مساء القداح حبايب ❤

//// #البارت_الاخيييير /////

#بقلم_الكاتبة_شمس

( #شمس_السعـدي )

********* #ترانـيــم ***********

عندما تتحدى القدر وتواجه تستطيع التغلب على الصعاب ..

مااتحملت نبقى محاصرين لاعدنا سلاح لاتغطية موبايلاتنا انغلقت ..
عطش وجوع .. والكل يتشاهد النهايتة ..
تعبت واني اسمع كلامهم ..
- يمعودين صدگتوا واحد يفزعلنا ..
- معقولة ماكو طيارات تجي تنقذنا ..
- وصدگتوا نطلع هاي نهايتنا. .
- يعني بعد مااشوف بنتي الصغيرة ..
- ولكم امي تموت وراي والله ماعندها احد غيري ..
- واني مرتي راح تجيب منو الها وابني منو اله ..

اسمعهم وگلبي يتگطع .. ببالي حبيبتي واهلي .
مايعرفون شي عني وحتى مااقلقهم ماخابرت .
حنت متأمل احد يجي ينقذنا .
بس لحد الان ماكو خبر .. مااتحملت ابقى گاعد بمكاني وانتظر قدري ..

وگفت على حيلي .. يالله گوموا ..
باوعوا عليه بنظرات متسائلة ..
- وين عزيز .. المنطقة محاصرة بداعش صدگت يعوفونا عايشين . من غير القناصين الي تارسين
المنطقة ..

جنت متعود البس ملابس مدنية جوة ملابسي العسكرية بكل هجوم ..
نزعت البدلة العسكرية ..
راح اروح اشوف حل النا او اطلب دعم منو يروح وياي ؟؟
كم مرة كررت الكلام وماقبلوا ..
زين اني رايح وحدي .. ديرو بالكم على نفسكم بين مااطلب دعم ..

طلعت بعد التوكل على الله ..
بين الشوراع والبيوت . المنطقة هادية والاهالي خايفة وببيوتها ..

جانت مجازفة بالنسبة الي بس لازم احاول ..
وصلت وحدة من القرى بالصقلاوية والقريبة ع الفلوجة ..
استنجدت بأهلها وگمت احجي حجيهم .. وگلتلهم اهلي كلهم ماتوا من التفجيرات والبيت وگع عليهم ..
اريد مساعدة ..
الكل خايف والي يسد بابة ومايقبل ..
سمعت صوت وري مرأة جبيرة . تجر بسعف على متنها .
- انت من وين ابني ..
- من الصقلاوية . واهلي ماتو وبقيت وحيد ..
- تفضل ابني ادخل .
دخلتني البيت قديم . وزوجها رجال جبير يسموه العطار .
رحب بية بس كانت عندة حدبة على ظهرة ومايگدر يمشي ..

بقيت عندهم كم يوم متأمل الگي طريقة للهروب .
سألتها گالت الا تعبر للجهة الثانية من نهر الفرات ..
بس هيج خطر عليك .. لان كل الي يردون يعبرون اما ينقتلون او يعتقلوهم ..
خوفتني اكثر بس لازم اجازف ..

وامنتني امانة اذا وصلت البر الامان . ماانساهم وانقذهم لان وجودهم مثل المساجين هنا .
وعدتها خير وطلعت .
لكن الي ماحسبت حسابة وجود قناصين ..

اول مرة بدأ ضرب علينا عشوائي لان ماطلعت وحدي وياي كم عائلة ..
العوائل من شافوا الضرب تراجعوا .. اما اني بقيت مصر
الى ان حسيت ظهري خدر...
ووگعت بالگاع گمت ازحف مثل الطفل وارجع ورى لان الرمي كثر وعبالك مترصدين اي واحد يريد يعبر يرمون عليه ..
بقيت بالگاع واون من الوجع ..
اجة كم ولد سحبوني وودوني البيت العطار ..
گال اكو طلقة مستقرة بظهرك ومال قناص .. .
مااگدر اجازف واطلعها واني مو دكتور ..
راح اضمدلك الجرح وتبقى هنا بين ما يجي الفرج .

جان يضمدها واحس روحي راح يغمى عليه ..
گام يعقمها بالكحول ويلفها بفيت نايم على بطني مااتحرك الى ان بدت اطرافي توگف ..
هنا يأست واتمنيت باقي وي جماعتي وميت ولابقى هيج ..

صرت مثل السجين المحكوم مؤبد بنفس الغرفة ونفس المكان لمدة اشهر لااحد يوصلنا ولااحد يگدر يطلع منا .
من التفكير انقطعت شهيتي ..
المرأة ماقصرت وياي جانت مراعيتني وتسميني بأسم ابنها هم مقتول على يد داعش ..
وهم اجو شاردين الهاي القرية حتى ينجون بنفسهم .
بسبب سوء الحال ..
جانت ماعدهم امكانية يشترون واللگمة يقسموها بينا .
بقيت مقعد وهي تراعيني بالبداية جان مثل الموت بالنسبة الي من تنظفني وتمسح جسمي وتبدلي .
بعدها استسلمت ويأست ..
گمت احسب ايام ع الحايط مثل المسجون .
افكر بأهلي بحبيبتي انتظروني لو نصبو فاتحتي ..
لو باقي يم جماعتي وميت بشرف ولا بقيت هيج عالة ياترى اجاهم دعم لو بعدهم بمكانهم ..
لما بدأت القوات تحرر بعض الاراضي .
فرحوا اهل القرية وتشجعوا يطلعون .. لكن الدواعش فجرو الجسر الي يوصلهم للجهة الثانية .
وگامو يرمون على القوارب الي تنقل الناس .
هالشي خلى البقية يرجعون وفقدنا الامل ..

ماصدگت من اجو القوات .. وطلعونا ..
شالوني ببطانية من طلعت وصارت الشمس بعيني غمضت مااتحملت ضوة النهار والشمس ..
اشهر والشمس ماشايفهة .. حتى المراة والرجال . ماعرفت عنهم شي ومااعرف وين راحوا ..
لما طلعنا من الفلوجة خبرت القوات عن اسمي واهلي وانطيتهم رقم عامر ..
ورجعت لكن رجعت عبارة عن سجين بغرفة مقعد هو والجدران الاربعة ..
حفظت حتى الحشرات الي تجي كل يوم حتى تاكل جلدي المسلوخ من النوم ..
احس بألم ومااگدر احجي .. بس انفضهم من جلدي وينسلخ اكثر ..
رغم المرة دايما تعقم جسمي وجلدي بس مايفيد ..

لما رجعت حسيت نفسي غريب بين اهلي .. والي احبهم تغيروا هواااي ..

انفتحت الباب ..
جنت مغمض واتخيل ذيج الغرفة ..
سمعت صوت ..
بابا نحنا اجينا .. فتحت عيوني من الكابوس الاحمق الي مايفارقني . الغرفة صارت هاجس بالنسبة ..

ترانيم ..
اخذت اسد ودخلتلو .. لقيتو مغمض عينو ويضرب ع الجدار .. وكان يكتب بأصبعو عليه ..
لما حكيت فزع ..
- مو گلتلكم لاتعوفوني وحدي .. تعبت اشهر واني وحدي ارحموني ..

خليت يدي على راسو .. انا مااتركك حبيبي . رحت جبت اسد تغشعوا ..
بقى صافن عليه .. تعبان اريد انام ..
خلى ايدو على عينو ونام ..

طلعت اسد عند عماتو .. ودخلت عندو ..
اخذت قرآن الجدة وقعدت اقرألو .. دموعي ماوقفو ..
كل شوية يفزع من نومو . وكأنو بكابوس ..
ولما يغشعني يمسك ايدي ..
لكن امو كانت بحرب معي ماتخليني اتقرب منو..
وكلما تغشعني عندو تقول ..
ابنج يبجي ..

عزيز كان مايحكي كثير ويكتفي بالاجابة فقط اذا احد سألو ..
عدنان ماتركوا ودايما معاه .. هذا الشي قلقني ..
وخوفي كان بمكانو..
بيوم سألني عزيز .. اسد شلون تسجل على اسمي ..

- هااا بقيت مصدومة مااعرف اشنو اعمل قلتلو .
عمو هو رتب الوضع وعمل عقد النا ..
- قصدج عقد زواج مزور مووو
- اي ماكان عدنا حل غيرو لان... .
- گلتي عزيز مات ومايرجع وابني يبقى بلا ابو ..
- عزيز ليش تقول هاكذ . انا خفت على ابني يبقى مثل اللقيط . واهلك ..
- اهلي جبروج مووو
- مو وقت هالكلام انا احكيلك كلشي بعدين ..
- شايفتني عاجز مووو
- عزيز ارجوك ..
- هاهي ترانيم . روحي منا .
- هذا كلامك الي هذا اشتياقك . انت عارف شلون عشت دونك واشنو صار بيه .
انت حتى ابنك ماكلفت نفسك تحملو وتغشعو ..
- الخاطر محمد كافي . تعبان تعبان اني .
- خليني اطيب جروحك واريحك لاتبعدني عنك .. خلي اكون بلسم ودوا الك ..
- مااگدر . جماعتي كلهم راحوا ماتو . لافدتهم ونقذتهم ولامتت وياهم ..
- هذا قدرك . وانت مؤمن مالازم تقول هاكذ .
- ااااااه ماكو واحد يحس بيه ماكووووو .
اخذتو الحضني وخليت راسو على صدري حسيتو هدأ واتنهد بقوة ..
بعدها بعد راسو عني ..
انتي بعدج تحبيني ..
- اموت فيك ..
- جيبيلي اسد ..
جبتلو اسد اخذو
- عوفيه يمي وروحي ..

كنت اراقبو من بعيد . حملو على صدرو ويشم فيه .
ابتسمت . سمعت صوت وراي .
كان عامر .. لاتخافين شوية شوية ينسى ويرتاح . صح ورانا طريق طويل بس لازم نتحمل ..

- حاستو متغير ماعزيز الي عرفتو ..
- مو بس وياج ويانا كلنا .. والله يسامح الي نقلة حجي صدگ جذب وشوش عقلة ..
بس ادري بعزيز ماراح يصدگهم ويجذب احساسة ..

رحت عند البنات بالمطبخ .
كانت اسراء وسراب . كل يوم وحدة تجي عندنا تساعدنا بالبيت .
الناس والخطار مابطلو ..
لكن مايخلو احد يدخلوا ..

مر كم يوم وابوه قرر يسافرو للخارج وبدأ بتجهيز اوراقو ..
بين ماعملو جواز الو وفيزو .. اخذوه ..
طلبت اروح معو قال لا .. انتي ابقي يم ابنج .
امي وابوي راح يرحون وياي ..

اخر يوم وقبل ليسافرو صاحني وقدام اهلو وجدتو ..
قال خلي لينا تنقل مدرستها هنا او دزي علي واستقرو هنا ..

بقيت ادحق فيه .. وغراضنا ..
- يجيبهن علي بسيارة او عامر .. وخلوهن بالمشتمل .
مااريدكم وحدكم هناك تبقون ..

اغشعت امو تبتسم وايمان بعيونها الشماتة ..
- خلص حبيبي الي تقولو انت يصير .
حسيت ابتسامة خفيفة بملامحو ..
وصدمة بملامح البقية ..

لينا تضايقت واعرف حقها . لكن مابيدنا شي نعمل . انا نفسي تعبت كل يوم بمكان وماكو استقرار ..

الفلوس الي أمنهم عندي ..
نزلت بالليل وقلتلو انهم موجودين وماصرفتهم .
قال .. خليهن عندج خاف يصير شي عليه . ذني ضمان الاسد والج ..
- ليش تگول هيج عزيز .. اني تعبت وصبرت وانتظرت والرب رجعك الي ليش تحاول تخوفني من جديد ..

- كلشي اعرف لاتخافين . اذا الله كاتبلي عمر من ارجع احل كلشي ..

بعد ماسافرو ايمان حاولت تسيطر ع البيت .
لكن الجدة ماتسكت عنها ..
كل يوم كنت اتصل بعزيز . فيديو انا واسد .
وكان يفرح لما يغشعو .

رغم احسو بعيد عني . لكن حاسة بنظراتو وحبو الي .
كنت اشكي السراب بعدو وجفاه ..
- خيه شبيج تدرين الي مر بي مو سهل ومايگدر يسولفلج . خلي يحجيلج عامر شلون لگوه ..
لو جسمة شحالة ماتسلخ من النوم ..

- اعرف ومقدرة وضعو لكن انا اريد بس نظرة منو مااريد شي ..
- الله لاينطي الي لعبو بعقله ..
- اشنو قصدج ..
- خية حلفني مااگول . بس اريدج تصبرين وتثبتين الهم انتي وياه بعدكم مثل الاول واكثر .
مو عدنان مسولفلة حجي صدگ جذب وگايله انتي شردتي وي عامر البغداد وعقد عليج بأسم عزيز حتى بعدها تگدرين تتطلگين غيابي .
عزيز صح ماصدگ كلامة بس صار شك عندة .
وصاحلي بالليل وحلفني بأبني اسولفلة كلشي .
تدرين بيه مااخاف ولااسكت عن الظلم حجيتلة كلشي من اول مااختفى الحد هذا يومنا .
بس هو شني سودة عليه . اني احجي وهو يضرب بالحايط بقوتة . حتى جدتي گعدها من النوم ..
مخترعة خطية ..
لاتشوفيه ساكت بس هو ياكل بروحة ماردت اسولفلة واضوجة بس حقه يعرف كلشي ..

- ااااه سراب يمكن مكتوب ماارتاح طول عمري ..
- لاتگولين هيج .. صح العيشة هنا تگصر العمر هههههه بس من يرجع زلمتج وابنج بحظنج هاي تسوى الدنيا ومابيها ..
طنش تعش ..
- ههههه اشنو هاي ..
- ههههه هاي لازگة بحلگي هاليومين وماخذتها قاعدة بحياتي والله الي يطنش الناس يعيش ..

حاولت اعمل بحكمة سراب .. وقمت اطنش عدنان ومرتو .
وكنا كلنا ننجمع عند الجدة بالغرفة ومرات ننام عندها .
تقعد تحكيلنا حكايا ايامها وحياتها ..
ومرات تغني وتلعب مع اسد ..
لينا تداوم مع سرور وتروح وترجع معاها ..
عامر كان مايجي الا يومين بالشهر ويروح .
اخذ بيتنا واستقر بي هو وعلي ..
بعد مااخذ الاذن من عزيز انو يعيش بالبيت لان دوامو بين يوم ويوم ومايقدر يروح ويرجع ..

عرفت انو عامر يحاول يبعد بسبب كلام عدنان ومعاملة اهلو بالفترة الاخيرة ..

بعد عملية عزيز وطلع منها بسلامة فرحنا لان كانت اطلقة باقية بظهرو لكن كلام الدكتور ازعجنا .
قال احتمال يتأخر بالمشي او مايمشي ..
وطلب منو علاج طبيعي بعد مدة شفائو ..
لما رجع عزيز كان يائس من انو يمشي ..
وقالي .. شوفي يبنت الناس مااريد اظلمج وياي طول العمر.
هذا اني وهاي وحياتي لو امشي لو ماامشي ..
جانت عندي نية اهاجر واخذكم .. بس مااريد ابهذلج وياي بالغربة ومااگدر امشي ..

- اشنو تقول عزيز .. انا راضية ترجعلي نفس فقط . ماصدقت رجعتلي وتحكي وتتحرك . انا حياتي كلها فداك ياعمري . انا وابنك بحاجتك بعدك عشنا بذل وقهر لاتبعدني عنك عزيز .
مااتحمل اموت ..

سحبني العندو وحضني ..
بحياتي ماخاب ظني بيج .. واعرف اصيلة .. اعذريني اذا قسيت عليج بس جنت ماطايق حتى روحي ..
ترانيم انتي عندي الهوا الي اتنفسة واسد روحي ..
الملعون اشتاقيتلة وينة...
- نايم هسا اصحيه .
اخذ ابنو الحظنو ويحاول يصحيه ويقبلو ..
نزلو غرفتنا بدل غرفة اهل عزيز ..
وصرت قريبة عليه ..

بعد شهرين من رجوع عزيز تغيرت حياتنا . وبدأ يسترجع نفسو وضحكتو وكلامو ..
التزم بالعلاج الطبيعي وكان عمو ياخذنا وانا معاه ماتركتوا يرجع تعبان ومتضايق لان النتيجة مابينت ابدا .
لكن كنت دايما احاول اعطيه الامل .. او اخلي اسد بحضنو واروح اشتغل ..
في سبيل ينشغل معو ..

رغم وجودنا ببيت اهلو .. لكن بوجودو مااحد يقدر يحكي معي ابدا ..
وخاصة بعد ماعاتبهم على الي عملوه معي .. وقالهم .اي كلمة انا اخذ مرتي وابني واستقر بعيد عنكم .
وهذا الي خلى امو تتغير ..
وايمان ماعادت تقدر تحكي ..

كنت حاملة البيت كلو .. كل يوم بالاسبوع اعمل عشا واعزم اخواتو وننجمع نحكي ونضحك .
ولما يجو عامر وعلي ..
كنا نبقى للفجر سهرانين كل هذا اثرت على حياتو وبدأ يتأقلم ..

بسنة 2017 صار عمر اسد سنة .
وعزيز ماتحسنت حالتو قدر يحرك رجليه ويوقف اما المشي صعب عليه .. صح هو يتضايق لكن لما يغشع اسد يقول ..
- شوفت اسد عندي تكفيني لو ابقى عمري كلة هيج
حياتنا طبيعية وحبو الي زاد اكثر واكثر ..
لما كملنا عيد ميلاد اسد ..
خليتو عند لينا وسرور . وجهزت نفسي الو .
طول السنة كان يخاف يتقربلي ويحس بعجزو . لكن قررت ازيح هالخوف منو..
لما دخل وهو ع الكرسي واغشعني .. دحق بيه بأبتسامة ..
- شلون بيه . اشهر واني صابر ومتحمل عنج .. جنت مكتفي بحضنج وبوساتج ..
- اشتقتلك حبيبي ..
اتقرب من السرير ساعدتو ..
واتقربت منو .. لمس وجهي بيدو ..
ويتلمس بشعري .. ادري مقصر بحقج ..
- انت غامرني بحبك وهذا عندي بالدنيا .
- بس انتي حقج هم عندج رغبة وغريزة .
- وانا اريد اكفيها بوجودك معي ..
كنت جريئة وحاولت اخليه يتجرأ معي .. ماانكر كنت خايفة عليه يتأذى ..
لكن عشنا احلى ليلة ماعشتها من سنتين .
طلعنا شوقنا وشغفنا كلو ..
بعدها اخذني الحظنو وقال ..
- شكرا حبيبتي لانج صبرتي عليه ..
- انا الي اشكر الرب لانك موجود بحياتي لسا ..
- شموجود غير تفصيخ ههههه ..
- لاتقول هاكذ حالتك فيها تحسن ..
وانا متأكدة راح تمشي ..
- ااااه رنوم شوكت مشتهي اخذ اسد ونطلع نتمشى بالبستان ..
لو افررة واونسة .. خطية ماشاف شي مني ..
- يكفي وجودك يمو.. ولاتنسى مايريد احد فقط انت قد مايحبك ..
- ماگلتلج . عامر يحب ..

قعدت وانا مصدومة .. صدق منو ووين اغشعها ..
- ماادري بس الي عرفتة هي من بغداد . المهم اكيد هالمرة اهلي ينجلطون .
ماخلصو من الموصلية اجتهم البغدادية ..
- هههههه لاتقول هاكذ . المهم انفكت عقدتو وراح يتزوج وهو اصلا مايجي هوني كثير وعايش حياتو ببغداد ..
- اي هو كلفني احجي وي جدتي واهلي .. وحاير شلون افاتحهم ..
- امممم اصعب مهمة ..
- باجر احجي وياهم واشوف ..

ثاني يوم حكى مع اهلو .. امو رفضت وماقبلت .
لكن عمو قحطان قنعها وقالها ..
- هو اول وتالي مو يمنا خليه يتزوج ع الاقل اكو مرة تراعيه هناك والجدة ايدتو بكلامو ..

رحنا البغداد انا وام عدنان وعماتو خطبناها الو .
كانو ناس بسيطين وكثير حبابيبن .
والبنت الوحيدة الاهلها ..
عزيز اهدالو الاثاث الي بالبيت الو . وقالو اخذو وتزوجو بي . ماعدا اغراضنا الشخصية جمعتها وصورنا ..

بيوم الخطوبة رحنا كلنا حتى عزيز والجدة . وكانت اول مرة نفرح هاكذ ..
لبست حبيبي وابني قاط صارو مثل العرسان ..

علي قرر يرجع للقسم بعد ماتزوج عامر ببداية سنة 2018 ..
انا رحت للموصل بعد التحرير بخمس اشهر واخذت لينا .
دموعنا ماوقفت من البكي .
اخذنا عزيز اجرلنا سيارة ..
كان بيتنا مهدوم للارض واراضينا كلها خربانة ..
مابقى منها فقط صور قديمة وذكريات محطمة ..
بيومها صارحت لينا بوفاة ابي واخي ..
وهي انجنت وقعدت تبكي وتلومني لان خبيت عنها ..

بالقوة قدرت اسكتها واقنعها ..
قررت اترك كلشي بالموصل وابيع اراضينا .
بعد اهلي ماعاد الي رجعة ..
رجعت الملم خيبات املي بمدينتي ووطني ..
طلب عزيز انو ارفع دعوة تعويض لكني رفضت .
لان ماكو اي شي يعوضني عن اهلي وخسارتهم .

لينا بالاعدادية وكانت متفوقة ..
بيوم صارحتني بشي ماكنت متوقعتو ..
- اختي جود يريد يطلع للسويد ... وطلب مني انه يخطبني قبل لايروح ويعمل اوراقي ونطلع اشنو قلتي ..

الصراحة ماتوقعت هالكلام منها وخفت .. هي الوحيدة الي بقت لي من اهلي .
- وانتي مقتنعه ..
- انا احبو وهو ماتركني ابد . وكان معي دايما . ووعدني اكمل دراستي واستقر ..
- وانا ..
- انتي عندكي حياتكي واسد واخي عزيز .. انا راح اتصل كل يوم فيديو وتغشعيني وبعدين انا ماراح اتزوج هسا ..
حضنتها وبكيت ماعرفت اشنو احكي ولااقدر امنعها وهي مقتنعه بقراراها ..
قلتلها اعطيني وقت افكر ..

لما حكيت العزيز بالليل وقلتلو على رأي لينا ..
قال صح ماارتاحيتلة . بس مبين متمسك بيها ..
ولو حاس علي مايل الها ..
بس مادام هي رايدة ذاك الولد مانگدر نعارض ..

بقيت مصدومة... حبيبي صاير ديمقراطي ..
- هههههه لينا كبرت وعانت هواي مالازم نضغط عليها .
شوفي ترانيم اني جنت مقرر مااگلج بس هسا لازم تعرفين .
- قول حبيبي ..
- جنت مقرر اطلب لجوء ..
- ليش ووين . هوني اهلك وبلدك ..
- بس اني مااريد اعيش هنا .. تعبت كل يوم اتذكر الي صارلي وصار الجماعتي ومحد نقذنا .
احنة مبيوعين من زمان ومحد النا ..
هاي حالتي اكو واحد سأل عني عالجني طلعني برة .
شتحجين انتي ..
- واهلك .. عزيز انا مااريد يقولو انا الي قلتلك نطلع ..
وخاصة بعد ماتحسنت علاقتي بيهم ..
- هنا ماكو امل الي .. احنة نطلع هجرة وعلاج بنفس الوقت ..
وانتي گلتي جود يريد يروح للسويد . واحنة هم نطلع وياهم ..
- خلينا نفكر اكثر مااريد استعجل ..
- اني تعبت ترانيم .. من زمان ببالي الشغلة من اول مارجعت لهنا ..
ودرست الوضع وعندي عرف بالسويد . گال شهادتج مرغوبة عندهم .
واكو اجهزة حديثة للعلاج الطبيعي واطباء .. واگدر افتحلي مشروع هناك واشوفلي شريك ..
- عزيز انت سمعت الدكتور قالك علاجك يتأخر ع الاقل 18 شهر وتقدر تمشي يعني مو صعبة عليك مااريد اعيش بغربة ثانية ..
- ليش منو الج هنا ..
- انا عندي انت لكن اهلك... .
- عوفيهم عليه ..

اهلو تضايقو لما فاتحهم بالموضوع والكل وجهلي اصابع الاتهام لكن عزيز قدر يقنعهم ..
لينا فرحت كثير ..
جود اجة خطبها من عمو قحطان وتزوجوا ..
علي بيومها مادخل للبيت ابد واعتكف ايام بغرفتو ..
طلبنا لجوء للسويد من دائرة الهجرة . وقدمنا اسبابنا ..
لينا قدمت بدل جود لان نعتبر متضررين من الموصل واحداثها ..
اشهر وقدرنا نسافر للسويد ..
كانت مأساة حقيقية لما تروح عن بلدك واهلك وتعيش بالغربة .. ريحة العراق وحدها تكفي حتى تشعر بنفسك تنتمي الو ..
ودعنا الكل وطلعنا ..
كل الي احبهم معي .. لكن احس نفسي مسؤولة عنهم كلهم ..
راح ابدي حياة جديدة وتحديات اكثر بهذه الخطوة .
رغم عمو قحطان ماقصر معانا وقال اي شي تحتاجوه گولو واني احوللكم ..
بحكم عزيز عندو حصة من الشغل ..
عانينا كثير بالبداية وجود ماتركنا ابد وكان معنا . ووقف مع عزيز كثير .. حتى كل يوم ياخذو للعلاج الطبيعي ..
انا قدمت شغل مساعدة طبيب وكنت اعمل ممرضة ايضا وهالشي ساعدنا بدخلنا ..
عملنا حفلة صغيرة الجود ولينا وسكنو معانا بالبيت ..
اشترك هو عزيز بشركة صغيرة للتسويق المباشر .
وكان شغلهم ماشي ..
وبعد تعب نهار كامل ارجع الاقي حبيبي هو واسد منتظريني يستقبلوني بعشا من ايدو .. رغم صعب عليه يوقف لكنو صار احسن ويقدر يمشي بعكاز ..
اسد خليتو بحضانة وصار السانو طويل ويحكي كثير ..
عانينا كثير ومازلت اعاني بالغربة والمسؤولية لكن اشكر الرب الي جمعنا وساعدنا وغير حياتنا ..
هوني التقيت بكثير لاجئات مثل حالتي او اكثر .. وصرنا صديقات ..
عزيز رغم اعاقتو لكن مايأس وكان يحاول يقدملي الافضل الي والابنو..
لينا حاليا تكمل دراستها وتتمنى تصير دكتورة ..
مازلت مستمرة بطريقي في الحياة ..
ومازلت اقاوم لأعيش واسعد عائلتي الصغيرة ..
اختصرت الكثير من حياتي بعد رجوع عزيز لكي لاتملو من معاناتي واخترت لكم اجمل لحظاتي معه بعد رجوعه ..
اما حياتي في الغربة ستعرفونها في جزء من رواية اخرى للكاتبة تخص المغتربات وحياتهم ..
شكرا لكل من ساندني وذكرني بالدعاء .. ادعوا لي بالسعادة ولزوجي بالشفاء وراحة البال ..
اتمنى ان اكون قد شرحت لكم ولو جزء بسيط من معاناة الموصليات وهناك الكثير منا وحكايتهم اسوء بكثير.
شكرا لكم وفي امان الله مثلما يقول عزيز ..

#بقلم_الكاتبة_شمس_السعدي

احبتي اتمنى ان تكون الرواية اعجبتكم ملتقانا معاكم برواية اخرى ..
الحقيقية عندي روايتين .. وحدة اسمها حكمة ذئب
والثانية عن المغتربات العراقيات ..
سأختار احداهما بعد فترة استراحة ❤❤
شكرا لمتابعتكم الدائمة لي ..