مساء الورد والقداح لأروع متابعين 💕

شكرا لوصول القصة للمرتبة الاولى ..

///// البارت الخـامس /////

#بقلم_الكاتبة_شمس

( شمس السعـدي )

********* #ترانـيــم ***********

-اشنو تقول انت ؟؟
مستحيل !!
-ليش مستحيل اذا بالج عزيز ياخذج لاتصدگين بي عزيز مو مال مرة ومسؤوليه .. واصلا عندة وحدة ببغداد مخليها فمااكو امان وياه ..

-انت مريض .. ومن قلك انا افكر بعزيز .. عزيز مثل اخي انقذنا وحمانا ولهيكي انا احترمو واقدرو مو مثل ماتفكر انت ..

-لاتتسرعين هسا .. انتضرج فكري وشوفي والله ادللج دلال انتي واختج واخليجن ببيت وحدجن وانسيجن الي شفتنه ..

- ماكان هذا رأيك لما اجينا .. وكنت تلوم عزيز لأن دزنا العندكم ..

-ماجنت اعرفج بس هذا الشهر الي عشتي بي يمنا تعلقت بيج ..

-اطلع عدنا .. ولا اقلك انا راح اطلع .. وراح انسى الكلام الي قلتو مو خوف .. لا ابدا !!
وانما احترام للبيت الي أوانا وحمانا وضيفنا ..

تركتو وطلعت من الغرفـة .. صارت سراب دحقت بيه ماقدرت اخبي عنها ..
سراب .. شبيج تري اكو شي ..
ترانيم .. تعالي ننزل للحديقه مااريد احد يسمعنا ..

سراب .. خوفتيني شبيج ..
قعدنا ع الديدي وقلتلها .. سراب انتي تعرفيني انا مااحب الكذب والخداع ومااحب انكر الجميل واخون ..
اصلا هذي صفات ماتناسبني واكرهها ..

سراب .. ولج شكو خبلتني احجي ..
ترانيم .. اخوكي عدنان .. دخل عليه بغرفة عزيز وطلب يتزوجني ..
سراب .. عزا العزاه .. والله لو تدري بي ايمان الا تحرگه حرگ ..
ترانيم .. مااريد تصير مشاكل بسببنا .. انا وقفتو عند حدو لكن مااعتقد راح يترك الموضوع ..
انا ماببالي هالامور .. الي يهمني تستقر حياتنا والقي اهلي ونعيش سوا ..

سراب .. لاتخافين اني اعرفج شنو واخوي شنو .. اني احجي وياه ..
خلينا نروح للغرفه ونامي وانسي ..

لكن ماقدرت انام .. اكيد اذا بقيت اكثر راح اسبب الهم مشاكل ..
واكيد راح اكون بنضرهم انسانه خرابة بيوت ..
الرب يساعدنـي ويرشدني للطريق ..
قمت صليت ودعيت وطلبت من امنا العذرى ترشدني اشنو اعمل ..

اشعر كـأني على سفينة متعطلة بوسط بحرٍ ..
لااعرف السباحة ولا سبيل للرجوع ؟؟

نمت بعد ماتعبت من التفكير .. واغشعت ابي فرحت وتقربت الو ..
لكن كلما اتقرب يبعد اكثر ..
بقيت اصرخ واطلب منو ياخذني معو لكن ماقبل وراح عني ...

ااااه ياابي وينك انت وسليمان وين رحتو وتركتونا ..
سمعت صوت بكي وصراخ ..
فزعت مرعوبة ..
سراب بسرعة نزلت تركض ..
واحنة وراها ..
تلاقينا انا وايمان ع الباب…
سحبتني وقالت ..
وخري من شفناجن ماشفنا الخير ..
حتى بأصعب الضروف وهي تحاول تهينا ..

نزلنا واغشعت ام عدنان قاعدة بوسط البيت وتبكي وتولول ..
ابني .. ولكم ابني متصوب. يمة جيبولي ابني ..

انا سمعتها قعدت ع السلم .
لا مستحيل يكون عزيز صارلو شي ..
عزيز مايموت ..
عزيز وعدنا مايتركنا لحالنا ..
ليش ؟؟

حتى الانسان الوحيد الي لما اغشعوا اغشع الامل بعينو ..يروح عنا ليش ؟؟
قحطان .. صدگ جذب انتضار شبيج .. مو گالج عزيز مصوب برجلة مابي شي .. عليمن تفاولين ..

-عزيز ؟؟ .. لكن مين يقصدو تصوب .. لايكون اخوهم الثاني اعتقد اسمو عامر . 

ملكية .. هي من يومها تفاول بالشر .. وج انتي جايبة بنات لو ولد ..
اذا مايدافعون عن وطنهم وبلدهم لاخير بيهم ..
فخر الي من اشوف ولدي يقاتلون ويدافعون ..

ام عدنان .. اي حقج عمة ماضايگة اللوعة .
ملكية .. والله تريدني اكسر العصا عليها ولح منو الرباهم غيري .. هاي لان جبتيهم صرتي تخافين عليهم اكثر مني ..
ام عدنان .. روح جيبو اخوكم شمنتضرين . اريد اشوف ابني لو اخذوني اله ..

ابو عدنان .. گومي بدلي يله ..
وانت عدنان جهز السيارة ولاتقلقون عمامكم وعماتكم .  نشوف السالفه شنو ونخابركم واصلا عزيز يمة ويطمنا اول بأول ..

وانت علي بوية الشغل بيدك مو تعوفه وتنام للظهر ترى اخابر ابو فلاح واسأله..

ملكية .. روح شوف عامر وطمنا عليه ولاتشيل هم الشغل اني هنا وشويه واخابر كريم يروح بمكانك ..
سلموا وراحوا .. والكل يدعي بسلامتو ..
لينا .. بعدني نعسانه ..

ترانيم .. اشششش ماتغشعين الناس مقهورة على ابنهم وانتي تفكرين بالنوم ..

قمت اساعد سراب بالشغل وكل شوية داخلة وحدة من اقربائهم وعماتهم . 
يبكو ويدخلو لغرفة الجدة ..
دخلت اسراء من غير سلام ..
-ولج ماتعرفين تگولين تخابرين . لو اني مو اخته .

سراب .. هو احنة شفنا دربنا .. بسرعه بسرعه راحوا وين النا خلگ نخابر ونحجي ..

دخلت ابنها الغرفة اهلها . وراحت عند جدتها ..
انا الليل كلو مانمت وتعب وارق حسيت بنعاس ..

-سراب انا راح اصعد فوق ..
-وماتتغدين ..
-لا مااريد وانتو بأي حال .
-قابل نموت من الجوع شايفتهن ذني الي ضايجات وكت مانخلي السفرة صدگيني كلهن يگعدن ياكلن وينسن
عيني وكت البطون تعمى العيون ..

-ههههههه مااعرف منين تقولي هالكلام ..
-ههههههه هو الي يگعد يم الحجية ملكيه كلشي يتعلم .
ادري تعبتج اليوم وياي بس شأسوي هاي مرت اخوي الشفية سوت روحها ضايحة وگابلت امها واختها وعافتني وحدي ..
روحي نامي بس هااا امشي بغرفة عزيز نامو انتي ولينا احسن باردة وهدوء ..

لأن غرفتنا راح هسا تصعد عمتي ابتسام واولادها مايخلوجن تنامن ..
صعدنا لغرفة عزيز ..
لينا ماصدقت راحت ع السرير ونامت ..
-اااااه الي يشوفني يقول سنين مانايمة.. 

ترانيم .. مين قلك لاتنامي ..وتسهري ..
لينا .. لو يمي كانت صرخت علينا وقالت نامي من وقت وحافظو على صحتكم ..
وتغلق التلفزيون ساعه تسعه حتى ننام. 

-لاتذكريني الرب يجمعنا بيهم وين مايكونو ..
نامت لينا بسرعة ..
وانا بقيت اتصفح في الفيسبوك واخذ معلومات عن النازحين للجنوب والمناطق الوسطى ووين يقعدوا ..
وخاصه في العمارة ..

دخلت سراب ومعاها صينيه اكل .
- هاي شنو لينا نامت ؟؟
-اي من السهر ماتحملت ؟؟
-همزين بعدج مانايمة تعالي تغدي وگعدي لينا .. جدتي رزلتني ..
-ليش ..
-گالت شلون تخليهن ينامن بلا اكل فوگ مامتعبات البتيه تشتغل وتنضف الجن ..
ماتحطن لگمة بحلگجن اذا ماياكلن . 

ترانيم .. الرب يحفظها شقد حبيتها ..
سراب .. اي والله بلاها كلنا نضيع هي الي جامعتنا ..الله يحفظها النا ..
يله گعدي لينا تاكل .
ترانيم .. لا اتركيها خليها لما تقعد لاتروح نومتها .  انتي اقعدي معاي اكلي مااعرف اكل لوحدي ..
سراب .. والوادم الجوة كل شويه صايحيني ..
ترانيم .. سرور وايمان موجودات . صدقيني مااكل .
سراب .  لاعيني خليني اگعد وين لاگيه هيج گعدة وبغرفة حضرة الضابط ..

لو يدري ناكل بيها الا يتخبل يموت من ريحة الاكل بغرفته حريص على كلشي بيها .
تذكرت لما كنا بالموصل واشنو سوة لما حاولت ادخل غرفتو .. طيب ليش هسا سمحلي ؟؟

كملنا اكل ورحت نمت مع لينا .. فتحت الموبايل وكنت مترددة اتصل عليه او لا ..
يمكن مشغول ومايقدر .  او عندو هجوم او واجب ..
اخاف اشغلو ويصيرلو شي ..

اخر شي تجرأت وكتبتلو رسالة ..
شلونك عزيز كيفو عامر الرب يشفيه ..
شقد زعلت لما سمعت .. الرب يحفظكم وترجعو سالمين

اول مارسلتها اتصل بسرعه ..
بقيت مترددة ارد او لا ..
هفففف رديت ورتبت حالي واستقمت بجلستي وكأنه يغشعلي او قاعد قدامي ..

مااگدر اكتب .. بس حبيت اطمنج . 
شلونج بالاول .. مرتاحة ان شاء الله.  وليون شلونها

-ليون؟؟
-اي صديقتي ليون ليش ضجتي ؟؟
- لا اكيد ليش اضوج ..
- لان دمها خفيف ومو مثلج ..
-امممممم تتهنى .. انا بخير وهي بخير المهم اخوك شلونو ..
-الحمد لله هسا كل شويه اخابر واهلي يمة . 
-الرب يشفيه . اعتذر لان شغلتك ..
-لا بالعكس جنت ماخذ استراحة .
-امممم خليك ترتاح باااي ..

-ادري تردين تنهزمين يله عمي مااخرج .. سلميلي ع الاهل كلهم ..
غلقتو وغمضت عيني واخذت نفس ..
خليت راسي جوة المخدا ونمت ..

صحيت على صوت ايمان ..
- والله عيني ماخذات راحتجن بغرفة عزيز .. موگلنا مايقبل احد يدخل غرفتة ..

سحبت شعري لورى .. ولفيتو وهي تدحق بيه واختها بالباب واقفة ..
وقلت .. عزيز هو الي سمحلنا ندخل غرفتو اسألي سراب اذا ماتصدقي ..

سوزان .. جذابة عزيز مستحيل يخلي احد يدخل غرفته .
ترانيم .. والمطلوب اشنو ؟؟
ايمان .. تطلعين واني اگول هذني راحن البيت كله دورتة ماكو تالي هنا ..
سوزان .. گوة تذب روحها عليه تورط نقذهن ..

ترانيم .. اعتذر تعبتكم معاي وانتو تدورو البيت كلو هيكي انا مهمة عندكم ..
ايمان .. ماينگدرلج عرمة ..
ترانيم .. ولو ماافهمت لكن شكرا الكي ..

صحيت لينا بهدوء .  لينا حبيبتي قومي صار العصر ..
لينا .. امممم اشنو بكم تتناقرون ..
ترانيم .. لا حبيبتي مانتناقر البنات يضحكو معاي ..
نسيت اقلك عزيز اتصل يسأل عنكي ..
لينا .. صدق واشلونو اخو ..
ترانيم .. بخير .. يله قومي ..
سوزان .. اوگفي عليمن خابرج عزيز ..
اشرتلها بالموبايل . 
بهذا اشتراه الي عزيز ..

كانو يدحقو البعض مستغربين .. وطلعنا انا ولينا. 

بحياتي مااحب اتعامل مع احد هيكي لكن هم جبروني بتصرفاتهم معي ..
نزلت وانا ضايجة ومقهورة لكن مابينت لأحد الي فيهم يكفي ..
كانت سراب تحضر سرير العامر بالاستقبال ..
دخلت الها ..
-تحتاجي مساعدة ؟؟
-صح النوم .. هلكتني جدتي ..
گومي اگعدي نضفي رتبي .. عبالك اول مرة ننضف ودور ذني البنات كلها مسطرة مايگومن يساعدني ..
حتى مالحگت اخابر اهلي اسأل عليهم ..

- اتصل عزيز وطمني واهلك عندو .
-عزيز اتصل بيج .. احم احم ..
-اشنو تقصدي ؟؟
-انتي الذكيه مالگفتيها ..

-فهمت قصدك بس الي في بالكي مستحيل يصير لامن جهتي ولامن جهتو ..
-اي هم صدگ الناس ماترحم وانتي من طائفه وهو من طائفة .. ولو اني اشوفج انتي وعزيز مخلوقين البعض ..
ضحكت لااراديا .. انتي اشبيكي سراب ناقصك تسويلنا عرس .. انا ماتهمني طائفه .. وحتى ابي كان يقول الحب مايعرف دين او طائفه معينة ..
لكن انا اقصد انه مستحيل افكر ارتبط او احب الا اذا لقيت اهلي ..
وانا اغشع عزيز مو مناسب لي .. احسو غامض وعندو اسرار وانا احب ارتبط بأنسان ورقة بيضه قدامي. .

- ياخية وهذا وين تلگيه بالعراق العظيم .. وبعدين اخوي طيب معليج بالكلام الي ينگال عليه ..
-لا سراب لاتتوقعي اني انتقص منو او اقلل من شخصيتو بالعكس ..
هو انسان شهم وصاحب غيرة على بنات بلدو .. الرب يحفظو لحبيبتو ..

-بس عزيز مايحب هي وحدة وراحت وتركته ..
- ليش ؟؟
-كان ببغداد يدرس .. وتعرف عليها هناك وحبها اربع سنوات سويه بقوا ..
اهلنا وناسنا كلها تعرف بيها لان مقرر يتزوجها وصارح جدتي وابوي ..

لكن فجأة تركتة وسافرت مع اهلها لجوء ..
-اشنو .. وليش ماخبرتو ..
-مالمحتله اصلا .. قطعت اخبارها وهو يخابر ماكو تالي بيوم خابرتة هي .. گالتله اني سافرت وي اهلي الله يكتبلك الاحسن مني ..
انصدم وعصب وكسر .. حتى هددها اذا ماترجع يسافر الها ..
بس هي غلقت والخط وكلشي يربطها بي حتى مايعرف طريقها ..

-اشنو هالبشر شلون تقدر تتلاعب بمشاعر شخص .  مستحيل كانت تحبو ..
وقديش صارلو ..
-اعتقد سنتين وبعدها ماحب ابد ذب نفسه على شغلة ودوامة ومخلصها ببغداد يجينا قليل ..

-قهرتيني والكلام الي سمعتو من عدنان عنو ..
-معليج بعدنان من يومة يغار من عزيز لأن الكل يمدح بي ويحبه ..
-ليش هو اكو غيرة بين الاخوة ..
- الطمع والزن يولدن الكره لاتستغربين ..
وخاصه هو يحس لو مهما سويناله يحس مقصرين بحقه .
-اشنو السبب ؟؟
-اووووه تركينا من هذا الكلام .. تدرين محد يحس بعزيز گدي .. انتي تشوفيني اضحك واسولف ومابيه شي .
بس داخلي يتگطع ..
-فاهمتك ..
-احنه هنا عدنا كلشي عيب .. حتى الحب عيب والكلام وي الغريب عيب .
بس مو بيدي .. گلبي تعلق بي ..
نزلت دموعها . ومسحتهن بسرعه وابتسمت ..
تدرين اول مرة اسولف وافضفض ..
بس ماعندي احد اسولفله ..

البارحة دزلي رساله يگلي تعبت !!
الى متى نبقى هيج ..
هو حقه كم مرة ينرفض ويرجع .. هم اهلة يردون يفرحون بي ويشوفون اولادة ..
ساعات تطخ براسي اگله انساني واتزوج ..
بس ادري بروحي اذا تزوج اموت مااتحمل ..

حضنتها وبوستها .. حبيبتي لاتقولي هيكي انتي اختي الي ماولدتها يمي ..
انا احس اني اعرفكي من زمان مو من شهر ..
الرب يحميكم ويجمعكم ..

-امانة ادعيلنا ترانيم ماعندي احد غير الله وانتي اشكيلكم
-اشكي للرب افضل .. هو الي يقدر يساعدك ..
انا اسمعك واواسيكي .. لكن الحل بيدو ..

-والنعم بالله .. خليني اگوم احضر للعشا لا تحجي جدتي عليه ..
- وانا اروح اشوف الجدة واقيس ضغطها اليوم ماقستو ..

دخلت غرفتها كان الكل قاعد عندها ..
-وينج يمة اني گلت نستيني ..
-شلون انساكي لكن اخذتني الغفوة ..
-نوم العوافي ..
قست ضغطها وكملت ..
سوزان .. خوش صارت عندنا ممرضه بالبيت ..
ابتسمت الها وقلت . 
لا بس يسعدني اراعي الي احبهم ..

كملت وطلعت ..
ماردت ابقى يمهم ..
مر كم يوم ورجع فقط عدنان وامو وابوه بقو عند عامر ..
كان عزيز كل يوم بالليل يتصل بحجة اهلو وجدتو ..
كان يقدر يتصل ع سراب او اي احد ..
لكن حسيتو يتعمد يتصل بيه ..
مااعطيتو فرصه ابدا لكن بذوق .. وخاصة انا مااعرف غايتو ولااعرفو ..

حتى لو نقذني واشتراني من داعش .  لكن مايعطيه الحق انه يتصل كل يوم ويسهر الليل ..
هذا اشنو صاحبتو ماتغار ..
ماانكر كنت صارمة معاه في البداية ..
لكن لما غشعتو مخلي بينا خدود بالكلام ..
وكان اكثر كلامو عن الاوضاع ..
وفرحان لان سيد من دينهم اصدر فتوى الجهاد ضد داعش وقال ..
بعون الله وعون النشامى واصحاب الغيرة الي بالجنوب وبكل العراق راح نهزمهم بفترة قصيرة ..
حتى لو كلفت ارواحنا ..

- انت كثير تحب وطنك ..
-وانتي ماتحبيه ..
-لا بالعكس احبو كثير بس ماعشت وشفت فيه مثلك احنة حياتنا اقتصرت ع الموصل فقط ..
ماطلعنا ولاشفنا .  اول مرة اطلع من الموصل لما اجيت للعمارة .
كنت اتمنى اكون ولد واستبد واتمرد وانهض ببلدي للاحسن ..

عزيز .. كلنا العراقيين اصحاب غيرة من شمالنا الجنوبنا الدول كلها تحسدنا على شجاعتنا ..
مايوم فكرت دقيقه..  انه الموصل مو ولايتي وانه داعش مادخل مدينتي ..
ماترددت ولالحظة انه البي دعوة الجهات العليا واضحي بنفسي وادخل وسطهم واعرف اخبارهم وافلش خططهم
كنت اقتل منهم واوجه اصابع الاتهام للي منهم وبيهم حتى واحد يكتل الثاني ..
مااريد اگلج اني واني . 
بس فعلا ذولة احنه وكل ولدنا مثلي واكثر ..

-الرب يحميك ..
انا اتمنى اخدم بلدي مثلك . حتى لو اعالج الجرحى واداوي المرضى بالمخيمات لكن للاسف مااقدر ..
عزيز .. يوم عن يوم اقدرج اكثر واعرفج اخت رجال وبنت ابوج ..
بس انتي امانتي مااگدر افرط بيج واخليج تتعذبين بالمخيمات ..
تگدرين تخدمين بلدج بالدعاء ..

-ترانيم ؟؟
-نعم ..
-شگاعد تسوين هسا ووين گاعدة ..
تذكرت انا نايمة على سريرو .. فزعت وقمت من مكاني ورتبت السرير ومن عقلي انو يغشعني ..

-هااا انا اجيت الغرفتك اخذ كتاب وبعد مااتصلت مااقدرت اطلع ..
-افتحي او مجر من المكتب وطلعي كتاب بي ..

-عملت مثل ماقلي ..
-لگتيه ؟؟
-اي .. ( جذبنـي اسمو للكتاب )
-اكو فاصله بالوسط افتحي الكتاب واقرألي بصوتج ..
محتاج استرخي بعد هذا التعب ..

ماقدرت ارفض او اتكلم .. ولقيت نفسي اقرأ .. وكأن الفضول يقتلني لأعرف ماتحويه هذه الصفحات ..
التي عندما يقرأها يسترخي ويرتاح !!

بدأت اقرأ ..
وكنت اهيم مع الكلمات وكأني اعيش فيها !!
{ أعرف بأن هذا هو جزء من مشكـلتي معك .. أخشى الابتعاد عنك ' أخشـى الحياة من دونك .. حاولـت الابتعاد لكـنني لم أتمكـن من ذلك .. نار قربـك اخف وطأة من نار بعـدك ياعزيز '………

هنا استوقفني الاسم واستغربت ؟؟

-ليش توقفتي كـملي ؟؟
اكملت من غير كلام ..
قلبـي يستعر بعيداً عنك ويتلظى بجوارك !.. اي حبٌ موحل هذا الذي علقت به ؟..
أي علاقةٍ عقيمـة هذه ؟…… ..}
كنت اقرأ وهو يستمع بصمت لكن انفاسه وتنهداته واضحة ..

قال .. تعبتج وياي .. صوتج فعلا يدل انك قارئة جيدة تدرين تصلحين تكونين مذيعة او شاعرة على هذا الصوت

حاولت اغير الكلام..
-اممممم اخجلت تواضعنا سيد عزيز ..
-انتي منين طلعتي ؟؟
-اشنو ؟؟
-لا هيج .. يله روحي ارتاحي ونامي اخرتج ..
سلم وغلق الموبايل ..

وانا بقيت اتصفح هذا الكتاب العجيب ..
اول مرأة اقرأه ..
وكأنه مكتوب الو والي ..
هل هي صدفة او كان متعمد ..
بقيت الليل كلو سهرانة اقرأ فيه ..
عحبتني كل كلمة وهمسة وخاطرة فيه ..

لدرجة ماحسيت الا على صوت الاذان . 
قمت بسرعة ورجعت الفاصلة المكانها وقفلت الغرفه وطلعت ..

دخلت الغرفه لقيت المنبه يدق ..
سراب توقتو لما تصلي الفجر ..
ركضت للفراش ونمت ..
صحيت الصبح بالقوة ..
بس اجت سراب وقالت ..
اهلي وصلوا بالطريق همة وعامر ..گومي سرور بسرعه قمت معاها ورتبنا البيت كانت ايمان عند اهلها تروح تخبز لان التنور عاطل عند بيت ابو عدنان .

سراب تطبخ .. وانا عملت دولمة موصلية استغليت عدم تواجد ام عدنان لانها ماتخليني اطبخ ..
قست الضغط للجدة ..
كانت اسراء في غرفتها ترضع ابنها ..
قلت لسرور ولينا انهم ينضفوا الطابق الارضي وانا صاعدة للطابق العلوي انضفو ..

كنت انضف وامسح بالارضيات . الدشداشة كانت مضايقتني ..
رفعتها وخاصه انو البيت فارغ ..
وعلي راح يجيب اهلو من بغداد ..
وعدنان بالشغل ..

وانا انضف تفاجأت بوجود عدنان وراي ..
نزلت الدشداشة بسرعه .
وسويت نفسي ماشفتو ..

اخذت المي للحمام .. لقيتو وراي .
-اشنو تريد عدنان ليش ملاحقني ..
-فكرتي ؟؟
-انت من عقلك اوافق .. مستحيل انسى ..
-ادري بيج تخافين من اهلي .. بس لاتخافين اني اهربج من البيت والكل ماراح يحس ..
واصلا عندي بيت مشتريه اخذجن عليه واتزوجج بالسر صدگيني محد يحس بينا ومحد يلومج ..
وحتى عزيز تركيله رساله انه انتي رحتي ع المخيمات راح يتركج ومايدور عليج ..
رميت القماشة الي كنت امسح بيها من ايدي ..
وضحكت ..

-امممممم بس انا مااتزوج الا بالكنيسة ..
- بس احنة مسلمين ولازم عقد ..
-اي عادي صير مسيحي واوافق اتزوجك ..
-تحجين صدگ مستحيل . ليش هو الرجال يمشي على ديانة المرة لو المرة تمشي ع ديانة الرجال ..
احنة ماعدنا هيج .
وهاي فرصه ماتتعوض فكري زين والج خلال هذا الاسبوع قرري والا ..

- والا اشنو ؟؟ اشنو هذي المصطلحات .. للمرة والرجال ليش هو اشنو الفرق بيني وبينك ..
انا اقدر اعمل كل الي تعملو واكثر ..
ع الاقل المرة اطهر واحسن من الذكور مثلك ..
انا احترم الاسلام واحترم المسلمين لكن انت لا لانك مستحيل تكون مسلم وتحمل تعاليم واخلاق دينك ..

عدنان .. اعرفج ليش هيج تسوين .. كل هذا علمود عزيز
بيش احسن مني. 
- الاحسن لاتقارن حالك بي .. يكفي هو حافظ علينا ومانظر النا مثلما تنظر انت لي ..

عدنان .. بطلي فلسلفه .. اني مشتريج وانتي مالج احد واهلج اصلا ماتوا وشبعوا موت .. يعني محد الج غيري گتلك ادللج دلال ..

دخل الغرفتو اخذ كيس وطلع . وهو يدحق بيه ويبتسم ..
كرهت حياتي كلما اقول راح تنحل تتعقد اكثر ..
قعدت ع الارض وانا ابكي ..
اي بكيت لأول مرة ..
ماحسيت بضعف واستسلام لكن الذل صعب ..
مسحت دموعي وكملت ونزلت ..
اغشعتني سراب .. شبيج .. عدنان سمعج شي ..
-ليش ماقلتي اجة ..

-ماادري بي .. ماشفته الا لمن طلع سألته گال اجيت اخذ فلوس واطلع مستعجل .. شنو راد منج ..
-اتركي الموضوع ..
-لا الا اعرف ..
سحبتني من ايدي وطلعنا للحديقة ..
يلة گولي ..
-يجبرني بالزواج منو بالسر . وهددني ..
-خلي يولي بس خلي يجي عامر وتهدأ الاوضاع .
واني اشوفلي حل وياه .
-يقلي اهربي انتي واختك وانا اخذكم على بيت واكتبي رساله انك هربتي على المخيمات ..
-اووووف هي دواه بس ايمان واني گلت شلون يتزوج غير تموته طلع يريد يتزوج من وراها ..
ااااخ كله من مرت عمي وايمان گاللة الحقيقه ومن يومها تغير وصار حاقد ..
-حقيقه شنو ..
-بعدين اسولفلج ..
سمعنا صوت سيارة…
دخلت ..

ونزل علي يركض .. نزل كرسي متحرك .. ونزل شخص كان يشبهو لعزيز لكن اصغر منو ..
وامو فرحانة ..
بسرعه اجن عماتو وعمامو واولاد عمو اتجمعوا كلهم ..
دخلوه لاستقبال بسريرو ..

قحطان .. تعاي بوية ترانيم .. عندة مغذي وعلاج فات وكتهن شكليهن بسرعه بعد ابوج ..

سلمت ودخلت واحس الكل يدحق بيه ..
اغشعتلو وابتسمت ..
سلامتك ..
عامر .. الله يسلمج انتي ترانيم .. عزيز سولفلي عنج ..
دخلت لينا ..
سلامتك ..
-وانتي لينا سبحان الخالق عزيز قصر بالوصف اصلا ..

ابتسمت وانا اركب المغذي الو ..
- واشنو قال ..
- لا اعذريني اني بئر اسرار عزيز مستحيل تبوگين الساني ..
ابتسمت .. الرب يحفظكم البعض ..

ارتحت لعامر كثير .. كان رزن وعاقل مو مثل علي يحب يمزح ويضحك ..

بقيت جنب عامر اعطيتو علاجو .. وكنت خجلانة من ولد عمو . بعدها قالو اجو اصدقاء عامر يردون يغشعوه .
اشرلي عامر اقوم ادخل ..
قمت للبيت ..
كنت مستغربه معقولة هو يشبه تصرفات عزيز والا انا الي قمت اتخيلو عزيز ..

حركت راسي حتى اطرد الافكار ..
وانشغلت مع البنات في المطبخ ..
بيومها اتعحبو ع الدولمة وحبوها والكل طلب الوصفه ..
كانت ام عدنان هادئة وقليلة الكلام من غير عادتها او يمكن من التعب لان سبحت ودخلت نامت .

للعصر الكل راح على بيتو .. طلب ابو عدنان نضمد جرحو العامر برجلو ..
لكن الخطار ماتوقف .. محبيه كثار او هم عاداتهم كذا ..
كل شويه خطار ..
مااتوقفوا لليل ..
وانا بقيت منتضرة ومانمت لان ابو عدنان اعتمد عليه ..
صعدو البنات للغرفه وانا بقيت بالمطبخ اسوي شاي الهم وسراب قالت انا تعبت خليج بمكاني .

لكن هلكني علي بطلباتو ..
كل شويه يقول شاي ماي فواكه ..
ماصدقت بدأو يطلعوا ..
دخل عدنان من باب الحديقه ..
شفتو عملت نفسي اغسل الاكواب وانضف ..
اتقرب وهمس ..
شلونها زوجتي المستقبلية ع التعب .. وكان يبتسم ..
سمعت صوت التفتت بسرعه ..
واغشعت ايمان واقفة بباب المطبخ الي من جهة الصالة وكان تحدق بية بغضب ..
من الصدمة وقعت الكوب وانكسر من يدي !!

#بقلمي_الكاتبة_شمس

يتبع……