#اضعت_ربيع_عمري

#بارت13

#بقلمي_سارة_المجيد

اسعد الله مساء متابعيني بكل خير
💐💐💐💐💐💐💐💐💐💐💐

قاسم ..راح اكولج شي هسه

جنة شنو ؟؟!

قاسم ..تتذكرين باول فترة من زواجنا شفتي يمي دفتر مال البنك واكتشفتي بي 50 مليون

جنة ..اي اتذكر وانت وكتها كلت مال اخويه مو مالتي ..

قاسم ..صح بس هذا الدفتر مالتي مو مال اخويه

جنة ..عرفت مالك وماصدكت من كذبت عليه وكلت دفتر اخوية ..بس ليش ضميت عليه

قاسم ..ماجنت اريد اضم عليج بس اخواني كالو لاتكول لمرتك عندك فلوس لان اذا المرة تشوف الرجال عنده فلوس تكوم تدخل بطمع

بس صدكي من شفتج وعرفت معدنج وشفت من كطعت عليج الفلوس وماانطيج هوايه وكله اكولج ماعندي وجنتي راضيه مقتنعة وهم بطيحتي ابد ماضجتي ولااشتكيتي ولاتعبتي وجنتي بالكوة ادبرين حالتنا وهسه راح اكولج هل فلوس كلها الج

جنة ..حبيبي الي او الك احنا ماكو فرق بيناتنا لان اثنينه واحد ...اني ماريد منك غير بس تحبني وتعاملني بالحنيه هذا اهم من الفلوس

قاسم ...انتي عمري وكل اهلي وناسي انتي صرتي النفس الي يصعد وينزل بين ضلوعي ...زين عندي اقتراح راح اكولج انتي اختاري بعد الي تكولين عليه اني اسوي الج

جنة ..اممممم شنو هل اقتراح

قاسم ...بهل الفلوس تريدين اسوي الج ذهب لو بيت الي يعجبج يجرالج ..

جنة ...طبعا ماتتصورن اشكد فرحت بهذا كلامه حسيت ملكت الدنيا كلها حسيت قاسم رجعل لحظني من جديد ...كتله حبيبي ذهب ماريد شسوي بالذهب واحنا عدنا ولد لازم نأمن مستقبله مو كدامك شفت ولاواحد اهتم بينه بطيحتك فااحسن شي خلي نشتري بيت بلا مانضيع فلوس بشغلات مالها معنى وهالبيت راح يصير النا كلنا ويصير ذخر لابنة وهم نرتاح من هالغرفة الصغيرة وكافي خلي اشويه نعيش مرتاحين اريد يكون الي مملكة خاصة بينه نعيش سوا بيها

قاسم ..صاااار تدللين يعمري لعد بعد من باجر راح ادور بيت ع كد فلوسنا ونعيش بي

جنة ..ومرت الايام وتقريبا وره سنتين ظل يشتغل ويدور بيت لحد مافديوم اجه من الشغل كعدنا نتعشئ كال عندي الج خبر حلو كتله شنو ياالله فرحني

قاسم ..لكيت بيت بهاي المنطقه بس اشويه بعيدة ع اهلي واصلا اني عجبني كلش حلو اذا شفتي تكولين هسه اخذه
باجر ان شاءالله من ارجع من الشغل اجي اخذج ويايه حتئ تشوفينه

اتفقت ويه صاحب البيت كتله باجر اجيب مرتي تشوفه يله نتفق عليه

جنة ..طبعا ماتتخيلون اشكثر فرحتي لان جنت دائما احلم يصير الي بيت انظفه وارتبه واثثه ع ذوقي كمزت وشبكته وبوسته كتله فدوة لعمرك حبيبي واخيرا راح يتحقق حلمي

قاسم ..ان شاءالله حبيبي يكون من نصيبنه بس ادعي ربنه يسهل علينه ....

جنة ..ان شاءالله ياااارب يسهل امرنه ...ف ثاني يوم اجه قاسم من الشغل كال حظري العشا نتعشا حتى
اخذج ونروح

كتله تمام روح غسل وبدل دقايق ويصير العشا جاهز ف كملنا وخلصنا وبدلت واخذني ورحنا وصلنا وكفنا كدام البيت من البرة شفته يفتح النفس اشكد حلوو يجنن كلت لزوجي يعني معقولة يصير عندي هجي بيت

قاسم ..شفتها شلون فرحانه بالبيت خليت ايدي ع خدودها وكتلها اي حبيبي انتي تستاهلين اكثر من هاي بس تعالي شوفي من الداخل راح يعجبج اكثر

جنة ..يله 😁ف نزلنا رحنا دكينا الباب اجا الرجال صاحب البيت استقبلنا كال اهلا وسهلا بيكم اتفضلوا ومرته هم طلعت استقبلتنا ودخلونا لغرفة الاستقبال

شفت كعدنا اشويه حجينا بعدها الرجال كال لمرته روحي اخذي الاخت خلي تشوف البيت لان زوجها البارحة شافه خلي هسه هي تشوفه ف المرة كالت كومي اتفضلي شوفي البيت

اخذتني للمطبخ دخلت باول جان مطبخ حار وبعده مطبخ بارد واكو هول جبير وبي غرفتين وحدة الغرفة الاستقبال والثانيه غرفة النوم وبيها باب كله جام فتحته ودخلت بي جان بيها حمامات ومن صفحة الدرج وبيها محجر ذهبي وبي كرستال من هاي الموديل الجديد

وارضيات كله سيراميك وحمامات والمطبخ كله سيراميك يجنن كله تركي دوخني حيل عجبني دعيت بكلبي يصير من قسمتنا رحت كلت لزوجي اي حلو كلش عجبني فاتعاملوا ع البيت واتفقوا بس جان فلوسنا ناقص لازم نداين

رجعنا للبيت كال اشلون ندبر فلوس البيت فلوسي ناقصات وماريد يروح من ايدنا

جنة .. راح احجي ويا ماما اشوف اشكد تكدر تنطنيا

قاسم .. اي والله ياريت بلكت تكدر اتدبرلنه كم فلس

جنة ..ان شاءالله حبيبي بلحظتها شلت التلفون خابرت ع امي حجيتلها السالفة فرحت حيل كالت اي اكدر انطيكم كلت لقاسم امي كالت راح انطيكم بس هم ماتكفي

قاسم ..هسه راح اروح احجي ويااخواني خلي هما هم يساعدوني

جنة ..خوش .. والله راح حجه ويااخوه الجبير ماانطاه كاله ماعندي وراح لاخوه الوسطاني هم مانطاه وزوج خالتي اشويه ساعده واجه يم اخوه الصغير كال اي اني هم اساعدك وراح انطيك فلوسي كلها اني ممحتاجهن خليها يمك اشوكت مايصير عندك رجعهن

والله الحمدلله كملنا فلوس البيت هوايا فرحت ثاني يوم جمع الفلوس كلها راح انطاه وسووا االعقد مال البيت كدام شهود وصار البيت النا بس بقئ يصدقه بالمحكمة وصاحب البيت كال لزوجي صحيح البيت بعته الكم بس اني عندي قطعه ارض بس انطوني مهلة حتئ ابني بيتي واطلع اذا مامستعجلين

قاسم ..عادي ابني براحتك اني مامستعجل

جنة ..ليش هجي كتله اخاف يعصئ بعد مايطلع

قاسم ..مايكدر لان العقد صار بأسمنا راح يبني بيته ويطلع وبعدين احنا مامستعجلين خلي نخلص ديوننا واشتريلج غراض جديدة لبيتج لاتنسين انتي اهنا ماعندج شي غراضج كلها قديمة وبعدين احنا كاعدين بيت ابويه محد يطلعنا وماعدنه مشاكل ننتظر ماعدنه شي

جنة ..هاي هيه الي تشوفه حبيبي ورة كم يوم ..جنت بالمطبخ اغسل مواعين ومرت حماي الصغير هم بالمطبخ واكفه دتطبخ شفتها وجها ثكيل احجي وياها ترد عليه ببرود اني اتعجبت كلت اشبيها هاي لازعلتها لاعدنا مشاكل هاي اشبيها ويايه رحت وكفت بصفها كتلها اشبيج نسرين داحسج مو ع بعضج

نسرين ..مابيه شي راسي يوجعني 😞

جنة ..لاوالله وضعج مومال راسج يوجعج شو هاي عوجت حلكها 😕
كتلها شكو سامعه حجي او اني مزعلتج بشي وماعرف حجت من ورة خشمها

نسرين .. لاا ..بس اكولج شغلة لاتكولين لزوجج اخاف يحجيها لزوجي تسوي مشكلة ويايه

جنة ..شنو كولي شكو

نسرين ..من زوجج راد الفلوس الي عدنه احنه هم جنه نريد نبني قطعة الارض مالتنه بس انتو اخذتوا فلوسنه

جنة ..عكدت حاجبي باستغراب ..طبعا همه جان عدهم قطعة ارض بس ماجان يريدون يبنوها لان حييييل بعيده بأحدئ القرئ من نواحي كركوك علمود هاي بقوها هجي زوجها جان يكول راح ابيعها واشتري اهنا حتى كلنا نصير قريبين ع بعض

فاكالت جنه نريد نبني واني كتلها حبيبتي اول شي احنا مااخذنا فلوس منكم بالغصب زوجج هو كال عندي فلوس اخذوها كملوا فلوسكم اني مامحتاجهن وثانيا احنا مماكلين فلوسكم فترة ونرجعهن الكم احنا اخذناها دين

كالت من ورة خشمها عادي وتركتني وراحت عرفت اهنا معدنها شنو ..بينت كلشي جانت تحسدني واني جنت عميه مااشوف هل شي من ورة طيبة كلبي وكملت شغلي ورحت كعدت بغرفتي افكر بكلامها وانقهر

ليش الناس هجي تتغير ويايه وبعد صار الليل اجه قاسم من الشغل اتعشينا وكملنا جنه كاعدين نباوع ع تلفزيون

قاسم ..اشبيج هجي صافنه صاير شي ..

جنة ..ها لا ماكو شي

قاسم ..كمت وكعدت بصفها وخليت ايدي ع وجها كتلها اعرفج كوولش زين امبينه ضايجة من شي كولي احجيلي

جنة ..بعد مالح عليه هوايه حجيتله كتله اخوك من انطاك الفلوس جان هو هم يريد يبني القطعة مالته

قاسم ..باستغراب لا وين يبنيها باخر الدنيا اش ياخذه اهناك ليش تسالين

جنة ..مادري اليوم مرته كالت جنه محتاجين الفلوس وانتوا اخذتوهن

قاسم ..ضحكت كتلها هاي جذابة اصلا اخويه كال ممحتاجهن خليهن يمك

جنة ..والله بعد مادري

قاسم ..حبيبتي الشغلة واضحة تغار منج

جنة ..مااعتقد هل شي صحيح لان هي جانت دوم حبابه ويايه

قاسم ..اي وهسه بين معدنها 😉

جنة ..ع العموم عادي اني اعذرها هي هم مرة مثلي تحب يصير الها بيت مثل اي مرة

قاسم ..اي حبيبتي اني مماكل فلوسهم اول مايصبر عندي راسا ارجعهن الهم ..

جنة ..اعرف حبيبي ..زين عندي حل راح تبعدني ع لسانها وحسدها اذا تحسد

قاسم ..شنو الحل بله 🤔

جنة .. ذهبي اخذه وبيعه وانطي فلوسهم حتى نخلص

قاسم ..لاحبيبتي مااكدر اخذ هاي حقوقج وابسط شي تملكينه

جنة ..حبيبي الذهب ذهبك انت اشتريته الي بالنيشان وهسه اني ممحتاجته روح بيعه لان اني عندي شي اغلئ من الذهب هو انت وابني وبيتي ملكي شسوي بالذهب

كلبي مليان جروح اريد ارتاح كافي ناس يغثوني

قاسم ..اشويه فكرت وبعدين كتلها ماشي بس اوعدج من اخلص ديوني ونستقر بيتنا اشتريلج احسن واحلئ منهم

جنة .. لزمت وجهه باثنين ايديه وابتسمت بوجه كتله حبيبي اعرف وماريد شي من الدنيا بس تبقئ يمي وتسعدني هاي اغلئ شي عندي وبعدين ضربت بصدرة بزعل ودلع كتله نسيت جنت تصرف هالفلوس لحبيبتك

قاسم ..ضحكت كتلها ايباااه انتي شنو مانسيتي

جنة ..بزعل حجيت ويا كتله لا 😒 ولاانساه وسحبني لحظنه كام ويضغط ع خصري وكال تعالي هسه انسيج كلشي واني ادفع بي واضرب بس مااكدر عليه هو ضخم وقوي ضعت بين ايدي وكام يبوس ويشم وبعدوو

قاسم ..شفتها تدلع بزعل ردت انسيها هدى والخلف هدى سحبتها بقوة عليه كتلها تعالي هسه انسيج كوولشي يزعلج 😉وحظنتها وبقيت ابوسها وصعدت عندي حرارتي واتسودنت عليها كمزت فوكاها وسويت بيها عمايل نسيتها حتى اسمها مو بس هدى 😂😂😂😂

جنة ..مرت ايام وصار سنة طلع صاحب البيت من بيتنا خابر قاسم كاله تعال اخذ المفتاح مال البيت اني انتقلت لبيتي الجديد وراح قاسم جاب المفتاح واجه

قاسم ..حبيبتي هذا المفتاح شتكولين تريدين ننتقل لبيتنا لو نأجرها لحد مانخلص ديونا ونغير اثاث البيت

جنة .. حبيبي كيفك مااضغط عليك ادري بيك تعبان ليل نهار تشتغل وماتلحك احسن شي روح اجره

قاسم ..خلاص تمام من باجر
اجره علمود فلوس الاجار هم يساعدني واشتغل هم طبعا بعت ذهبي وانطيت فلوس حماي علمود مرته صارت تبتعد عني ومن اروح اكعد وياها تسمعني حجي

عرفت هي حسودة ومن رجعنا فلوسهم رجع الدم بوجها كامت تحاجيني عادي وتكعد ويايه بس ماانكر انقهرت انكسر كلبي لان مااتحمل نجمع فلوسهم وننطيهم فكتلها ع عموم هو احنا اول تالي راح نرجع فلوس الكل

بقينا 3 سنوات يله خلصنا فلوس الي علينا مابقئ شي علينا وبعده زوجي اشتغل علمود نشتري اثاث جديد جان كل مايجمع اشويه نشتري شي الئ ان خلصنا لان خطيه جان تعبان مثل ماتعرفون هو انضرب وسكط ايده ورجله ف جان يشتغل بالكوة ورة ماخلصنا كلشي

قاسم .. اختاري يوم الي نروح نغسل ونظف البيت حتئ ننقل غراضنا

جنة ..حبيبي خلي ع يوم الجمعه لان اخوانك واولادهم يصيرون بالبيت حتئ هما هم يساعدونا اشويه وحدك مانكدر انت ايدك ورجلك موتمام

قاسم ..ماشي حبيبتي

جنة ..صار يوم الخميس من الصبح رحت كلت لمرت حماي تجين تساعدني نروح نغسل البيت حتئ باجر نريد ننقل غراضنا

نسرين ..لاولله حبي اعذريني ماكدر زوجي مايقبل

جنة ..ليش .. خابري وكوليله

نسرين ..لا ما اخابر مايرد وبعدين اني ماكدر تعبانه مريضة ماكدر

جنة ..عرفت ماتريد تجي ويايه رحت كلت لقاسم تكول مريضة مااكدر كال عوفي اني اساعدج رحنا اني وزوجي نظفنا وغسلنا البيت كله كله ماتركنا شي مانضفنا جنت حيييل فرحانه

ماردت احد يغثني بتصرفاته تركت كلشي ورة ضهري مردت اخرب سعادتي كملنا كلشي لحد ليل يله خلصنا ورجعنا باليل زوجي انطاه خبر لكل اخوانه يجون يساعدونه

كالو الله كريم وراح كال لاخوه الي يمنا كال باجر اروح لشغل كال بس باجر جمعه كال عادي اروح صار الصبح اتريكنا كمت جمعت كل غراضي ولملمت كله والملابس خليتهم بالجنط والفراشات خليتهم بجرجف جبير

كاعدين ننتظر يجون يساعدونه اخوانه واخوه الي ويانا بنفس البيت ماكو ماخذ جهاله ومرته رايحين يعني مختصر المفيد الكل انهزم مارادوا يساعدونه

قاسم ..صار وره الظهر ومحد اجه يساعدنه كتلها حبيبي كومي اني وياج ننقلهم هسة عرفت كلشي اول شي بطيحتي من انضربت عافوج وعافوني وحدي جنتي بالكوة دبرين اللكمه وبقيتوا ايام واسابيع وشهور بدون مسواك وفلوس محد منهم دك بابنا

ومن اشتريت البيت الج الكل كاموا يحقدون عليه لان جانو دوم يكولون ليش اخذتلها بيت جان خليتها اهنا وحتئ لو ماخذ البيت اجره واجمع فلوسه الك يعني عرفت اخواني جان يدفعوني عليج

جنة ..اتنهدت بحزن كلت بكلبي يعني هما السبب اني جنت انحرم من الملابس والاكل والفلوس مو زوجي بهل شغلتين كلشي بين كمنا اني قاسم ننقل الغراض اشياء الصغيرة اخذهم بسيارته واشياء الكيبرة مثل طباخ وثلاجه وقنفات هذول راح جاب كيه حمل اخذناها والله الحمدلله ...

لحد الليل خلصنا كلشي وطبعا من فرحتي مانمت ضليت لحد الصبح اشتغل بي وارتب الغراض الصبح يله نمت والحمدلله ......

خلصنا من المشاكل وقاسم صار يتقرب اكثر واكثر مني بعد لان اني سندته وماعفته مثل اهله كاطعونا لا اجو باركلونا بالبيت ولاشي زوجي هسه اهله تركوا علمود يكولون ليش اي شي تريد منك تسويلها يكولن عليه جنة كدرت تسيطر عليك هو وكفهم كلهم عند حدهم كال مرتي شافت اشكال ضيم يمكم ويمي وهذا شي بسيط اكدر اوفره الها ولتعبها يمي ...

جنة ..للاسف جانوا اهل قاسم ناس انانيين ومصلحجيين يحبون نفسهم ولايحبون الخير النه وكاموا يبتعدون عنه هو مااهتم

لان كال انتي امي واهلي وحبيبتي شفت حنية كل الموجودين بيج بس اهلي اجونا وجاوبولي مجمدة هديه مال بيتي واخوية الجبير جابلي جداري من نوع تيفال كله موديل جديد والحمدلله بيتي صار يجنن واحلئ يوم جان عندي من انتقلت لبيتي الجديد وهاي جان حلم عمري الي تحققلي والله جبر بخاطري الف الحمدلله وعشنا بي احلئ ايام ربي لايحرمني منه لقاسم حبيبي ...

المهم عرفنه محد بحال احد وكلمن يكول ياروحي ..حتى اخوتي من اتزوجوا لليوم ولا احد سئل عني مع انو اني الي ربيتهم وكبرتهم ..

وبعدين ورة ماكبروا هم ماكدروا يتتدخلون بحياتي ومشاكلي لان اخويه الجبير اتزوج مرته صارت حبيبته واخته ومرته ماجنه نكدر نحجي شي وياها كبل جان يعصب ع امي وعليه كعد فترة يم امي وبعدها طلعو من البيت

اخذو بيت الهم وكعدو بي وطلع من حياتي هسه لايخابر ولايسال وكأنما اني وحدة غريبه مع علم اول ماتزوج جان يوميه يخابرني ويسأل عني اشمحتاجة وجان يجب ملاعيب لمجودي بس ورة الزواج اتغير وصار لمرته واخويه الوسطاني هم كذالك ...

قبل لايتزوج جان كل مااروح بيت اهلي ماجان يخليني انام الا بصفه نكعد ونتعلل ونتشاقئ جنه نضرب بعضنا بالمخاد ومرات جنت واكفه واغسل حوش ومندمجة يجي من ورة كبل يشليني بحضنه ويفتر بيه واني جنت اصرخ واصيح واضرب بي ولك نزلني راح توكعني هههههه

جان دوم نتضارب اني وياه من جنت حامل بمجودي من اروح ابات بيت اهلي امي جانت تكول انتي نامي بمكان عامر هو جان يكول غرفتي اخذتيها وفراشي اخذتيها واكلتي كل اكلنا جان يكول انتي من تجين احنا مانشبع هلكد ماتاكلين ههههههه بس مع الاسف الدنيا غيرتهم خلتهم نسوا شي اسمها اخت بحياتهم 😔

هسه هما لايسألون عليه ولايخابرون ولايحجون ويايه وحتئ من اروح لبيت اهلي ماينزلون لا هو ولازوجته يجون يسلمون علينه مع علم هوايا تعبت بتربيتهم بس الحمدلله علئ كل الحال مارايد شي منهم غير ربي يحفظهم لزواجاتهم واطفالهم اما اخر العنقود اخويه الصغير بعده باقي نفسه مامتغير مااعرف بعد هو هم اذا يتزوج يتغير او لا خصوصا هذا اني وياه هواي متعلقين بعض قبل فترة قصيرة قبل ماندخل لشتا هو خطيه يشتغل ويدرس الصبح بالجامعه والعصر يشتغل بالمطعم

فد يوم جان الجمعه جنت اشتغل بالبيت دزلي رساله ع ماسنجر كال اشوكت تجين مشتاق اشوفج صارلج 3 اسابيع ماجايه لبيتنا لان اني بوكت الدوام مااروح هلكد علمود مدرسة امجد كتله اليوم راح اجيكم حبيبي جانت ساعه 12 الظهر كتله العصر راح اجي كملت شغلي وخلصت كل شي كعدنا نتغدة كلت لقاسم ورة الظهر اخذني لبيت اهلي من زمان مارايحة كال ماشي كملنا غدة وشلت مواعين وغسلتهم ورتبت البيت كله

ورحت سبحت وسبحت مجودي وكملنا كلشي بس جنت احس بضوجة وخنكة وداحس گلبي مقبوض ليش مادري وراها كملنا كلشي وكلت قاسم يله صارت ساعه 3 تاخذنا هسه

قاسم ..اي ديله كوموا خلي اخذكم بطريقي

جنة ..جنت بس اصفن كل دقيقة ماعرف شبية
قاسم ..اشبيج ليش صافنه بيج شي

جنة ..مابيه شي بس احس نفسي ضايجة

قاسم ..ليش ضايجة هسه مو داخذج لبيت اهلج بعد شكو

قاسم ..لاحبيبي ماكو شي والله وصلنا لبيت اهلي نزلت من السيارة ونزلت جنطي اني ومجودي ..قاسم بقه بالسيارة كال طبوا للبيت اني اروح نزلنا اندك الباب ماكو احد ندك جرس هم محد يجي كلت ياربي هذول وين رايحين يعرفون اليوم اني اجي وين راحوا

ورة اشويه شفت مرت اخويه الوسطاني اجت حجت ويايه من البلكونه من طابق الثاني .......كالت ماكو احد راحوا للمستشفئ اني انصدمت رجلي كامت ترجف كتلها ليش ابويه بي شي كالت لا محمود اخوج احترك بالمطعم ...

الفرن كب عليه واحترك ...هي هيجي كالت اني وكعت مني الجنطه وكعت بالكاع كدام الباب اصرخ واصيح ملخت نفسي من الدك واللطم ع وجهي ...

وللحكاية بقية ..

#يتبع ..

#سارة_المجيد🎀