TOH HUA YUN KI-Aaj kaafi shaamo ke baad baarish hui …..baarish jo ki hamesha mere liye ek sukhoon bhara waqt rha hai
Aisa laga jaise zameen ko pehli baar khuli saans lete huey dekh aasmaan bhi khushi ke aansu giraa rha ho
Aaj phir meri khidki pe ek choti si chidya aa baithi aur vahi purane geet gungunane lagi jinse aaj bhi mujhe pyaar tha
Voh bheeni bheeni si khushboo, voh khidki se takrati baarish ki choti choti boondein
Aaj na haath mein chai ki pyaali thi aur na hi pakode ki thaali
Phone side mein pada hua tha na koi notifications na koi entertainment.
Unn boondon ko chhukar aisa lag raha tha jaise barso ki ek talaash poori hogyi ho
Talaash kisi chehre ya kisi cheez ki thi yeh mat poochna , voh jawaab abhi tak nhi mila par haan kuch poora sa zaroor lag raha tha
Ab isko covid ke side effects bolo yaa mera pagalpan ,
Par sukhoon sa thaa aaj ki hawaaon mein…na kahin bhagna na kahin rukna bas dheemi si chaal aur raaste apne aap saamne aate jaa rhe they
Mere baalon ko aaj kisi ki izaazat ya tareef ki zaroorat nhi thi …bas madmast hoke duniya se baatein krne ki talab thi unhein….aur maine krne diya
Chehre par girti hui boondein sab purani yaadon ki tarah lag rhi thi…achi buri yaadein….par aaj na ghum tha aur naa hi koi gile shikwe….bas main aur meri tedhe medhe hasi
Aur aaj aasmaan mein udte panchii ,main aur background mein Rajesh Khanna ,sab saath mein gaa rahe they
“Hum kyu shikhwa kare jhootha, kya hua jo dil tootaa,
Sheeshe ka khilona tha kuch toh kuch hona tha…hua”
Khushi si thi ek dil mein beete huey kal ki, aaj aur shayad kahin na kahin aane waale kal ki bhi….aane waale mulaqaaton ki bhi
Toh yeh sab hua yun janaab kyunki aaj kaafi shaamo ke baad baarish hui.