مساء الورد لعيونكم احبتي ❤

//// البارت الخامس والعشرون /////
#بقلم_الكاتبة_شمس
( شمس السعـدي )

********* #ترانـيــم ***********

متى الموت يرحمني من عذابي
متى أرتاح من أحزاني
متى يترك الهم قلبي
أعيش ولا أعيش فالموت يدق أبوابي
فالعذاب دائم والدنيا تسعى إلى خرابي
لم أعد أطيق الحزن إين أنتم يا أحبابي
قلبي ينزف الاوجاع وأنا أنادي إين أحبابي
لماذا لا يرد الجميع لماذا لم يعد أحدا يبالي
______________________________

مااهتميت الهم ونزلت بهدوء حتى احد يساعدني ..
كان المي اهون عليه من جرح قلبي بعد عزيز وعيون الي مايرحموا ..

لاقتني ام عدنان.. 
شبيج يمة بس لاتطلگين ..
صاحت الجدة .. تعاي يمة هنا خلي اشوفج ..
رحت الغرفتها ..

- بعدج هاي بدايتها .
- عمة خلي ناخذها للمستشفى.
- تاخذها يلعب بالبنية ويضربنها ومدري شيسوللها وتالي يشگن بطنها مثل سراب ..
عوفيها هنا تكمل طلوگها وتجيها الحدادية ..
بقيت بالبيت اتلوى ساعة يروح الالم وارتاح وساعة يرجع بقوة بحيث بطني تقطعني ..

نزل عدنان من فوق ومن غير مايحكي طلع ..
وبعدو ايمان .. انت تدحق بيه بحقد لكن ماحكت شي .
تعجبت من سكوتها رغم هاي فرصة الها تفصحني ..
دخلت للاستقبال وقعدت نص ساعة وطلعت ..
وهي تأشرلي بحركة بأيدها مثل التهديد ..

انا الوجع قاتلني والجدة قالت ابقي اتحركي لاتنامي ..
وايمان تحوم حولي ترمي كلام عليه ..

صعدت ام عدنان حظرت الجنطة واغراض للطفل والي ولينا معاها تساعدها ..

دخل عمو وبعدو عامر .. ياالله ياالله واخيرا راح يجي ابن الغالي وينور البيت ..

ابتسمتلو بثقل .. عامر كان ملامحو متغيرة ومعصب ..
تغدوا انا ماقدرت اكل من الالم ..
جبروني اكلت شوربة دجاج قليل ..

بعد الغدا اشرلي عامر للاستقبال ..
دخلت بعدو ..
- اگعدي ارتاحي ..
قعدت ..
هذا النذل شسوالج .. وبسببه صارت عندج آلام ..
- اشنو تقصد عامر ماحبيت طريقة كلامك ..
تتوقع انا اتركوا يقرب عليه ..

- لاتخلطين بالحجي ماقصدي هيج .. اعرفج شنو انتي .. بس مرتة ختبرت وحجت حجي ماله معنى ورزلتها وگلتلها ديري بالج على رجلج لان الصوج بي مو بيها ..

ولاعبالج سكتت والله طبحت حضة .. ضحك .
بقيت ادحق فيه وهو يضحك ..
- هاي انتي هيج عاضته
ابتسمت .. اي كان الوجع موتني وهو راد يساعدني وانا مقهورة منو مااتحملت وعضيتو .. ليش متأذي كثير ..

- هههههه شنو متأذي غير رايح للمضمد يضدمها بالله شتتوقعين شگاله منو العضاني ..

ضحكت مااتحملت وانا اتخيلو… والم زاد عليه قمت من مكاني ..
- ها شبيج تأذيتي . بس تدرين من زمان ماشايفج هيج تضحكين ..
- بعد الغالي مالي ضحك وفرح .. وحتى لو ضحكت ما من قلبي .. اغشع اليوم اولد ويجي ابنو للدنيا وهو ما هوني ..
اتمنى اغشعو وهو منتظر بالباب وينتظر ابنو وينتظرني ..

- خلي املج بالله .. افرحي اليوم يجي قطعة من عندة النا وينور بيتنا ..
بقيت لليل اتألم الى ان زادت الامي كثير .. اخذني عامر وعمو والخالة ام عدنان.. 
قلتلهم خلو لينا تروح معي . مااقدر بلاها ..

كانت ولادتي سهلة وماطولت .. كنت اتخيل حبيبي عندي وامي .. هم الاثنين الي حظرو ولادتي ..
مااعرف ليش خفت لما اتخيلي اني اغشعتو. وليش طيفو دايما يلاحقني ..
معقول احساسي يخيبني وعزيز خلص ماعاد يرجع ..

بكيت يومها لما اغشعت اسد وشميتو… من اول لحظة وكأنو عزيز قبالي ..
اخذتو الخالة ام عدنان وحضنتو وتبكي ..

- ياروح امك وينك تعال شوف ابنك بحضني .. سودة عليه يمة رحت وماتدري راح يجيك ولد ..
كانت تحكي وتبكي وبكت معاها كل الواقفين ..

من فرحها ماصدقت وقامت تعطي فلوس للكل ..
الممرضات والعاملات .. وقفو حولها كلهم ..

طلعوني بعد ساعة .. عامر وعلي باركولي وفرحانين مثلي واكثر . 
ولينا وام عدنان يتناقرو عليه .. كل وحدة تريد هي تحملو ..

وصلنا للبيت وعمو كان مشتري خروف ذبحو تحت رجلي عدنان ..
دخلت للجدة اخذتو من ام عدنان وقبلتو وحضنتو. وعمو قام يقرأ ايات وتكبيرات بأذنو…
الفرحة يومها كبيرة كان ليل لكن عندنا نهار ..
اتمنيت حبيبي يدخل من الباب وتكتمل فرحتنا ..

من التعب نمت بعد ماحطو سرير بغرفة الجدة ونزلو سرير اسد…
نمت وحلمت عزيز نايم وعيونو تدحق بيه .. احاول اتقرب منو مااقدر ..
حملت اسد الو .. دموعو نزلو ..

قعدت مفزوعة وابكي ..
والجدة قعدت من نومها على صوتي ..
دحقت بأسد نايم بسريرو وجدتو يمو..

- شبيج يمة مخروعة ..
- حلمت بعزيز..  عزيز في شي انا حاسة ..
- استهدي بالرحمن يمة .. الي كاتبة الله يصير ..
ادعيلة وانتي نفسة هسا .. اذا عايش يرجعلنا بسلامة واذا اسم الله لا فنشوف جثتة وندفنه ونسوي فاتحتة..

هي قالت هاكذ وانا تهسترت اول مرة ابكي هاكذ ..
- لاتقولي عزيز مات . عزيز عايش وراح يرجع الابنو ويرجعلي .. انا صابرة ومتحملة لأنو عندي امل يرجع
واذا مارجع معناها مالي حياة بعدو ..

قعدت لينا .. اختي اهدي خوفتيني ..
ام عدنان .. شبيج الطفل منا لاتفززي .. عبالج بس انتي گلبج محروگ .. اني ام تعرفين شنو ام .. عزيز اول طفل عندي وبكري .. ومااعرف ميت لو حي ..
ماتشوفين اوسي روحي بأبنة لان من ريحتة ..
دحقت فيها من غير كلام .. اعرف انو ابنها ..لكن هو كلشي الي بالدنيا ..
انا ماعندي اهل ولااقارب .. هو اهلي وناسي ..
قامت الجدة وقعدت يمي ..
خلت يدها على راسي وتقرأ ايات ..
وفعلا قدرت اهدأ وانام ..
وانا ادعي الرب بداخلي يرجعلي عزيز واغشعو بخير ..

ثاني يوم انقلب البيت بالناس ..
عمو كان عازم اخواتو واخوانو .. وسراب اجت واسراء سلمت عليه وباركتلي ..
حتى عماتو العزيز استغربت من موقفهم ..
كانت الخالة ام عدنان مخليتو بحضنها ماتعطيه الاحد ..
الى ان صاحت بيها الجدة وقالتلها ..
كافي عوفي الولد انطيه الامة خلي ترضعه تشمه يشمها . من البارحة واليوم مخليته بحضنج ..

- هااا مو اخاف ماتعرفله ..
- وهو ياهو الطلع من بطن امة يعرف .. دگومي انطي الولد الامة وروحي ركبي الغدا وي البنات ..

لينا صعدت نامت فوق من الهوسة .. نزلت ايمان ..
مبروك عيني .. شو خلي اشوفه ..
- يااا هذا يشبه منو . شو لايشبه امة. ولاابوه ..

الجدة ردتها ..
- هجم بيتج هو وين بين وعرفتيه مايشبهم .. شو بعدة لحمة حمرة ..

ام عدنان .. لا والله اشوف عزيز بصغرة ..
ايمان .. شو عمة جاي اشوفج متغيرة مو نفسج الي گلتي هذا مو ابن عزيز ..
الجدة تعصبت .. ولجن ماتنطني العصا خلي اكسرها على راسها .. ماترتاح اذا ماتنهان .. واني اگول خطية ومااريد اكسر بخاطرج ..
دگولي الحمد لله حتى ينطيج يالمدمغة ..

زعلت وماعجبها كلامها طلعت ..
هيام .. يمة خطية شلون هيج تگليلها ..
الجدة .. مابيها مثل الحيوان ماينكسر خاطرها لاتخافين .. ماتشوفيها تشكك بأبن عزيز . من تروحلة سبع فدوات ..

اجة عمو خلى ورقة جوة راسة وعمات عزيز هم جايبات هداية ..
اما عامر فحاير شنو مشتري حتى البايسكل ..
ضحكنا كلنا عليه ..

عشت يوم حلو وجمعة ولمة حلوة .. الكل گاعد على سفرة وحدة واول مرة احس ماكو حقد وغل .. رغم عدنان ونظراتة الي تزعجني ..

كان ابني بحضني اشمو وادحق عليه ..
سحبتو مني الخالة ام عدنان ..
- انطيني خلي انيمة بفراشة مايصلح تخليه بحضنج ليل ونهار ..
- مااغشعتو ابد ..
- وين هو يمج هنا بس خليه بفراشه وباوعيلة ..

بقيت مصدومة ..
اجت سراب .. ها رنوم فدوة صرتي ام ..
- ام مع وقف التنفيذ هههههه اشرتلها على امها
- ههههه لان بعدة جديد هسا تمل ..
لكن مااعتقد راح تمل .. بعد ايام ردت اصعد سريرو للغرفة .. ماقبلت ..
- تردين انتي اصعدي وخليه هنا يمي .. انتي ماتعرفيلة وتروحين تكتليه ..
- شلون اقتلوه وهو قطعة مني ..
- وقطعة من ابني هم والي حق عليه ..
- ماقلت شي بالنهار عندك دايما فقط لما ارضعو تعطينياه .. خليني اشبع منو ..
- الي يسمعج يگول حارمتج منه ..

سمعتنا الجدة…
- خايبة ماتخلين الولد عند امة اخذتي بي طابو
- حتى انتي عمة… هاي جزاتي لان مداريتة ومااخليها تتعب بي ..
- ومنو قلك يتعبني هذا ابني واسعد لحظة عندي لما يبكي واقوم اسكتو ..
- امهاتيش انتن امهات هالوكت .. تنام ا الطفل وتكتلنة اخذيه بس والله اذا صار بي شي احملج المسؤولية ..

ماصدقت اخذتو الحضني وصعدتو..
دخلت لينا قاعدة هي وسرور ..
هذا الحلو شرف عندنا الليلة ..

خليتو ع السرير غيرت ملابسو ورضعتو .. صعد عامر دق الباب هو وعلي دخلو السرير ..

عامر .. شعجب اني فكت اسرة ههههه
علي .. والله گلت راح تعلگ بس الله ستر ..

- لاتقولو هاكذ هي تغشع فيه عزيز . حقها ام . وانا جربت الامومة .. لو يبكي افز بعز نومتي .. كيف هي ابنها ماتعرف عنو شي ..

تعرفو .. كل شوية اقول راح يدخل من الباب ويحمل ابنو ..اشتقتلو كثير ..
علي .. اااااخ الحنية جانت كلها عندة ..
سرور .. كان يحير شيجيبلي من يجي اجازة ومدللنا دلال ..
لينا .. كان اكثر من اخي الي .. اكثر واحد وقف معانا بمحنتنا هو ..

عامر… كافي ولكم گطعتوا گلبي .. واني شگول والفرق بينا اقل السنة . كل الي يشوفنا يگول انتو توأم ..
احسة نصي الثاني وراح عني ..

مسحت دموعي .. كافي لاتقولو هاكذ ادعولو الرب يرجعو بالسلامة .. النا ..

كلهم يدعو .. ساعتها حسيت بلفحة هوا باردة وريح طيبة عطرت الغرفة ..

وكأنو موجود يمنا .. هالعلامات تخوفني اكثر مما تريحني .. لان احس بروحو تحوم حولي انا وابنو ..

طلعوا كلهم وبقينا انا وابني وحدنا .. بقيت احكيلو عن ابوه وكيف نقذنا وكيف تعرفنا على بعض ..

نيمتو وسحبت السرير بصف سريري ..
نمت ولينا نامت مع سرور ..

قعدت بنص الليل لقيت فراشو فارغ .. انجنيت ..
قمت من مكاني اركض التحت من الخوف ..

ابني وينو… دخلت الغرفة الجدة فقط هي نايمة…
صعدت السراب ولينا ماكو ..
خفت عليه ..
للحظة ردت ادق باب ايمان وعدنان ..
نزلت مرة ثانية..
دقيت باب غرفة اهل عزيز ..
طلعت امو…
- شبيج بنص الليل حلمانة ..
- ابني وينو ماموجود بفراشو ..
- قابل انباگ .. سمعت صوتة صعدت لگيتة يبجي وانتي ماتدرين بالدنيا .. نزلتة يمي وخليتج نايمة ..
- مستحيل .. انا نومي ماثقيل واحس فيه اذا بكى ..
- ياااا قابل مجذبة عليج ..
- وينو اعطينياه ..
- لا خليه يمي اتعودت عليه مااگدر اعوفة .. روحي انتي ارتاحي ..
- شلون اروح واذا بكى او جاع ..
- اسويلة ممية
- لكن انا اريد رضاعتو طبيعية ..
- ياعاد هو شلون حليب حليبج مايشبع روحي فضحتينا لايگعد عمج ..

غلقت الباب ودخلت ..
بقيت واقفة مصدومة…  ابني ومالي حق فيه ليش ..
حسيت صوت وراية..
التفتت .. لقيت عدنان ينزل ع الدرج ..
هاااا بزونتي شبيج ضايجة .. ماتاخذين حجايتي مووو وهاي النتيجة اكليها .. لو عندج الي يسندج ماگدرت تحجي وياج ..

تركتو وصعدت وهو يضحك ..
دخلت الغرفة وقفلتها .. قعدت ع الارض ابكي ..
اااااه امي اااااه .. ااااااه ياعزيز ااااااه ليش تركتوني ليش ..
بعدكم ماعندي قوة اتحمل .. تعبت ماعاد عندي صبر ..
نمت ع الارض الباردة للصبح من كثير مابكيت وماادري بنفسي ..

الصبح قعدت حاسة بصداع وتعب .. وجسمي حار. .
اريد اقوم مااقدر .. احس الجو بارد كثير . 
قمت ع السرير وتغطيت بالبطانية .. طفيت حتى المروحة وانا بردانة ..

اندقت الباب ماقدرت افتح .. قمت بالقوة فتحتها ورجعت نمت ..
لينا .. اختي اشنو بيكي صارت العشرة وانتي نايمة وام عدنان نرفزتني تحكي وتقول انتي ماقد المسؤولية تاركة ابنك يبكي ونايمة لسا ..
غطيت راسي .. لينا انا تعبانة خليني انام ..
- انتي مريضة؟؟
- مااعرف اشنو بيه حاسة ببرد ..

نزلت لينا بعد شوية اندقت الباب .. دخل عامر ولينا ..
اختي خلي حجاب على راسكي اخي عامر راح يدخل ..

دخل عامر .. ام اسد شبيج لينا تگول مصخنة ..
- مابية شي لاتخاف .
- گومي اخذج للمستشفى مايصير انتي نفسة بعدج .
وجدتي اصرت اخذج وتريد تشوفج ماتگدر تصعد ..

كان عامر اعند مني واصر ياخذني ..
قمت لبست وانزلت .. لكن مااقدر افتح عيني من الحرارة ..
اغشعتني الجدة ولمست وجهي ..
يايمة ليش هيج مسخنة .. مو زين ع الطفل شلون راح ترضعيه ..

ردت ام عدنان .. كلكم مارضيتو عليه من اخذت الطفل . تلگيها عالگة السبلت والغرفة باردة همزين مااتمرض ..

مالي خلق ارد عليها سكتت عنها ..
اجت سراب خلت ابنها عند امها وراحت معاي ..

فحصتني الدكتورة .. دخلتني مؤقت للطوارئ عطوني ابرة ومغذي وبراستيول خافض حرارة ومضاد التهاب .

عامر راح يجيب البيان ..
وسراب يمي ..
- رنوم متغيرة وضعفانة حيل .. ليش هيج . من هيج تمرضتي ادري الي بيج مو شوية بس فكري بأبنج هذا امانة عزيز حافظي عليها ..
- انتي اشنو تقولي ليش هو انا اغشعت ابني لمستو او قدرت اهتم فيه .. امكي ماتعطيني فرصة ..
تحاول تظهر للكل انا هاملتو .. تعبت وماعاد فية اخوض حرب جديدة ..
كل الي ردتو حياة بسيطة تجمعني بحبيبي وابني .. لاحبيبي رجع ولاابني لي ..
انا مرضت من قهري مامن اهمالي مثل مايقولوا ..

- اوووف ماادري شأگلج .. انتي حقج بس شتسوين ماكو حل غير ترجعون البغداد بعد الاربعين ..
وهم منو يگولون يخلوج ترجعين ..

دحقت بيها ..ليش مايقبلو .. انا اتفقت معاهم اولد هوني فقط . واصلا انا قلت بس تخلص العطلة ارجع لأجل دوام لينا ..

هاي انتي هيج تگولين بس بعد مااتعلقوا بأسد وشافوه مااظن يقبلون .. وهو هم الفنعوص عمرة ايام ويضحك للهوى ..

انا احكي مع عامر ويحلها .. مااريد اخذ ابني واهرب مثل كل مرة ..
اريد اروح برضاتهم .. يجو العندي واروحلهم مااريد مشاكل بينا ..

وهو هذا الصح خلي يطلع الاربعين واگعدي وي عامر وسولفي وياه ..

اجة عامر ومعو البيان ..
هاج ام اسد بالعافية .. اخذتو وحسيت نفسي طبت ومابيه شي .  لما قرأت اسمو .. اسد عزيز قحطان

ياروح امك حلمي كان اغشع اسمك قبل اسم ابوك .
وينك ياحبيبي وتغشع ابنك ..
هالفترة دمعتي كثير نزلت وترخصت .. ماكنت احب ابين ضعفي لكني ضعفت فعلا بعد عزيز . 
هو ملاذي وسندي وقوتي ..
وهسا بعد مااجة اسد لازم استرجع قوتي واكون اقوى من قبل واحافظ على نفسي ..

رجعت للبيت .. مشتاقة الاسد كثير . لقيتو عند الجدة اخذتو الحضني وشميتو .. اشتقتلك ياحبيب امك .

ضحكت الجدة .. هايمة شگالولج ..
- ماكو شي افلاونزا بسيطة .. وعطوني علاج ..

دخلت هي .. خاف بيج نشلة وتعديه ونشلة النفاس مو زينة تبقى وياه العمر كلة ..

اتنهدت .. اطمأني خالة مابية شي . وهسا راح اخذ ابني اشتاقيتلو . حملتو واخذت اغراضو ..
ردت تحكي .. خزرتها الجدة وسكتت ..

صعدت وبعدي لينا وسراب ..
نمت ع السرير وخليتو بحضني .  ابد مااشبعت منو وكأني اول يوم احملو ..

لينا المجنونة قعدت تعملو جلسات تصوير هو ومحمد ابن سراب ..
واخذتلي معو صور كثير. 

اندقت الباب عامر كان ..
لبست حجابي . 
ام اسد اتصل ابو البيت يگول راح تخلص المهلة مال الشقة شوفولكم بيت ثاني وحملو غراضكم لان اريد اجرة ..
- ليش نحنا نجدد العقد ..
- يعني ناوية ترجعين ؟؟
- اي طبعا .. انا مااقدر اترك بغداد وخاصة البيت ..

اتقرب يمي .. يعني لسا عندج امل ؟؟
- وماراح اتخلى عنو ..
- لكن صاحب الشقة معاند كلش خليني اروح احجي وياه وجها لوجه واذا ماكو احاول اشوفلج بيت قريب على المجمع ومدرسة لينا ..

- تمام ..
حكت لينا .. اخي عامر تقدر تروح لمدرستي صديقاتي قالو وزعوا نتائج ..
- ان شاء الله لان علي هم يريد يروح يشوف النتائج .

دخلت ايمان وهي تدحق بينا .. لمة خير ان شاء الله.  عود سراب عمتي تگول تعالن راح نسوي غدا ابوجن اجة وعينها على عامر وعليه ..

ثاني يوم .. عامر راح البغداد هو وعلي ..
نزلت الصبح انا واسد ..
دخلت للجدة .. جدتي وينكي اغشعي منو اجة ..
ضحكت .. هلا بهالصباح .. يمة تروحلك فدوة جدتك ..

قعدت خالتي وعمو…
كانت قالبة وجهها عليه لأن ماعطيتها اسد البارحة ..

عمو سلم واخذ اسد حضنوو..
- اوووف يريحة الغالي .
راح يغسل حكت معي خالتي بصوت واطي قدام الجدة.
اسمعي .. اني انطيتج واحد اخذتي مني ومارجع .. اذا ناوية ع الثاني تبقين هنا وماتطلعين من الباب . مامستعده بعد اخسر ثاني ولااخسر ابن ابني ..

- مافهمت ..
- لاتغشمين نفسج .. مو عبالج مااعرف ساحبة عامر الجانبج وتقشمريه ياخذلج بيت ببغداد ..
وتردين تاخذين ابن عزيز مني تحلمين . اعرف حبج العزيز تمثيل بتمثيل ..

ابتسمت .. مااعرف منو الي وصلكي هالكلام  .. لكن اعتقد صاغو بغير طريقه ..
- اي نعم انا لما يطلع اربعين ابني اخذو ونرجع البغداد لكن لوحدنا .. مااخذ ابنك او اي شخص ثاني .
لان بعد عزيز مايحلى بعيني اي رجال ..

اشرت الجدة الها تسكت وقالتلها ..
- مو وكت هالحجي .. قحطان عندة شغل هسا خلي يروح ويرجع ويرجع عامر ونگعد نسولف ..

خليت ابني عند الجدة وطلعت ..
قلبي انقبض حاسة ماراح يتركوني بحالي .. انا قلت انحلت العقد بحياتي لكن مااعتقد راح ارتاح ..
مادام ايمان وراي وتقرأ براسهم وتحرضهم عليه ..

اتصلت بعامر .. قال صاحب المجمع ماقبل .. واني راح ابقى هنا كم يوم بين ماالگيلج شقة او مشتمل اخلي بي غراضج ..
وعلي وياي هم .. هاااا عود بشري لينا گليلها ناجحة ..
فرحت للينا واخيرا خبر فرحني ..
- عامر صور عزيز حافظ عليهن واغراضو مااريدهن ينكسرن ..

صعدت للغرفة اريد ابشر لينا .. سمعت حركة بغرفتي ..
فتحت الباب لقيت ايمان تدور بالكنتور ..

اغشعتني وبعين وقحة .. هذا الباب ليش مقفول شضامة بي ..
- وانتي ماتستحي تدخلي الغرفتي من غير استذان . تقبلي ادخل وادور بغرفتكي ..
- منين اجتي غرفتج .. وبعدين اني مو غامضة وعندي اسرار مثلج ..
احجي ولج .. شتخططون انتي وعدنان من وراي ..

ابتسمت ..انتي مريضه فعلا .. لو عدنان ببالي كان من زمان انا اخذتو .. لكن متى تعرفي عدنان بالنسبة لي لاشي مايهمني ارتاحي ولاراح افكر فيه ..
يعني انتي تقارني هيبة عزيز وشخصيتو بعدنان ..

هزيت يدي .. اطلعي ولاتدخلي غرفتي بعد ..
طلعت وهي تهدد وتتوعد ..
تذكرت كلام سراب وخفت .. ليكون فعلا تعمل شي الابني ..
فتشت الغرفة كلها ماكو شي ..
طلعت وقفلتها .. رحت صحيت سرور ولينا وبشرتها بنجاحها فرحت ..
وبيومها عزمت البيت على موطا ومني ادفع طبعا ..
لكن ماعدنا احد يشتري فقط عدنان موجود وهذا ماصدق قالتلو لينا اشتريلنا ..
ماقبل ياخذ فلوس لو لينا واصرارها ..
كان بيني وبين الخالة توتر .. وتتعمد تاخذو مني وتخليني امام الامر الواقع ..

الجدة كانت هادية وماتحكي .. ومااعرف سبب هدوئها ..
عامر اتصل وقال رحت المكتب عقارات واعطاني بيت قريب على مدرسة لينا ..

- وليش ماخبرت ابو المجمع اذا احد سأل يعطيه عنواننا ..
- باجر قبل مانرجع اگلة ..
هسا احنة ملتهين نحمل بالغراض .. المشتمل ترى مو جبير كلش راح ادزلج صورة وشوفيه ..
- مامهم المهم اكون قريبة عليه ..
- بس احلى من الشقة ومايتعبكم بالصعدة والنزلة…
يلة اني راح احمل ومن تجون بسلامة نرتبهن ..

تجدد الامل عندي لما قال نرجع ..
لكن تضايقت لما رجعو وجمعتنا الجدة كلنا بغرفتها ..

صاحت السرور ولينا .. اخذن الطفل واطلعن ..
استغربت وخفت ..
عامر .. خير جدة شصاير ..
الجدة .. صار كم يوم منتظرة رجعتك .. وابوك راد يحجي وگلتلة لمن يجي عامر يلة ..

دحقت بيه وقالت .. يمة انتي كل مرة تلمين غراضج وترحين ومانهتم نگول عندها اسبابها وهاي حياتها . المرة الاولى السبب بأبننا وفشلنا وياجن .. المرة الثانية گلنا عدها رجل هو يتصرف ومالنا علاقه . ورجلج رجعج اله واعلن زواجكم ..
اما هاي المرة تختلف رجلج ماهو وعندج ابنة . يعني من تخططين للروحة منا لازم تاخذين رأينا لان احنة اهل الطفل ..
قحطان .. اني استشرعت وگالو زوجها مفقود صارلة اقل السنة… ومايصير مرتة تتزوج الا بعد اربع سنين من غيابة .. يعني اذا تفكرين تعرسين عوفي ابنة هنا وروحي .. لو تبقين هنا معززة مكرمة بين ماتخلص الثلاث سنين المارجع رجلج حموينج اولى بيج ..

انصدمت من قرارهم .. انتو منو قلكم انا اريد اتزوج . ومنو قلكم انا راح اترك ابني عندكم ..
اسد ابني انا وعزيز ومامن حقكم تقررو عنو او عني ..انا راح ارجع البغداد وانتظر زوجي ومابحاجة حماية احد . وحتى المصرف الي تبعثوا كل شهر مااريدو ..
اشتغل واعيش ابني ..

ام عدنان.. تحلمين والله ساعة الي تردين ترحين تاخذين اختج وملابس واسد يبقى هنا .. انطيتج ابني وموتي مااخليج تاخذين ابنة من عندي ..

اشعر اني بمتاهة كبيييييرة لا بداية لها ولا نهاية ادور بها وحدي ولا استطيع ان اتوقف هكذا ﻫﻮ الصراع بين الوقوف صامدة او الضعف والاستسلام للحفاظ على اخر ماتبقى منك لي ..
#بقلمي_الكاتبة_شمس
يتبع……