مساء الورد حبايب ❤
نزلت البارت من وقت تعويض عن تأخير البارحة

//// البارت السابع عشر /////

#بقلم_الكاتبة_شمس
( شمس السعـدي )

********* #ترانـيــم ***********

لقد تعب عقلي من هذا القلب .. الذي لايبالي بوجعـي فينشر المه لجميع اجزاء جسمـي ..

متى يفهم ذلك القلب بأن الحب لايمكن ان يستمر مادامت هناك عوائق وحواجز تمنعه من الاستمرار ..

مع بداية يوم جديد من ايامي هنا ..
بمدينة ليست مدينتي ولازلت اشعر بغربة فيها ..
فتحت الستارة ..
دحقت من الشباك الكل يجهز ويرتب بالحديقة ..
فتحت الكنتور ..
وطلعت ثوب حلو لبستو ورتبت وجهي اخذت الشال ..
خليتو على راسي .. وفتحت باب الغرفة بعد مااخذت نفس قوي ..
مااريد ابين ضعفي او انكساري ..
صارت بوجهي لينا ..

صباحووو رنوم ..
-اهلا حبيبتي اليوم صاحية من وقت ..
-امممممم من الضجة .. الكل يتحظر ومشغولين .. قلت اغشعك نتروق سوى ..
- انتي زينة ؟؟
- تمام .. خلينا ننزل ..
نزلت بخطوات واثقة وابتسامة خفيفة .. صدمت الكل وتركوا كلشي بيدهم ونظراتهم مافارقتني لثواني ..
بينما كان نظري بأستقامة ..
وعيوني تبحث عن شخص واحد بس ..
صباح الخير ..
الكل رد بتردد صباح النور ..

همست مرت عمهم ابتسام العمتي ..
- دادة شو هاي مامهتمة وعبالك هي العروس .. ولاتگول اليوم عرس زلتمها ..
-اششششش لاتسمعج .. عمتي بهمس گالتلها ..

دخلت للمطبخ وبديت احضر الريوق بالامبالاة ..
لكن احس هناك ثغرة وجرح بداخلي والم ..
مستحيل احد يحس فيه الا الي مجربو ..

قعدت على الطاولة بالمطبخ ..
وكل الي يدخل يدحق لي بنظرة شفقة واني اقابلو بأبتسامة ..
مستحيل اخليهم يحسوا بضعفي وقلة حيلتي ..
بأسوء الظروف وبتشتت عائلتي ..
ودخول داعش النا مااستسلمت ولاضعفت ..
نهضت من الطاولة ..
لينا .. انتي روحي الغرفتكي اني اغسلهم ..

هزيت براسي وصعدت ..
من غير كلام ..
دحقت العمتي بعدت نظرها عني بسرعة .. يمكن حاسـة بتأنيب الضمير او ماتقدر تبرر خطأها بحقي ..

صعدت الغرفتي ..
فتحت الخزانة وعيني على ملابسو تلمستهم وقربتهم لي اشم بيهم ..
اخذتهم ورتبتهم على السرير ..
وبقيت ادحق بيهم ..
اشتقتلو .. لكن مااقدر امنعوا يغشع حياتو وبنفس الوقت مااتحمل اغشعو مع انسانة ثانية تكون مرتو ..
صحيت على صوت لينا وهي تقلي ..
اختي وصلنا ..
كان مثل الكابوس بحياتي .. اذا حلم مااتحملتو كيف لو صار حقيقة وقدام عيني . مستحيل قدرت اصبر او اتحمل ..

كان الوقت شارف على الظهيرة ..
نزلت صارت اشعة الشمس بعيني ..
غمضت وبنفس الوقت ..
تذكرت أمي وابي وحياتنا الحلوة بالموصل ..
قريتنا الي كان مابيها غير الفرح واللهو والحب ..
ماعرفنا الالم بيوم ..
ولا الحزن ..
الا لما دخل علينا داعش المشؤوم ..
ضاعت بسببة كل امانينا واحلامنا وطفولتنا ..

خسرت كلشي بحياتي .. ومازلت مستمرة بخسارة كل شي جميل عرفتو ..

لينا مستمرة بالتذمر والكلام ..
اختي انا كبرت ومن حقي اعرف ليش طلعنا منهم مثل الهربانين .. اشنو راح يقولو علينا واخي عزيز مافكرتي راح يزعل ..

- لينا انسي كل شي .. واعتبري وجودهم بحياتنا مؤقت وانتهى كل شي ..
- انا تعبت كل يوم نهرب ونرجع ..
- هذي المرة غير لان ماراح نرجع راح نبني حياتنا من جديد ونوقف على رجلنا ..
- ودراستي ؟؟ ومستقبلي .
- لينا ماراح تفهميني . كان لازم نطلع من الاول ومانرجع احنة ماراح نقدر نعيش معهم ونتحمل حياتهم ..
اوعدك راح افهمك كل شي فقط خلينا نوصل ونستقر ..
دخلنا مطعم للأستراحة كانت نفسي ماتقدر تاكل او تشرب شي .
طلبت للينا فقط ..
وانا بقيت افكر بشخص واحد .. عزيز . ياترى راح يفهمني او يقدر يسامحني ..

قبل ايام ..
مااتحملت وانا اسمع كلام ام عدنان وايمان .. وتخطيطاتهم لخطوبة عزيز من سوزان .. وعدنان لما سمع زادت مضايقاتو لي ويسألني اشنو نعمل بالغرفة لو كان زواجنا على ورق ..

عدنان .. اكيد بحجة ع الورق ويلعب عليج .. ليش وين لاگيها . بس تدرين هنيالة . كل يوم وي وحدة شكل شگد محظوظ ..

ترانيم .. احترم نفسك ماكل الناس مثل طبعك .. عزيز بحياتو مالمس شعرة مني ..

ضحك بمكر واستهزاء .. تركتو ومشيت ..
سراب فهميني اشنو اعمل ..
- صارحي عزيز بمشاعرج اني اعرفج تحبيه لاتكابرين
- اي مشاعر .. ليش مشاعري تكفي . انتي ماسمعتي امكي وجدتكي راح يخطبوا سوزان الو ..
- والله ماادري شأگلج مادام جدتي قررت معناها ماكو احد ينزللها حجاية ..

عزيز من يومين مااحكي معاه ولاارد على اتصالاتة وجع ابي واخي تحفر بداخلي لسا ..
حتى ماقدرت احزن عليهم ..
مروة من يوم الي قلتلها .. وهي تصر انه اروح عندها ووعدتني تساعدني وحجزتلي طيران لأربيل ..
فكرت انهي كلشي واروح ..
مستعدة اشتغل اي شي واعيش ..
طلبت راتبي من الدكتورة .. ولما رجعت دخلت العمو ابو رماح وحكيت معاه كل شي ..

- يابنتي وين تروحوا وانتو بنات مالكم احد .
- عمو انا تعبت ماراح اقد اعيش هوني واتقألم ..
- لو عندي صحة كان رحت معاكم مااريد احملكي همي ..
اوقفي ..
راح للغرفة ورجع .. بيدو فلوس . 
- اخذي هذا المبلغ الشيخ الله يحفظة يعطيني راتب وانا مااحتاجو ..
اخذيه انتي واختكي ولاتقطعي اتصالك معي وطمنيني عليكي ..

حضنتو وودعتوا ..
وطلبت منو يدبر لي سيارة توصلنا انا ولينا لبغداد ..
مروة راح تبعث سائق ياخذنا من بغداد ..

رجعت للبيت واخذت لينا للغرفة وقلتلها راح نسافر لكنها تذمرت وماقبلت ..
مااتحملت ولاول مرة احس نفسي عاجزة بكيت لما اغشعت دموعي فهمت ضعفي وقلة حيلتي ..

- خلص اختي راح روح معكي ..
- سراب حست علينا .. لما اغشعت لينا تجمع بأغراضها .. توسلت فيها ماتقول الاحد وقلتلها ..
- انتي اختي الي ماولدتها امي .. لو تحبيني خلينا ننروح احنة مانقدر نتحمل حياتكم وعاداتكم .
مااريد اعطي وعد العزيز واخلفوا لان اعرف ماراح اقدر استمر معاه ومااريد يتحطم ويحس بنفس الشعور الي حسو من قبل ..
انا راح اطمنك عنا لما نوصل ..
بقت الليل كلو سهرانة معانا .. جمعت اغراضي وملابس واخذت كم قطعة من ملابس عزيز وعطرو ..
وهذي الذكرى الوحيدة الي راح تبقى معي العمر كلو ..
لان مااعتقد راح اقابل شخص مثلو ..
عزيز ترك اثر بداخلي جميل .. مااقدر اوصفوا ..

طلعنا ومعانا سراب .. كل شي بهذا البيت له ذكرى عندي . صح عانيت من البعض لكن ماانكر الي عملوه معي بعد مابقيت وحيدة انا واختي ..

اخذنا عمو ابو رماح للسيارة الي راح توصلنا البغداد ..
طلعنا من غير ماادحق للخلف ..
راح اعتبر تلك الاشهر الي قضيتها هوني من الذكريات الي القدر كتبها لي ..
صارت مثل حياتي بالموصل .. فيها ذكريات حلوة وذكريات اليمة ..

رجعت من ذكرياتي ..
بعدما اتصلت مروة ..
قلتلها دخلنا بغداد وراح نطلع للمطار ..
قالت طيب وانا راح انتظركم بالمطار مع ابي ..
الطريق طويل واتعبنا ..

كملنا اخذنا تكسي للمطار ..
بقينا منتظرين الرحلة .. الجو كان جميل ومشمس الا انا اشعر بأن حياتي عبارة عن غيوم سوداء ..

طلعنا بالطيارة وكانت هذه اول مرة بحياتي ..
ماقدرت اروح بسيارة واجازف بحياتي انا واختي .. وخاصة بهذه الاوضاع ..
نزلنا بمطار اربيل .. لقيت مرة وابوها استقبلونا ..
حضنتها وابوها رحب بينا وقال ..
انتو من اليوم بناتي مثل مروة وريم ..

وصلنا البيتهم كان عبارة عن شقة ..
حسيت بالاحراج منهم لان الشقة كانت صغيرة ..
امها حظرت النا الاكل ..
اكلنا ونمنا من التعب ..

قعدت من النوم تذكرت سراب .. فتحت الموبايل .. بعثت رسالة الها وطمنتها بوصولنا ..

لقيت رسائل كثيرة من عزيز واتصالات ..
سامحني لكن الافضل انه تنساني ..
كتبت رقم عمو ابو رماح وسراب .. وكسرت السيم كارت ورميتو ..

حتى حسابي على الفيسبوك غيرتوا ..
مروة .. بابا راح يطلعنا بسرعة بدلوا ..

بدلنا انا ولينا .. لكنها لسا حزنانة ..
اخذونا مطعم والمولات ..
لفت انتباهي البنات الي يشتغلوا بالمول ..
سألت مروة ..
- مروة اي وحدة تقدر تشتغل بالمول .. او اشنو يصير .
- الي يشتغلوا كلهم عندهم شهادات مو اي شخص ..
- تقدري تحكي مع ابوكي يغشعلي عمل هوني ..
- انا راح اخلي خطيبي عندو معارف يغشعلك عمل محترم ..
فرحت لما قالتلي خطيبها اياد اغشعلي عمل هو اصلو من اربيل .
المول كان مشهور بأربيل وكبير كثير ..
اشتغلت مع شخص هو تقريبا يصغرني بالعمر لكن انسان محترم اسمو جود ..
امو من بغداد وابوه من اربيل ..
وخاصة لما عرف اني من الموصل ونازحة .. قال اعتبريني اخوكي انا ادرس واشتغل يعني ماكثير راح اتواجد هنا المحل بأمانتك ..

المحل مواد تجميل وعطور وكماليات ..
حبيت المكان كثير.  في بعض الاحيان احظر معاي لينا تتسلى وتساعدني بترتيب وتنسيق المحل ..

رغم نزعت الحجاب لكن لبسي كان محتشم وحتى لما البس جينز القميص فوقو طويل ..

لينا تركت الدراسة بنفس السنة ..
وصار لازم اعمل اقامة حتى اقدر ابقى بأربيل ..
لما اخذت اول راتب ..
طلبت من مروة تغشعلي شقة صغيرة ومناسبة بنفس العمارة الي هم بيها ..
وفعلا بعد شرح معاناتنا لصاحب العمارة عمل خصم النا . وكأن الرب دائما يهيئ النا الناس الطيبة تساعدنا .

جود كان واثق كثير بية ومايحظر الا في المساء ﻻخذ الوارد ..
وكان يعطيني حصتي وبقشيش معاها ..
بيوم اجة واغشع لينا عندي بالمحل .. حسيت بنظراتو اتجاهها وخفت عليها ..
بطلت احظرها معاي وكنت اتركها عند مروة وريم اختها صاروا اصحاب ..

لكن جود مابطل سؤال عنها ..
فقلتلو .. جود لينا صغيرة وبعدها بمرحلة المتوسطة ..
جود .. اسف اذا سؤالي عنها خلاكي تفهميني خطأ ..
كان شغلي من الصبح للمساء .. اتعب كثير ومرات جود يساعدني العصر وانا ارجع للشقة ..
رغم بالي كلو عند لينا . حاسة اني اهملتها هذي الفترة .
وطلبت كثير تروح تساعدني بالمحل ..

لما حكيت مع جود قال عادي خليها تساعدك وانا اعطيها راتبها مثلك لان انتي وحدك ماتقدري ..

فرحت لما سمعت .. ووصيتها ماتعطيه وجه ..
وفعلا كانت لما يحظر تقعد ع الموبايل وتهملو ..
هو كان مايقدر يحكي لكن نظراتو توحي اعجابو فيها .

كنت احاول قدر الامكان ابعدو عنها .. مااريد اختي تتعلق بشخص وتتعذب مثلي ..
رغم احسها صارت انضج واكبر من قبل ..
بأختلاطها بالناس ولباقتها مع الزبائن ..

مروة وخطيبها واصدقائهم غالبا مايشتروا منا حتى تساعدنا ..
كانت فعلا صديقة ووقفت معي كثير وماتركتني ..
حتى خطيبها وصى صاحب المول علينا ..

اشهر وانا مشغولة ليل مع نهار وماارتاح الا بليل نروح للفراش ننام بسرعة ..
كنت اريد اضمن حياتي مع اختي ويكون عدنا ضمان .
كل ليلة كنت اشم ملابسو وعطرو قبل ماانام ..
اشتقتلو .. حسيت بحاجتو وحبي الو لما ابتعدت عنو ..

كثير من الرجال اغشع كل يوم .. الا مااغشعت مثلو وشخصيتو ..
لدرجة مرات يحظروا من الجنوب سياح .. افرح واعمللهم خصم احس بوجودو معاهم ..
كلما احاول اكذب نفسي واكابر الا اني مااقدر انكر عشقي الو ..
كنت خايفة من نار حبو .. الا ان نار بعدو وفراقو اشد واكبر ..

بيوم كانت استراحة عندي ..
بقيت اتصفح بالموبايل ..
اخذتني يدي لرقم سراب . من يوم الي وصلنا الاربيل مااتصلت بها..

اتصلت كم مرة وماردت ..
قلت اكيد رقم غريب وماتعرفوا ..
بقيت كل يوم اتصل وماترد ..
قلقت عليها ..

اتصلت على عمو ابو رماح ..
لما سمع صوتي فرح وقام يبكي ..
- يابنيتي وينكي شغلتن بالي .. وبقيت الوم بحالي لان تركتكم تروحوا من غيري ..
- انا ولينا بخير .  انت كيفك وسراب كيفها ماترد علية قلقت ..
- البيت كلو تغير بعدكم .. وعزيز عصب على اهلو وترك البيت من يومها ..
وسراب زوجوها وماتحظر كثير الاهلها .. فقط بالمناسبات ..

انقهرت عليها .. كانت رافضة هذا الزواج وجبروها ..
استغربت لما قال عزيز ترك اهلو ..
- ليش مااتزوج ..
- اي اهلة خطبولة بنت عمة بس هو ماقبل وتركهم ..
بقيت بحيرة واستغراب .. معقولة ماقبل لانو يحبني او لانو مايحبها ..
اكيد الجدة ماراح تتركو وراح تزوجوا غصب عنو ..
غلقت المكالمة بعد مانبهت عليه مايقول الاحد على مكاني او اتصالي ..

كنت كل فترة اتصل بي اسأل عنو .. ويحكيلي عن صحتوا تدهورت . وماعاد يقدر يقوم ويشتغل ..
طلبت منو يحظر هوني وعطيتو مكان شغلي وشقتي وقلتلو انا ارعاك ..
لكن رفض وقال .. خليني هوني احسن انا موحمل سفر وتعب .. يكفي انتو حايرين بشغلكم ولقمة عيشكم ..

كنا انا ولينا نوفر بحصالة .. نشتري الي نحتاجو والباقي نخليه بالحصالة ..
مر خمس اشهر وانا بأربيل ..
بيوم اجة خطيب مروة معاه صديقو اشترو عطور وراحو ..
لما وصلنا للشقة ..
اجت مروة وريم سهروا عندنا ..
بعدها اشرتلي ندخل للغرفة ..

دخلنا ..
مروة .. اليوم اجاكم اياد وصديقو ؟؟
- واشتروا عطور ..
- الصراحة صديقة معجب بكي كثير  .. وطلب من اياد يحكي معي ..
- اشنو تقصدي ؟؟
- يعني يريد يتعرف عليكي ويخطبكي ..
- تحكي صدق مروة . انتي تعرفي انا مرتبطة ..
- وانتي مصدقة هذا ارتباط .. هو زواج ع الورق ومن غير معرفتكي بي ان كان صحيح او لا ويعتبر جبروكي ..
- من قالك جبروني .. انا وافقت براضاتي .. وحتى لو كنت مااعرف زواجهم صحيح او لا .. فهو يسمى عقد زواج وانا كنت موافقة ..
مااقدر اعمل اي شي من غير فسخ ذاك العقد ..
- يعني اذا نفسخ توافقين ؟؟ لعد شمنتظرة خابريه وخلي يحررج ..
- مااقدر مستحيل .. وانا اصلا مااريد ارتبط بأي شخص اريدكي تعتذري الاياد عني ..
انا هوني حتى اعيش ..
- واني الاجلكي احكي ترانيم .. انتي مالكي احد اقاربكي كلهم هاجروا واهلكي ماتو لازم يكون رجال بحياتكي يحميكي ..

- ومين قلك انا اريد رجال بحياتي .. انا قادرة احمي نفسي واختي . وشغلي ماشي ..

- فكري اكثر . هذه فرصة ماتتعوض الولد عندو فندق ومحلات ومتمكن .. وهو صديق اياد ويعرفوا كثير يعني لو مااعرفوا ماكان اصريت عليكي انتي مثل اختي ..
- شكرا الكي مروة . ماانسى افضالكي علية لكن هذا الامر اعتذر مااقدر اوافق ..

تطلب مني اتركوا وانساه .. انا الشي الوحيد والجميل الي يخليني اتذكر ايامي بالجنوب هو وجود عزيز ..
وخاصة لما ابتعدت عنو .. عرفت قيمتو اكثر . رغم اعرف انه من المستحيل نلتقي بعد او نحكي مع بعض ..

وجودي بأربيل خلاني اكون اقوى ..
جود قال .. وجهكم على المحل خير. ارباحة زادت .
الهيج راح ناخذ محل ثاني للألبسة النسائية وكل وحدة منجن تلزم محل ..
واني هم ماراح اتركجن وخاصة هاي عطلة وماعندي دوام ..

الي عرفتو جود الوحيد الاهلو ..
مرة من المرات اصر يعزمنا مع اهلوا المطعم ..
رغم رفضت كثير لكن هو اصر ..
لينا يوم عن يوم تحلى اكثر وجسمها اكبر من عمرها يعطي المقابل رؤية ثانية الها ..
كان بودي اخفيها من العين .. ودايما كنت اطلب منها تلبس ملابس فضفاضة لان مفاتنها بارزة ..
وهي الشكر للرب ماكانت ترفض كلامي او تعصيه .
حسيتها اتأقلمت اكثر هوني ..
قابلنا اهل جود كانو طيبين وامهم صاحبة مدرسة ..
لما عرفت بلينا قالت اني عندي معارف احجي وياهم وارتب وضعها .. كان كلامها عربي قليل لكن مفهوم .

لاحظت عيونهم مانزلت من لينا .. وخاصة بعد ماعرفوا قصتنا تأثروا كثير ..

رجعنا ولينا ماعندها كلام فقط عن جود واهلو ..
استغربت الوضعها .. ومن يومها حسيت علاقتها تغيرت بي لما تغشعوا يحمرو خدودها وتخجل ..

بيوم قعدتها قبالي وحكيت معها .. حبيبتي انتي بعدكي صغيرة والعمر قدامكي ودراستكي ومستقبلكي اهم .
لازم ماتخلي مشاعركي تاخذكي الغير مكان ..

- اختي انا اعرف اشنو تقصدي لكن صدقي ماعندي اي شي معو مجرد اعحاب ..
- وانا مااريدكي تتعلقي وتعجبي بي .. احتفظي بهذي المشاعر للي تحسي اتجاهو بشعور وحب حقيقي ..

حبيت اقلل تواجدها بالمحل وقربها من جود دخلتها دورات انگلش وحاسوب بالعطلة .. واتقنت اللغة الكردية اكثر مني ..

بيوم اتصلت بعمو ابو رماح .. كان جهازو مغلق قلقت عليه ..
اتصلت على سراب ماردت ..
رسلت رسالة الها .  انا ترانيم ردي ..

ردت بسرعة .. رنوم هاي انتي اعذريني واني كلما تتصلين اخاف ارد من ورى هذا الشكاك العندي ..
- اشتقتلك سراب . من اشهر وانا اتمنى اسمع صوتكي كيفك سمعت تزوجتي الف مبروك ..
- ياتزوجت ريتني ميتة .. ولج خانگني حتى بوشية لبسني ويشك ويغار من خيالة .. اني شمسوية وهيج الله عاقبني ..
- لاتقولي هاكذ حبيبتي الرب يهديه ويصلحو الكي . قليلي عمو ابو رماح موبايلو مغلق اتصلت عليه كثير وماحصلتو ..
- عمو ابو رماح توفى من اسبوع البقية بحياتج ..
هي قالت هاكذ وانا مااتحملت .. بكيت بصوت .. كيف مات .
- تمرض واخذتة الحرگة . جنتي انتي ولينا مهونات عليه بعدجن تغير وحبس نفسة بالبيت وتمرض الى ان مات .. اخر انفاسة طلب يشوف عزيز ووصاه على ولدة وعليجن سودة عليه مات وهو شايل همجن ..
غلقتو منها وقعدت ابكي .. صليت ودعيت الرب يرحمو
بيومها حتى لينا تأذت وبكت وماطلعت من البيت ابدا ..

خليتها نايمة بالبيت وطلعت للمول ..
سألني جود عنها قلتلو مريضة ..
حسيتو انقهر ..
لينا حساسة كثير واي شي يأثر فيها ..

كان عندنا بضاعة جديدة اجت .. لفيت شعري لفوق ..
وقعدنا نرتب الاغراض ..
سمعت صوت وراي .. السلام عليكم .

كان ظهري للباب .. لما سمعت الصوت اقشعر بدني ..
الصوت سامعتو ماغريب عني ..
رد جود .  وعليكم السلام تفضل اخي ..
- اني جاي الست ترانيم ..
التفتت . واغشعتو ..
مستحيل ماصدقت عيني وهي تدحق بي ..
همست .. عزيز ؟؟
كان يدحق بية من فوق التحت وعيونو حمر وحاستو مخنوق ..
- اي عزيز ان شاء الله مانسيتيني .. ولو الي يطلع بلا وداع كلشي اتوقع منة ..
- عزيز انا… .
قاطعني .. اريد احجي وياج بغير مكان ..

دحقت بجود قال .. عادي روحي بس تعرفيه ؟؟
- اي اعرفوا ..
رد عزيز ..
- اني زوجها .. لو هم ماگايلتلهم متزوجة ..
سكتت ومارديت ..
اشرلي جود اطلع .. اخذت الجنطة وطلعت ..
ابتعد من الباب وقال . اطلعي گدامي ..
طلعنا من المول من غير كلام . انا امشي معو وهو عينو لقدام وماحكى ولا كلمة ..
حاسة انه بأي لحظة ممكن ينفجر ..

سيارتو بالباب .  اصعدي ..
التفتت .. وين مااقدر ابعد .
- ليش تخافين مني . هيج عزيز يخوف صاير .
- مو هاكذ لكن عندي شغل ..
سحبني قدامو . حطي عينج بعيني ليش تبعدين عيونج عني حقج لان تعرفين نفسج مذنبة ..

اصعدي .. صعدت .
وهو طول الطريق ساكت ..
- منو قلك انا هوني . اكيد عمو ابو رماح ..
- ابو رماح الله يرحمة انطاني عنوان الشقة بس لگيت لينا وهي الي گالتلي على مكان شغلج ..
ليش خايفه اعرف مكانج .؟؟
- لا لكن استغربت لان مااحد يعرف مكاني غيرو..
- لاعبالج جاي اتوسل بيج ترجعين . انتي من يوم الي طلعتي من البيت وطعنتيتي للمرة الثانية المفروض مااسامحج .. بس وصية ابو رماح وطلبة اشوفجن شلون عايشات هي الي جابتني ..
منو ساعدج وشجابج لهنا ..
- مو تقول مااهتم الكي ليش تسأل ..
- وفوگاها انتي ام الراهي . تعرفين اني شنو حسيت من خابروني وگالولي مرتك شردت ..
- مرتك ؟؟ واحساسك ؟؟ ليش انت اشنو عرفك كيف كنت عايشة واشنو صار عند اهلك ..
انت اشهر تغيب وانا كل يوم اسمع كلام وحكي يجرحني ويأذيني .. من غير معرفتي بوفاة اهلي من امك وبطريقة جارحة ..
وفوق كل هذا تتزوج وتريدني ابقى اتفرج ..
انا انسانة ولي مشاعر واحاسيس انت مايهمك لان كل يوم مع بنت شكل لكن انا يهمني كرامتي ..
كرامتي مستحيل اخليها تنهان اكثر بذاك البيت ..
وقف السيارة ودحق بية .. وانتي شعرفج بية اني ابو البنات . سمعتي من عدنان ومسرة وصدگتي مووو . مسرة مثلج حافظت عليها وسترتها وتالي طعنتني ..

- لاتقارني فيها ..
- ماقارنتج انتي الي قارنتي حالج .. بكل مرة تذكريني بيها رغم گلتلج انتي تختلفين عنها انتي غالية عندي كم مرة ردت احسسج انتي الج مكانة بگلبي ..
بس عنادج وكبريائج جانت اقوى منج ..

هو يحكي وانا مستغربة . اشنو يقصد معقولة الي فهمتو صحيح ..

كمل كلامو .. المهم انتي اختاريتي الرحيل ولازم احترم رأيج .. اذا تحبين تتطلگين اني جاهز ..
انطيني رقمج واي شي تحتاجيه گولي .. ولو اعرفج قوية وماينخاف عليج ..
تعاي صدگ .. شني هذا اللبس ورافعة شعرج .. لو عاجبتج روحج هيج ..

- ليش غرت ؟؟ مو تقول ماتهميني ..
- ليش اني مهم عندج .  وبعدين هذا الزعطوط الوياج منو ؟؟
- هذا صاحب المحل ..
- هاااا ماعجبني ..
- عزيز انا هوني اشتغل حتى اعيش انا واختي . انت تعرف كيف اجينا وشلون عشنا هوني لو لا مساعدة صديقتي واهلها ..
- صديقتج ؟؟ هاي المرة گلتيلي عليها مووو . اصلا لو ماهي ماجان تمردتي وعفتيني بس هذا طبعجن دووم غدارات ..

- عزيز لاتقول هاكذ . انا لأنه بينا رابط زواج مادحقت بعين احد ولاكلمت احد ولاعرفت احد . انا حافظت على هذا الرابط حتى لو كان شكلي وحتى لو انت بعيد عني ..

- كثير خيرج من فكرتي بية ..
- انت ليش زعلان . انا ماوعدتك بشي . وانت الي طلبت نتزوج ويكون زواجنا شكلي ..
- اني مازعلان بس متضايق منج . لان مرتين تديرين وجهج وترحين من غير تبرير . سامحت بالاولى لان مجبورة اما الثانية لا جان تگدرين تگليلي واني اتصرف

- كنت متضايقة منك لانك ماقلتلي اهلي ماتو .
كلشي صار بسرعة ويمكن هذا الحل الافضل للجميع احنة حياتنا مختلفة عاداتنا وتقاليدنا وبيئتنا كذلك .
حتى لو انجمعنا راح الكل يكون ضدنا ويفرقنا ..

- وانت شلج بيهم اذا اني وياج .. ااااه ترانيم ااااه تعبت واني اركض وراج . راح يصيرلنا اكثر من سنة .. بس ماگدرتي تفهميني ولاتعرفيني ..
ديري بالج على نفسج .. وعلى اختج . اني باقي يومين هنا اي شي ترديه گولي ..
واخذي قرارج حتى ننهي كلشي وكل واحد يبدي حياتة من جديد ..
هاج سجلي رقمي .. اخذ مني الموبايل سجلة واعطانياه
رديلي جواب لان يومين وراجع ..
رجعني للمول وراح ..
بقت عيني تدحق وراه .. وقلبي راح معاه ..
اختنقت قعدت ع الارض ابكي .. للحظة خفت اخسرو وخاصة لما اغشعت بعينو الالم والحزن والعتب .
لو ماكان يحبني مااجة هوني وعيونو كلها غضب .

اتصلت بجود قلتلو لينا تعبانة راح اروح للبيت . وافق وقال طمنيني عنها ..
وصلت البيت ..
لقيت لينا محظرة العشا ..
ابتسمت .. كبرتي وقمتي انتي تعملي الاختكي عشا ..
- اختي التقيتي بأخي عزيز ماصدقت لما اغشعتو فرحت ولو ماعيب كان حضنتو . اول مافتحت الباب واغشعتو قبالي تذكرت حياتي مع سرور وعلي والجدة وسراب اااه لو تعرفي كيف مشتاقة الهم ..

خليت جنطتي وقعدت من غير مااحكي ..
وانا افتح بسير الحذاء.
سألتني .  اشنو بكي تقابلتوا .. اشنو قال الكي وتضايقتي ..

- هو الي متضايق مني وعاتب عليه وطلب مني افكر حتى يطلقني ..
- انتي تحبيه اختي مااا؟؟
- لليوم مااعترفت حتى النفسي لاني خايفة من مشاعري تأذيني . ابتعدت عنو وهربت الاشهر وماقدرت انساه . واليوم لما اغشعتو حسيت قلبي طلع من مكانو وراح يحضنو ..
هو يفكرني انانية .. لكن هو مايحس بشعوري واحساسي والي مريت فيه ..
صعب اعيش معاهم واتحمل .. وكذلك هو ماقلي يحبني رغم كنت حاسة بأهتمامو . خفت احبو واتعذب لكن الي عرفتو بعد ماقلي نتطلق .
اني احبو من زمان من اول يوم نقذني فيه من الموصل وصار اماني وملاذي الوحيد ..
خايفة اخسرو واتعذب .  لان اعرف ماراح انساه او احب غيرو ..
كنت احكي ولينا تبكي .  اختي لاتتركيه تندمي . انتو الاثنين تحبو بعض وواضح من عيونكم ونظراتكم .
قوليلو انكي تحبيه .

- مااقدر مااقدر ارجع معاه . انا احبو لكن اريد اعيش معاه حياتنا سوة ونبنيها سوة من غير تدخل احد. 
وانا عارفة ماراح يقبل يترك كلشي ويستقر معي هوني .
- انتي اعطيه امل وخليه واعطيه فرصة يقرر..
- لينا انتي متى كبرتي حبيبتي وقمتي تعطيني حلول.
- اووووه اختي انا اصلا كبيرة من زمان لكن انتي ماتغشعيني هههههه
حضنتها .. قبان قلبكي حبيبتي ..
بليلتها انا مانمت كلامو وحركاتو ونظراتو كلها مرسومة بخيالي ..
لو ماكان يحبني ماكان اجة هوني ودور عليه معقولة ينفذ وصية عمو ابو رماح فقط ؟؟

ثاني يوم قعدت الصبح لقيت لينا مجهزة خالها ..
- اختي انا عندي دورة حاسوب اليوم . انتي روحي للمحل وانا بعد مااكمل الحقك ..
- تمام . مااغشعتي موبايلي ؟؟
- خليتو على الشحن كان خالص شحنو ..
قبلتني وطلعت ..
نظفت البيت .. وبدلت وطلعت ..
لقيت جود قبلي ..
- بشري شلون صارت لينا .
- احسن الظهر تجي للمحل هسا عندها دورة ..
- الحمد لله . ترانيم اريد احجي وياج بموضوع ..
- قول جود ؟؟
- انتي اعتبرج الله شاهد مثل اختي الكبيرة . وحبيت اخذ رأيج قبل لااخطو اي خطوة ..
- قلقتني ؟؟

- اني اريد اخطب لينا ..
بقيت ساكتة ومستغربة ..
- لكن لينا صغيرة ولسا تدرس وانت تدرس بعدك .
- ماكو مانع انه ننخطب ونتعرف على بعضنا واني اوعدج اخليها تكمل دراستها ومااقصر عنها بشي . بس لان مااحب اسوي شي من وراج اريد كلشي بالحلال ..

- واهلك .
- اهلي ماعدهم هيج عقائد . وبالعكس همة يحبوجن .
- انتظر فترة .. انا مريت مثل تجربتها وخايفة عليها .
- لاتخافين مو كل اصابعج سوة . اني لو ماحس بمشاعرها اتجاهي ومتأكد ماجان حجيت وياج .
اريد اسويلها مفاجأة بس قبل هيج اريدج تعرفين رأيها وتگليلي ..

- مااعرف اشنو اقلك لكن هذي حياتها ولازم اخذ رأيها احكي معاها واغشع ..
كلما اتخيل لينا وهي عروس استغرب ..
لينا صغيرة لو مهما كبرت او نضجت راح تبقى بنظري نفسها الطفلة الي تخاف من الرعد وتنام بحضني ..

للظهر ومااجت لينا اتصلت عليها ماردت قلقت اكثر .
بقيت ادحق برقمو اصابعي تحاول تضغط وتتصل لكنها تتراجع بآخر لحظة ..

بعدها اتصلت .. وينكي انتي قلقتيني عليكي .. انا بالبيت اختي تعبانة تقدري تجي ..
بدون وعي تركت كلشي وقلتلو الجود حالة طارئة . الشقة قريبة على المول ركبت سيارة ورحت ..
دقيت الباب مثل المجنونة…
طلعت تدحق بيه وتبتسم ..
- اشنو بيكي قلقتيني ..
- ماانا اختي .. انتو الي عندكم مرض الكبرياء والعناد راح اخليكم تعالجو بعض ..
- اشنو تقصدي .. اشرتلي للصالة دخلت لقيت عزيز يدحق بيه ورافع ايدو لفوق ..
- مالي علاقة مثل ماسوت بيج سوت بيه وهبطتني .
- ومنين تعرفي رقمو…
- ماكو شي صعب على ليون . قابل اخلي جهازكي ع الشحن بدون مااستفاد ضحكت وطلعت انا رايحة للمول اسفة اختي ماتزعلي ..
راحت وانا بقيت واقفة مكاني .. وبموقف لايحسد عليه .كيف اتصرف واشنو احكي مااعرف ..
كانت عيونا تدحق ببعض والكلام سكت واختارالصمت

عندما تعجز النفس عن رؤية الأحبة فإنها تشتاق لهم بصمت مؤلم إياك أن تظن أن الصمت نسيان!!!
فالأرض صامتة ولكن...في جوفها ألف بركان!!!

#بقلمي_الكاتبة_شمس

يتبع….

حبايب ..
دااشوف هواي تجاوزات على بطلة الرواية .. مو انتقاد تجاوز خلو خط جواها .. خاف وحدة تگول نزلت قصتها لازم تتحمل الانتقاد .
الانتقاد البناء مامعترضة عليه . لكن التجاوز لا مامسموح .. يعني بفضل كم وحدة اختصرت ثلاث بارتات ببارت بواحد بطلبها ..

تعبت واني احجي بكل قصة واكول مااريد تجاوز .
انتو ماعشتو الي عاشتة تشوفون كلشي سهل وبسيط الي مرت بي . وبكل مرة تلاگي الي ينقذها ويوگف وياها . لكن لو ماهي واختها طيبات گلب ونقيات ماكان الناس توگف وياهن وتحميهن ..

لكن واقعهن والي عاشن بي امر من الكلام والوصف .
خلونا نستمتع بالرواية ونكملها على خير ..
احبكم ❤