السلام عليكم
.

اليعرف معنى العنوان يترجمة
لان انا حطيتة بس لان عجبتني القافية
.

لا اشاقة انا ممتاز بالعناوين مثل متعرفون 🗿
بشكل عام الموضوع يحجي عن عقل البشر بالعراق
.

شوفوا هي هاي حادثة صارت ومن خلالها استنتجت امر ليس بمجهول
راح انطي اسم للشخصيات المذكورة من يمي لان ماعرفهم
وحتى ما تدوخون
.

قبل كم يوم جنت كاعد بالصف اگلب بالموبايل
فـ جان ياسر كاعد يحل امثلة مال كيمياء
فـ اجة يمة خالد بكل فضول وهكذا دار الحديث بينهم
سأله:
_شكاعد تسوي؟
_دا احل امثلة مال كيمياء من امس حاير بيهن
_صدك جذب -مستهزئاً-
_والعباس
.
وخالد راح طلع من الصف وانتهت السالفة
.

انتوا عبالكم موقف بسيط؟
او لا يُذكر حتى؟
زين اول شي ذولة اثنينهم محد يعرف الثاني بأبسط شي وهو "الاسم"
وصارت حادثتين تعكس الكثير من الامور
الاولى : هي الفضول تجاه طالب دا ينقل واجباته وهذا شي واضح ميراد عليه سؤال سخيف
الثانية : الاستهزاء الصار "طبعا اساساً خالد ما حال واجبة ولا يدري شنو الفلم وميعرف يجمع ويطرح رقم يتكون من 3 مراتب"
بكل ما يملكه من صفات الطالب الفاشل يُعيب شخص مثابر
الثالثة : سكوت ياسر الغير مبرر تجاه السخرية هذه
.

طيب...
هذا طرح للاخطاء الي حصلت من نقاش مكون من 4 جُمل
لكن... اهمية الامر تكمن بمتتبعاته السلبية
فـ لو نفترض أن ياسر رد على خالد بدل كلمة "والعباس"
كان رد عليه بجملة "دامك تعرف الحل تعال ساعدني"
واكيد خالد ميعرف وراح يتعلم بعد ما يصيرلة فضول نحو هكذا امور بس علمود يسخر من الشخص ويفشل نفسة بلاش
.

هي المشكلة فكرية...
العقل عد اغلب العراقيين مبرمج
العراقيين من ينطبق عليهم جملة "حياتهم مسيرة"
ابدا لا ارى أي خيارات امامهم
يعني اختيار الوظيفة واختيار شريك الحياة واختيار انجاب الاطفال واختيار اتقان مهنة وغيرها وغيرها
كلهن امور مسيرة بالنسبة الهم
لكن كلامي مو على واحدة منهن
لان ذني كلهن مشاكل فرعية
كلامي عن اساس المشكلة هذه
وهو العقل...
.

فـ مثلا
رد ياسر بقول "والعباس"
كان عقله مبرمج لقولها
مو باختيار موزون طلعت وياه هذه الكلمة
هو حافظ يعني هيج موقف واثناء انو خلص الكلام ماكو واحد يسأله فقط رد عليه بـ رد ما يعرف شنو يجاوبة فـ يجاوبة بهل طريقة حتى ينهي الكلام مباشرة وما يتعمق بالامر لان اساساً احنا فاقدين لاسلوب النقاش والحوار فـ الحوار الوحيد الي ممكن يصير هنا هو فعلياً الي صار
ماكو غيرة
ميكدر يرد بطريقة مُلجمة للمقابل او بشكل منطقي للحادثة الصارت
.

يعني بختصار لكل هذا الكلام
فـ هذه الامور البسيطة هي التعكس شخصية الانسان وطريقة تعامله مع الامور...
واكيد مع اختلاطي بالمجتمع الي حولي اكتشفت ان 95% هيج شخصيتهم
تلاحظون كمية الملل؟
ان اغلب الناس هنا نفس الشخصية؟
تدرون الاشخاص الوحيدين "من المقربين لي"
طريقة تفكيرهم تختلف همَ ثلاث اشخاص فقط
من ضمنهم مدرس الاحياء
نعم هو صديقي تقريبا
والحلاق "هم نعمة هاي حلاقي مثقف"
والاخير صديق قديم ماعرف عنه شي هسة
فـ نعم الباقين كلهم نفس النظام
بحيث بأي معاملة بأي حادثة انا حافظ السيناريو الي راح يصير وحافظ الكلمات الي وصلت لمخهم والي راح تخرج من لسانهم
.

الامر اشبه بأنك تعيد تشغيل فيديو طوله 30 ثانية لمئات المرات...
وتستمر بتكراره وتمثل انك تشاهده اول مرة ومستمتع بيه
طبعا هذه الطريقة الوحيدة حتى تظهر نفسك بشكل طبيعي وسط أُناس سطحيين
.

اكتفي لهذا الحد
بالايام الجاية اتعمق بالموضوع اكثر
.

اشوفكم بخير 🦍
.