجاب والدشاديش ولاطلعة ولاطبة هاي وين تصرفلهن ..

سراب .. بله انتي اجتج من الله على الله .. اكثر وحدة تفرح وترگص انتي ..
ايمان .. يا اني شعليه قابل اني گلتلهن روحن .
سراب .. كلشي يصير شمدرينا ..
ايمان .. نعم الله عليج .. ادري بيج راح تطيحيها براسي .
والله اني اگول خاف واحد قشمرها بالفيس وغواها وراحت .
سراب .. خافي ربج .. كلنا نعرف اخلاقهن شنو ..
ملكية .. خايبة ماتولين الحجرتج وتنجبين .. البنات مانعرفلهن اثر وانتي تتشمتين ..
امشي لااگوملج بالعصا ..
ها ولك عامر مارد اخوك ..
-لاجدة مارد ..
-خابر ابوك وگلة خلي يدورون عليهن ..
خاف بالبستان بعدهن ..
شني فص ملح وذاب ..
------------------------------
عزيز ..
جنت نايم وتعبان والليل كله سهران جان عدنا هجوم ..
اجاني واحد من الجنود ..

سيدي سيدي .. بصوت قري
فتحت عيني .. وطفرت .. سحبت سلاحي بسرعة .
-شني صار علينا هجوم ..
-لاسيدي .. بس جهازك صار ساعه يدگ ع الشحن واجيت اگلك ..

اخذت نفس وفركت وجهي وگعدت ..
-من شأكول عليك .. هي هاي سواية .. اكو واحد عاقل هيج يصحي النايم ..
والله عبالي صار علينا هجوم ..
احجي وياه بس يضحك كسر خاطري .. واحنة بوضع لازم تصير گلوبنا جبيرة ومانضوج بسرعة ..

-روح انت هسا ..
اخذت الموبايل من الشحن ..
باوعت هذا عامر متصل خمس مرات ..
سترك يارب شصاير ..

بسرعة دگيت عليه ..
-الو ..
-ها عامر شصاير بيك شي .؟
-لاخوية مابيه بس عندك رقم ترانيم موووو ؟
-اي عندي ليش شبيها ..
-خوية ترانيم ولينا صبحنا ماهنة بالبيت مختفيات ..
-مختفياااااات شنو .. وانتو وين عنهن . اكو واحد مأذيهن
-والله خوية الحد الليل كلنا سهرانين وسوالف وضحك ماكو شي ..
حتى تعجبنا من مالگيناهن .
-شو سدة بسرعه خلي اخابر ترانيم ..
سديته منه .. وخابرت ترانيم . كم مرة ادگ ومغلق قلقت اكثر ..
وين يرحن ..
خابرت على عامر ..
-باوع خلي ابوي والولد يدورون عليهن هن مايرحن بعيد مايندلن ..
خاف شو منو مسمعهن حجايه وطالعات ..
عامر .. هسا ابوي على جية واگلة ..
انطيني سراب من يمك .

سراب .. ها خوية شلونك ..
عزيز .. سراب اصعدي شوفي ماخذات غراضهن الموبايل اتأكدي وخابريني ..

سراب…
اجة ابوي .. شكو وين البنات راحن ؟؟
جدتي متكيه على عصتها واشرت بأديها .. والله ماادري اسأل مرتك وبنت اخوك ياهي منهن الي هججت البنات
الحد البارحة شحلاتهن يسولفن ويضحكن ..

ام عدنان .. ياعمة نعم الله عليج اني شعلية .. والله ماحاجية وياهن ..
قحطان .. وانتي ايمان.  
ايمان .. ياعمي بالقرآن مالي علاقه من صارت الشغلة بينا تجنبتها وماحجيت وياها ..
الله شاهد عليه اذا مسمعتهن ..

طلع ابوي موبايله وخابر عدنان ..
الو وليدي اخذ ولد عمك احمد حسن والباقين واطلعوا دورو ع البنات ترانيم ولينا .
ذني امانة يبعد ابوك ولازم نلگاهن ..

صعدت اني لفوگ .. گعدت سرور بحرگة ..
گومي ولج گومي البيت مگلوب وانتي تنبل مال نوم ..
سرور .. شكو
سراب .. لينا وترانيم مختفيات ماهنة ..
طفرت من مكانها يااااااوين راحن
-ماادري .. لينا مالمحتلج ..
-لا .. اصلا هي فرحانة لان اليوم نروح نشتري ملابس مدرسة وگلتلها روحي وياي اختاريلي على ذوقج ..
سراب .. گلبي نار عليهن وين يرحن ومنو الهن بعدنا ..
ربي احفظهن مالهن احد غيرك هسا ..
تذكرت كلامها .. البارحة كله عبالك جاي تودع وماادري شبيها سارحة وضايجة ..
نزلت سرور .. فتحت الكنتور ماخذات كل غراضهن ..
انتبهت للكومدي اكو ورقه جوة الشاحنة ..
فتحتها ..
صباح الخير حبيبتي ..
ادري بيج هسا قعدتي من النوم ومالقيتينا .. واكيد قلقتي علينا .
لاتخافي احنه بخير .
وطمني اهلك وخاصه عزيز . وقوليلو يسامحني ماقدرت ابقى ..
واني اشكرو على كل شي عملو لأجلنا . 
وماانسى فضلو ..
انا ماراح انساه وراح اتصل فيه بس استقر ..
بوسيلي الجدة وعمو قحطان وسرور وسلميلي على علي وعامر ..
ولاتنسين الدوا ..
انا كتبت الك كلشي بخصوصو ..
احبك يااختي الحبيبة ..

اقرأ وعيوني تجري من البجي ..
ليش هيج ترانيم ليش .  ولج علقتيني بيج وحبيتج وگلت الله عوضني وانطاني وحدة تفهمني ..
نزلت ..
اشهگ من البجي ..
ملكية .. خير ولج شبيج البنات بيهن شي ..
الكل يباوعلي يريد كلمة مني ..
گلتلهم ..
كاتبتلي رسالة ..
راحن بعد مايرجعن .ومااتحملت بعد العبرة خنگتني ..
اخذ ابوي الورقه من ايدي وقرأها ..

-شلون هيج تتصرف .. عود جنت اگول عليها عاقله واكبر من عمرها تالي صدمتني ..
لازم اكو سبب ورى اختفائهن مامقتنع اصلا ..
عامر خابر اخوك وگله لايبقى قلق ..

عزيز .. بقيت الوب واروح منا وارجع منا .. واتصل عليها مغلق .  دزيت رسائل شگد من قهري ماعرفت شنو اكتب ..
واني اگول كلامها غريب وعبالك تودعني ..
اااااخ ياعزيز ماتوب ..

دور خابرني عامر وزاد الطين بلة بعد ماگالي ع الرساله ورايحة برغبتها ومودعتنا ..
استغفرت ربي ..
حتى اهدأ ..
هاي ثوله لو شنو .. شلون تخاطر بروحها هي واختها وتطلع حتى جناسي ماعدها .
وين تولي ..
ااااخ ترانيم .. اااااخ من يومج عنيدة ..
بقيت النهار كله افكر بيهن وين ممكن يروحن ..
حسيت روحي مربط ولاحول ولاقوة الي. 
منا واجبي ومنا الامانة الي خليتها على عاتقي ..
الك حكمة بيها ياربي ..
من خليتني اشوفها وانقذهن من دون البنات والناس .

لليل واني اتصل ومغلق وبكل مرة احس نار وتشب بيه
اتصل بأهلي واذب حرگتي بيهم واتعصب .
وساعة اهدأ والعن الشيطان .

ماادري شصار بيه .. حسيت هالموقف مر بيه ..
تذكرت ذرى من حب اربع سنوات تالي تركتني بلا كلام وبعدها تخابر وتگلي سافرت ..
ليش كل الي اعرفهن يخذلني ..

صح ترانيم ماوعدتني بشي ..
ولابينا شي .
بس من سمعت راحت حسيت بخذلان ..
ليالي واحنة نسولف ..
حسيتها نفسي واني افضفض الها .

اجة ببالي اليوم الي شفتها بي ..
جانت مسوية ضفيرة مثل ميسموها اهلها ..
واكو شعرات من الگذلة نازله على وجهها .. قوية وعنيدة ونضرتها حادة ..
واگف بعيد وگلبي نار على بناتنا بيد الانجاس ..
جان بودي اهجم عليهم كلهم وارميهم لو اتذكر اني بواجب وهجومي واني بوسطهم معناه موتي وخسارة المهمة بالتالي ..

سمعت صوتها وهي تدافع عن نفسها واختها .
ضربت ايد الخليجي والي وياه ..
وجانت مثل اللبوة الي تدافع على اطفالها ..
اذا حست بخطر ..
هيج جانت تدافع عن نفسها واختها ..
ماادري شنو الي خلاني اروح واگول اني اشتريتهن ..
شفت نضارتها الي وشلون تريد تهجم عليه ..
ولحد مااخذتهن وهي ماخذة وضعية الهجوم ..
كل شوية احس راح تنفعل وتهجم .
ماقبلت تصعد السيارة الا لمن هددتها اني اريد اخلصها من وضعها وهي معاندة ..
حقها وماألومها ..
لأن الي شفته بالموصل ..
راح يبقى محفور بذاكرتي العمر كله ..
بنات كبار وصغار مثل الورد ..
صارن بيد انجاس مايعرفون الرحمة ..

من اول لحظة اخذت ترانيم واختها صارن بعاتقي گمت اخاف عليهن من روحي ..
خليتهن بيت اهلة هربانين ..
وبدلت اقفالة ..
مخلي بي غراضي والاسلكي مالتي وموبايلاتي الخاصه بالدوام. 
كانت حياتي على حافة الهاوية ..
لأن ممكن بأي لحظة انكشف ..
اطلع وياهم واخبر عنهم وينقتل منهم هواي لكن بالي وفكري يمهن ..
خايف لا واحد يدخل البيت ويكسر الباب ويلگيهن .
وخاصه من غبت عشر ايام عنهن ..
جنت اضحك على سوالف ترانيم ..
وشلون مامخلية سجين بالمطبخ ..
وعاجبتني قوتها حيل ..
كنت التزم الصمت حتى ماانكشف ..
ماگدرت اگلهن بهويتي واخليهن يطمأنن..
لان مااعرفهن زين ..
ويمكن يكشفني ..
من رجعت ..
لاحظت بالبيت الي يمنا اكو يجون ووياهم بنات ..
والبنات يبجن ومايقبلن يدخلن وهم بالضرب والسحب ياخذوهن غصب ..
احس روحي تتگطع وياهن ..
ساعات احس روحي واحد نذل لان مابيدي شي اسوي الهن ..
وماارتاحيت الا دخلت ورميتهم وهربتهن ..
مااگدرت ابقى اكثر لأن اكيد راح انكشف وخاصه الكل يعرف البيت الي يمهم الي ..
اخذتهن وطلعت من الموصل ..
الي ساعدني لهجتي الغربية الي تعلمتها من كنت اداوم بالانبار ..
ودهائي بالتعامل وياهم . 
ماگدروا يكشفوني ..
من اتصلت بالمسؤل مالتي وگتله اني طلعت من الموصل ..
ماقبل واصر ارجع واكمل المهمة .
بس خوفي عليهن واذا بقيت اكثر راح اعرضهن للخطر .

طلعتهن وامنت عليهن يله ارتاحيت ..
ضحكت .. لااراديا من تذكرت موقفها بالسيطرة ..

-ههههههه شلون نزلت تركض وتصيح داعشي داعشي .
خررررب يومها شگد داهية ..

ماگدرت اخليهن ببغداد ..
لأن مايعرفن احد ..
فكان الانسب ادزهن الاهلي ..

ماقبلت تروح واصرت تبقى يمي .. لان حست بالامان وياي وهذا الشي فرحني ..

منظرين الها ماراحن من بالي ..
لما طلعنا من الموصل البغداد شلون نايمة وشعرها الذهبي مغطي وجهها .
ومن لما لبسن هي واختها ملف الصلاة ..
عبالك ملاك ..

ااااخ ياترانيم .. شنو الي بيج جذبني هيج ..
اذا ع الجمال فمايهمني .
ببغداد شفت اشكال البنات واحلاهن ..
اكو شي يحسسني بأرتباط روحي وياج ..

خلاني اترك كلشي واعرض حياتي للخطر وارجع للموصل حتى احصل اوراق او هويات الجن ..
وادور بكل مكان على اهلج وامج ..
-جنت اريد اصارحج بالحقيقة بس خفت عليج .. ولو ادري بيج قوية وراح تتحملين ..
بس گلبي ماانطاني ليش . 
ليش ..
اي اني اسألك ياگلبي ليش ؟؟
ولك ليش ؟؟
مو حلفتك تكره كل مرة بالكون وماترف بعد ليش ؟؟

بتُ اشعر ان قلبـي لايضخ الا الم الى باقي اجزاء جسمـي !!

اي رجل انا .. لاتلاحقه الا الواتـي يتلذذن بألمـي !!

مستحيل اهدأ الا اذا لگيتج واعرف ليش رحتي ..
خابرت سراب ..
-الو سراب ..
-هلا خوية ماكو خبر عنهن ..
-جهازها مغلق .. بس گليلي ماسولفتلج شي . مالمحتلج
-لا ابد اخر لحظة جانت توصيني ومثل الي تودع بس مااتوقعت راح تعوفنا ..

-زين بالبيت اكو واحد مسمعها حجي .. غير الي سولفة عامر الي .

-هااااا لا بس ..

-بس شنو ..
-ها لاهيج گلت خاف ايمان وياها بس هي ماتهتم الايمان وتردها وماتسكت ..

-هو هذا الي مخبلني .. ترانيم ماتهتم للسوالف الفارغة لازم اكو شي صاير ..

-يله روحي نامي خوية تصبحين على خير ..
- وانت من اهل الخير دير بالك على نفسك ..
سديتة منه واني الوم بروحي .. لااگدر اسولفله على سواية عدنان خاف يتكاتلون ..
معقولة عدنان سوالها شي وخلاها تهج ..

خلي اروح احجي وياه واشوفه ..
دگيت باب غرفتهم ..
فتحت ايمان ..
-عدنان گاعد ..
-اي شتردين منه ..
-عندي شغله وياه .

عدنان .. ها سراب خير ..
سراب .. اريد احجي وياك وحدنا ..
ايمان .. وليش مو يمي شني هي اسرار. 
عدنان .. ايماااان.  يله جاي ..

اجة عدنان ودخلنا الغرفة عزيز ..
-اكو خبر عنهن ..
-وليش تسأل مو انت الي هججتهن ..
-صمي حلگج شلون تحجين هيج وياي ..
-ترانيم كلشي جانت تسولفلي .. شسويتلها وخليتها تهج
-ماسويت شي حالي من حالكم حتى گلبت المنطقه عليها اليوم ماكو ..
-اخاف انت جابرها وماخذها .. لو ضغطت عليها وخليتها توافق تتزوجك بالسر .
شهگت وصحت عزززززا شلون راحت من بالي ..
صم حلگي ..
اششششششش فضحتينا .  والله ماادري بيهن وين شبيج ..

-عزيز اذا عرف مايسكت ..
-هاااااا گولي هيج خايفة على مشاعر اخوج العزيز .
اسمعي ولج ماتهدديني بي لان مااخاف منه ولااهتم فاهمة ..
واذا حجيتي ماتحصلين بس المشاكل .
وشدعوة كاتلة روحج .  بنات اجن شهر زمان وراحن عرفة ولفه وخبصتينا ..
وبعدين اني جاي ادور عليهن بس الگاهن عود اطمنج لاتخافين ..

-انت شنو .. حرام عندي اخو مثلك ..
-اي اتبري مني كافي عندج اخوانج الذهب الي مايخطأون والملاك ..
اطلع احسن الي مافارغ التفاهاتج ..
-عوف البنات .. اذا صدگ انهزمن منك .. عوفن لاتلاحگهن خليهن بهمهن ..
ضحك وطلع تفاجأت بأيمان بالباب واكفه تتنصت ..

راح الغرفته واجت .. اگلج شگالج عدنان . شنو راح يدور عليهن ..

سراب .. ماادري اسأليه مو سمعتي كلامة ليش تغشمين روحج . 
يله هسا اطلعي اريد اقفل الغرفه. 
قفلتها وطلعت واني اكل بروحي اكل ..
هسا لو بس اسمع خبر عنهن جان ارتاحيت ..

ترانيم… .
لليل قمت سويت عشا مكان خالة ام رماح لان ماتقدر مفاصلها توجعها ولاحظت ابو رماح هو الي يقوم بأشغال البيت ..

-اقعد عمو انا من اليوم اتكفل بكلشي..
-بارك الله بيج بنيتي ..
-عمو عندي طلب ؟؟
-قولي يابنتي ..
-اريد ادور شغل ..
-وهو وين تلقين شغل هوني .. وانتي تقولي ماعندك وثيقة او اوراق رسميه ..
-اي شغلة اذا تعرف احد يساعدني هوني ..
-الرجال الي جابكم .. عندو معارف وهو الي اجة مع المسؤول لما انطونا مساعدات ..
-مااقدر اطلب منو ماعندي رقمو ..
-اني اشوفلج ..

ام رماح .. انا عندي فكرة .. بين ماتلقيلك شغل ..
بالاول انتي تعرفي تطبخي ؟؟
-اي اعرف ..
- خلص خلينا نفتح مشروع نعمل اكلات برأس مال الي عدنا وعمك ابو رماح ياخذهن للسوق او المحلات ويبيعهن
ترانيم .. فكرة حلوة انا عندي مبلغ قليل نشتري فيه الي نقدر عليه ..
ام رماح .. وانا ابيع سواراتي وذهبي ونشتري مجمدة نحفظ فيها الاكل ..
فرحت وابتسمت حسيت حياتي راح تستقر واخيرا مع هذي الناس الطيية وخاصة بعد ماشجعنا ابو رماح ..

لينا كان ماعاجبها الكلام وضايجة ..
ثاني يوم قعد ابو رماح من نومو ..
وانا حضرت الريوق ..
واحنة قاعدين ع الاكل اغشع لينا ماتاكل وزعلانة ..

قال .. لينا ياابي انا مااقدر انزل لوحدي ع السوق واتسوق اشنو رأيك تنزلين معاي وتساعديني ..

ضحكت وقالت .. يصير اروح معاك ..
ابو رماح .. وليش مايصير بس خلي على راسك اشي لأن الناس هوني تستغربك .

-اختي توافقي اروح ..
ابتسمت الها وقلت ..
اي حبيبتي روحي .. وهاكي هذول الي بقوا معي اشتري فيهم الي تحتاجيه ..
فرحت وراحت غيرت ملابسها ..

قلت الابو رماح .. شكرا عمو ..
غمزلي وقال .. لاتشيلي هم .. هذا دلال مراهقين .
ام رماح .. الله يكون بعونها طفله وشافت كل هذا ..

اخذها وراحوا للسوق ..
وانا بقيت مع خاله ام رماح نضفت المكان وغسلت ملابس وطلعت انشرهم ..
اغشعت كثير عوائل مثلنا مهجرين واطفال تلعب ولاحسين ..
اتمنيت ارجع طفله .. او ياليت لم اولد اصلا ..
دخلت عملت غدا ..
وام رماح نايمة ..
فتحت موبايلي ..
لقيت رسائل كثيرة من عزيز .
ليش رحتي . 
مو گلتلج لاتروحين
شنو صار وغيرج ..
ليش ودعتيني ..
انا لعبة بيديج ..
اتخيلت شكلو وهو معصب .. بينطوا شرايين رقبتو ..

كتبت رسالة الو والسراب .. وبعثتهم نفس الوقت ورجعت غلقتو ..

سراب .. گاعدة انضف وضايجة..  احس البيت موحش بلا ترانيم ولينا . 
ومو بس رأي هذا ..
جدتي وسرور وعامر وعلي وابوي كلنا حاسين بوحشة بلياهن ..
اجت سرور تركض وطايرة ..
سراب .. سراب .  رسالة من ترانيم ..
فرحت وتركت كلشي بمكاني ..
جدتي تصيح وتگول ..
ها ولجن بشرني شتگول ..
وعامر من جهة .

قرأتلهم الرسالة بصوت عالي .. حبيبتي سراب اشتقتلكم كثير .. وخاصة الجدة اشتقت لحكيها وقعداتها سلميلي ع الكل ولاتخافوا انا بخير وعند ناس طيبين مثلكم ..
وراح ارسلك اخبارنا دائما .. احبكي يااختي الغاليه ..

نزلت دموعي .. وجدتي تقول .  سودة علية يمة ربي يحميجن وين ماجنتن ..
وراح ابقى ادعي الجن الى ان يلم شملجن بأهلجن ..
سراب .. خلي اخابر عزيز ابشرة ..

عزيز .. 
كنت گاعد وضايج ..وحددنا مكان عناصر من التنضيم ..
ومنتضرين نهجم ..
اجتني رساله ..
مااهتميت بالاول ..
بعدها حسيت گلبي نغزني فتحتها ..

لگيتها كاتبة .. اتخيلك وانت تقول هذي الكلمات ومعصب لكن حقك ومالومك . سامحني كلشي صار غصب عني والا انا مو طبعي انكر الجميل واهرب ..
لاتخاف انا بمكان امن ..
وراح اراسلك .. ولطلب منك تبعثلي صور عن الاوراق الي قلت عليها ..
اشكرك من قلبي على كلشي عملتو النا ..
وخلي بالك على حالك ..

ماتشفعلج اي رسالة بس خلي اشوفج ..
ابتسمت .. المهم بمكان امن ..
بقيت اقرأ بالرساله كم مرة ..
گالت غصب شنو الي غصبها ..
هينة بس خلي تخلص هاي الايام وانزل الاهلي وكلشي يتوضح ..

اتصلت سراب .. فصلته مااگدر ارد لان راح اروح بواجب
دزتلي رساله ..
ترانيم بخير دزتلي رسالة بس تفرغ خابرني !!
#بقلمي_الكاتبة_شمس
يتبع…… .