البارت السادس

راعك في وجهي شحوب الخائفين..
وذهول الضائعين..
أنت لو أبصرتني..
راعك هذا السهم في ظهري..
وهذا النصل في صدري..
وإفلاسي من الطهر..وأكوام من الشعر الحزين..
سألقي رأسي المتعب في الصدر الذي ضم جميع المتعبين..
وسنبكي ..
وسنحكي.
كل ما ذقناه من عشر سنين..

المرحوم غازي القصيبي ..

دخلت سديم بخطوات سريعة للمجلس عند الجد مساعد وايرم ويديها ماسكة يد يوسف الكبيرة وتسحبه معها..كانت العصبية واضحة على وجهها ودموعها بعيونها..
سديم بقهر\جالسين تفطرون ومو عارفين وش صاير بالمسكين..
ايرم قربت منها\سديم وش فيك..؟؟يوسف متى جيت هنا؟
مسوي لك شي ضايقك؟؟
الجد مساعد\يوسف يبه من جابك هنا؟؟
يوسف\فهد..
الجد مساعد\سديم يابنتي وش فيك معصبة؟؟وش مسوي لك يوسف..لا تواخذينه مايقصد شر..
ايرم بمحبة\سديم ترى يوسف مايفهم ليش تضاربينه..هو طيب ولا بيئذيك..
سديم بعبرة\ليش انتوا مو مهتمين فيه؟؟ليش مخلين الشغالة تضربه بنت الكلب..؟
ايرم\اي شغالة ومن تضرب.؟
سديم تبكي\كانت تضرب يوسف..بالعصا يا ايرم تضربه..وهو يتحمل ضربها وجالس بالارض..
الجد مساعد بجزع\ابو صالح..تضرب ولدي..يوسف ينضرب..؟
سديم\ايه ينضرب وانت مو داري عنه..ليش ما تنتبه عليه..
ترى طفل هذا ولو كبير ويخوف بس طفل..حرام عليك انت ابوه..
ايرم بصدمة\اي شغالة بتقدر تضرب يوسف او تتجرأ تضربه.؟
سديم بقهر\الشغالة الي بتلقينها مضروبة بالعصا ومنتف شعرها.. ضربتها ولعنت شكلها تحسب انها بتضرب زوجي واخليها الا تخسي..
الجد بفرحة\صحت يمينك كفو والله انك كفو..

التفتت سديم على يوسف ودموعها على خدودها..الاطفال ماينضربون مايحزنون..شكله مرعب وكبير وضخم ولا باي قاموس ممكن يتسمى شخص بهذا الشكل والحجم بمسمى طفل..ولكن يوسف فعلاً طفل صغير وضعيف..
عقله وتفكيره وتصرفاته..لو يفهم كرهها له وخوفها منه كان بينتقم من تصرفاتها العنيفة معه.. بس هو يرجع يبتسم لها ويقرب منها..

ايرم\سديم قلبي مافيه الا سونا وريتا معنا هنا..وهم من سنين طويلة موجودين من قبل لا يمرض يوسف..ولا وحدة منهم عنيفة او تجرات مرة وضربته..
سديم بقهر\تبيني اروح اسحبها من شعرها واجيبها لك الحيوانة الي ضربته.؟
الجد مساعد بعصبية\ايرم جيبي الشغالة الي ضربته والله ان ارسلها خروج نهائي..
سديم بقهر\خيــر لا يكون تبي تسفرها مكافئة لانها ضربت يوسف.. مافيه كلموا هذا الشرطي الي شفته عندكم مرة مدري وش اسمه طويل ويضحك على الناس الي يمشون..كلموه يجي ياخذها السجن..
ايرم بضحكة\تقصدين سعود..؟
سديم\ما اعرف اسمه جاء هنا اول ليلة نمنا بالمزرعة وهو لابس بدلة شرطي يمكن سارقها ماوجهه وجه رجل امن..

جلس الجد مساعد وهو يضحك من هالبنت الي ماتخاف ابدا.. تضرب يوسف ورعد وتسيل الدم ولا يهتز فيها شعره..
والحين تشكك في سعود وانه سارق بدلته ولا هو ضابط..
ياليت يوسف بعقله ياسديم..كان بيستاهلك على قوتك وعقلك..يوسف قوي وقاسي..وماكانت بتتحمله وبتكسر راسه الا وحدة مثلك..واثقة وقوية وجميلة..حتى الكبر والتفاخر الي فيه لو شفتيه وش بتسوين فيه..
ضحكت ايرم لضحكة جدها السعيدة من زمان ماشافته يضحك بهالشكل الجميل..شكرت سديم العصبية المتهورة على ضحكة جدها..

الجد مساعد\سديم يابوك ترى سعود مقدم بالشرطة..
سديم بدون اهتمام\مقدم ولا ممثل مالي شغل..كلموه يجي يسجن الشغالة..
ايرم\والله الشغالات يحبون يوسف ولا مرة تهاوشوا معه..
سديم بغضب\خيــر يحبونه..ليش مازوجتيه منهم طيب.؟؟ ولا وضعك وضع ولدنا الف بنت تتمناه..بس النصيب..
ايرم بورطة\لا والله ماقصدي يمه منك وش فيك معصبة..؟
سديم\روحي اطردي الشغالة تخيلي تضربه مرة ثانية.؟؟
ايرم تناظر يوسف\يوسف من الشغالة الي ضربتك.؟
يوسف\ريتا..
ايرم بشهقة\مستحيل..
سديم تاخذ جوال ايرم\انقلعي عني مستحيل..اكذب عيوني واصدق نظرتك الثاقبة بالشغالات..باتصل على الشرطة..
الجد مساعد بضحكة\والله ان تصبرين..وان طلعت ضاربته بنطردها من عندنا ولا يهمك..
سديم\تراه ولدك وانا وهو نقولك ضربته..بكرة تقتله بالساطور..طفل مايقدر يدافع عن نفسه..
ايرم\هذا يعرف يدافع عن نفسه شفتي كيف ضرب رعد؟
سديم\اي والله اذكر كيف حتى طلعه من الغرفة..طيب ليش مادافع عن نفسه من الشغالة..؟
ايرم\انا الحين باطلع تاخرت ولما ارجع نشوف مشكلة الشغالة..

خرجت ايرم من المجلس وركضت سديم وراها..
سديم\هيه ايرم وين بتروحين.؟
ايرم\باروح العيادة..
سديم بفرح\الله عيادة تجميل.؟
ايرم\عيادة الاسنان..انا طبيبة اسنان..
سديم\اما عاد انتي طبيبة..؟
ايرم بضحكة\ليش مو مالية عينك.؟
سديم\ماشاء الله عليك..اممم باقولك هذيك الي تضاربت انا معها هنا بنت خالتك ابي اكلمها..
ايرم بحيرة\وش تبين فيها..؟
سديم بكذب\هذاك اليوم هي ماغلطت علي..وانا غلطت وتضاربت معها..حابة اكلمها واعتذر منها بليز ايرم..
ايرم تبتسم\ابشر لما ارجع اخليك تكلمينها..كنت باجيب لك جوال بس رعد منعني..

سديم لما انذكر اسم رعد تغيرت نظراتها لايرم..
اختفت ابتسامتها وتجمدت ملامحها..والتفتت تبتعد عن المكان الي واقفة فيه ايرم..تمنت ايررم تقدر تتكلم معها اكثر وتقول لها انها بتقنع رعد يترك سديم براحتها..بس هي متاخرة عن دوامها والمزرعة بعيدة عن موقع المستشفى ولا فيه وقت تراضي سديم..

بالنسبة لسديم جلست على الدرجات الخارجية للمدخل الرئيسي للبيت ..هي ارتاحت نفسيا لما جات المزرعة وابتعدت عن رعد..الطاقة السلبية الي تسيطر عليها بوجوده ما تقدر تتحكم فيها..غصب عنها تتحول لوحش..لآلة قتل يمكن ..وكل تفكيرها توجعه بالكلام او بالافعال..
هذا كله ناتج عن صدمتها فيه بالماضي..هي حبته من حب حنين.. كان حنون معها يدللها يرسم معها خطط عشان تتركه بحاله مع حنين وتلهي امها عذوب..
وهي كانت تساعده بسعادة كبيرة..وهو يكافئها بالهدايا بالوعود..
وعود خانها هو..

تتذكر بيوم لما رجعت من المدرسة مع السائق الخاص بامها عذوب..كان توه واصل ونازل من سيارته وبيده اكياس الهدايا لحنين..مثل لما يزورهم بكل مرة يغطي حنين باهتمامه وهداياه..
هو ما انتبه عليها وهي تقترب منه نزلت شنطتها ورى سيارته
وقربت منه بهدؤ وبحركة سريعة خطفت الاكياس الي بيده اليسار وراحت تركض بعيد عنه بسرعة كبيرة..
وهو بقى بمكانه مصدوم من الشيء الصغير الي خطف هداياه وركض لبعيد..ولما قرر يدور عن هالسراق الصغير مالقاه باي مكان..
تتذكر كيف كان معصب ومتضايق لما دخلت المجلس عند حنين وامها عذوب وهو زعلان ليش مامعه هدية لحنين..
امها عذوب بس شافتها دخلت اعتذرت منهم وراحت تجهز الغداء لضيفهم..
سديم بمرح\يالله تحيي زوج اختي..
رعد بابتسامة\الله يحييك ويبقيك..كيفك؟
سديم بخبث\تمام..بس انت وش فيك شفتك تراكض بالشارع..
رعد\متى شفتيني.؟
سديم تجلس جنب حنين وتصير بين رعد وحنين.. وتلم يدينها حوالين حنين وتبوسها قدام رعد..وخرجت من جيب عبايتها الصغيرة علبة مخملية..وقدمتها لحنين..
سديم\هذي هدية مني ياقلبي..يا اجمل عروس انتي..
حنين بابتسامة\قلبي انتي تسلمين حبييتها..احبك..
شاف رعد الفرحة بعيون حنين لما فتحت العلبة المخملية وكان بداخلها عقد ماسي بشكل فراشتين..وهذي هي الهدية الي هو اشتراها لحنين وانسرقت منه..
رعد بصدمة\والله قلت القزم الي خطف الاكياس شكله مو غريب..
سديم بضحكة\اي قزم.؟
رعد بعجل\قومي حسابك بعدين..ابعدي عن مكاني..
سديم\لا والله ما ابعد..انت لا تقرب من اختي مابقى على زواجكم شي وتاخذها مني ..
رعد وقف وجلس بالجهة الثانية لحنين وقربها منه غصب عن سديم..ومسك يدها وباسها..وباسها على خدها..
سديم بحرج\هيه انت والله اعلم امي وخر عنها اشوف..
رعد\وعــد يا سديم اعطيك اي شي تبينه بس فكيني منك..
سديم\كم مرة قلت لك باسوق سيارتك ولا تخليني..
رعد\جاتك السيارة بالي فيها بس اطلعي قبل تجي امك..جنرال مراقبتها مو صاحية كتمت نفسي والله..
سديم\رعد اوعدني ماتروحون وتخلوني..تاخذني معكم لما تروحون..
رعد بحنية\وعـــد..وابوك انا قلت له باخذك معنا..
سديم\وامي عذوب بناخذها معنا..؟
رعد بجزع\لا والله ماخذيناها..لا بتخليني اتهنى بزوجتي ولا اقرب منها..بتنام بالنص بينا..

استمر حوارهم ومناوشتهم وحنين بينهم .. ذايبة بحب الهزيم الي رفض نهائيا يقطع زياراته عنهم ليوم الزواج الي مابقى عليه الا اسبوع..رعد لا زال يمطرها بهداياه وحبه..
بمشاعره الي حولتها لمهووسة برعد بحبه بحنيته الطاغية..
حتى مكالماته لها صارت شيء اساسي ماتعيش يوم بدونه..
احيانا تتمنى لو هي تتصل عليه قبل يتصل عليها لو هي تبادر باي خطوة ولكن خجلها يمنعها..
محبته لسديم تسعد قلبها ولما سمعته يوعد سديم ياخذها معهم تطمنت..هي تحب امها عذوب وبتتحمل لو تبتعد عنها مع رعد..ولكن بتظل خايفة على سديم وتبيها معها..
قدر رعد خوفها على اختها واسعدها بتصرفه..
لما ارسل لها اليوم انه بيجي يشوفها وبياخذها معه بمشوار هي وسديم..كانت محتارة كيف تقابله..
اول مرة يجيها وسديم غير موجودة..كانت ترسل سديم لامها عذوب تعلمها عن زيارات رعد قبل يجي..
بس اليوم هي قالت لامها عذوب وهي خجلانة..ولاحظت ان امها عذوب مو حابة زياراته الكثيرة عليهم..
عذوب\حنين امي انتي..مابقى على زواجك الا اسبوع وكم يوم..علميه ان هذي اخر زيارة بينكم ليوم الزواج..
حنين\يمه مابيرضى..
عذوب\ان مارضى علمته شغله..المهم انتي قولي له وخلي الباقي علي ان رجع..

تضايقت لانها يمكن ماتشوفه بعد اليوم وقررت تكون جميلة وتتجرأ شوي بلبسها وشكلها عشان يشتاق لها..
كانت هذي مشاعرها وهذي افكارها..

مالي أحدق في المرآة أسالــها..
بأي ثوب من الأثواب ألقـــاه ..

لبست فستان فيروزي لنص الساق هو اشتراه لها..بعد ماقال لها انه قاس خصرها بذراعه..مكياج خفيف نهاري..
تركت شعرها الكثيف الطويل على ظهرها..
لبست اسوارة ( معدي ) الي كانت هدية منه..بخت من عطوراته..
كلها كانت مكسية بهدايا رعد حبيبها..

ناظرت مرايتها باعجاب بشكلها وبثقة يهزها الكثير من الخجل العذري..وبتردد خافت من الفستان..من رايه..من نظرة عذوب..

ماذا اقول له لو جاء يسألني..
إن كنت أكرهه أو كنت أهواه..
ماذا أقول إن راحت اصابعه
تلملم الليل عن شعري وترعاه..
وكيف اسمح ان يدنو بمقعده
وأن تنام على خصري ذراعاه..؟

دخلت المجلس بخجل وخطواتها مترددة..امها عذوب الي مابينت رايها عن لبس حنين وماحبت تضايقها ابتسمت لها..وقالت روحي لزوجك وانا باخلص كم شغلة واجيكم..وحتى سديم ماكانت موجودة يعني بتكون لحالها معه..
ماكانت حابة تدخل لحالها فيها رهبة منه من التواجد لوحدها معه..
هي خطوة وحدة بس دخلتها وبعدها وقفت بمكانها..
خانتها قوتها خانتها جرئتها الخجولة..وكانت بتتراجع بالخطوات وتنسحب..ولكن رعد اللي كان ضايق من السراق القزم الي اختفى قبل ياخذ هدايا حنين منه..
رفع راسه وانسحر بالملاك الجميل الواقفة بخوف عند الباب وكانها تنتظر حركة صغيرة منه لحتى تهرب..
تبي تعذبه بجمالها الطاغي ونعومتها.. شعرها الغجري الموعوده اصابعه تغوص فيه وبجماله..
والي افقده نبضه من نبضاته محاولتها اسعاده لما لبست من هداياه ..
وقف بهدؤ وقرب منها بخطوات متمهلة..وصل لها مد ذراعه وحاوط كتوفها الصغيرة وضمها له..
تحرك لداخل المجلس وهي تلقائيا تحركت معه..
وقفها ورفع راسها له اصابعه تتعبث بخصلات شعرها.. وتستجيب له خصلاتها الحبيبة على يمين او شمال تستجيب..نزل عيونه الهايمة لوجهها الجميل الجذاب..
عيونها..العيون بحواجبها الكثيفة عشـــق كبير..
خشمها..شفايفها..خدودها الرفيعة نحرها المغري..
كل شي فيها حكاية..نزل راسه لها ولصق جبينه بجبينها..
عيونهم تحكي مشااعرهم..عيونها هي تعترف بحبها وعشقها له..
وعيونه تحكي استسلامه الكامل لها..
حركت راسها تقطع تواصل عيونهم لما فشلت في حرب العيون..
ونزلته على صدره تخفي معالمها عنه..
حست بيدينه تترك شعرها وتلتف حوالين خصرها..ضمها له بقوة وحست بقبلته على جبينها وبعدها على خصلات شعرها..

بوقتها الأميرة المسحورة بهزيم ماحست بالحرب الداخلية لرعد حرب النفس للنفس..اتخاذ قرارات جديدة غير القديمة الي كانت اساس محاصرته لها..اساس خطبته وتملكه عليها.. حسم امره لما ادرك انه انتهى فيها وبحدودها وقرر يسيطر على هذي الاميرة الجميلة ويعيد حساباته بعيد عنها..
مايبي يخسر المشاعر الجميلة الي تتملكه لها..بحضورها او بغيابه عنها..بمكالماته لها وشعوره بحبها له..
رعد يهمس لها\تحبيــني مثل ما أحبــك.؟
ماجاوبته وهو ماكان ينتظر اجابتها..حب يوصل لها كلمته بطريقته.. يبي الثقة الي حاوطته منها تبقى موجودة بينهم..
هو ما اعتاد يغير طريقه..ولا يغير قراراته مهما تاثرت بعوامل جانبية..بس عشــقه الغريب لها مايعتبره عوامل جانبيه يعتبره أجمل قدر صادفه برحلة استعادة شي مسلوب منه..

&&&&&&&&&&&&&&&&&&&&&&&&

شهقت حنين بوجع من قرصة سديم لذراعها العارية..وناظرتها بصدمة من تصرفها..ولاحظت الدموع بعيونها..
حنين بحب\ليــه الدمووع ياقلبي..سديم.؟
سديم بزعل\ماسمعتيه وش يقول..؟
حنين ابتعدت عن ذراع رعد ولصقت بسديم..وبعدها التفتت لجهة رعد ورفعت حاجبها الايسر..
حنين\ليه مزعل حبيبتي..؟وش قلت لها.؟
رعد مُعجب بالحاجب المرفوع\يشهد الله اني حبيت..

انحرجت حنين من رده عليها ونزلت راسها بابتسامة ذوبت قلب رعد..الي تجاهل وجود سديم وسحب حنين له وحضنها وباسها بخدها..
سديم بقهر\اننننننن ومسوية بتفزعين لي وانتي من جنبها..وانت هين واله ان اعلم امي عذوب وش تسوي معها..
رعد\ذليتينا انتي والجنرال حقكم..باصبر اسبوع وبعدها افتك من منتكم علي..
سديم\هين وانا ما ابطلع معكم بعد الغداء..وشف كيف بتطلع معكم امي عذوب..
رعد يضحك\والله ان تطلعين وانتي مبسوطة بعد..كم سديم عندي..؟وتراني اخوك لا تنسين.
سديم بتكبر\انت الي احمد ربك اني صرت اخت لك ولاخوانك..ولا انتوا ماتستاهلوني..
رعد\الحين وش دخل اخواني..؟
سديم بكذب\مدري امك وخالاتك الي قالوه اسالهم..
رعد يضحك\ياكــذبك..
سديم\هم احسن منك..مايهدون حنين بس..حتى انا يهدوني ويقولون رضى حنين من رضاي عليك..
رعد\اما عاد!!..ليش مطنقرة علينا.؟؟
سديم\اسال نفسك وش مسوي..
رعد يناظر حنين بحيرة يبي يفهم زعل سديم..فرفعت حنين يدها واشرت على اسوارتها الي اهداها اياها وفيها مجسم صغير لحصان..
رعد بورطة\ شكلك عرفتي عن معدي.؟
سديم بزعل\ايه عرفت عنه..وش كان بينقص منك لو اهديتني حتى انا مهر مثلها.؟
رعد\لما نزوجك باخلي زوجك يهديك الي تبين..
سديم بغرور\شكــرا مو بحاجتكم أبوي وعدني يجيب لي واحد..عساني من ظله ماخلا..
رعد\ايــه مايقصر حبيب بناته..
سديم\رعــد إنت ليش تكره ابوي.؟
السؤال كان مفاجىء لرعد ولحنين الي انصدمت من كلام سديم..
هو كان حريص جدا مايبين كرهه لابوهم او عدم تقبله له..
كيف هذي الصغيرة كشفته وواجهته بهذي الصراحة..
رعد ببرود\ومن قال اكره ابوكم ..؟
سديم\انت ماتكلمت معه لما كان هنا معك هذاك اليوم..وانت كنت معصب منه وتهاوشتوا..
حنين بخوف\رعد انت متهاوش مع ابوي.؟
رعد بحيلة\كان مقرر يأجل الزواج سنة وزيادة وعشان كذا زعلت منه وتناقشنا ياسديم ماتهاوشنا..وهذا زواجنا بعد اسبوع وبارزف معه وقدامكم بعد..

أبتســم لهم بعد ماكذب كذبته..
كانت كذبــة..
بس سديم وحنيــن صدقوها..من حب رعد صدقوها من حنيته صدقوها..أبوهم عشقهم الاول وحبيبهم..
ورعد ثاني رجل يتواجد بحياتهم وتعلقهم فيه وحدة منهم بعشق الانثى..والثانية بحب الاخ وزوج الاخت ..
ماكان لهم افكار ثانية..عالمهم الجميل مابيوم استقبل احقاد خفية او حروب غادرة ..

&&&&&&&&&&&&&&&&&&&&&

ابتسمت قصايد بانتصار بعد ما أكد لها احد عمال مزرعتها بسرقتهم للحصان معدي مثل كل مرة قدروا يسرقونه فيها..
فتحت الصورة الي ارسلها لها وشافت حصانها بغرفته الي تليق فيه..كحصان قصايد..
ماكنت شاكة ابدا باستطاعت عمالها يسرقونه او انهم ممكن يفشلون بمهمتهم..هم دائما يجيبونه لها..بس هالمرة كانت متخوفة لان الجد مساعد كان بالمزرعة.. بس مشت عليهم وقدروا ياخذونه..
لانه رعد الى الان مايعتقد اني اقدر اسلبه اكثر من ولده..
عقــاب..
طفــلي ولد قلبــي..قلبي الي مات بسبايب ابوه رعد.. ماظنيت بيوم اقدر اتقبل شي ينتمي لرعد ..بس عقاب كان نصف العاصفة الي مريت فيها بعد رعد.. لو ماكان ابوه جثة بالسرير لسبع سنين كان بيرجع له ولده..
وامــه نورة..السطحية عديمة المسئولية..بيدي اخذت ولدها لها ظنيتها ام مسكينة ظالمها رعد الحقير وماخذ ولدها بالقهر والغصيبة..بس كانت عار على الامومة...
( هله اولى فيه .. أنا بديت حياة جديدة ومابي يكون فيها بقايا الحياه القديمة..)
اي أم بتعتبر ولدها بقايا حياه .؟؟!
اي ام بترفض تشوف ولدها وتطمن عليه كل هالسنين..؟
لو بس سالت كانت بتعرف ان ولدها مو مع ابوه..
ولا مع هله..كانت بتعرف انه اصلا مو موجود بالنسبة لهم..
من المستحيل كنت بالتجي لاهل رعد وانا الي قاتلة ولدهم وهو الي قاتلني..
حضنت عقاب لروحي ولقلبي..ومالي نية اتنازل عنه..مالي حق فيه بالدم..بس لي حق فيه بالروح بالمحبة..رعــد مو كفو يكون اب..

توجهت لغرفة عيالها وهي مبسوطة وناوية تقول لهم عن المفاجئة ان معدي صار لهم رسميا..وبتاخذهم المزرعة يشوفونه..
ويمكن تسمح لهم يركبون على حصانها بشرط تكون معهم..
وهي تعرف كبريائهم المتعجرف مايقبلون احد يعاملهم كاطفال حتى لو كانت هي..
فتحت الباب بهدؤ ودخلت بخطوات هادية..
استغربت جلوسهم ورى احد المكتبين المدرسية الي موفرتها لهم ولدراستهم..ارهفت سمعها تبي تعرف بايش يتكلمون بس صوتهم ماكان واضح لها..هزت راسها بابتسامة وفكرت وش يخططون الحين..
قصايد\السلام عليكم..وين عيالي .؟
شافتهم كيف فجأة خبوا الي كان بيدهم والتفتوا عليها وهم جالسين..
وبانت على وجيهم الصغيرة اثار الذنب..وعرفت انهم مسوين شي غلط..هي بتحقق معهم ولكن بدون مايعرفون..م اذكياء واذا ما كانت منتبهة بيغلبونها ولا بتعرف وش يخبون..
توجهت للكنبة وجلست عليها باناقة ولمت شعرها الطويل على كتفها الايسر..وفتحت جوالها وتعبثت فيه وهي تقول لهم بدون اهتمام..
قصايد\خلصوا اسراركم مع بعض..وانا خلوني غريبة..
هيثم\انتي امنا مو غريبة..
قرناس\ليه زعلانة منا.؟
قصايد\انتوا مسوين شيء يزعلني منكم..؟

سكتوا لوقت وهم يفكرون ويناظرون بعض بايش يردون..وهذا اكد لها انهم مخبين شيء..هي ماتتوقع منهم شيء سي ممكن يسوونه..بس بنفس الوقت تخاف عليهم من كل شيء ولا تبي يصير شي ماتعرفه..

وقفت\براحتكم..انا باروح انام تصبحون على خير..
مشت كم خطوة ناوية تخرج من الغرفة..وسمعت حركتهم السريعة وهم يوقفون ويركضون لجهتها ويقطعون عليها الوصول للباب..
قرناس\والله ماتنامين زعلانة..
هيثم\مانبيك تزعلين بس كنا بنتاكد..
قرناس\انتي قلتي لا نفتش اغراضك..بس هو يشبه ابونا كثير..وقلت لهيثم نشوف صورة ابونا مرة ثانية ونتاكد..ويشبهه مرة يمه..
هيثم بحماس\يششبهه صح بس مو ابونا لان وجه القناص مقطوع..وابونا وجهه مو مقطوع..
قصايد باختناق\ميـن القناص.؟!
قرناس بعدم اهتمام\ولد جد مساعد صديق جدي راشد..كان معنا بالسيارة هذاك اليوم..
هيثم بمقاطعة لقرناس\مو ولد جد مساعد .. جد مساعد يصير جد القناص..
قرناس بعناد\لا هو ولد جد مساعد..صار قناص لان الغزالة قطعت وجهه وهربت منه..
هيثم\انت قلت ماهو قناص لانه ماقدر يصيد الغزالة..يعني هو خرطي..
قرناس يضحك بخبث\شفت وجهه لما قلت له كيف تهزمه غزاله..

قصايد تستمع لمناوشتهم وحست برجفة بعظامها.. بانهيار لكيانها كله..وكأن الارض تزلزلت تحتها..مدت يدينها وارتكزت على كتوف عيالها ونزلت جالسة على ركبتينها..عيونها زايغة بالفراغ.. ماعادت تسمع اصواتهم ولا تفهم كلامهم..ما استوعبت جلوسهم على ركبهم بنفس جلستها..واحتضانهم ليدينها..
ماتسمع الا طنيــن مزعج باذنها..عيالها يتكلمون عنه..عن الخبيـث رعـد ومسمينه القناص..هي تعرف من الجد مساعد صديق خالها راشد..وتعرف انها كانت قريبة من رعد بالموقع ولكن بعيدة بالتوقع..مستحيل يتوقعها عند راشد ابو قاتل ابوه..
تعرف انه بيتاخر لحتى يلقاها..لانه مابيدور قريب..بيدور بعيد وبعيد..
بس انكســرت كل توقعاتها على ارض عيالها الحين..وهم يقولون كانوا معه يتكلمون ويستفسرون..عياله مسمينه القناص وهي الغزالة..
متــى غفيت انا عنهم لحتى يلقاهم هو..
كيف اهملتهم واستغل هو الفرصة..؟!
وين التقى فيهم وكل الطرق بين عائلته وعائلة خالي راشد مقطوعة..

خالي راشد كيف سمح لهالشيء يصير.؟كيف سمح لمساعد يقرب منه هو ورعد بعد عقدين من الزمن..
هذا الي ماحسبت حسابه..ماحسبت حساب الصلح بينهم..
كنت واثقة بعداوتهم وبتجنبهم لبعض..والحين وش الحل اذا رجع راشد ومساعد لصحبتهم الي ياما حكى لي ابوي عنها..
وكم سمعت خالي راشد يتكلم عن صاحبه مساعد..ويوصفه لعيالي يوصف قوته وصلابته..يوصف قسوته وعياله واحفاده..
كل شي لازم يتغير الان..كــل شي..

مابيعرفكم رعد قبل ما أنا اقرر هالشيء..مابيلقاكم لحتى يدفع حساب كل خطاياه بحقي وحقكم..

أخذت الصورة من يد قرناس ووقفت بانتفاضة..
خرجت بدون ماترد على ندائاتهم لها..تحس بجمرة تحرق يدها..
دخلت جناحها وتوجهت لغرفتها وقفلت الباب تمنع عيالها يدخلون ..
فتحت احد الادراج المنسية بالنسبة لها..
وانتبهت لحوسة الصناديق الي مسويها قرناس وهيثم عشان بلقون هذي الصورة..
هي مو مثــالية لحتى تدخل رعد بحياتهم..بصورة..
ابوهم بالنسبة لهم مغترب مسافر بعيـد..
ويمكن يرجع ويمكن مايرجع..
ماخلتهم يتعلقون فيه..ماخلتهم يحتاجونه..
هي حتى بمدارسهم متواجدة..
هي ام ولا احد يقدر يقول لها هذي مدرسة اولاد ماتستقبل امهات..

فتحت بوكس ورمت الصورة فيه..كانت بتقفله بس كتحدي لنفسها سحبت الصورة وناظرتها ..
هذا انــت..
سبحان الي غير نظرتي لك..
من ولــــه إلى حقد وكره..
تستاهل الي بوجهك يارعد..
تستـــــاهلها..

وقفت قدام مرايتها والصورة بيدها..
تناظر نفسها وتناظر الصورة..
كنــت استحق منك الغدر يا رعــــد ..؟؟
أحرقت صورته بدون اهتمام..

أنا التي سكنت في الحب لوعتها..
لكنــها حُرمت من يقظة الفجــر..
أنا التي اسرت في عشق سيدها..
ولكنها عُتقت من ذالك الأسر..
أنا التي ولدت في الحب طاهرةً
لكنها قُتلت من دون أن تدري..

&&&&&&&&&&&&&&&&&&&&&

بكبرياء يشابه لكبرياء قصايد تعمدت سراب تتقمص شي من شخصيتها الغير مبالية والواثقة..دخلت بخطواتها الواثقة ووراها كانوا ثنتين ورجلين من فريقها وهم من أكثر الاشخاص الي تثق فيهم في فريق النصب تبعها..وتعرف انهم الافضل في شغلهم..
قالت السلام بنبرة جامدة وباسلوب عملي بحت..
رحب فيها فهد وفريقه المنتظرينهم للاجتماع..
وبدأ الاجتماع فهد الي كان سعيد بانه اقنع مجموعة الرواد على التعاقد مع مؤسستهم الي بتكون في غضون كم شهر شركة..
مجموعة الرواد كان اسم مجموعة سراب الوهمية..والي بمكرها هي وفريقها قدرت تسوق لمجموعتها بشكل كبير اعلاميا خلال الفترة الماضية..
وأوهمت فهد ومجموعته ان اختيار مجموعتها بيكون على مؤسستهم .. ولا اخفت عنهم وجود منافسين معروفين بوسط الانشاءات ممكن يثيرون اهتمامها وتتفق معهم..
هنا كان فهد مصمم وبقوة يحصل على الشراكة معهم ويوقع معهم باقرب وقت..
سراب\ما نخفيك استاذ فهد انا باطلع على عرض الشركة الثانية..
انا في سباق كبير مع الوقت والمشروع السكني الي انا ناوية عليه كبير ولازم اسلمه في الوقت المحدد..
فهد\مؤسستنا لها سمعة ومعروفة باتمام شغلها وتسليم المشاريع بالوقت المحدد..
سراب بمماطلة\شغلكم انا اعرفه ومريت اكثر من مشروع من تصميمكم وشغلكم..لاني ما اثق فقط بالاوراق..ولكني بحاجة ضمانة منكم بتسليم المشروع بالوقت المحدد..
فهد بضيق\هذا حق لكم..ومتوقع هالشرط..
سراب\اعتذر على السؤال..ولكن من حقي اعرف..هل فيه مشروع ثاني بتتكفل فيه مؤسستكم غير مشروعي اذا تم بينا الاتفاق.؟
فهد\ما اعتقد هذا شي يحق لك تعرفينه..
سراب بعناد\بالعكس يحق لي..ابي اتاكد من امكانياتكم سيد فهد..

فهد ورجع يعد بخاطره مثل ما حذره مساعد..عشان يتحكم باعصابه الي تتوسل له يقوم ويضرب الجهاز اللوحي على راس الانسانة المستفزة الي لها اكثر من ساعة وهي تماطل في الكلام.. لا هي الي قررت تعطيهم المشروع ولا هي الي ريحته من كثر الكلام .. وهو مجبور يقدم لها الضمانات الي تحتاجها عشان يحصل على مشروعها..
هو درس اعلاناتهم وشاف لهم عدة مشاريع ناجحة بعدة مدن مايعرف ان الاعلانات ماكانت تظهر قدامه بكل مكان الا بدراسة مسبقة من سراب وفريقها..الي تعمدت تحط اعلانها واسم مشروعها بطريق فهد دائما..
فهد بجمود\سيدة ذكرى انا قدمت لك اسماء الشركات والمشاريع الي قدمناها بالوقت المحدد لها..تقدرين تدرسينها وتستفسرين من الشركات عن شغلنا..واتمنى بالاجتماع القادم نوقع العقود ونبدأ الشغل..

سراب الي ما اعجبتها طريقة كلامه معها..لا ياشيخ قوم طقني بعد يقال ضيعت وقتك يعني..قررت يكون لها هي القرار الاخير والكلمة الاخيرة..وقفت ووقفوا معها فريقها وبنفس الوقت فهد وفريقه..
سراب بعدم اهتمام\مايهمني راي الشركات ولا شهادتهم لكم..ابي ضمانات حقيقية..قدم لي ضمان يا استاذ فهد خلال اسبوع او قدم لي شرط جزائي اذا ماتم تسليم المشروع بوقته المحدد..
وان قبلت شرطــي بتقديم الشرط الجزائي بيكون الاجتماع بمكتبي.. عن اذنكم وفرصة سعيدة..

]

اقتباس
  {[ اللهم لكـ الحمد والشكر كما ينبغي لجلال وجهكـ وعظيم سلطانكـ ]} 186 
قديم(ـة) 20-06-2020, 02:49 AM
صورة صدووودَ الرمزية
صدووودَ
الافتراضي رد: صدوا وأنا من عزة النفس صديت

أنسحبت من المكتب بدون ما تنتظر رد فهد عليها ..
فهد الي عصبيته وصلت لاقصاها كان بيطلع وراها ويرجعها المكتب غصب عنها هي وفريقها الغبي الي ماكان لهم رد او نقاش وطول الوقت مخلين هذي المتذاكية تقود الاجتماع..
قفل احد مساعدينه الباب واشر بيدينه لفهد..
ماجد\هدؤؤؤؤ ريلاكس شهيق زفير..راح المشروع صار لشركة ثانية.. انا وانت في السجن محكوم علينا مؤبد..هلنا طردونا من البيوت ومن القبيلة ..والقضية ضربنا حرمة قدمت مشروع لنا..
فهد\ابو وجهك..الحين انت تهديني ولا تحكي قصة؟
ماجد\انا ادري عنك تحسب اني ما اعرفك كنت بتخرج وراهم وتتضارب بالشارع الا يوقعون معنا ويعطونا المشروع..
فهد\لا كنت بارجعهم هنا ثم اقطع العقال عليه الا يوقعون..شفت كيف مصدقة نفسها هالذكرى البلا من النظارة اكبر من وجها ولابستها تحت النقاب..
ماجد\وش بتسوي الحين بتقدم لهم شرط جزائي ؟
فهد\تبي مساعد يقص رقبتي..

دخل مساعد وهو يكلم بجواله ومعصب..قفل الباب بقوة خلص اتصاله ورمى الجوال على الطاولة..
مساعد بعصبية\ايوه سيد فهد..غرد وش سويت باجتماعك؟
فهد ببرود\ابد سيد مساعد لازلنا في مفاوضات..
مساعد\ادرس المشروع اكثر..
فهد\انا درسته وماباقي وقت نبي ناخذ المشروع لا ياخذه غيرنا..
مساعد\ما بنقبل بمشروع بتسرع..طحنا بهالشي زمان وكنا بنموت على مانخلصه بوقته ونسلمه..
فهد بضيق\ياخي خلاص هذيك راحت ..
مساعد\وش الي راحت فهد حن كنا بننسجن وننتهي بسبب الشرط الجزائي الي تحملناه..هذا غير الافلاس الي كنا بنروح فيه..
لو مارجع جدي مساعد وساعدنا كنا انتهينا..

قدر فهد عصبية مساعد وخوفه من اعادة نفس المشكلة الي تعرضوا لها قبل كم سنة..لما قبلوا بمشروع لاحد الشركات وكان كبير جدا على مقدرتهم بس الاثنين تحدوا الوقت والزمن وكان تسليم المشروع بمدة ثلاث سنوات وقبل انتهاء المدة المحددة بسبعة اشهر نفذت عندهم المواد والعمال قرروا يسوون اضراب لتاخر دفع المستحقات وانهار كل شيء حوالينهم وتوقف الشغل..
وكان السجن هو المصير الاكيد لمساعد وفهد..ولما سمع الجد مساعد بمقدار المصيبة باع كل مايملكه من الحلال من الابل ومن بعض الاصول الي كانت مملوكة له وحتى نصيب ايرم من ابوها دفعه جدها بكل تهور بمحاولة انه ينقذ فهد ومساعد ومشروعهم..
وهو بنفسه كان يروح لمكان المشروع ويوقف على راس العمال ومايرد لا على مساعد ولا فهد ولا حتى باقي عياله الي كانوا يترجونه مايزور اماكن البناء من الخوف عليه..
وقدر يستميل العمال الي كانوا مضربين واقنعهم يكملون شغلهم..
وطلب تمديد لمهلة التسليم ثلاث شهور وبواسطاته قدر يمدد المهلة.. وبمشيئة الله تم تسليم المشروع على وقته الجديد..
ومن يد الجد مساعد بنفسه..
وبعد ما انتهى تسليم المشروع التجاري للشركة..قرر الجد مساعد يعاقب فهد ومساعد..وشالهم عن اتخاذ القرارات لتسرعهم واندفاعهم..ومن هذا الدرس قرر مساعد ما يندفع لاي مشروع بدون ما يحسب الخسارة فيه قبل الربح..وهو يشكر جده مساعد دائما الي علمه دروس ماتعلمها باحسن الجامعات..وكم تمنى بهذاك الوقت لو ينظر له جده مساعد او يتكلم معه ولو عن طريق الخطاء.. لو يهاوشه ويقول مانتوا كفو شغل..لو يسبه عادي..كان يتمنى كلمة بس من جده ولا لقاها..

فهد\يعني نبقى واقفين بمكانا اما ناخذ مشاريع صغيرة او ماناخذ شي.؟لا تنسى ان حن عوضنا على جدي وعلى انفسنا..ونجحنا
مساعد بصراحة\اسمح لي حن فشلنا واستسلمنا..ولو ماتدخل جدي مساعد وفزع لنا بفلوسه وفلوس ايرم وبتواجده باماكن البناء وبحب خشوم لحتى يتاخر موعد التسليم كان انا واياك بالسجن الى الحين..
فهد بعصبية\طيب والحين نرفض المشروع ونشوفه يروح لغيرنا..
مساعد\لا مانرفض الا اذا كان مايناسبنا..وبعد ماندرسه ونتاكد من قدرتنا عليه..ولا تنسى حن على وشك ننتقل لمبنى جديد ونتحول من مؤسسة لشركة..ولا نبي نضغط على انفسنا ونطيح..
الثقة الي كسبناه بعد المشروع الي كان بيودينا بداهية مانبي نخسرها بهالوقت..
فهد\طيب يا مساعد باقدم لك تقرير كامل عن المشروع..وبندرسه مع بعض..المشروع كبيير ومالي نية اطيره من يدي..
مساعد\طيب نتفاهم لما تجيب تقريرك..

&&&&&&&&&&&&&&&&&&&&&&&&&&&&&

دخلت سراب لمكتبها الاساسي كمديرة لمكتب سفريات..ومعها صديقتها ومعاونتها النصابة مثلها سمر..بشغلهم هذا هم المثال الاعلى للانضباط وما احد يشك انهم نصابات محترفات..

قربت سمر من مكتب سراب وجلست على طرف المكتب..
وهي متحمسة للكلام عن اجتماعهم مع فهد..
سمر\هيه سراب باي مكتب بنستقبلهم..؟
سراب بابتسامة\تذكرين ابو مازن الي اخذنا منه 3مليون..
سمر باحباط\الي ماشفنا منها ريال..
سراب تضحك\ايه راحت للي يستاهلها..المهم حن استاجرنا المكاتب الفخمة الي بالبرج..
بناخذها هالمرة وبنستقبل فهد فيها..احنا معطينهم فكرة ان حن مو مستقرين بالعاصمة وهذي المكاتب بتكون تمويه فقط..
سمر\شفتيه كيف جنتل مان..؟
سراب\وع من الجنتل مان..؟ قولي تبن مان..هذا واحد ابي اربيه..
متعرض لجدي راشد..ومالي نية انصب عليه بس ابي الهيه..
سمر\ترى بيضيع وقتنا معهم ولا بناخذ منهم شي.
سراب\صح مابناخذ منهم فلوس بس بناخذ منهم وقت..وبنشغلهم..والاهم اذا قبلوا بمشروعنا هم بيخسرون مشاريع ثانية لانهم يبون يتفضون لنا احنا..عاد شفتي قدمنا لهم مشروع كبير ومن الي عرفته عنهم ما بيخلونه يضيع منهم..
سمر\وهو فهد لحاله الي بيقرر تراك مرة واثقة..
سراب\مو الخوف من فهد..فهد مايدري ان له عدو يبي يشغله ويبعده..الخوف من مساعد هو يتخذ اكثر القرارات..
وفهد عنيييد وانا شفت انه يبي مشروعنا وبيسوي اي شي عشان ياخذه هو مجنون بشغله وبتصاميمه الهندسية..ومشروعنا الوهمي بيرفعه فوق..
سمر\وان كشفنا.؟
سراب تضحك\خليه يدور على ذكرى ولا جميلة ولا الفريق الي كله من بنات افكاري..ويقدمنا للمحكمة..

&&&&&&&&&&&&&&&&&&&&&&&

لا السيفُ يفعل بي ما أنتِ فاعلةُ
ولا لقــاء عدوي مثل لقياكِ ..
لو بات سهــم من الأعداء في كبدي
ما نـــال مني مانالته عيــناكِ ..

قفلت ايرم جوالها بعد مكالمتها مع جدها وقالت له ان سعود بيمرهم ياخذ يوسف لدكتوره..ونشب لها سديم الا بتروح معه..
ايرم\بافهم وش يوديك وش تبين؟
سديم باهتمام\مو زوجي هو ابي افهم وضعه..اقل شي اقابل دكتوره اشوف هو كفو ولا خرطي مثل عيال عمك..
ايرم تبتسم\سديم خافي على لسانك..تراه اطول منك ويمكن يقصونه عيال عمي..
سديم بغرور\يخسون عندي يوسف والله لا اخليه حارس شخصي واخليه يكفخهم..
ايرم\عنــدي شغل وانتي مابيخليك سعود تروحين معهم..
سديم\خيــر وش دخله يوسف قال اروح معه هو راضي وش دخله الشرطي الي مافيه حيلة..
ايرم\سعود بيحوسك ابعدي عنه..رعد متحملك.
سديم تكلم يوسف\هيه يوسف بتخلي سعود يحوسني..سمعتي وش قال.؟قال يعقب..
ايرم بشك\لا ماسمعته خليه يعيدها..
سديم بتصريف\يوسف مايعيد كلامه..
ايرم تضحك\يمــه يا كذبك يا هالبنت مو صاحية..
سديم\جدك يبي جواله ذلنا..ايرم جيبي لي جوال..ولاتنسين باكلم الهبلة بنت خوالك..
ايرم\طيب عطي جدي جواله..وانتبهي لنفسك لا تضاربين احد لحتى اجي..
سديم\والله على حسب الاخلاق..ان رفع احد ضغطي كفخته..

قفلت وهي لازالت تضحك على سديم الي فجأة صارت تردد يوسف زوجي واهتم له لانها شافت الشغالة تضربه..
سبحان الله بعد ماكانت كل ماشافته اما تضربه او تسبب له اصابة ..وهو مصمم الا ينشب لها..
ألتفتت للمرضة المساعدة لها تنبها لدخول احد المرضى الجديدين بملفها..خافت لان توها تعتبر متدربة بس قوت نفسها وخرج من المكتب لغرفة المعاينة وهي تتاكد من كمامها الطبي الي اكتفت فيه عن النقاب بينما هي مع المراجعين..
قربت من الكرسي ولبست القلفز وهي تتكلم مع الممرضة عن مشكلة المريض..
ايرم بهدؤ\هلا أخوي باي جهة الوجع.؟
بابتسامة باهتة توجهت يده لخده اليسار..
رفعت عيونها وشافته مستسلم على الكرسي..مغــمض عيونه
ماتكلم ماقال وش يشكي منه..وأين موضع الألم..
أشر بأصابعه على خده الايسر يوجها لمكان الوجع..
يدينها وقفت بالهواء قبل توصل لوجهه..الصدمة أكبر من انها تستوعبها..
مســـاعد عندها بعيادتها بغرفتها هي..
على كرسي المرضى..متسطح مسلمها نفسه..
ما أقــدر على هالمواجهة يا مساعد..
كنت بأواجهك بمكتبك وأكسب اشوف صدمتك..
وإنت تصدمني هنا..
يا خبيـــث..
بــس ما بتقدر تربكني وتنتصر علي..يكفيك انتصارات ويكفيني هزايــم..قررت تتعامل معه بمهنية بحته وكانها ماتعرفه..
ولكن لما قربت منه وصارت تشوف كل زاوية وعلامة بوجهه..
حتى منابت عارضه كانت واضحة لها بدقة..حواجبه الكثيفة رموشه ..حبة الخال الصغيرة الي بطرف عينه اليسرى..
أرتجفت يدينها غصب عنها..وهي تشتغل بأسنانه..
مقرره ما تتكلم معه ولو تخلع اسنانه كلها..
اما يتكلم من نفسه او مابتتكلم ولا بتسأل..
وجهت كلامها للممرضة\إسالي المريض عن موضع الألم رجاء..
ومثل ماتوقعت مسوي نفسه ماسمع الممرضة ولا رد عليها..
طيب يامساعد تحمل..
حاولت تستدعي غضبها منه ومن تجاهله لها السنين الماضية..
لحتى تنهي الرجفة الي بداخلها..
ولكن غلطت لما رفعت عيونها من اسنانه الى عيونه..
وألتقت عينها بعينه الي كانت تناظرها..
هي ما تفهم بالعيون ولا بلغتها.. ماتفهم لغة السكوت..ولا تسمع ضجيج الصمت..
وهو الوحيــد اللي يفهم عيونها..ولغتها..
وحشتــني عيونك العسلية البريئة الدامــعة..
وحشتني بكل فصولها..الفضول الخوف الحماس الحب ..
فصــل الكره والبغض ماشفته حتى لما حكمتي بنفيي..
كيـف أقدر استرجعك؟؟
كيــف أقدر أعوضك عن الخذلان يا ايرم.؟
غمض عيونه مجبور يخفي عتبه على نفسه..

أما هي الي تفسر اي شي يتوجه لها بالمشاعر السلبية وبعدم الثقة..
لما شافته غمض عيونه وقطع اتصال عيونهم..ولما شافته عقد حواجبه الكثيفة..
فسرتها بصده المستمر.. بعتابه على حكمها..بنسيانه لها..وعدم مبالاته بتواجدها..
حست غصة تخنقها وغصب عنها عبرتها تقتلها اذا تخيلت مساعد يكرها..رمشت تحاول تقهر دموعها الي تجمعت بعيونها لا تفضحها..
ناظرت الشامة الصغيرة بطرف عينه اليسرى..
هذي الي كانت تمسكها باصابعها وكانها تاخذها منه وتحطه على وجهها بجنب عينها هي..
وهو كان يكذب عليها ويقول صارت بوجهك خلاص..

صاحت بداخلها..
محتاجة مساعدي هذاك..
مســاعدي الي كان يقهر الدنيا عشاني..
الي كسر ذراع رعد وتواجه مع عمامي كلهم عشاني..
ابي اللي قال بكل صوته لبنات عمامي ايرم تسواكم كلكم وماتزعلونها..
أبيــه ينتقم لي من مساعد هذا..
مساعد الي صار يجرحني ويوجعني..
الي شمت فيني بنات عمامي بعد ما توجني عليهم كلهم..
الي ماعاد يسأل عني وعن حالي..
ما يدري يعني إن لو تغيرت نبرة صوته وهو يكلمني يخلق بداخلي الف مدينة من اليبــاس..
وأتوه واضيع لأن نبرته بس تغيرت..
فكيف والحـــين وهو ماعاد يعرفني..ولا يناظر بعيوني..

خانتها دمعتها وغصب عنها طاحت على جفنه..

ورحــت أسال من أوجاع قســوته..
أذاك من كــنتُ للآلام ارجـــوه..؟
ماذا أقول لقلب كــان يسكنــهُ؟
أدعــوه باسمي إذا ما جئـت أدعوه..
آه على زمــنِ ودعــت أجمله..
بالأمس أشكو لــه واليــوم أشكــوه..

ابتعدت عنه واشرت للمرضة تنهي شغلها وانسحبت بسرعة قبل يستوعب مساعد إن دمعة إيرم سبقت شهقتها الي سمعها..
فتح عيونه ولمح طيفها تدخل لمكتبها وتقفل الباب..
ابعد يد الممرضة عنه ووقف وهو مقهور من حاله وحالها..
متـــى ضيعت جسور الوصل بيني وبينها..
متــى تربطت يديني وماعاد لي الحق امسح دمعتها ولا اطبطب على كتفها..
ايــرم تبكي بحضور مساعد..
حسبـــي على مساعد يا ايرم..
ماعاد اعرف باي لغة اتكلم معك واتواصل..
إنتي تعاقبيني بسكوتك ورفضك الكلام معي..
لما كنتي صغيرة وتزعلين كنت اقدر اداريك وترضين..
بس الحين أنا عجـــزت اعرف طريق لمداراتك وكسر زعلك علي..
هذي ايرم الوحيدة..الي اغلب من حولها عاداها بدون اسباب..
وبنات عائلتهم يعرفهم اغلبهم مبتعدين عنها نهائيا..
وهو كــان يزيد نفورهم منها لما كان يردد بكل مكان ان ايرم تاج عليهم..كان يحب يرضي ايرم بكل شي..
لأنها وحيــدته هو..
كنت انا وحيدها وتخليت عنها..

&&&&&&&&&&&&&&&&&&&&&&&&&

جلست سديم وهي جاهزة بعبايتها تنتظر سعود يوصل مثل ماقالت لها ايرم.. وهي مصممة تروح مع يوسف وتعرف وضعه الصحي بشكل واضح..عشان تعرف كيف تتصرف معه..
كانت معها نوته وقلم ويوسف معه مثلها نوته وقلم..واي شي تكتبه تقول ليوسف يكتبه..وتنتبه على خطه الي يشبه لخط الاطفال والحروف متعرجة وغير متصلة ببعض..
ضايقها هالشيء اكثر.. وحست بحزن كبير على وضع يوسف...
وتمسكت بقرارها انها لازم تساعده..بتقول لايرم يدورون على مدرسين جيدين ليوسف..
سديم\تعرف يوسف أنا عندي هواية..
يوسف يناظرها\عطيني وحدة.
سديم بابتسامة\انت لازم تعرف وش هوايتك
يوسف\مامعي عطيني حقتك..
سديم\انا احب اسوي اعادة تدوير لاي شي القاه بطريقي..
ولحسن حظك انا لقيتك بطريقي وباسوي لك اعادة تدوير..
يوسف بعدم فهم\انتــي حلوة..
سديم تضحك\اعــرف..المهم باعيد تعليمك الحروف وكل شي تعلمته انت ونسيته..لازم يرجع عقلك ينمو من جديد..
دكتورك هذا شكله مو فاهم شي..انا باعالجك..
يوسف يضحك\يعني نزرع عقلي.
سديم\بــرافوا بنزرع عقلك..

سعود واقف ويسمع كلامهم ومتعجب من كلام النتفة الي جالسة قدام يوسف ويدينها تشرح ليوسف كيف بتزرع عقله..
كديــنا خير..كنا بواحد صرنا باثنين..
سعود ينادي يوسف\ يــوسف يالله مشينا..لا نتاخر..

وقفت سديم واخذت الي بيد يوسف وحطتهم بشنطتها..ومشت مع يوسف الي كان مبسوط لمراعاة سديم له..مسك يدها وقربوا من سعود..الي ناظرهم بحيرة وهو يشوف سديم لابسة عبايتها..
سعود\هلا سديم تبين شي.؟
سديم\لا ما ابي شي..باروح مع يوسف..
سعود\نعــم وين تروحين..؟
سديم\مع يوسف..
سعود\رايحين الدكتور..
سديم بعدم اهتمام\اعــرف..
سعود بعجل\ادخلي عند جدي..مابتروحين..
سديم تناظر يوسف\باروح معك صح.؟
يوسف بعناد\بتروح معي ..
سعود\يــوسف ترى تاخرنا خلها تدخل ومشينا..

سديم مسكت بيد يوسف وسحبتها لتحت..نزل يوسف راسه لها يسمعها وش تقوله..تحت نظرات سعود المتسلية بحركاتها..
التقت يوسف ويده بيد سديم راجعين للبيت..
سعود\هيـــه يوسف وين رايح.؟
يوسف بعناد\بتروح سديم باروح ماتروح ما اروح..
سعود\الصبــر يارب..إنت انهبلت..اليوم بدون سديم المرة الجاية بناخذها معنا..

بعناد رفضت سديم ويوسف اي محايلة من سعود..وجلسوا بالحديقة بنفس اماكنهم الاولى ..وخرجت سديم نوتاتهم والاقلام والتهوا عن سعود..الي ظل بمكانه مصدوم من تصرفهم الصادم له خصوصا من يوسف.. هيــن يا يوسف لعبت عليك..
والله مو هينه يالشبــر ..

ألتفت سعود على السيارتين الي دخلت المزرعة وكانت غريبة عليه ووصلت الى باب المجلس الخارجي..
توجه لهم سعود وهو مستغرب الجرأة لدخولهم بدون اذن..
ترجلوا منها 6 اشخاص غريبين عنه كليا..ولا مرة شافهم او قابل احد منهم..
سعود\ يالله حيهم..

سعود ماسمع رد التحية..ولا خفت عنه النظرات المعادية والشر الي واضح على وجيه الضيوف الغير معروفين..
باحساس يتمنى سعود لو كان كاذب..يمكن يكونون هم اصحاب الثار الي مارضى رعد يكشف غريمه ومنهو ولده..
ويحمد ربه انه باقي باللبس العسكري ما نزل بدلته..وقرر اذا صعبت الامور ياخذها بماخذ امني..
....\ويــن رعــد ؟!
سعود بهدؤ\من الضيــف..؟
......\ماحـــن ضيــوف حن طالبين حــق..طالبيـــن شرف رعد تعدى عليـــه..
سعود بحمية\تخســـي إلا أنت..رعد مايسويها..

بعد الكلام الكبير الي سمعه سعود من احد الضيوف..قرر يتمهل ولا يتصرف بشيء قبل مايفهم مشكلتهم مع اخوه..
مستحيـــل رعد يتعدى على شرف احد..ولا بيدافع عن رعد الا رعد..بس مستحيل يستدعيه بوجود اشخاص حاقدين عليه..
يمكن معهم اسلحة يئذون اخوه فيها..
سعود\تفضلوا بالمجلس نتعارف وان شاء الله مابه الا الخير..
واكيد فيه سؤ تفاهم..
مبـــارك\أخـــوك أخذ بنتنا وزوجها لعمه المجنون..
والنسب الي بينا وبينه مايسمح له ياخذها وكن ماوراها لا عم ولا خال..هو زوج اختها ماهو ولي امرها..
سعود بدبلوماسية\تفضلوا وان لكم حق بتاخذونه..

قرر سعود يبقى معهم دبلوماسي ومايثير عصبيتهم..هم هل البنت الي صارت حرمة عمه وزوجته.. ومعاداتهم مابتكون خيرة لهم ولا لسديم..الي بتستفزع بهلها وخوالها لحتى يخلصونها من يوسف..
وجده مســاعد رغم رفضه لاجبار سديم على الزواج من يوسف مابيقبل ياخذونها من ولده وهي صارت حرمته..
والاقوى من كل هذا هو رعــد إلي مابيتنازل عن سديم لحتى ترجع زوجته وترجع ولده..هم هلها واكيد عارفين وين بتكون..

خرج لهم جده لما عرف من عماله بوجود ضيوف بالمزرعة..
التفت سعود للمكان الي كانت فيه سديم ويوسف ومالقى لهم اثر..وهذا الشيء ريحه..
كتب رساله سريعة وارسلها لمساعد ورعد وثنين من عمامه الكبار..
واستغرب لما دخل رعد المزرعة قبل مايستلم الرسالة..
مايعرف ان رعد كان جاي والشر بعيونه لما عرف باختفاء حصانه معدي..وينصدم برسالة سعود..
نزل من سيارته ثبت الكاب على راسه ونزل نظارته بجيب ثوبه..
ومشى بخطوات مستفزة ووقف بجنب جده الي رحب بضيوفه..
الجد مساعد\اقلطوا يالله تحيي ال عبدالله وال ماجد..
العم مبارك \ماحن بقالطين يامساعد..ولا حن بضيوفك ولا انت مضيفنا..حن هل البنت وجايين ناخذ بنتنا..
الجد مساعد\البنت بنتنا والولد ولدكم..ولا بنختلف في شي..
العم مبارك\لا تطولها يامساعد عطنا البنت وخل المجنون يطلقها..
الجد مساعد\المجنون يسواك ياولد عبدالله..احشم نفسك انت في بيتي ولاهو مساعد الي يغالط ضيوفه..
.......\قالك ماهو بضيفك..هاتوا بنتنا ترى فعلتكم ردية ما يغسلها الا الدم..
رعد باستهزاء\لا يكــون انت يامشاري الي بتغسلها..صرت تعرف الردى .؟
سكت مشاري وفضل ما ياخذ ولا يعطي مع رعد..لانه الى اليوم مانسى لما كسر رعد رجله قدام عيون حنيـن وقدام عمه ظافر ابو حنين..بسبب تطاوله عليهم بوسط بيت ابو حنين..

العم مبارك\أنت اخذت حنيــن وغابت بك دروبك.. وتعرف انك خذيت معها الي مايحق لك تاخذه..
رعد ببرود\وانتوا الي اليوم تطردون ورى حنيــن..زوجتي انا ماكفيتوا شركم عنها..
العم مبارك\مالنا بزوجتك مطلب..عطنا سديم الي اجبرتها تتزوج عمك المريض..حن هلها وخوالها مانرضى بزواجها..
رعد\ما اشوف خوالها معكم .. ولا انت جايب هالشلة التعبانة معك تحسبنا مانعرف خوال حريمنا..؟ال ماجد مايمشون بدرب انت تمشي فيه يامبارك يعزون نفسهم عن طريقك..
مبـارك بغضب\تهبــي الا انت..ولا ناسي سواتك الشينة..
مشاري\وحن والله ذلينا عمرنا لما دخلنا ارضكم..تراك سلمت منا وحنين معك..ماهو ضعف الا تنازل..
رعد\انا ما اتنازل..اذا تذكرون خذيتها وخشومكم بالارض..وخذيت سديم وغصب عنكم بعد.
ابو متعب\رعـد انت اجبرتني ازوج سديم لعمك المجنون..

رفع رعد عينه يناظر ابو متعب..الي كانت يدينه الثنتين معلقه برقبته بحامل للجبيرة..بعد ما امرت قصايد بكسر يدينه..
رعد بشماته\يشهد الله ان يدينك تستاهل القطع ماهو الكسر..
مبارك\عطنا سديم يامساعد..بنتنا ما تبقى بذمة مجنون هذي عرضنا..
يوسف بصوت عالي\المجنون أنــت..سديم زوجتي أنا.. ولا بتاخذها لا انت ولا غيرك..والباب الي دخلت منه تدله..

ارتفعت عيونهم كلهم للي واقف عند باب الببيت الرئيسي ويتكلم بصوت غاضب وعالي..
ابو متعب بصدمة\هذا هو الي تزوج سديم..
مبارك بضيق\الله ياخذك..هذا مجنون الحين.؟
مشاري بقهر\يبه لازم تشوفها وتكلمها..هذؤلا يلعبون علينا..
مبارك\عطني البنت يامساعد..
الجد مساعد بفرحة\الرد جاك من زوجها..العقد معي وشفته مصدق وموقع وكل اوراقهم قانونية..الحرمة مكانها مع زوجها..
مبارك\هذا خذا حنين الي سرقت معها كل حلالنا..
والحين بتاخذون سديم لا والله بعيدة عن اشنابكم..
رعد يقرب منه وبهمس\شف هي صح مرت سبع سنين وانت بهذي السنين تطرد ورى زوجتي ولك غاية الى الحين ماعرفتها انا.. بس باعرفها يامبارك..ووعد اجيك واعطيك حساب السنين كلها..حتى الشيب الي مغطيك ما يترك للرحمة بقلبي مكان..
مشاري\لا تهــدد وانت الغلطان والمعتــدي..

رعد مسك مشاري من رقبته ورصه على باب السيارة..
مبارك الي اهتزت عصاه بيده من خوفه لا رعد يكتشف المخفي..
لازم هو يوصل لحنين قبل رعد..سبع سنين قدرت تختفي وتلاعبهم لعبة القط والفار..الخبيـــثة..
رعد بحقد\مشــاري لولا دموع العذوب كان رحت فيك اعدام من سنين وانت خابر وش انت مسوي..

سعود سحب رعد عن مشاري ودفع مشاري بعيد عنهم لما حاول يضرب رعد..
سعود\ انكم بتتصلون على النبي وتدخلون نتفاهم معكم بخير..فحياكم الله وان بديتوها ضراب وهواش فترى على ماقلتوا ما انتوا بضيوفنا ولا لكم حق الضيف عندنا..
مبارك بقهر\ما باروح بدون سديم..

يوسف بعناد\قلت لك زوجتـي ولا تروح معك ولا مع غيرك..
المجنون هذا الي مكسر معكم..
رعد بمأزرة\ليه يا ابو متعب ماقلت لهم كم عطيناك مهر لسديم.لا يكون كليت مهر المسكينة ومخبي على عمها الطيب..
ابو متعب\لا لا تكذب يارعد..
رفع نظراته بخوف لمبارك وعياله الي نظراتهم تتوعده بالموت على كذبه عليهم..

الجد مساعد\جاك العلم يا مبارك..الولد هذاك شفته رجال مالي ثيابه عاقل ولله الحمد ولا به خوف على بنتكم..معززة ومكرمة..
العم مبارك\بأشوفها..
يوسف بقهر\والله ما تشـــوفها..

كلمة يوسف القاطعة اثبتت لابو مشاري انه عاقل ولا بيقدر ياخذ سديم منه..بس مابيتخلى بهالسهولة..
مبارك يتوجه لسيارته\البنت بناخذها يامساعد..ولا حن بقاصرين..
رعـد\مبارك بازورك قريب واطيب خاطرك..انت عم حريمنا المصونات ولك حق..

أنسحب مبارك بعد تهديد رعد الي ارعبهم كلهم واكثر شخص كان خايف من تهديد رعد هو الشخص الي بقى صامت طول الوقت ما تكلم بكلمة وحدة..متــعب..

&&&&&&&&&&&&&&&&&&&&&&&&&&&

مــــــــن أذبلك..؟
من أتلف الوردات تلك ومبسمك..
مـــن أحزنك.؟
من جمع الدمعـــات غيمــاً وأمطرك..
وأطــلق في عينيــك رعـــداً وأغضـــبك ..؟؟
فلتهدئـــي..
سأبعد الأحزان قســراً عندما تبقى معك..
ما أجمـــلك..
إنــي هنا سأظل دومــاً أزهـــرك ..

لما تأكد من خروج السيارات من بوابة المزرعة..
شد على يد سديم الي كانت ماسكة بيده وجالسة على الارض مقابل له..كانت تبكي..وترتجف..
كــانت خايفة ومرعوبة..
جلس قدامها وهو يبتسم..
يوسف\خلاص راحوا الاشرار..قلت لهم الي قلتيه..
صدقوا اني باضربهم..وش رايك فيني مثلت صح..

سديم بغيابات عقلها كلام عمها مبارك يتردد براسها..
ماصدقت لما شافتهم واقفين ويتكلمون مع سعود..عرفتهم ووقفت بخوف تبي تهرب منهم..هذولاء المجرمين..الي اجرموا فيها وفي حنيــن..
تخبت ورى يوسف وضمته من ورى مرعوبة..وجها مدفون بظهره..واظافرها تحفر بخصره..
كلــهم جايــين يبونها اكيد..حتى هم يبون حنيــن يبون يوصلون لها عن طريقي انا..حبيبتي الي قتلوها قدامي..
حست بيوسف يتحرك وبكت بصوت عالي تترجاه
سديم برجاء\تكفى يوسف لا تتحرك بيشوفوني..
يوسف\تبين اضربهم..
سديم\لا خلك ثابت لا تتحرك بيشوفوني..
التفت عليها يوسف وضمها له وهو يهديها باسلوبه اللطيف المسالم.
يوسف\لا تخافين هذا رعد جاء وسعود معه مسدس بيقتلهم.حتى انا معي مسدس باروح اجيبه اقتلهم..
سديم بنحيب\لا ياخذوني تكفى يوسف ما باروح معه..
يوسف بعصبيه\انتي لعبتي حقتي..محد بياخذك مني..
شالها بين يدينه ودخلها البيت بدون ما ينزلها مثل ماتقوله او يهتم لاحد..
نزلها لما دخل البيت وهو زعلان ليش تبكي وخايفة..
يوسف\اقول لابوي يضربهم علميني وش اسوي فيهم..
سديم\هم يقولون انت مجنون..بس انت عاقل..انت شاطر يايوسف..هم مايعرفونك..لو يعرفونك مابيكرهونك كذا..هم اصلا مايهتمون لي مايبوني يبون حنين..
يوسف\يالله نروح لحنين..

عرفت سديم ان يوسف يحاول بكل قدرته يسعدها ويغير حالتها..قررت تنقذ نفسها من تسلط مبارك والي معه ..
سديم\يوسف ساعدني..وقف هنا قدامهم وابيك تقول بصوت عالي وقوي انك زوجي ومالهم شغل فيني..
يوسف\انتي زوجتي وماياخذونك مني..
سديم بتشجيع\ايه تكفى يوسف..اصرخ بقوة خلهم يسمعونك ويخافون منك..عشان ماياخذوني..

وقف يوسف على الباب الرئيسي وسديم واقفة وراه كفينها بكفوفه..
وجبينها مرتكز على ظهره..وتردد كلماتها له وتشجعه يتكلم بقوة وثقة..
وكان لها الي تبيه اقنعهم يوسف انه عاقل ومابيسمح لهم ياخذونها منه.. جلست بالارض قدامه ولا زالت كفها بكفه..
وانهارت لما عرفت انهم انسحبوا بفرحة يوسف المبسوط بتمثيله عليهم..ارتاحت بحضن يوسف الحنون الطيب..
بس مابتقدر ترتاح لحتى تجتمع بحنين ويتخلصون من مبارك ومن اسؤ كوابيسهم..رعـــــــد..

سمعت صوت رعد يكلمها يناديها..ويمكن تجرأ وطمنها ان مبارك مابيقدر ياخذها..وهي رفضت مواساته..
ماهو انت يارعد الي بتطمني..ماهو انت اللي باصدق مواساتك..
سحبت نفسها من يوسف ووقفت بتعب..
سديم بعتب\ما هــم أقسى منك يا رعد تطمن..ولا هم أحســن منك..

توجهت بخطواتها المهزوزة للدرج وباول خطوة على الدرج حست بيدين يوسف تسندها ويطلع معها وهو يردد عليها كلماته الحبيبة لقلبها..

يوسف\أنتـــي حلــــوة..

&&&&&&&&&&&&&&&&&&&&&&

رعد
أعصابه ثايرة من بعد مقابلته لمبارك والي معه..خصوصا مشاري الحقير..
وبعدها انهيار سديم وبكاها..هم أذوها..هي تخاف منهم..
وش صار لها بعد غيابي انا وحنين..
قالت ماني احسـن منهم..ولا هم اسؤ مني..
سديــم تعني لي الكثير..ليش تركتها حنين طول هالسنين..؟

واقف بداخل اسطبلات الخيل..ويسمع سعود يحقق مع العمال كيف ينسرق حصان بكبره من المزرعة وهم موجودين..
وهم فعلا هذي المرة عمال مزرعة الجد مساعد ماكان لهم علاقة بسرقة حصان رعد..
ماحبت قصايد تخاطر وتسمح لهم يتدخلون بالموضوع فيمكن يكشفهم رعد..العمال حفاظاَ على سلامتهم ما قالوا ان الحصان كان يطلع من المزرعة ويرجع بمعرفتهم ..
سعود كان مصمم يعرف كيف انسرق الحصان..بس رعد كان يحس بتواجد حنيــن بهذا الموضوع..
حصانه معدي هو الوحيد الي انسرق من الاسطبل..
ومعدي عنيـــد مابيطلع بدون عناد..
كيــف قدرت تاخذه بهذي السهــولة..
كيف قدرت تاخذ معــدي..؟
لا العمال ولا جدي ولا يوسف ولا احد حس عليها..
اذا اخذت معدي بتقدر تاخذ سديم..
شكلي تهاونت بامرك ياحنيــن..
حتى عمك وعياله قالبين الدنيا عليك طول هالسنين..
وش يبــون منك..وش أخذتي منهم..
لحتى تاخذين من عمرهم سبع سنين وهم يدورون حول أنفسهم..
وش صار بسنين غيابي..؟
مالقيت المفقــود..؟
كل هذؤلا الأعداء حولك ووراك ياحنين..؟؟

أنتي مختفية..لا مو أنتي..اسم حنيــن مختفي..
فقط الاسم مختفي..واكيد اسم عقاب مختفي..

خـــذي الي تبين يا حنيــن بس رجعي عقاب..
من بعد ما قابل عيال قصايد وقلبــه محروق يبي يلقى عقاب..
الشعور الابوي الي حسه بتواجدهم يبيه بولده..
قرر مايسمح لغياب ولده يطول عنه..وبيرجع رعــد الأولي قبل حنيــن..بيضرب تحت الحزام..
بيطعن بالظهر..بيغدر..بيخون..بيسوي كل شي ردي عشان يوصل لها ولولده..

رفع جواله يشوف التنبيه الي اصدرته الرسالة الواردة له..
ابتسم رعـد\بديـــنا يا حنيــــن ..

إلى الملتقى باذن الله ..

كونــوا بخير..
صدووود..