السلام عليكم ورحمة الله وبركاته

مشــتــــــــاقــة وكـــفى ..
لـــن أحكي عن غيابي فإن الظروف لا تستأذن قبل أن تهاجمنا..
ممتـــنة لكل القلوب الجميلة المهتمة..

أنا بخيـــر ..
كونوا بخيـــــر ..

البارت العــاشر ..

وكـــالحلم جئتي..
وكــالحلم غبتـــــي ..
وأصبحت أنفض منك اليدا..
فما كان أغربه ملتقى..
وما كان أقصـــره موعـــدا ..

المرحوم ..
غـــــازي القصيبي ..

مسكت طرف المفرش بيدها وسحبته عن سديم..
وهنا كانت صدمتها عظيمة لما اكتشفت بان الي تحت المفرش كانت مجرد وسادة ..
أبتعدت عن السرير بسرعة والتفتت لباقي أنحاء الغرفة..
ماكان فيه اي شي يدل على وجود اي شخص غيرها هي..
بخطوات حذرة تحركت باتجاه باب الغرفة وقبل تفتح القفل..
كانت يدينه تلتف عليها مثل القيد الحديدي..
يكتـــم نفسها وشهقتها المخنوقة..
رعـــــد بوعيد\ويــــــن يا حنيـــــن..؟

فزت سديم بصرخة\حنيـــــــن..
وبلحظات مابين الصحوة والمنام صارت سديم بأحضان أختها حنين..
حنين اللي كان لها نص ساعة وهي جالسة بجنب سديم تتأمل أختها المفترقة عنها من سنين تنسخ كل جزء منها في ذاكرتها وتبحث عن بقايا الطفلة اللي تركتها وراها ..
تمسك باصابعها وتبوسها بلطف خايفة تصحى سديم وتخاف..
ياروحي ياسديم آخر مرة التقينا كنت أنا بحال اسؤ من حالك وبعد هالسنين ألقاك بهالحالة التعبانة.. ويكون نفس الشخص هو المسئول عن حالنا..
وحشتيني ياروحي.. من وين لك هالجمال يابنت تبين تغطين علي..؟
سلامتك ياروحي سلامتك ياقلبي..

لما صحت سديم مفزوعة تصرخ باسم حنين أحتضنتها بقوة وهي تسمي عليها ..
حنين بحب\لبيـــــه ياروح حنين وقلبها لبيــه..
سديم ولازالت تحت تاثير الحلم\اهربي حنين اهربي رعد بياخذك حنيــــن..
حنين تضمها\يخســـي رعد والي خلفوه..لا تخافين ياروحي انا هنا انا معك..
سديم تبكي\والله شفته مسكك بقوة اهربي قبل يجي تكفيــن..
حنين بحنية\هشششش قلبو اصحي انتي كنتي تحلمين.. كان حلم..
سديم بنحيب\مابي اصحى خليك شوي بس..ضميني شوي..
حنين تشد يدينها حوالين سديم\ياروحــــي أنا حقيقة ورعد حلم لاتخافين ماباخليك هالمرة باخذك معي..
سديم برجفة\حنين..؟إنتي صدق هنا.؟
حنين بحب\إيه ياروحها ايه ياقلبها أنا هنا معك..ناظريني..
أبتعدت سديم عن حضن حنين وتوها تستوعب انها فعلا بالقرب من اختها وهذا حقيقة ماهو حلم..
تغيرت ملامح وجهها ببداية استيعاب وغير تصديق..بأن أختها الغايبة عنها من سنين موجودة معها بنفس المكان ويدينها بيدين اختها..رفعت كفوف حنين بين كفوفها وتناظر باصابعها وكانها تتتاكد من ملمسها..
رفعت عيونها تناظر بوجه حنين وعيونها..لازالت بين التصديق وعدمه..مدت يدها برجفة تتلمس وجه حنين بين الشك واليقين تتارجح بشعورها..
سديم بخفوت\حنيـــن ؟!
حنين بحب\لبيـــــه..
سديم بخوف\حلــم؟؟
حنين\لا ياروحي حقيقة..جيتك وباخذك معي..
سديم بحزن\حلـــم..
حنين\والله حقيـــقة..

ضمتها حنين لها لما بكت سديم وهي تردد اسم حنين بشوق وتترجاها تكون حقيقة..
سديم\والله حلم..اعرف دائما كذا اشوفك وتروحين..
حنين بقهر\روووحي والله مااروح بدونك..ماجيت الا عشان اخذك..
سديم بنحيب\حنيــــن انتي صدق هنا..؟

حنين بحزن على خوف اختها ونحيبها قربت وبحب باست كتف سديم وخدها وعيونها وهي تردد لها انها معها وقريبة منها ولا بتتركها..
حنين\سديمي حبي استوعبي انا جيت..محتاجتك تكونين قوية وتساعديني اخذك من هنا..
سديم بانهيار\وحشتيــــــــــني حنين وحشتيني..ضميني اذا كان صدق ضميـــني..
حنين تضمها اكثر\يشهـــد ربي ان شوقي لك وخوفي عليك بكفة وكل مصايبي بكفة ثانية ياروح حنين..
سديم بعتاب\تأخرتي علي..صرت احسك ماتبيني..؟
حنين تقاطعها\خفـــت عليك منهم..من حقارتهم..كنت مخليتك بعيدة عني..صح هم محاصرينك مراقبينك يبوني..بس كنتي بامان بعيدة عن كل المصايب الثانية..بس النذل زوجك عمه وهدم كل شيء..
سديم بشماته\طعنته الحيوان..
حنين بضحكة\يستـــاهل..
سديم تمسح دموعها\آآآآآه ياقلبي وربي مو مصدقة..بعد كل هالسنين اشوفك اضمك..
حنين\ربي أكرمنــا..حفظك ربي من كل شر..وجمعنا اخيرا..
سديم بعبرة\لا تخليـــني..
حنين بتصميم\مستحيـــل أخليك.. والحين بتطلعين معي..
سديم بفرحة\بجــد بتاخذيني..
حنين بحزم\اكيـــد باخذك..
سديم بتعب\بس أنا تعبانة من العملية..
حنين بحنية\حبيـــبي التعبان..عساه برعد واخوانه وعمه..
سديم بقهر\وولد عمه الحيوان مساعد..
حنين\وهو بعــد..
سديم بشوق\وحشتيني..والله مشتاقة لك..
حنين بعتب على نفسها\سامحيني يا سديم انتي الوحيدة الي تئذيتي بسببي..انتي الوحيدة الي خذلتك..
سديم تضمها\روووح سديم..ماخذلتيني ياروحي ..

التفتت حنين على صوت الباب الي انفتح بقوة ودخل يوسف بخطوات سريعة.. ولاحظت نظراته النارية بعيونه.. حنين صدت عنه ورفعت طرحتها وتحجبت عنه ..
قرب منهم وسحب سديم من بين يدينها بقوة وحضنها.. وهنا قصايد وقفت وابتعدت عن السرير..
يوسف بغضب\انقلعي..من انتي سراقة؟؟
سديم بوجع\آآآه يوسف يدي..
يوسف بحدة\هذي سراقة بتسرقك شفت السراقين معها..
سديم بخوف\يوسف إهداء هذي دكتورة..
قصايد بعدم اهتمام\يوسف نصيحة اجلس قبل تطيح من طولك..
يوسف\انتي بتطيحين ياسراقة..باكلم سعود الشرطي يجي ياخذك السجن..
سديم بخوف\يوووسف هذي دكتورة صديقتنا..
يوسف\لا هي كذابة مو دكتورة..معها سراقين برا انا شفتهم..
سديم بخوف تناظر حنين\دكتورة طمنيه..هو زوجي وخايف علي..
قصايد\الشي الوحيد الي باقوله اجلس يايوسف قبل تنام وانت واقف..
يوسف بدأ يتحرك بوقفته بعدم اتزان ويشد يدينه على سديم..
سديم بحيرة\يوسف وش فيك.؟ تعبان..؟
قصايد بهدؤ\لا بس بينام لانه شرب مخدر بينيمه لحتى نطلع بسلام..
سديم بشهقة\حنيـــن لا يموت..
قصايد\مابيموت قبل يومه..بينام وحن بنطلع..
يوسف فعلا بدأ يحس بعدم توازن وإرتخاء بعضلاته وبرعب شدد احتضانه لسديم وهو يردد كلامه لها ..
يوسف بانفعال\لعبتي لا تروحين معها..لا تخليني قلتي بتاخذيني معك..
سديم بعبرة\لا تخاف ما باخليك..باخذك معي..

يوسف جلس على السرير بقرب سديم وبدأ يفقد التحكم باعضائه..
بسبب الثقل الي صار يسري بعضلاته وجسمه..
سديم بخوف قربت منه وحاوطت وجهه بيدينها وهي تناديه باسمه..
سديم تبكي\يوووسف لا تخاف انت بخير..بتنام شوي بس وبتصحى..
يوسف بخوف\بتخليني..بيضربوني كلهم..باموت لعبتي..
سديم بوعيد\باقتلهم الكلاب ما اخليهم يضربونك..انت صديقي باخذك منهم..
يوسف يغمض عيونه\خذيني معك..

سديم تبكي وهي تحاول بيوسف يفتح عيونه ويناظرها..وهي توعده ماتتركه لهم وبتاخذه معها.. التفتت على حنين تترجاها تساعدها..
سديم\تكفين حنين باخذه معي..
قصايد باستنكار\لعبــه هو ناخذه معنا..هو ولدهم وش تبين فيه..؟
سديم بضيق\يضربونه حنين يعذبونه..
قصايد بجمود\رجال طول بعرض مابيوجعه كم ضربه او صفعه.. غيره انضرب وانقتل ولا مات وهو اصغر منه واضعف بالجسم والقوة..
سديم\كيف قدرتي تخدرينه..؟
قصايد ببرود\شرب من الكوفي الي قدمته له وحدة من ممرضاتي..
على فكرة ترى هو عينه طويلة ماتقبل يشرب من الممرض وتقبل من الممرضة..
سديم بدفاع\هو طفــل مايثق بالغرباء..ويمكن يظن الممرضات مامنهم خوف..
قصايد بعتاب\وإنتي طفلة ليش وثقتي بالغرباء..؟
ليش مهتمة بهالشخص الي انجبرتي عليه..؟ سديم انا حتى من نفسك وحنيتك باحميك..هالشخص انتهى من حياتك..

قصايد رفعت جوالها واتصلت برقم وطلبت منهم يدخلون الغرفة..
بعد دقايق دخلوا ممرضتين مستئجرات من قصايد وبأمر منها بدؤ بنقل سديم من السرير الطبي الى كرسي كبير متحرك بلطف وحذر..
سديم تناظر لجهة يوسف مقهورة ماتبي تتركه لحاله..

سديم برجاء\تكفين حنين ما اقدر اخليه معهم..
قصايد جلست ركبة ونص ويدينها على ركبتين سديم\هشش اهدي الحين ابيك تكونين هادية عشان ماتتعبين وتعاوني مع الممرضات الي بينقلونك..
سديم تبكي\هو وحيد..مابي اخليه..هو طفل وحيد..
قصايد\وحن كنــا أطفال..بس كبرنا ياسديم..
سديم بعجل\ إنتظري أبي جوالي..

أخذت حنين الجوال من على الطاولة وناظرت فيه بتفكير..وبعدها رجعته على الطاولة وتوجهت لسديم..
سديم باستفهام\وجــوالي ..؟!
قصايد بغمزة\ تستاهلين أحســن منه هذا خليه لهم..
أشرت لهم يتحركون بعد ما غطت سديم بعباية بيضاء وطرحة بيضاء..ورفضت تستمع لرجاوي سديم المتعلقة بيوسف..
طلبت من ثنين من الحرس الي كانوا معها يدخلون الغرفة..
قصايد\ارفعوه على السرير كويس..
نفذوا كلامها وغطوه بالمفرش وهي قربت منه وتناظر بملامحه وهو نايم..
قصايد\نام يايوسف ولا تحلم بسديم..انا صرت اعرف هوسك فيها..
انا اكثر من يعرف نظرات المهووس..طفولتك ونقص عقلك تنقذك من اني اضمك لقافلة المذنبين..

خرجت من الغرفة وسكرت الباب وهي تخرج الاوراق المزورة المختومة من المستشفى تسمح بخروج سديم من المستشفى تحت مسئولية زوجها يوسف..بتوقيع مزور..
حنين بجمود\ تعودنا على التزوير وش الجديد ..!

&&&&&&&&&&&&&&&&&

نزلت سراب من السيارة ولازالت العصبية مسيطرة عليها.. لطالما اتخذت الجهة المحايدة بحياة ايرم مايوم تدخلت او بينت رفضها لتصرفاتهم معها..لان ايرم مانعه اهلها مايتدخلون بعلاقتها بخوالها.. ونفس الشيء مانعه خوالها يتدخلون بحياتها مع اهلها..
توجهت لبيت الشعر وهي تفكر كيف تفتح الموضوع مع جدها ماتبي ترفع ضغطه بهالليل ..
وقفها احد عمال المزرعه\فيه رجال مع بابا كبير جوه..
سراب\مين فيه ؟؟
العامل\اول مرة شوف رجال كبير مع واحد شرطي..
سراب بشهقة\شرطي متاكد..؟وش يبون.؟
العامل\هذا شرطي يروح مع بابا قرناس بابا هيثم عند حصان..

ابتعدت سراب عن العامل وتوجهت لمكان الخيل وهي مرعوبة من هالشرطي الي مع قرناس وهيثم..
ياويلك ياقصايد اكيد عرفوا الشرطه انك سرقتي الحصان..
قلت لك مانتي قد شغل النصب والسرقه وانتي الا مسويه نفسك قويه .. قلت لك خلي الصنعه لاهلها..وخليك باسهمك وعصاباتك..
تخبت ورى احد الاسوار الخشبيه وهي تشوف قرناس وهيثم يسولفون مع شرطي ومبسوطين يضحكون معه..
يا انذال انت واخوك بتجيبون اخرتنا.. شهقة بقوة لما شافت الشرطي التفت على وراه وتاكدت انه سعود الي كان معهم في مواقف السيارات في المستشفى..
سراب بصدمه\ياوووويلك ياقصايد ياويلي بيكشفنا حصان اخوه عساهم ابو رمح..قرناااس ارجع ياحيوان انت واياه لا يشوف الحصان..
وش اسوي كيف اتصرف لو يشوفني بيعرفني توه اليوم مربطني بالكلبشات..يارب اسلمتني اول اليوم رجيتك تسلمني تالي الليل..

سعود يضحك مبسوط\عز الله شيبنا..سميتها سراب..؟
قرناس\ايه سميتها باسم ناقة الحرب القديمة..
هيثم يفتن\كذاب مسميها على اسم حرمتك..
قرناس\هش لا اسميها ايرم واخليك تبكي..
هيثم بعصبيه\لا تقول اسمها قدامه..
سعود يبتسم\تقصد ايرم بنتنا..؟
هيثم\وش الي يخليها تصير بنتكم..؟
قرناس بتعجب\ايرم بنتنا حن..
سعود\هي بنت عمي وبنت خالتكم..
قرناس بتحليل\يعني حن وانتوا قرايب..
سعود بحذر\يعني بينا دم وقرابة..
هيثم\ودامكم قرايبنا ليش مانعرفكم.؟
سعود بهدؤ\ظروف..
قرناس بتفكير\عندكم عيال بعمرنا.؟
سعود يبتسم\ايــه ولد أخوي بعمركم تقريبا..
هيثم\عادي نتعرف عليه نبي نصير أخويا مثل جدي راشد وجدي مساعد..
سعود بمحبة\اكيد تقدرون بس يرجع من السفر ان شاء الله أعرفكم عليه..
قرناس بحماس\وش اسمه خوينا .؟
سعود\اسمه عقاب ..

قرناس وهيثم بعد ماسمعوا اسم عقاب ناظروا بعض وابتسموا وهالشيء لاحظه سعود وابتسم ولكن صابه فضول يعرف سر ابتسامتهم..
سعود\أعجبكم الاسم..؟
قرناس\إيــه أكيد هذا الاسم مايسمى به الا الكفو ..
هيثم بتعزيز\أشهد إنك صادق ..
سعود يضحك\يعني تعرف أحد بهالاسم..
الاثنين بعناد\لا مانعرف ..
مشوا عنه وحطوا يدينهم حوالين رقاب بعض..
قرناس\تعال شف الحصان السوم وصل مليونين..
هيثم بشهقة\تبي تبيع حصان أمي .؟
قرناس بغمزة\خل نهايط عليه..
سعود يضحك بصوت عالي ويحاول يكاسرهم بسعر الحصان..

أما سراب بخوف صارت تدور حوالين نفسها تبي تسوي اي شي يمنعهم يدخلون اسطبلات الخيل..
وبدون تفكير وبكل قوة صوتيه عندها صرخت بكل صوتها تنادي اي احد قريب يساعدها..
ولا قفلت فمها لحتى شافت سعود والاقزام الي معه مغيرين طريقهم يركضون لجهة الصوت..
ووقتها بدت تركض بكل سرعتها وهي تحلف ماتنصب ولا تسرق مرة ثانيه..ولاحسبت حساب الشايبين الي بيقابلونها ويقطعون عليها طريق الهروب..بعد ماسمعوا صوتها وهي تصرخ بكل صوتها..
فصارت بين الشايبين الي قدامها..
وسعود والي معه بيوصلون لمكانها بثواني..
توجهت لجدها وتخبت وراه وهي تتراجف وتتمسك بثوبه تبي تختفي عن عيون سعود لا يعرفها..
الجد راشد\وش فيك يابنت صبيتي عظامي..؟
سراب بهمس\تكفى يبه صرفهم تكفى..
الجد مساعد باستغراب\عسى ماشر يابوك..؟
سراب بخوف\شفت ثعبان حيوان..

لما شافت سعود واقف قدام الشايبين لصقت بظهر جدها وهي تكتم نفسها وصوتها..
سعود\عســى ماشر يابو جابر..؟
الجد راشد بفشلة\ماشر يابوك البنت شافت حنش وارهبتنا ذا الليل..
قرناس\حنــش..؟! وبعدين من انتي .؟
هيثم\من وين حنش اول مرة تصير..!
سراب تتوعدهم بداخلها\خلوا ضيوفكم يروحون لا اطلع الحنش من عيونكم يا ورعان قصايد..
الجد راشد باحراج يحاول يصرف\تفضلوا للمجلس بادخل بنتي واجيكم..

سعود وجده انسحبوا متوجهين للمجلس..وبفضول قرب قرناس من سراب يحاول يعرف من هذي المتمسكة بجده..
قرناس\هيه من انتي يابت.؟
سراب بقهر\البنت الي بتمصع رقبتك..انت وناقتك..
قرناس بفزع\اعوذ بالله منك وش جابك بذا الليل الاسود..؟
هيثم بصدمة\عشان سمينا الناقة باسمك جايتنا بشرك..؟
سراب بعصبيه\ امشوا البيت معي لين يروحون ضيوف جدي ونتفاهم..
قرناس يبتعد عنها\ لا والله عندنا ضيوف ماندخل لين يروحون..
هيثم بعجل\ادخلي انتي البيت وحن بنجيك..
الجد راشد بحزم \ولا كلمة ادخل انت واياه مع سراب وانا بعد مايروحون ضيوفي اجيكم..
كنت مشغول عليكم بعد ماطلعتوا..
قرناس بضيق\لا تخاف علينا وبعدين كنا مع شرطي يشبه عمي سعود..
هيثم\ايه يشبهه ذكرني بهذاك الي وجهه مقطوع..تذكره؟
قرناس\ايه القناص..يشبه ابونا..وهذا يشبه عمنا..
هيثم\يبيلنا جلسة مع أمك يولد.. مو الشرطي يقول هم اقاربنا..؟
قرناس\تعال نساله وش قرابتهم الحقيقية لنا..؟

سراب تحركت وسحبت قرناس وهيثم قبل يهربون ويرجعون لمجلس الشعر..
قرناس\فكي لا افك وجهك..
سراب بعصبيه\اص لا اصفقك الحين..

قربت من جدها وتكلمت بصوت خافت لا يسمعونها هيثم وقرناس الي معصبين ويهددونها تفكهم..
سراب\يبه هذا سعود الي مسكنا بالمستشفى انا وسحاب..
وكانوا ماخذينه يشوف الخيل وانت تعرف قصايد وش مسوية..
الجد راشد بضيق\انا الي قلت لها تجيبه هنا..قلت يبقى قريب وتحت عيونا..ماحسبت ان مساعد بيجي ويجيب عياله معه..
سراب\تكفى يبه خفت يعرفني..وهالاقزام لسانهم وش طوله..
وان عرفت قصايد هجت وخذتهم معها..
الجد راشد بحزم\قرناس بس اسمع الكلام ادخلوا مع سراب ولا تتكلم مع حد عن اي شيء..
قرناس بغضب\بكيفها هي وش جابها اصلا هنا هذي النشبه .. شف اصلا كيف ماسكتني هي..
الجد راشد\لا ترادد بالكلام ادخل وبعدين لنا كلام انا وانت واخوك..
هيثم بزعل\ قلت بننام معك في بيت الشعر..وبعدين جدي مساعد عندنا عيب نخليه لحاله..

سراب\يبه مابتخلص حنتهم..ابي اقولك شي مهم بما ان جد ايرم هنا..عشان توقفهم عند حدهم..
الجد راشد بغضب\تأدبي يابنت..ماجانا من الرجال شيء..
سراب\يبه انت ماتدري وش صاار في ايرم.. جيتك وهي عندنا في البيت وحالتها حالة..
الجد راشد بفزع\لـــيه.. وش فيها.؟
سراب بضيق\هلها زوجوها لولد عمها وهي ماتدري..وجاتنا بهالليل هاربة منهم..
الجد راشد بصدمة\أبــو جابر..تقولينها صادقة..
سراب\والله اني صادقة..ماتحملت اشوفها بهالحال واسكت..يبه انت قلبك كبير لنا كلنا..وصار الوقت الي تعطي لايرم من حمايتك الي عطيته لنا أنا وخواتي..وقصايد وعيالها..
الجد راشد بغضب\هذي اخرتها يامساعد..تزوجها ولا لها راي ولا قيمة..والله ان يبطون عنها وانا ابو جابر..والله ان يبطون
سراب بتردد\يبه ترى زوجها قهرها الليلة..جابها عندنا وهي تبكي ..وهي جاتك لبيتك تبي الراحة..تكفى لا تردها لهم لين ترضى..
الجد راشد بوعيد \لا والله ما اردها لين يسوقون الرضى لها هو وعياله..وعندي في بيتي ومجلسي ..

بغضب يشبه النار المدفونة تحت الرماد كان هذا حال الغضب بقلب الجد راشد الي كتمه سنين على مساعد وعياله.. وقهره على بنته الي كانت تذبل قدامه ترتجي اليوم الي تجتمع فيه مع بنتها بعد مافقدت زوجها وحبيبها..وبعدها يموت اخوها ثم تنحرم من بنتها..توجه لمجلس الشعر وهو يتوعد بمساعد وعياله..
فاتت سنين يامساعد تكابرت فيها وحرمت البنت من امها وسكتنا.. بس والله ولو يرجع بينا دم ماتبقى ايرم تحت شورك..
دخل المجلس وهو يرمي حق الضيف على عتبة الباب..

&&&&&&&&&&&&&&&&&&

ثـــم إنني ..
سأنتظر ذلك اليوم الذي أقف به أمام الله..
وتقف أنت بجانبي ومعنا كل هؤلاء..
اللذين فرقوا مابيني وبين إبنتــــي ..
وسيتكفل الله بأمـــركم جميـــعاً..
ولــــــــــــن أغفر ..

أم إيــــرم ..

الجد راشد بغضب\ علمني يا ابو صالح يومك ناوي قهر لليتيمة وشهو له مخليها في حماك وبيتك..؟
الجد مساعد بصدمة\أنت عرفت..؟
الجد راشد\إيـــه عرفت ليه ناوي تخلي زواجها سر حتى علي انا..؟ إيـــرم وش لكم فيها تزوجها بدون شورها ورضاها..؟
عنبوا دارن سكنتوها إن ضاقت عليكم عطني إياها العين أوسع لها من الدنيا كلها..
الجد مساعد بغضب\لا تزيــدها يا راشد .. الحلال والمال كله لها..
ابو جابر \ ليـــــه تجبرها .؟؟ وين بتوصل بظلمك للبنت.. مايكفيك إنها عاشت يتيمة بدون أب..وقررت تيتمها من أمها وتسرق طفولتها..سكت وقلت بكرة بيعقل مساعد ويرد البنت لأمها.. مــــــاتت يا مساعد بنتي ماتت لا شافت بنتها ولا تهنت فيها.. بنتي الي رجتني أجيك واطلبك تعطيها بنتها..
تحملت أشوفها ترتجي اليوم الي تجتمع فيه بايرم.. كم مرة جددت غرفة بنتها من غرفة طفلة لغرفة مراهقة إلى غرفة شابة.. تغير الديكور وتجدد الألوان ومتأملة بيوم تكون أم لبنت انت سلبتها إياها..

الجد مساعد بندم \ والله إنه ذنب ماينغفر يا راشد.. والله إن خبر موتها فجعني أكبر من فجيعتي بموت عيالي.. وإني بكيتها مابكيت عيالي.. أنا اللي يومني شاب طايش ضربت هندي وبعدها رحت ادوره من مكان لمكان لحتى لقيته اطلب منه السماح خايف من يوم القضاء..انت تذكر حالي زين كيف كان .. قلي وش تتوقع صار فيني وأنا ازور قبر بنتك نادم ومكسور.. قلي وين القى بنتك واتعذر منها.. بأي موقف بأوقف مقابلها قدام ربي وهي تطلب بأن الله ينتقم لها مني ومن ظلمي.. موت بنتك كسرني ياراشد والله إنه كسرني..حتــى ولدي يوم ينشدني في حرمته وبنته وش صار فيهم عقب عينه وش بأقوله ياراشد..؟ دبــرني قبل الحقه وش اقول وش ابرر لولدي وحرمته عن بنتهم وعن وجيعتها بعدهم..؟

ابو جابر بقهر\ قل لهم انك قهرتها..إنك حرمتها من أمها من خوالها..قل زوجتها وهي لا علم ولا خبر..قل وسلمتها لمن يقهرها مضويها ساري ليل لبيتي قاهرها ومبكيها..

الجد مساعد بغضب\أبو صالح..من الي مبكيها..؟
والله ماخليت من يقهرها..إن ادفنه بأرضه.. وإن ارضيها ذا الليل..

ابو جابر بحزم\لا واللي خلقها سبع ماتشوفها الليلة ولا ليلة ثانية لين هي ترضى عليك وعليهم..وإن هي ماتبي أسود الوجه الي زوجتها له إن يطلقها ولا رملتها منه..

الجد مساعد بقهر\تحلف علي من بنتي ياراشد..؟
ابو جابر\إيــــه أحلف عليك منها وأمنعك عنها وإلي فيه خير منك ومن هلك يوريني وجهه ويقبل علي..
الجد مساعد\لا والله إني ماخذها منك الليلة ولا أنت الي غشيم عن مساعد..
ابو جابر بغضب\ولا انت الغشيم عني يامساعد..والله ماتعرفونها إلا إن أمسيت الليلة في المقبرة..

سعود بعد ماوصلت بين الجبلين الغاضبين لباب المقبرة والقتل..قرر يتدخل ويكون محضر خير بينهم قبل يكبر الموضوع ويوصل لعمامه أو إخوانه رعد وفهد إللي مستحيل يمسون الليلة وراشد ابو قاتل أبوهم مهدد يقتل الي يقرب منهم من ايرم .. إخوانه ماتخطوا قصة قتل أبوهم .. ولا تخطوا وجود ظافر بحياتهم ..
هو بنفسه غاضب من كلام واسلوب ابو جابر ولكنه يعرف مجابهة الغضب بالغضب أو العناد بالعناد ماله نتيجة..

سعود بصوت أعلى من اصوات الشياب\إذكـروا الله وصلوا على النبي..صلوا على خير البشر وإطردوا إبليس عنكم ..

تحرك من مكانه ووقف بين الرجلين الغاضبين.. صار يردد عليهم يصلون على النبي الكريم عليه الصلاة والسلام..
سعود بمحايلة \ البنت بنتكم اثنينكم ولاحد يهمه أمرها وصلاحها اكثر منكم..تعوذوا من الشيطان سريتونا المقابر وهذا اول لقاء بينا بعد هالسنين كلها..تذكروا إن آخر لقاء بينكم كان بالمقبرة خلوا لقاكم في خير ..

صد عنهم ابو جابر وهو يذكر الله ويصلي على النبي ويردد في باله إنه مابيرضى يخليهم ياخذونها.. تحمل يشوفها تدخل بيتهم تدور على امها وهي موجوعه منهم..تدخل غرفة أمها تبكي وتنتحب..يدري لو ماتزعل مابتجي تدور الخلوة بحصن امها الراحلة..
تمنى لو بيوم يحتضنها ويقول وش مزعلك وش مضايقك.. بس إيرم مالقت فيه إللي فقدته.. هو يبقى غريب ماعرفته عمرها كله.. إللي يمتلك قلبها وروحها المساعدين..
هالاثنين الي شكرهم وكرهم لتملكهم لها ولرعايتها..
اللي حاصروها من طفولتها وحسسوها بالإكتمال وعدم حاجتها لأم دللوها وأتخموها بالحنية والأمان لحتى ماعادت تحتاجه ولا تحتاج أحد غيرهم..

الجد مساعد بإنفعال\يا أبو جابر والله إنك سودتها بوجهي..
إنت تساومني في إيرم ولا يغرك من إيرم لمساعد..
أبو جابر بحزم\ولإني أعرف فمالك عندي عذر يشفع سواتك فيها..

سعود بهدؤ\ياعم راشد الله يحفظك.. البنت رابية عند جدها والزواج تم بموافقتها ورضاها..وإن صار بينها هي وزوجها شي الليلة فمالنا علم فيه..حن عندك وعرفنا منك..ولا حن اللي بنرضى بزعلها..
الجد مساعد\والله إن كان موجعها ومزعلها إن أنا الي أخذ حقها منه..
ابو جابر بقهر\كثر الله خيرك لا تاخذ حقها ولا تكلف على نفسك.. هذي المرة لي انا يامساعد.. ولا انت بمانعني عن حقها لا أخذه لها.. هي جاتني بتالي الليل وهذاك حالها وانا حلفت ماتطلع الا راضية بالي يرضيها صدق..

الجد مساعد برفض\ بنتــ ....
ابو جابر بمقاطعه \عطيتني العهـــد يا مساعد.. عاهدتني وقلت لو هي رقبتك بتعطيني إن طلبتها.. رقبتك سالمة ما أبيها.. البنت عندي وماتطلع إلا بشوري وحكمي..

تذكر الجد مساعد وعده لصاحبه لما ألتقوا قبل فترة وكيف عاهده إن طلب شي بالدنيا فبيعطيه وبدون تراجع..
الجد مساعد بحسرة\ وماطلبت إلا ايرم ياراشد..؟ والله إنك عرفت من وين تأكل كتفي..
ابو جابر بضيق\ ماكان هذا وقت طلبتي لك.. وضيعت من يدي عهدك لشي أكبر وأعظم..
الجد مساعد\ وش مخبي ياراشد ..؟ وش بينا وملزم على عهدي ..
ابو جابر بحزم\ بينا يامساعد شيء لو تدري به مايبقى بينا صلح ولا خير.. وإلى هذاك اليوم إللي بتجيني تطلب طلبتك مني.. فخذ ردي من الليلة.. والله إن رقبتي بينكم .. ماتاخذون مني قبل تاخذون رقبتي..

الجد مساعد بفزع\ منهم..؟ إللي بيني وبينك يالخوي ماتوا.. ماتـــوا ياراشد من بقى يشب نار بيني وبينك..؟ لا تخلي بينا غير عيالنا الي ماتوا وكسرونا طالبك يا ابو جابر.. طالبك لا تخلي لعدو بيني وبينك مجال..
ابو جابر بضيق\ عــــــدو ؟؟! أكبر عدو للإنسان هـــــي نفسه ..

صد عنهم أبو جابر وخرج من المجلس تارك سعود يمسك يد جده الهايم بتفكيره..وش بينا ياراشد..؟
والله إني مانع عيالي عنك .. لاحدن يضرك بكلام ولا يتعرض لك.. وش الي بيني وبينك وبيهدم الطريق بيني وبينك ..

سعود بحذر\ يـــبه .. وش يقصد أبو جابر..؟
الجد مساعد \ الله العالم يابوك.. بس من كلامه إن لي عنده حق ومصيري أطلبه منه..وهو مابيعطيني حقي..

مشى الجد مساعد وسحب يده من يد سعود خارج من مجلس صاحبه وهو يعيد حساباته من أول وجديد.. لابد يعرف وش اللي يخبيه عنه راشد..

وقف بخطواته لما شاف الجد راشد واقف مقابل له عند سيارته..
ما يعتقد إن راشد ينتظرهم يودعهم كضيوف..وصدق ظنه لما تكلم الجد راشد بسؤاله الغاضب..
ابو جابر \ لمن زوجت إيرم يا مساعد ..؟
الجد مساعد \ خذاها الي يستاهلها.. مساعد ولد صالح..
ابو جابر برفض\ محد يستاهلها ومساعد بالذات مايستاهلها..

أنسحب بعد كلمته وهو يتنهد براحة بعد ما تطمن إن زوج إيرم ماهو رعد .. لو كان رعد كنت قاتله الليلة..
أولتها حنين والليلة ايرم..
وسديم كيف اخلصها من ولدك..
وش يفك بناتي من عيالك يامساعد..

&&&&&&&&&&&&&&&&&&&&&

قفلت حنين باب الشقة ونزلت عبايتها وطرحتها وتوجهت بخطوات سريعة لغرفة النوم..
وتقابلت نظراتها بنظرات سديم الدامعة..
رفعت سديم يدينها تطلب قربها منها ..وحنين بلحظات صارت جنبها تحتضنها وتسمح لها تبكي وتعبر عن حالها..
قصايد بحنية\ألحين ليش كل هالبكي..؟
سديم بحب\لأني أحبك واشتقت لك.. سنين وانا أنتظر أشوفك حقيقة قدامي.. صح نتكالم بس ياحنين أخر مرة شفتك كنتي شبه ميته..
وبقت صورتك الأخيرة في بالي ماتروح..
قصايد بهدؤ\خلاص إنسي انا تشافيت.. شوفيني الحين هل معقولة الي تشوفينها ألحين نفس الي كانت قبل سنين..
سديم بحزن\ مقدر والله مقدر .. كل ماشفت رعد أبي أقتله.. ابي أكسر عظامه مقابل عظامك الي انكسرت.. ابي اقتلـــه..
قصايد بحزم\ خليـــه يا سديم هو صحى الحين وصار الوقت يستلم قيادة حربه بنفسه بعد مارماها علي ونام ..
إللي يهمني ألحين أخلصك من عمه المجنون..وبعدها اخذك إنتي وعيالي ونترك القارة كلها له..
سديم برعب\ لا حنين تكفين مقدر اخلي يوسف..
قصايد مايهمها يوسف\ إنتي نامي الحين وإرتاحي وأنا باروح اشوف العيال وسراب..وبأرجعلك الفجر الممرضة موجودة معك لا تخافين إنتي مو لحالك..
سديم\خليك معي تكفين ..
قصايد بحب تضمها بقوة\إنتـــي تأمرين ياروحي..بأبقى معك وبأروح لهم الفجر واجيبهم عندك هنا...
سديم بفرح\لا خلاص روحي ألحين وجيبيهم..
قصايد تضحك\لا وين مشوار اروح المزرعة وارجع بيت خالي اشوف ايرم حبيبتي خليتها نايمة وجيتك لما تاكدت منها ان رعد مسافر..
سديم بقهر\ الحيوانة ايرم خلتني طول اليوم لحالي.. ويوسف ظل محاصرني وخايف لا اضيع منه..
قصايد\اعرف انك تعبتي اليوم كثير كان لازم اخذك الليلة لانهم ماتوقعوا أعيدها بنفس اليوم وتطمنوا ان يوسف عندك..
فاللي مايتوقعه منك عدوك سويه..ابدا لا تسوين شي هو يتوقعه..
سديم بتردد\حين وش بيصير على يوسف بيصحى ماعنده أحد وبيخاف..
قصايد \ بيدبر نفسه معليك منه..
سديم بزعل\ والله صغير هو مايقدر يتصرف.. بيخاف وبيدورني..
قصايد\خليه بكيفه..لا تفكرين فيه..هله مابيخلونه..
سديم\ترى باخذه معي يسافر معنا..
قصايد بعتب\ سديم هذا عم رعد واخوانه.. ولو كان مريض مثل ماتقولين.. يبقى بصفهم ولدهم هو مالنا قدرة ناخذه معنا..
سديم بتصميم\والله لأخذه منهم..غنتي ماتدرين وش يسوون فيه..
قصايد بحزم\مابناخذه لا تجننيني معك..وش فيك واعية لكلامك..
سديم بعبرة\والله هم معذبينه وكلهم يضربونه..
تدرين ليش أنا دخلت المستشفى وهذا حالي لأنهم ثلاثة هجموا عليه وصاروا يضربونه وانا كنت باساعده منهم وضربني رعد وطحت على الطاولة..يوسف مسكين ومظلوم..
قصايد بقهر\عساهم المرض الي تسببوا بحالتك هذي..
وهو ياروحي عنده أب وإخوانه ماشاء الله ماينعدون بينصفونه..
سديم تبكي\والله محد يهتم فيه..حتى الشغالة تضربه ومحد يدري..
حنين هو مثلي لما كانت عمتي وزوجها يضربوني.. أمي عذوب منعتهم عني كثير بس أحيان كانوا يقدرون علي.. هو أنا لازم اصير له أمي عذوب..
قصايد بندم\ لا هــو مو أنتي.. سديم ياروحي توك صغيرة تصيرين أمه ومسئولة عنه.. لو الحقير رعد مازوجك له بالغصب ماعرفتيه.. إنتي إذا تركتيه الحين لا تعتبين على نفسك.. إنتي تعرفين إنك تزوجتيه غصب عنك..ولأنك مابتتحملين واحد مريض مثله..لازم تبتعدين عنه الحين..
سديم بنحيب\لا هو متعلق فيني كثير هو يحس بأمان معي.. يكرهم كان يقولي خلينا نهرب منهم وأنا وعدته اخذه معي..
قصايد \ لا تعطين وعود خارجة عن قدرتك.. إنتي مالك علاقة فيه .. إعتبريه شخص عابر ساعدك وساعدتيه وأنهيه من حياتك..

سديم بعدم قبول لكلام قصايد ضمت نفسها لها وهي تبكي من محبتها لأختها ومن خوفها على يوسف.. مستحيل اترك يوسف ياحنين..إنتي لو تعرفينه بتاخذينه معنا..
لازم اخليك تشوفينه وتعرفينه عشان ترضين ناخذه منهم..

&&&&&&&&&&&&&&&&&&&&&&&

وهذا اليوم الثالث أنتهى ورعد راجع لبيته بعد ما نفذ خطته وألتقى بأفراد من الماضي.. الماضي إللي عاشه مجبر بأوكار العصابات والتهريب والجرائم..
لا هله يدرون عنه وعن مصايب شغله.. ولا يقدر يخرج نفسه من أي مشكلة بإظهار شخصيته الحقيقية..
إن تعرض للتوقيف بنقاط التفتيش كان يدخل السجن ويبقى لحتى ينتهي التحقيق وأحيانا كان يضطر يلجاء للتهديد وإخافة الناس كرجل عصابة حقيقي..
وهذا الشيء كان يبث الثقة برجال عصابته عليه ويثقون انه كفو يكون زعيم عليهم وعلى ثرواتهم..
ولأنه بشغل العصابات الغلط ممنوع والي يغلط ويتسبب بكشف احد عليات التهريب يتم إعدامه أو معاقبته بشكل يخوف باقي افراد العصابة..
فكان بما إنه الزعيم هو المسئول عن معاقبة وقتل المقصرين بشغل العصابة..
يأخذ الفرد المقصر من عصابته لمكان نائي ويقتله فيه... ولكن رعد كان يسلمهم للسلطات بشكل سري جدا ويوهم عصابته بانه قتله ..
وهذا كان فيه خطر كبير عليه لو يسرب السجين خبر إن رعد سلمه للسلطات ماقتله بتثبت عليه تهمة خيانة العصابة وكان بيموت بأبشع الطرق..
رفع جواله وشاف الرقم وابتسم بسخرية لأنه يعرف مابتمضي ساعتين إلا وصاحب الرقم متنازل وراضي بكلام رعد له..

رعد بجمود \ من الاخر .. لا تضيع وقتي..
فارس \ تحت امرك يا زعيــــم ..
رعد بحدة\ مافيه تراجع يافارس.. ومثل مافهمتك حرب عصابات بعيد عن التهريب بعيد عن التجارة..
فارس بقهر\ فهمت يازعيم .. بس أتعابي واتعاب الشباب ماتضيع .. مثلك عارف محد يشتغل ببلاش..
رعد بعدم إهتمام \ أتعابكم بتندفع بس ما احد يدري من الشباب إن عصابتنا بدون تجارة يبقى الأمر بيني وبينك..
فارس \ تــم مثل ماتحب..
رعد بحزم \ مثــل ما أامر يا فارس..
فارس بطاعه إجبارية\ مثل ما تامر يازعيم..
رعد \ أول شيء أبي مكان سيف وكل معلومات تقدر تجمعها عنه أبيها..
فارس بوعد\ أبشــر يازعيم أجمعها لك ..
قفل رعد بدون اي كلمة إضافية بعد ماكان متاكد من خضوع فارس لطلبه بتشكيل عصابة من أكفئ الرجال اللي يعرفهم..
هو استغل حاجة فارس له ولحمايته بعد ما صار مطلوب من عصابة ضاعت شحنتهم بسببه..
وإذا عرفوا برجوع الزعيم هزيم لساحة العصبات وإن فارس صار تابع لعصابته أشياء كثير بتختلف..

وهــذا سيف وبدينا بمهمة التخلص منه..بس إنتي وينك ياحنين وش مورطة نفسك معه فيه..؟
بغضب مكبوت بدأ رعد يضرب مقود السيارة بقوة..وعروق يده نافرة من تجمع الدم..
كل ما يتخيل إن الدروب جمعت حنين بسيف .. يمووت من الغيض من القهر من الغيــــرة..
تبـــقى زوجته تبقى له ملكه حق من حقوقه..
كيف اتفقتي معه..؟
سيف ما احد يتفق معه..كنت زعيمه وكان مشقيني بكل امر..
كان خبيـــــث مايعطي لحتــــى يـــأخذ الدبل ثلاث مرات..
وش أخــــذ منك..؟!
ابــن ال..................

وقف سيارته بعنف ونزل منها مو قادر يسيطر على عصبيته وقهره... الغيرة من سنين كانت تصنع منه وحــش ما أحد يتحمله..
وحنيــن ماكانت الوحيدة إللي حس هالشعور المتملك لها..
فيه وحدة قبلها قتلته الغيرة مليون مرة من تفكيره فيها وهي في بيت غير بيته.. بأول أيام غيرته عليها تعرض لنوبة أدخلته المستشفى .. وبعدها توجه لشغله ودخل طواعية بتشكيل العصابات رغم كل التحذيرات اللي وجههوها له بأن هالطريق من بدايته هلاك وماله نهاية..
وفعلا مثل ماتمنى صار تشكيل العصابة يسحب منه شعور الغيرة والقهر االي كان يقتله.. أنشغل بعصابته لأكثر من سنة ونص كان يتنقل من مدينه لمدينه على حسب مصالح العصابة..
ويزور هله ويلقى استجواب من مساعد وسعود عن دخوله السجن كم مرة بسبب نقاط التفتيش.. وهو كان يتصنع معهم المشاكل لحتى يلقى سبب يبعده عن البيت لمدة أطول..

غصب عنه لما يوصل لمراحل عصبيته وقهره العظيم يتذكر كلمة الرجل المكرووه من كل قلبه.. لما واجهه بأحد نوبات عصبيته وما انسحب من مواجهته..
أبو حنين بحدة\ أرحنـــا بها يابلال .. هذا قول الرسول الكريم..
مايداويك غيرها يا رعـد أنا عشت إللي أنت عايشه الحين..
ولا يقطع غضبك إلا الصلاة..

كانت المرة الأولى الي يسمح لظافر ينصحه فيها ..
يسمح له يتكلم معه بدون دروع ..
بدون حواجز عظيمة قاهره..

كان بيومها في بيت عذوب غاضب من نفسه يومها لأنه ادرك بان زواجه من حنين صار يسحبه بقوقعة عشق هو رافضها..
قرر يزورها زيارة مفاجئة ويجرحها بهذا اللقاء او يكدرها..
لحتى تظهر له وجه ثاني غير وجهها الملائكي والجميل..
وتجابهه بعصبية متيقن إنها ما تملكها..
كان بيمنعها عن ابوها اذا تم زواجهم..
بيقطعها عن عذوب وبيتها..
بيقول لها اختك مالي فيها علاقة وتبقى عن ابوك وجدتها..
مابيك تدرسين ولا تكملين تعليم..
كان يفكر باي شي ممكن يغضبها يوجعها فيه..

بس لما دخل من الباب الرئيسي للبيت .. متوجه للمجلس الخارجي لبيت عذوب..
حس بان كل شياطين الارض تجمعت براسه وهو يشوف حنين متمسكة بابوها الغاضب تحتمي فيه من رجل ماتعرف عليه كان يشوفه من ورى بس..
ولكن حالة حنين وهي بدون غطاء على راسها ولا عباية..
ويدها من العضد أسيرة ليد الرجل الغريب عنه..
كان كفيل يجذب كل غضبه وقهره ويبدأ بهجوم قاسي على الشخص الغريب..

سحب الشخص الغريب من بين يدين ظافر ومسك يده الي كانت اسره يد حنين وبكل قوة يملكها ضربها من منتصفها ثلاث ضربات لحتى شاف العظم ينكسر..
ولا حس بأي إكتفاء..
فالشخص الغريب لازال واقف على رجلينه رغم صوت صراخ الالم القاهر الخارج من اوتاره الصوتيه..
بدون شعور رجع يضربه ويرميه بالارض ..

ظافر وعذوب وحتى حنين كانوا يسححبونه عنه لا يقتله..
وهو يرفض الانصات لهم..
لحتى بكت عذوب وهي ترمي شيلتها عليه ترتجيه ما يذبح مشــــــاري..
إللي قبل دخول رعد كان يتهاوش مع عمه عشانها ..
وليش زوجها للغريب وفضله عليه..

وقف لما سحبه ظافر بالقوة عن مشاري وصرخ بحنين تدخل معه لحتى يخرج مشاري من البيت..
رعــد بوعيد\ والله لو ما العذوب ووجها إنك ميت الليلة.. أنا واحد ماعندي شي أخســـره أنا بايعـــها والله بايـــعها روحي..
وإن شفتك قريب من هالبيت لا أكسر رجلينك وأتسبب بالشلل لك يا ابــن ..............

حنين كانت مرعوبة منه..وأنجبرت تمسكه وتحاول تمنعه يترك مشاري يخرجه ابوها..
يتذكر الرعب بعيونها لما التفت عليها وصرخ فيها بغضب..
رعــد\إدخـــلي قبل ألعن شكلك ..
وقبل تهرب منه مسكها وسحبها للمجلس وقفل الباب..

وقفها مواجه له وظهرها على الباب المقفول.. وهي ترتجف خايفة وتبكي بعد كل الي صار اليوم من هجوم مشاري ومضاربته مع ابوها.. وبعدها هجوم رعد ومحاولة قتله لمشاري..
حنين تبكي\رعـــد والله تخوفـــني إهداء تكفى..
رعد بحدة\ وش مخرجك قدامه بهالشكل..
حنين بتبرير \خفت على أبوي.. ما أنتبهت والله ما انتبهت على نفسي.. هو مو صاحي يمكن يقتله..
رعد يهزها بقوة\خليـــه يقتله..خليـــه يقتله ويريحني منه..
بس تطلعين كذا ليــــه ليـــه..؟
حنين بوجع باكي\ أبـــوي مقدر أخليه يئذيه..
رعد بوعـــيد \ماتقدرين تخلين أحــد يئذيه..؟
وهــو ليه يئذي النـــاس ليــــه يقهرهم ليــــه..؟؟

وبدأيضرب بيده على الباب بقوة من قهره..وحنين كانت منهارة من البكي والخوف منه..
ماتصدق إن هذا هو رعـــد حبيبها..
هــذا وحش مخيـــف..
وين مخبي كل هالقسوة ..
ماشفت منه الا الخييير..
نزلت على الارض وهي تضم ركبها وتبكي خايفة منه..
وتترجاه يبتعد عنها..
تراجع عنها قبل يتهور أكثر بعصبيته..
وبدا يتنفس بشكل سريع يحاول يهدأ..
ألتفت لما سمع صوت الباب ينفتح..
وشافها تبي تخرج هاربة منه..
وبخطوات سريعة وصل لها..وضمها من ورى ورجع يقفل الباب..
وهي بخوف بدت تبكي وتحاول تفك يدينه عنها عشان تهرب منه..
رعـد برجاء\ هشششش بس تكفين إهدي.. لا تخافين مني..
مستحيـــل أضرك..
حنين بخوف\إبــــعد يدينك عنـــي.. والله ما أظل معك..
انــت مو صاحي مو صاحـــــي..

أحتضنها رعد أكثر وهو يوزع قبلاته المعتذرة على شعرها وطرف وجهها..
رعد بهمس\أنا حبيـــبك رعــد.. سامحيني كنت مقهور منه..
كيف يلمسك كيف يسمح لنفسه يشوفك.. المفروض أنا خرجت عيونه من مكانها..
حنين بخوف\رعــد تكفى فكني.. وربي مرعوبة منك..
رعد بحنية\ ما أتركك.. انتي روحي ياحنين..
ماتحملت وجيت كل هالمسافة عشان أتاكد.. هل أنتي حقيقة او أنا عطيت الخيال مجال يتحكم فيني..
حنين برجاء\والله خـــايفة منك.. تكفـــى رعد نزلني .. انت تكرهني وتكره ابوي..

نزلها رعد بالارض بس ماسمح لها تبعد عنه لفها له وصار وجها المرعوب مقابل لوجهه..
لصق جبينه بجبينها وباسها على عيونها..
وصار يمسح دموعها بشفايفه وهو يردد عليها كلماته المحبــة..
رعـد بحنية\ الغاضب ما احد ياخذ بكلامه ياقلبي..
قلت كلامي عن ابوك لانهم العن ابو الكلب الي كان عنده..
وأنا اذا ما احبك وابيك وش يجبرني عليك..

حنين بخوف\ واذا انت عصبت بعدين مني..
وش بتســـوي فيني..؟!

سالتيني وش بـــاسوي فيك..؟
بيومهـــا حتى دمك يمكن ما يكفيني..
نزل على ركبه ومد كفينه على التراب وبدأ يتيمم..
توجه للقبلة وبدأ يصلي متبع نصيحة ظافر..
هالنصيحة إللي كانت وسيلته للهروب من نفسه من بعد ماصحى من غيبوبته وعرف بموت ظافر..

&&&&&&&&&&&&&&&&&&&&

مجتمعين في مجلس أبوهم مترقبين سبب جمعه لهم هم وعيالهم..
فهد وثنين من عيال عمامه مراهقين كانوا يدورون بالقهوة بالمجلس.. وهذي ثاني مرة تدور القهوة ولا زال الجد مساعد معتصم بصمته..
صالح بهدؤ\ســم يبه طال عمرك وش العلم إللي قلت لي أجمع إخواني وعيالهم عشانه..
الجد مساعد \ مابعد أكتملتوا أنتوا ناقصين..
صالح\يوسف وتعرف حاله من بعد نوبته الأخيرة..أما رعد فهو على وصول..
الجد مساعد\وهـــو ؟؟!
صالح باستفهام\ مـــن تقصد يبه ..؟
الجد مساعد\ ولـــدك ..؟!
صالح بصدمة\مســاعد تبيه يجي..؟
سعود\إيــه يا عم..أنا كلمته وجاي بالطريق..

وقبل يرد عليه ابو مساعد او جده كان رعد واقف على باب المجلس يسلم بصوت عالي..
توجه لجده وسلم عليه ثم تواجه مع عمامه وعيالهم..
ورجع يجلس بمكان سعود جنب جده..
رعد بمحبة\طمني عنك يبه..عساك طيب.؟
الجد مساعد بمحايلة\لك ولا للذيب ..؟
رعد بحمية\ لا والله يخسي الذيب..
الجد مساعد بحدة\عطني وجهك .
رعد بفزع\وجهــي لك وأنا تحت شورك يبه..
الجد وهو يشوف مساعد داخل\أنا في وجهك من مساعد لا يفشلني في راشد ابو جابر..
رعد بقهر\ابو عقاب والله ان يبطي مساعد وغيره مايفشلونك ولا يضايقونك..الرجال مابقى بينه وبينا شي..

وقف رعد وهو يشوف مساعد مقبل لجهة جده وعمامه ..
وضاق خاطره وهو يشوف جده مشتاق لمساعد ومتلهف عليه.. وهو متاكد إن جده طلب عونه على مساعد لأن فيه مصيبة بتنقال بالمجلس..والجد مساعد خايف مايقدر على مساعد بسبب الجفاء الي بينهم..
أنحنى مساعد على جده وحط شفايفه على راسه..
كان المقصد بوسه خفيفة ويبتعد إحتراما لصد جده وحاله قدام عياله.. ولكن ريحة اللقاء بعد فراق سنين عجاف اجبره يطول بإنحنائه عليه..هو يشم ريحة الرضى بعد الصد والجفاء..
والجد مساعد بعدم شعور كف يده يمسك بجيب مساعد وكأنه يرتجي يطول بقربه منه..
بتنهيدة قهر يدري إنه بعد مايدري مساعد بهروب ايرم لخوالها
يجفاه ويقسى أكثر.. فحب يدلل روحه المشتاقة لحفيده الغالي بلحظات مسروقه من الزمن.. شد اصابعه أكثر على جيب مساعد
إللي أبتسم بحب لما حس بأصابع جده تجذب جيب ثوبه بطلب غير منطوق ..
ما أحد من الموجودين تجرأ ينطق بحرف بلحظات لقاء المساعدين.. اللقاء الصــــامت..
الكل أحترم صمتهم وسلامهم القاسي رغم صمته..
ما أرتفع مساعد عن جده لحتى حس باصابع جده ترتخي عن جيب ثوبه.. أرتفع عنه وتوجه لأبوه وعمامه يواجهم ..
جلس جنب رعد بعد ماسلم عليه..
قرب فهد منهم بدلة القهوة\وارحب يا مســاعد والله إني صادق..
مساعد يبتسم\البقاء يابو راكان..
فهد بمحبة\أشهد إن المجلس ناقص بدونك..
مساعد\عـــامر بهله..
رعد \فهيدان ماترد على اتصالاتي لي ثلاث ايام وش المانع.؟
فهد بتردد\ أنا ..؟! من إللي قاله ؟
رعد بحدة\وش مخبي عني يافهد.؟
فهد\ شف أنا مالي شغل فيكم بريء منكم ومن مصايبكم..
أنت ماقلت لي اصير حارس وكذا..وصار اللي صار..
رعد بعصبية\وش صار..؟تكلم لا أصفقك..؟
فهد برفض\لا تصفقني ولا اصفقك.. العلم عند سعود..
سعود بصدمة\ وأنا وش دخلني..
فهد \ انت الكبير علمه..
رعد بهمس غاضب\تكلموا لا العن شكلك انت وهو..
مساعد بهدؤ\ أنا بأعلمك وش صار.. بس لما نطلع من مجلس جدي..
رعد بحدة\قـــم ألحين علمني وش يصبرني..
سعود بعجل\ لا لاتقومون جدي يبيكم..

ألتفتوا عليه الثلاثة بحيرة وأيقنوا ان سعود يدري وش يبي فيهم جده..
رعد بحزم\أنت عندك خبر وش بيقول..؟
سعود\ بيوصلكم الخبر.. أنتوا طالبكم إن تصلون على النبي وتهدون ..ترى الإنفعال والتعجل مايحل شيء..
فهد بعدم صبر\سعود وش العلم..؟

الجد مساعد بصوت عالي\من إللي منكم فيه خير يكسر لي كلمة..؟
صالح أبو مساعد\لا كنا يبه ولا صرنا.. ماهو بأنت إللي تنكسر كلمتك..
الجد مساعد\من فيكم إللي يهون عليه إني ثلاث ايام بلياليها لا نمت ولا عرفت الزاد والراحة..
صالح بجزع\ليـــه يالغالي عساني فدا رجلينك..؟ وش إللي مكدر خاطرك .. من يومين الحق وراك وانت اتعذر مني.. والله ماتهون يبه انت عارف بقدرك ومايغرك..

وكتأكيد على كلام صالح ( أبو مساعد ) ضاج المجلس بترديد نفس كلام الحب والطاعة للجد مساعد..

وقف سعود بعد ما اشار له جده مساعد بإتفاق مسبق بينه وبين جده إنه يحاول يكون الوسيط بين عائلته وخوال ايرم..
ويحاول يرضي جميع الأطراف ..

سعود \الأولة الصلاة على النبي تعمر بها المجالس..
فصلوا على النبي وعينوا خير من الله..
والثانية الديرة إللي حن ساكنين فيها لها حكم وقوانين مايمشي حكم القبايل والطيش..
أنا جدي مساعد وكلني أكون وسيط ووكيل عنكم كلكم في أمر تجهلونه إلى هاللحظة.. وإن شاء الله بس تعرفونه ترضون بوساطتي فيه..
صالح أبو مساعد بترقب\ إختصر ياعمك وش العلم..؟
سعود\ العلم بيبلغكم به جدي.. بس أنتوا إتركوا الإنفعال عنكم ..
مساعد بحدة\وش العـــلم ياسعود..؟
الجد مساعد بحدة مشابهه\ العـــلم إيــرم .. راحت لخوالها..
صالح بهدؤ\يبــه ربي يحفظك إيرم من زمن تروح لخوالها..
عطنــــا باقي العلم..
الجد مساعد\ البــاقي وأنا أبوك إنها راحت هاربة.. إيـرم دخلت بوجه جدها راشد مني ومنكم..

قبل يكمل باقي كلامه لهم وقفوا اللي بالمجلس مستنكرين رافعين الصوت بغضب واستنكار على ايرم وعلى دخولها بحمى جدها عدوهم..
صالح ابو مساعد بغضب\ وليه هربت..؟ ومنهو راشد تدخل بحماه منا..؟ وايرم وش لقت منا وغثها وخلاها تهرب.؟
الجد مساعد\ إيرم هاربة لسبب مابعد عرفته أنا عشان أقوله لكم..
بس إللي أعرفه إن جدها راشد حالف يمين ماترجع هنا لين ترضى وإن مارضت ماعاد ترجع..
فهد بغيض\ومنهو راشد عشان يحل ويرط فينا وفي بنتنا..؟
والله أن أمسك الخط إلى بيته ويخرج بنتنا من ورى خشمه..
محمد أحد أولاد مساعد\ شكله كان ينتظر متى يلقى فرصة وينتقم لموت ولده.. واليوم لقى هريبت ايرم له شي ينتقم فيه..
....\ وليــــه تهرب.؟وش سبب هروبها من بيت أهلها..؟
......\ يبــه البنت تبي تفضحنا بالعرب..هاربة من هلها لخوالها..
....\ ونا من اسبوع نبي نحدد زواجها بمساعد .. وش الي خلاها تهرب..؟
فهد بغضب\وانتوا باقي تسئلون ليه تهرب وليه تروح..
ماسمعتوني يوم قلت مالنا ومال خوالها..امسكوا البنت لا اتمادى بسيرة خوالها..وهذي أخرتها صار ابو المجرم يساومنا عليها..
بس والله ماني بعلى رجال إن تضوي الليلة ولو انثر دمه الشايب المحتال..

رعد فز بسرعه ومسك فهد قبل يطلع من المجلس وأجبره يجلس بمساعدة أخوه سعود..
رعد بغضب\مابينثر دمك غيري إجلس وخلنا نفهم باقي السالفة من جدي..
فهد يحاول يفك نفسه من سعود\وش تبي تفهم..يقولك البنت هربت لخوالها.. مالقت إلا هم تحتمي بهم..وش الي جاها منا عشان تطعنا كذا.؟هي تدري وش بينا وبينهم هي تدري..
الجد مساعد بغضب\وش اللي بينا وبينهم يافهد..؟ عيالي ماتوا وولده مات..كلن في قبره وطوتهم السنين..وش الثار الي تدور عليه..
فهد بقهر\ لا ماطوته السنين.. إذا أنت نسيت ولدك وهي نست ابوها أنا مانسيت ابوي.. مانسيته دمه الى اليوم على وجهي إلى اليوم..
سعود بحدة\إهداء واسمع الكلام..ياخوك الي قتل ابوي مات والله يرحم الجميع..
فهد بصراخ\ما مات ياسعود من يوم رجعت لهم ايرم وفتحت بينا وبينهم باب مودة كذابة.. مامات وحن باقي بينا وبينهم سلام عليكم ومرحبا..
الجد مساعد\ياولدي البنت نصها خوالها ونصها هلها..
تبي تقطع عروقها أنت..؟
فهد بغضب\ إيـــه نقطع عرقهم الي فيها..
رعد بحدة\ اسكـــت يافهد لا تزيد بالكلام عليها.. ولو انت اخوي ما اسمح لك ولا لغيرك ينطق حرف عن ايرم..
البنت ماهجت من عندنا وراحت لخوالها من عدم..فيه سبب لازم نعرفه اول وبعدها نهرج..
الجد مساعد بغضب\ وشهـــو السبب يامساعد ..؟!

وقف مساعد بهدؤ وتقدم للمكان الي واقف فيه جده قريب من فهد وإخوانه.. ومركز نظراته بعيون جده بنظرات تحدي ووعيد..
مساعد ببرود\ تبــي العلم يامساعد ..؟
إللي مالكم فيه شغل مابتعرفونه.. وإن ظنيت أنت وخويك راشد إن جسر رجوعكم هي إيرم.. أو ظن فهد إن ثاره بقطع عروقها..
أو من كان تسول له نفسه إن له في إيرم ظفر واحد.. يكون حافر قبره بنفسه.. أنا بنفسي وصلتها لبيت خوالها..
وأنا اللي باخذها منه وغصب عنها وعن خوالها..

الجد مساعد بحدة\ ما بتقرب من راشد يا مساعد ..
أنا عطيته العهد تبقى ايرم عنده لين ترضى هي وترجع..
مساعد بحدة مشابهه\ عهودك أنت وصاحبك مالي فيها مصلوح..
ولاني بمساعد الأولي أخلي أحد يرسم طريقي أو يقرر مصيري..
ما أحد له حكم علي اليوم..
الجد مساعد بتصميم\ إسمع الحكي واضبط عمرك ياولد..
حتى إن كان رضى ايرم بطلاقها منك.. بتطلقها يامساعد..
صالح ابو مساعد \ يبه اذكر الله وش طلاقه.. مالمساعد عندك قدر وحشيمة وانت تنطقها.. وكانك تقول هربت لا يتم زواجها بمساعد..
مساعد بوعيد\وإللي خلق هالراس وقدر يخط الشيب وجهي إن أخذها من بيته ولو كانت مكفنة.. وأكسر عينها وعين من فكر يتجبر علي .. لا أنت يابو صالح ولا راشد ولا قصور مشيدة بتمنعني عن شيء أنا ابيه.. وإن طابت النفس قطيتها عليكم ..يشهد علي الله ما تبقى السنين الماضية حسرة بقلبي لحالي.. لأذوقكم إياها أنت وهي وجدها راشد .. والله ما تخلوني شماته لمجالس الرجال وقد ذا عمري.. يكفيكم ماخذتوا من عمري..

صد عنهم مساعد خرج من المجلس وهو يسمع اصوات عمامه وابوه يشتمونه على كلامه لأبوهم..

رعد بنظرة عتاب لجده\ عطيت عهدك لراشد.. وأنا عطيتك وجهي مايقرب منه مساعد.. بس وشهو عذرك وانت تطعنه بظهره وبصدره..؟؟ انت تنتقم منه ولا من نفسك فيه.؟

خرج رعد ورى مساعد بعد ما اكد على سعود يحبس فهد لو ما عقل وهدده مايقرب من بيت ابو جابر وهله..

من المؤسف أنك لم تحمنـــي يوماً..
ولــم تحمــي هذا الحب الكبيــر لك ..
من العار أن يقتل الناس بكذباتهم ماكان بيننا..
من المؤلم انك اتبعت الناس .. ونسيــــــتني ...

&&&&&&&&&&&&&&&&&&&&&&&&&

ثمــــــة إهانة في كلمة ..
كيــــف حالك .؟!
عندما تُقال لشخص حزيـــــن ..,

نزلت إيرم عبايتها وعطتها للشغالة تاخذها لغرفتها.. وجلست باستسلام في المكتب المنزلي لجدها راشد..
بعد جدال طويل كان بينها وبينه عن دوامها وشغلها..
من أول ليلة جات لبيت جدها بعد لقائها مع مساعد وهي مرتاحة من الضغط النفسي وتوتر الأعصاب..
بعد مانيمتها قصايد بغرفة أمها غفت ليلتها من كثر مابكت وهي تتذكر حالها بين يدين مساعد وهو يرسم حياتهم بالغصب بعيونها..
صحت على يد جدها راشد وهو يمسح على شعرها ويبوس جبينها..
الجد راشد بحنية\ ياهلا ومرحبا بالغالية بنت الغالية.. نامي يا إيرم وإرتاحي وعزة الله يابنتي ماتنجبرين على شيء وأنا حي..
أنا أنتظرت هذا اليوم لين انقطع الرجاء فيه.. أنتظرت لما تحتاجيني وألبيك..
إيرم بغصة\يبـــه تكفــى ما أبيــه.. ما ابــي أرجع هناك.. مو ألحيــن..
الجد راشد بوعد\ والله ماترجعين إلا برضاك.. وإن مارضيتي فأنا إللي بأخلصك منهم كلهم..

نامت وهو بجنبها يوعدها يحميها يقتل العجز والضعف إللي فيها..
وهو من اول يوم قضته عنده وهو يكيل لها بالاهتمام والمراعاة..
بس اليوم صدمها إنها مجبورة تبقى في البيت وماتطلع دوامها..
بعذر إن أحد من أهلها يمكن يجيها لدوامها وياخذها منه..
هي ماحبت هالشيء..وبنفس الوقت ماتبي ترجع لهلها..
فكرت بيوسف وسديم وإنهم محتاجينها بهالوقت..
فكرت بجدها مساعد إللي ماتعرف من يرعاه ويهتم فيه..

سراب بمرح\قالوا تكفختي اليوم.. مافيه دوام
ايرم تبتسم\وانتي جاهزة للشماته..
سراب\إيـــه من اول يوم جيتي وجدي معطيك حصانة محد يقرب منك ولا يكلمك..واليوم عطاك اللي مايسرك..
ايرم بمحبة\عسى عمره طويل يخاف أحد يجي لشغلي..
سراب بخبث \ عاد أنا مليت راسه عليهم.. وانا الي حذرته من دوامك.. وش يحسبون المساعد ماوراك حد يتوطونك..
ايرم بهدؤ\ أعرف ماني رخيصة على أحد منهم..
ويمكن بكرة اندم إني دخلت جدي راشد وانا ادري إن العائلتين مابينهم صلح..
سراب بجدية\إيرم كل واحد منهم عايش حياته بالطول وبالعرض..
وإنتي الوحيدة من صغرك إللي ضايعة بينهم كلهم..
من حقك لا من اصصصغر حقوقك توافقين اذا تبين تتزوجين او لا.. بأي حق يسلبون هالشيء منك.؟
وبعدها يجي الزوج المحترم ويقولك كل شي بالغصب.. إياك ترضين بشيء بالغصب إياك..
شوفيني أبوي جاء يجبرني على الزواج وش سويت انا رضيت وقلت ابشر طال عمرك..لا ياروحي شليت نفسي ودايركت لجدي راشد ودخلت بوجهه ومن بعدها ابوي سحب علي وتبرئ مني..
من بعد ما علمه جدي إن الله حق..
شوفي ثقتي شوفي قوتي ماحملت نفسي مسئولية احد وقلت بيحتاجوني.. لا تقضين عمرك تحاولين ترضين الكل..
إيرم\ صعـــب يا سراب.. انا ربيت بينهم هالثلاث ايام تفكيري بجدي وبيوسف.. جدي مين اكله وقهواه.. من عطاه علاجه وقاس ضغطه وسكره.. ملابسه من جهزها له وبخرها..
يوسف تعرفين حاله طفل محتاج رعاية..
انا علي مسئوليات مقدر اقفل الباب وأقول خلاص انهي خدماتي ومسئولياتي..
قصايد بتشجيع\ صح ما احد يقدر يقدم استقالة من حياته العائلية.. ولكن لما يبدئون هالاشخاص بالضغط عليك عن طريق محبتك لهم واحترامك لازم تسوين نقطة تحول كبيرة بحياتك..
هنا يصير الوقت تتخذين موقف..وهالموقف يعبر عن رفضك بكلمة كفاية ..
ايرم بعتب\ انا اخذ موقف ضد جدي مساعد..؟
قصايد\ إيــه ضده بسلامته .. إيرم ماني حابة أضيق عليك..
ولكن زواجك من سنتين وبدون علمك ما يعطيك سبب قوي عشان تنتفضين وتقولين هذي حياتي وأنا اقرر..؟
الشخص اللي تزوجتيه ماسمعت عنه الا كل خير لما سالت وراه..
يمكن انتي ماتبينه..ماتشوفينه هو زوجك وراعي بيتك..
ومن جهة ثانية يمكن تبينه وراضية فيه..
بس مهما كان شعورك اتجاه هذا الشخص.. مايمنع حقك في إختياره زوج او لا ..

ايرم تبتسم\ إنتي سألتي عنه ..؟
قصايد بتاكيد\ إيـــه سألت عنه وعن هله.. وأخلاقه ودورت على اي شي ممكن انه يفركش الزواج بس مالقيت..
والى الحين ادور على اي شي غلط عشان نواجهم فيه حن وجدي إذا جاو يبونك..
ايرم تضحك مبسوطة\حبيبتــي انتي الي فكرتي فيني ..

سراب بسخرية\لك ثلاث أيام داجة عن البيت تبحثين ورى بعلها..؟ وينك مخليتني مع تماسيحك مبهذليني هاه..؟
قصايد \ اص ولا كلمة محد مخربهم إلا أنتي فلا تشتكين الحين..
سراب\ شوفيني مرابطة معهم حتى بحديقة الحيوانات الي ورى البيت عشان مايغافلوني ويخرجون برا..
كله من طولة لسانهم ولقافتهم.. لو ما انقذتك هذيك الليلة او كنتي
الحين بين براثن الاسد ..
قصايد بحدة\براثن تنشب في بلعومك.. اللي بيجي يوم ويوديني ورى الشمس.. قومي تجهزي بسرعه باخذك معي..
سراب ببرود\ لو تدفعين الف مارحت مكان جوعانة ومصدعه..
قصايد بخبث\ أحــــــسن لا تروحين إنتي الخسرانه..
بأخذ جوارحي وانزلهم عند ابوهم ..
سراب بصدمة\عند ابوهم..!

وقفت قصايد وسلمت على ايرم وهمست لها\شوفي الحين بيذبحها الفضول.. ارتاحي اليوم وبالليل باطلع معك مشوار مهم..

خرجت من المكتب وسراب تلحقها\هيـــه بنت وقفي وين بتروحون..؟
قصايد تلبس عبايتها\مالك شغل باخذ عيالي ونروح مكان تموتين ماتعرفينه..

خلصت قصايد كلامها بنزول هيثم وقرناس من الدرج يركضون مستعدين يروحون مع امهم..
سراب بشهقة\من جدكم بتروحون وتخلوني..
قرناس بنفخة\وش تبين اهلكتينا ناشبه لنا..
هيثم\سراب فيه قطوتين تحت الدرج الخلفية خلي الشغالة تسبحهم وانتي عطيهم اكل..توني سارقهم..
سراب بقهر\والله ماتروحون وتخلوني..انتظروني شوي بس..

طلعت تركض وقرناس وهيثم سحبوا يد امهم..
قرناس\يمــه اركضي نروح قبل تجي..
هيثم\تكفيــن يمه خل نروح ونخليها..

قصايد ماردت عليهم وجلست على الكنبة تنتظر سراب.. هي اصلا مستحيل تروح لسديم وسراب مو معها..
هي مضطرة تاخذهم لسديم تبيها تشوف عيالها وبنفس الوقت تبي تغير جوها الكئيب.. مع تعبها وفرحتها بانها اجتمعت باختها اغلب وقتها تبكي تفكر في يوسف ..
هاليوسف الي ماحسبت ان سديم بتتعلق فيه كذا..
قرناس يمسك يدها\يمــه إنتي زعلانة مني..؟
قصايد بهدؤ \وش رايك انت واخوك..؟
هيثم بخوف\ والله ماسوينا شي.. القطوتين لقيتهم بالحديقة حقتنا ماطلعت الشارع..
قصايد بحدة\ أنا مو محذرتكم ماتتكلمون مع ناس غريبين..؟
بمزرعة خالي قبل ايام جاء رجال غريب وجلستوا معه..
قرناس\ بس شهو شــرطي..
قصايد بغضب\وإذا شرطي..مو غريب ؟؟
انا مفهمتكم ما تتكلمون مع احد غريب.. وماخذينه للاسطبلات يشوف الخيل ليش؟؟ وش دخله هو تفرجونه بمزرعتكم وتجلسون معه لحالكم..؟
لو بقيتوا مع خالي راشد عادي لان خالي بينتبه عليكم..
هيثم بندم\ هو ولد جدي مساعد يعني صديقنا.. وماصار شي بس سولفنا عن الخيل..
قرناس بعجل\ وهم يمه ترى طلعوا قرايبنا..هو قاله وعندهم ولد اسمه عقاب قال بنصير اصدقاء لما يرجع من السفر..

وقفت قصايد بفزع وعيونها مركزة على وجيهم..
قصايد\وش سالكم عنه..؟ كل شي قلتوه له وقاله لكم علموني وش قال..؟
قرناس\قال ايرم بنتهم وبنتنا..وحن نصير قرايب عشان كذا..
قصايد\يعني قال انتوا قرايب عشان ايرم..؟
هيثم\ايــه .. وقلنا ليش مانشوفكم دام انتوا قرايبنا.. قال بعدين لما يجي ولدهم عقاب..
قرناس يبتسم\شفتي يمه حتى هم عندهم ولد اسمه عقاب ماهو بس حن عندنا عقاب..
قصايد بخوف\ قرناس انتوا قلتوا له هالكلام..؟
قرناس \ لا والله ماقلنا له..بس ضحكنا عشان اسم ولدهم مثل اسمنا..

تنهدت برجفة وهي تضم قرناس لها وحست بهيثم يضمها من الجهة الثانية وهي تحمد الله على الفرص إللي يوهبها لها وينقذها ماتنكشف..كيف أخفيكم ألحين..انتوا وسديم لازم اخبيكم..

&&&&&&&&&&&&&&&&&&&&

ببكاء عميق مازاالت سديم تحتضن هيثم وقرناس..
ياما تمنت تشوفهم على كثر مايكلمونها مع حنين وينتظرونها تجيهم.. كان لقائها معهم صادم جدا لها..
لما سمعت الجرس وممرضتها فتحت الباب تفاجئت بدوخل الولدين الصغار يتسابقون مين يشوفها الاول منهم..
وتسمع سراب تهاوشهم بصوتها العالي بان خالتهم تعبانة لا يوجعونها..
بعد دخولهم المزعج وقفوا قدامها مصدومين لاول مرة يشوفونها..
وغصب عنهم حسوا بالخجل منها لأنها شكلاً غريبة عليهم..
قصايد بمحبة\سلموا على خالة سديم .. رجعت من السفر..

سمعتهم يتهامسون وكل واحد يقول للثاني انت سلم أول..
فضحكت على اشكالهم المستكبرة..
سديم بشوق\ يمــــه قلبي الحلوين.. فديييت عيال أختي..
قرب منها هيثم بمحبة يصافحها\هلا ياحرمة كيفك..؟
سديم تضحك\أنا حـــرمه..؟
قرناس يضمها بقووة\يامرحبــــا وارحبــــي عرفتك خلاص من صوتك..
سديم تضمه وتبوسه بوجهه وعيونه وشعره..
وحست بهيثم يضم نفسه لها وينافس قرناس بضمها..
وضمته مثل اخوه وهي توزع قبلاتها بين الاثنين..
هيثم\اشهد إنك قريبة..
سراب بضحكة\وش رايك هي اطول منكم بشويات..
سديم بضحكة\ياحيوانة انطـــمي ..
قرناس بحب\حتى لو صغيرة نحبك..
سديم\فديـــت إللي يحبوني ..
هيثم\ وحن نحبك أخيراً جيتي ننتظرك من زمان..
قرناس\أمــي ماقالت لنا إنك جيتي..
قصايد \ كيف المفاجاءة..؟
سديم بمحبة\ حبيبـــة قلبي وربي اسعدتيني..
أمس تقولين ماباشوفهم وانهم يتكلمون كثير ويكشفون اسرارنا..

جلست سديم وعيال قصايد حوالينها..بعد ماسلمت على سراب..
قصايد بحيلة\إيــه ماكنت بأجيبهم معي واكيد ما باجيبهم مرة ثانية..
قرناس بصدمة\ليش خالة مابتجي معنا..؟
قصايد\لا مابتجي معنا بتبقى هنا في بيتها..
وانتوا مابتشوفونها مرة ثانية ..
هيثم \ليـــش يمه ماصدقنا تجي من سفرها..
قصايد بحزم\ إنتوا ماصرتوا تحفظون اسرارنا العائلية..
قرناس بزعل\يمــه تكفين لاتزعلين والله ما نتكلم عن شيء ولا نعلم احد.. لا شرطي ولا غيره ..
قصايد\ أكيد بس نروح البيت بتفضحونا عند خالي وايرم.. وبتعلمونهم عن سديم..
قرناس بوعد\ والله مانقول شي..
هيثم\ليـــه جدي مايعرف..؟ وإيرم ليه ماتجي معنا..؟
سراب بحدة\ والله انا قلت لك ياقصايد عيالك ماعادوا كفو مثل اول.. كل شوي يسالون ليه وليه.. ويكشفون اسرارك..
قصايد بزعل\ ادري انهم تغيروا علي..
هيثم برجاء\والله العظيم ماتغيرنا يمه تكفين مابنقول شيء..
قصايد بحزم\ اسمعوني زين هذا سر بينا احنا الخمسة بس..
مابي احد يعرف ان سديم موجودة ولا تتكلمون عنها ولا عن اسمها.. وحتى لو سمعتوا ايرم تتكلم عن وحدة اسمها سديم مو تقولون وحن خالتنا اسمها سديم..
قرناس بعصبية\ خلاص يمه والله فهمنا مابنقول شي لاحد..
سديم برجاء\حبيبي أنتوا.. تبوني اسافر مرة ثانية بعيد..
اذا احد عرف اني معكم بارجع اسافر ولا ارجع..
هيثم بعتب\ توك تجين تبين تروحين..؟ مابنقول لاحد شي خلاص..
سديم \ وانا اصدقكم لانكم رجال وكفو..

وقفت قصايد والتهت بجوالها عنهم وبعد نص ساعة رجعت لهم وهي تبتسم والسعادة مرسومة على وجهها..
سراب بلقافة\يازين الوجه وهو يضحك.. بشري ..
قصايد بابتسامة\ رايــحة الليلة جـــدة ..
كان الرد عليها منهم كلهم \ وأنــــــا بأروح ..
قصايد بضحكة\ لا والله ولا واحد منكم يروح معي..
سراب بعجل\خليهم عند سديم واروح انا وانتي..
هيثم وقرناس\ يمــه تكفين بنروح حن والله مانسوي شيء والله..
سديم بزعل\ لا والله تاخذيني انا صار دوري.. هم دائما يروحون معك..
قصايد برفض\ ولا واحد منكم بيروح.. خصوصا انتوا الثلاثة
اخر مرة فضحتونا .. وهالمرة الموعد غيـــــــر ..
قرناس وهيثم\والله نجلس متادبين ومانسوي شي ولا نتضارب مع احد..
قصايد برفض\ والله ماتروحون مو فاضية اطارد وراكم.. عندي شغل وارتباطات هناك..
سديم\طيب أنا ولا مرة رحت..
قصايد بوعد\ ابشـــــري ياقلبي باخذك بس مو هالمرة.. رجلك تعورك ومحتاجة راحة..
سراب بعدم اهتمام\عادي روحي لحالك وانا باروح لحالي..
خير الله كثير مو بحاجتك تحجزين لي..
قصايد بغمزة\ وبتخلين العيال وسديم وايرم لحالهم..
وجدي يبي له من يأزره اذا العرب هجموا عليه..
سراب بغضب\ يعني ماجات السفرة الا الحين..
قصايد بفرح\يمكـــن أخر مرة ربك كريم..
سديم بتخطيط\متـــى بترجعين ..؟
قصايد بتفكير\ أكثر من اسبوع بأبقى هناك..ويمكن اكثر..
الحين باطلع اخذ اغراضي واروح المطار.. وانتوا ارجعوا مع سراب البيت ومثل ما وصيتكم سديم سر وكل حياتنا سر ماتقولون لاحد شي..

سلمت على سديم وعيالها وهم يتدللون عليها بطلباتهم وتوصياتهم وهي توعدهم باللي تقدر عليه..
قبل تطلع من الشقة اخذت سراب معها بعيد عن سديم وعيالها..
قصايد بتحذير\ انتبــهي من العيال لا يقولون شي لايرم..
ولا تكثرين زياراتك لسديم مرة كل يومين والعيال لا يجون هنا مرة ثانية..
سراب بضيق\مين بيبقى معها هنا ..؟
قصايد\ ممرضتها معها وفيه حارس برا.. سديم بخير الحين انا بقييت معها الايام الماضية وتطمنت عليها..
بس مهووسة بيوسف المريض تقول تبيني اجيبه لها..
سراب بصدمة\أمــا عاد تجيبينه قطوه هو..
قصايد\جننتنــــي..هي تحس بمسئولية اتجاهه..
مابي اتاخر حجزت بعد ثلاث ساعات يالله يمدي اشوف خالي واروح.. لازم اوصيه على سديم وعليكم..
سراب\رووحي خلاص وتطمني.. وطمنيني وش يصير معك..
بتاخذين الحرس معك..؟
قصايد\ لا كلمت اللي بجدة بيكونون بالمطار..
أستودعتكم الله .. عيالي أمانتك إذا صار أي شي عندك رقم المحامي كل شي عنده..
سراب بملل\ أدري نفس التوصيات توكلي بس..
قصايد تبتسم\ ماعندي وقت اراددك بالكلام..

توجهت للمطار بعد ماوادعت خالها راشد واتفقت معه ..
اذا حاولوا المساعد يكلمونه عن ايرم..
مايسمح لعيالها يدخلون عندهم ولا يشوفون رعد او احد من هله..

كانت تبتسم مبسوطة على اللقاء إللي تنتظره من زمان..
وزادت سعادتها لما وصلتها رسالة من صاحب الرقم إللي تواعدت معه بكلمة وحدة ومن حرفيـــن ( تـــــــــم )
وبنفس الوقت يمر في بالها رعــد ..
وش شعورك لما تدري إنك السبب بكل هالشتـــات ..
وسيـــــــعة ذمتك يا رعــد وش بتتحمل ..؟
سنين وطعونك تزيد فيني..
فلا أحد يدري ولاهي تزول بصبري..

فلا أنا مفصح عما أعاني..
ولا وجعـــي على صمتــي يـــزول ..

&&&&&&&&&&&&&&&&&&&&&&

بقهـــــر كسر رعــد جواله لما أدرك بأن جوال سديم موجود بنفس المكان..واكيد مع يوسف.. وهذا أكد له بأن الخبيثة حنين تركت الجوال متعمدة.. ماتترك شي للصدف ..
لازال غير مصدق جرئتها بأخذ سديم بنفس اليوم الي حاولت تخطفها فيه.. وكيف قدرت على يوسف..
يوسف الي ماقدر يقابله الى الان بسبب جده الي منعه مايقرب من يوسف قايل إن حالته بعد خطف زوجته مايسمح لهواش من رعد او غيره..
ولكن غضبه توجه اكثر لاخوانه سعود وفهد..
سعود بضيق\ لا تلومني أنا كنت مشغول بجدي وصاحبه والله كانت بتقوم بينهم بالمزرعة لو مادخلت بينهم..
وبعد مارجعنا البيت بقيت مع جدي لان ايرم تركت البيت وكان تعبان..
فهد بعجل\ وأنا مالي شغل ماقلتوا لي احرسها .. ولا علمتوني إن فيه احد حاول يخطفها من المستشفى..
رعد بغضب\ وبــــس كل واحد يدور عذر لنفسه..
انتوا تدرون اني ماباقدر القى حنين بدون اختها.. تعرفون اني محاصرها ومضيق عليها عيشتها لحتى تنهار وتتكلم..
وبكل سهولة تجي اللعينة وتخطفها..بعد ماتخدر الثور الي معها..

سعود بحدة\ يوسف حاله اشد من حالك..ماهو مصدق كيف قدروا عليه.. لما لزم علي جدي اروح اشوفه بالمستشفى واتطمن عليه وعلى زوجته لقيته نايم بفراشها منوم ومو حاس بالدنيا..
احمد ربك ماقتلوه.. والله طق عقله يوم صحى مالقاها وتذكر انهم شالوها.. قال معها حرس يعني يا اخوي بنت ظافر تخطط لكل خطوة وهي واثقة بقدرتها عليها..

رعد بوعيد\ كنت اقول باصبر لحتى اتخلص من سيف ومصايبه..
وبعدها القاها واخذ ولدي بس الحين.. هي الاولة ..الممصيبة بتقدر تختفي اكثر بما ان سديم معها.. مابتظهر نفسها..ولا بتغلط..
كنت باسحبها بسديم..بس الحين وين القاها وييين..؟!

سعود بعصبية\ أنت مارضيت بالتحقيق.. وحتى يوسف مابيرضى بالتحقيق..ولما اتذكر كلامها عن سيف اتراجع عن جعل الموضوع رسمي بالمركز.. لا انتوا صاحين ولا هي..

فهد بقهر\ الحين مدري من ابي اكفخ اكثر بنت ظافر ولا ايرم..
انا قهري من ايرم وجدها نساني سالفة ولدك..
رعد بحدة\ إياك تقرب من ايرم او خوالها..
بالموت مسكت مساعد لا يروح لهم .. بعد ماوعدته ناخذها بيومين.. وادري مامسكه وعدي..وهو ناوي هالمرة كل شي يمشي برايه هو..
فهد بعصبيه\مدري وش مصبركم والله احس ان ثيابي كاتمه على انفاسي..كل ما اتخيل بس ان جدها ماخذها عناد فينا..
سعود بهدؤ\ جدها ماهو طفل عشان يكون تفكيره عناد و استفزاز..هو رجال كبير وعاقل ومشابه لجدي مساعد..
وقراره بمنع ايرم ماترجع لهلها ..لانه يفكر فيها وفي مصلحتها..

فهد بعناد\ حن أكثر الناس اهتمام فيها وفي مصلحتها..
لايسوي نفسه الحامي لها .. ماله شغل فيها هي بنتنـــا..

رعــد بحدة\وليـــه هربت له إيرم..؟ إسال نفسك ليه أحتمت فيه منا ومن جدي مساعد..؟ هي اللي راحت لبيته ودخلت بوجهه..
هو ماجاء لبيتنا وأخذها بالغصب..

فهد بقهر\لا ما باسال نفسي..
باسالها هي لما ترجع..ليه تهينا بذا الشكل..مع عدونا وقاتل ابونا ليــــه..؟!

سعود\انت ماتفهـــم الي قتل ابونا مات وشبع موت.. انت مابترتاح لين تقتل لك انسان وتقول انتقمت لابوي..
الحمدلله انك كنت بزر بوقتها او كنت بتجيب لنا المصايب..

رعد\إعقل يافهد..يشهد الله إنها اتحاذف علي من كل جهة .. مو بناقص افكر فيك وفي جنونك..
فهد بغضب\ يعنــي عاجبك انها معهم ضدنا..؟
رعـد بصراخ مقهور\لا ماهو بعاجبنــي..ولاني براضي بكل الكلام الي قاله جدك..
ولا براضي بعهده له.. بس موضوع ايرم بسيط مقابل حنين وولدي.. ايرم في بيت جدها في امان وبخير.. بس ولدي انا وينه..؟ وش المصايب الي مخبيتها المجنونة ومتورطة فيها..

قبل يتكلم فهد وقبل يزيد من غضبه وغضب اخوانه كثر..
رفع جواله يبي يقفله بسبب الازعاج الي يوصله منه..
بس لما قرأ الاسم المتصل..
تغيـــرت كل ملامحه غاب كل الغضب والعصبية والانفعال..
وارتسمت ابتسامــة كبيرة ساهمت في زيادة وسامته الرجولية..
فهد بحب\ لبيــــه..........والله إني صادق....

سعود بصدمة يكلم رعد\سبحان مغير الأحوال..
بالله تصدق هذا نفس الشخص اللي يصارخ قبل شوي..

رعد باستغراب\ مـــن إللي قلب حاله كذا.؟!
سعود\ من يكون..ما اقول الا الله يسعده..

فهد قفل جواله بعد مارد برساله..
وناظر باخوانه المصدومين من ابتسامته الصادقة وسعادته بالرسالة الي وصلته ..
فهد بابتسامة\توصـــون على شيء..عندي سفرة مفاجئة..
سعود\ ويـــن العزم..؟
فهد ببساطة\ جـــــــدة ..
رعد بجدية\ ومن الي لك بجدة يسعدك شوفه وتنتظر مواعيدك معه دايم..
فهد بولـــه \ الحــــــــــــب عســــاني فداها والله ..

&&&&&&&&&&&&&&&&&&&&&&&&

علميـــني ..
مبسمــك ليه دايــم حزيــن..؟
ليه لا ضحكنا إنتي ســاهية..
إضحـــكي..
وخلي اللي فات مع الأولين..
لا البكاء يفيد ولا الدمــوع صالحة..

سراب بمرح\والله إني كفـــو..
الجد راشد\ من زمـــان وانتي كفو.. بس وش علمك الليلة..
سراب\ يبــه واحد من اللي متفقة معهم على مشروع..
وقع العقد أبشرك وارسلي نسخة منه.. عز الله اللي بينجلط لما يكتشف وش مخبيه له..
الجد راشد\يابنتـــي بيجي يوم وتطيحين بشر أفعالك..
سراب\ لا تطمن الله معي..
قرناس\ شغلك يجيب فلوس..؟
سراب بغباء\ لا يجيب مسلخ اسلخ فيه ناقتك وبنتها..
هيثم بحدة\أنا ابن ابوي تهددين ناقة اخوي..؟
قرناس ببرود\ خلك منها يالخوي..هذي أقصاها كلام بدون فعل..
سراب بضحكة\اتحداك ياقرناس لو ابي ادخل بسوق المزايين ( الإبل ) إن أفوز وأبيع كل ناقة بخمسة مليون ..
قرناس \ تخسين.. ماهو كل من هب ودب يعرف للابل..
سراب\أنا باكون المالكة وانت بتكون الراعي حق نياقي وبعاريني..
هيثم\بعارين ترافسك اخوي راعي عندك..؟
سراب \ أيــه وانت معه تسوق الوايت وسيارة الشعير..

بدون كلام ثاني هجم قرناس وهيثم على سراب الي تعرف كيف ترفع ضغطهم وتحارشهم..

كانت سراب تنادي ايرم وجدها راشد يفكونها منهم..
بس جدها رد عليها وهو يضحك\قلت لك يابوك اذا منتي بقد الشي فلا تقولينه..
سراب وقرناس مكتف يدينها\يبـــه أهايط مثلهم..

ألتفت جدها على ايرم اللي كانت تناظرهم بشبه ابتسامة ميته..
وكأنها مو معهم ولا تشوفهم..
جلوسها معهم مجرد مجاملة ..
قلبها مع جدها مساعد..
ماهو معك ياراشد..
تفكر فيه وتقلق عليه..
وأنت قدامها ولا تشوفك..

وقف من مكانه وجلس جنبها..وهي رفعت نظراتها له وابتسمت بمحبة..
باسها على راسها واحتضنها وهو يفكر كيف بس يرضيها..

قبل يتكلم جاه اتصال على جواله..برقم غريب عليه..
ابو جابر\ يامـــرحبا .. من معــي..
..........\ اخـــرج وتعرف من معك.. انا بمجلسك..

&&&&&&&&&&&&&&&&&&&&&&&

وهجــرته كي أستريح من العنا ..
فوجدتـــه في غربتي وغيابي ..

ما أقدر اعيش بدونه.. فرحانة بأختي وعيالها وسراب وخالي راشد.. بس مقدر بدونه..خايفة عليه لازم اتطمن عليه.. ما احد يحبه منهم ما احد يهتم فيه..
بخطوات غير ثابته وصلت لأعلى الدرج وهي تحمد الله على هدؤ المكان مثل ماتعودت عليه..كانت خايفة لا تقابل ايرم او الشايب مساعد..
ولكن الوقت متاخر واكيد كلهم نايمين.. ما احد بيحس عليها..
قفلت جوالها لما اهتز بيدها.. كان الحارس العنيد الي مخليته حنين يحرسها برا شقتها ولا درت عنه..
ولزم هو ياخذها لمشوارها بهالليل.. واخذت معها ممرضتها..
بعد ماكذبت عليهم وقالت هذا بيتها ومحتاجة اغراض لها منه..
وواضح لها ان الحارس مو مصدقها بس يماشيها..

توجهت لغرفة يوسف على امل تلقاه فيها..بس ماكان موجود..
سديم بقهر\أوف أكيــد عند ايرم.. هئ ياقلبي نسيت ان ايرم عند خوالها..يعني طفلي لحاله..
بخطوات سريعه راحت لغرفة ايرم بس بعد ماكان موجود..
معقولة نام عند ابوه..؟كيف اقدر القاه الحين..؟
قبل تتوجه للدرج عشان تنزل التفتت لغرفتها الي كانت تنام فيها ولاحظت النور البسيط الخافت فيها..
ابتسمت وهي متاكدة بتلقاه هناك..
فتحت الباب بحذر خايفة مايكون يوسف الي بالغرفة..
بس صدقت ظنونها المحبة له لما شافته جالس على الكنبة وساند ظهره عليها وراسه مايل لفوق وكانه يناظر السقف او يمكن نايم..
قربت منه وهي تشوف الشموع الي سوتها معه كلها على الطاولة تضيء المكان.. ورائحة عطره الي استخدمته على الشموع كانت منتشرة بالجو..
حيوان خرب كل الشموع!! أنا أوريك..

بصوت خافت نادته ماتبي تخوفه..بس مارد عليها فقربت منه اكثر وهي تناديه مرة ثانية.. وقربت لحتى صارت يدها على كتفه..
هزته بخفة وهي تناظر عوارضه الي صارت اكثف من قبل..
وهالشي زعلها لانها ادركت ان ما احد يهتم فيه.. حتى لما راحت عنه ايرم.. وانتبهت على البدلة العسكرية الي كان لابسها..
ياعمري ياما قالي بالبسها تشوفين اني لما اكبر اصير عسكري بالجيش والبس بدلة الجيش.. لابسها وجالس لحاله ومشغل شموعنا حقت مشروعنا.. يحسبني نسيته حبيبي..
سديم بمحبة\يـــوسف حبيبي قوم..جيت أخذك معي نهرب..
يــــوسف..

فز من جلسته بقوة ومسكها بحركة سريعة منه صارت متسطحة على الكنبة وهو مثبتها..
غصب عنها خافت..
لأن إللي يناظرها مو يوسف..الطفل البريء الي تحبه..
تردد في بالها هذا يوسف بس مو يوسف.. يمكن خاف مني لان صحيته من النوم..بيرجع يوسف الي اعرفه ايه بيرجع..
سديم بهلع\ يـــوسف جيت اخذك..

بخوف عظيم بدت سديم ترجف وعيون يوسف تحرقها بالغضب..
وبنظرات مخيـــفة...
سديم تبكي\يــ...يوسف أنــا ماقدرت أخليك.. جيت أخذك..
يمــــــه ..يوووسف انت تخوفني وش فيك..
مدت كفها بخوف تمررها على خده وهي تتكلم وتبكي..
والله جيت أخذك كنت خايفة عليك.. ماقدرت بدونك ماقدرت..
صرخت صرخة مرعوبة لما كتمها يوسف بشفايفه وهو يقبلها بعنف أدمى شفايفها..

كونـوا بخير...

إلى الملتقـــى باذن الله ..
صدووود..